O'o! O'o!

1 Cine zinariya lambai cece va̱ yi,

cine zinariya can vadalai wo o'woi da̱n!

Atali o Uba̱ta̱ wa Akiza

ubazu lakatala e re gbain suru.

2 Cine ulobonu u muwun ma̱ Sihiyona n da̱na̱i,

aza a na ulobonu u le u shi tsa zinariya,

gogo a tara le ta̱ tso mpondo mo olo'o,

ulinga we ekere wu ma'in!

3 Ko musa̱n mu una n tsa apato ta̱ maani

a kungwato muwun n le,

amma ama a̱ va̱ o o'wo ta̱ no okolo e iwuya

tsa azamina a̱ a̱tsumona.

4 Elentsu e mereɓu a ta kaɓusa

a gan vu una̱ va̱ yi adama a akuli.

Muwun n ta patishi ilyalya,

agba ko za ca le shi.

5 Ele na a̱ shi a lyuwusa ilyalya yu uyo'o,

ele ɗa nda o sowuso a̱tsuma̱lima̱ e re.

Aza a na a kungwatoi ni itana i san da̱n da̱n*,

gogo ele ɗa nda nden a aganga o okomo.

6 Oforo a ama a̱ va̱

a la'a ta̱ za va̱ Sodom,

za na a̱ mula̱i mantsa wa'a,

babu za na zuwai ukere u na waa kamba yi.

7 Azagbain a̱ yi a̱ shi ta̱ a la'a atayan cece

waru a la'a ta̱ maani u'uri.

Lipu le waru la'a ta̱ atali a̱ shili e ikebe,

o rotso ta̱ atali a safaya.

8 Agba gogo a la'a ta̱ upondo ulima̱,

a gura reve ne ele e re shi.

Ukwan u lipu le u kaɓa ta̱ e etele e le,

wo o'wo ta̱ u'yewu tsa aaɗanga.

9 Aza a na o unai na̱ matsun me pe'eni

a la'a ta̱ aza a na a̱ kuwa̱i na ambulu.

A ramba ta̱ na ambulu

o ulambu wi ilyalya diga a̱ a̱ɗuma̱.

10 Ekere a̱ a̱ma̱ci a na a̱ shi e tse ene iliyali

a su'wan ta̱ muwun n le,

a̱vu o o'wo le ilyalya

a mantsa ma na o kototosu ama a̱ va̱.

11 A̱sulazuva a̱ ba̱ɗa̱ ta̱ upan wa̱ yi,

u tsun ta̱ upan wu usuɗuwu wa̱ yi.

U daɓa ta̱ akina a̱tsuma̱ a̱ Sihiyona

a na o soɗuyi ikyun ya̱ yi.

12 Ngono mu uvaɗi n usu shi,

ko ama a na a̱ ri nden o uvaɗi,

a tara a na aza a na a̱ ri a̱ nla̱ngi ko n'yuwatan

maa gura uwa a̱tsuma̱ a̱ na̱ntsu va̱ Urishelima shi.

13 Agba u fara ta̱ adama a̱ nusu va ama̱sula̱ a̱ yi

ni iwuya i nan ganu a̱ yi,

aza a na o ocoi mpasa

ma̱ a̱za̱ a̱ a̱ɓula̱ a̱tsuma̱ a̱ yi.

14 A̱ da̱na̱ ta̱ e ipapuru a̱tsuma̱ e re

tsa̱ nrumba̱,

a̱ lungusa̱ ta̱ aciyele na̱ mpasa,

hali na ko za aa gura ju'wa̱n a̱tugu e le shi.

15 Ama a saala le ta̱, <<Tawai pe ure! Tawai pe ure!

I ta̱ idaba!

She i ju'wa̱n tsu wan!>>

Ɗaɗa a sumai reve o o'wo aza a agara,

ama a nɗa a dansa,

<<Ee isawan pa oɓolo na̱ a̱tsu shi.>>

16 A̱sulazuva na aciya̱yi a ɗa e bete'we nle,

waru u buwa a̱ da̱shi idana le shi.

A buwa a tarasa nan ganu ili ya̱ a̱ɓula̱ shi,

waru a buwa a casu mbara tsugbain shi.

17 Waru esu a̱ tsu a̱ kuna̱ ta̱,

a̱ a̱ka̱nla̱ e ikambi i pere.

Tsu zuwa ta̱ esu e izami yi iɗa

i na yaa wawa tsu shi.

18 Ama a̱ kuru ta̱ ana a̱ tsu uba̱ta̱ biti,

adama o ndolo tsu gura wala a̱tsuma̱ e re gbain tsu shi.

Ukosu u tsu u shi ta̱ u rawa zuzu, rana tsu shi ta̱ ukecu,

adama a na ukosu u tsu u shi ta̱ u rawa.

19 Aza a na aa saɓusa tsu

a la'a ta̱ a̱kuru ilaɗi,

a̱ gba̱ra̱ tsu ta̱ a nsasan,

reve a vawan tsu a̱tsumona.

20 Za na A̱sulazuva a ɗangwai wivuwun u wuma u tsu,

e reme yi ta̱ a maza me ele.

Tsu da̱na̱ ta̱ a majiyan a̱tsuma̱ o ululu wa̱ yi u ɗa

tsa̱a̱ da̱nu oɓolo na̱ nɗa n ro.

21 Yuwan ma̱za̱nga̱ vu yuwan mere, a̱ɗu ama a̱ Edom,

a̱ɗu na i ri na̱ nden e iɗa ya Uz.

Amma a̱vu fo a ta ca wu a̱tsuma̱lima̱ vu sowo,

vu to o'wo usowu hali vo o'wo ataɓu.

22 A̱vu Sihiyona, oforo a̱ wu o to koto,

wa̱a̱ da̱shi lyawa wu vu jima a̱tsuma̱ a tsugbashi shi.

Amma a̱vu Edom, u ta ca unusu wa̱ wu oforo,

a̱vu u pa̱lu'wa̱ iwuya ya̱ wu.