1 O'o! O'o!

A̱vu lyuci na shi tapu na ama,

gogo vo o'wo ta̱ babu vuma.

A̱vu na vu shi egbere a̱tsuma̱ a nɗa

gogo vo o'wo ta̱ a̱ nde'en tsa̱ ma̱runa̱.

A̱vu na vu shi egbere e ilyuci vu pasu tsugono suru,

gogo vo o'wo ta̱ aagbashi.

2 Na ayin u tsu shosun ta̱ lon,

aɓara a̱ yi oo ocusho a agbaguzu a̱ yi.

A̱tsuma̱ a aza a na a ciga niyi suru

ko za lo na aa ca yi adanshi shi.

N'utsa̱ ma̱ yi suru n wina yi ta̱

reve o o'wo n'yuwatan ma̱ yi.

3 A̱ pura̱ ta̱ Yahuda a̱ ka̱ra̱,

a̱tsuma̱ e iɓongi na̱ tsugbashi tsa̱ a̱tsuma̱lima̱.

U ta̱ nden a̱tsuma̱ a nɗa mo omocin

agba u ri nu uba̱ta̱ u wivuwun shi.

Aza a na aa saɓusa yi suru a cina yi ta̱

e memere ma̱ a̱tsuma̱lima̱ ma̱ yi

agba u ri nu ula'atan shi.

4 Re va̱ Sihiyona kima̱ ta̱,

adama a na ko vuma ta̱wa̱

uba̱ta̱ wa̱ a̱buki a̱ yi a na a zuwai shi.

Na̱ntsu va̱ yi suru vo o'wo ta̱ lya̱nga̱,

nan ganu a̱yi suru e te i'wan.

Esheli a̱ yi suru e te mesun,

a̱yi aciya̱yi u ta̱ a̱tsuma̱ a̱tsuma̱lima̱ lon.

5 N'yuwatan ma̱ yi mo o'wo ta̱ azagbain a̱ yi,✝

reve waru n'yuwatan ma̱ yi n lyuwa elime,

adama a na A̱sulazuva a ca ta̱ Urishelima oforo

adama a̱ a̱bunda̱ a̱ nusu va̱ yi.

N'yuwatan n reme ta̱ muwun ma̱ yi

reve a̱ pura̱ le a̱ tyo tsugbashi.

6 Ulobonu wa̱ Sihiyona suru

wu kasa ta̱ na̱ a̱yi.

Ngono ma̱ yi suru o rotso ta̱ nre'on ma ambulu

adama a na a̱ tsura̱i uba̱ta̱ wa alyuna shi.

A̱ ri nu ucira u na aa sumaa

aza a na aa saɓusa le shi.

7 A rana va̱ a̱tsuma̱lima̱ a̱ yi na agara a̱ yi,

Urishelima cuwan ta̱ na̱ wuma wa̱a̱ yi

ni itana yi ikebe ya̱ yi yu ufaru.

Agba gogo u riya̱ ta̱ e ekere a n'yuwatan ma̱ yi,

waru babu za na aa kamba yi.

N'yuwatan ma̱ yi n zo'oso yi ta̱,

a̱vu a yuwaan yi ulamu o ukototosu wa̱ yi.

8 Urishelima yuwan ta̱ unusu lon,

reve gba wo o'wo idaba.

Aza a na suru a̱ shi a ca niyi tsugbain

aa tarasa yi ili i ro waru shi,

adama a na e ene ta̱ ataɓu a̱ yi.

A̱yi na aciya̱yi

u te i'wan na̱ mapala mo urewesu wa̱ yi.

9 Idaba ya̱ yi i roco ta̱ a̱ nkuru ma̱ yi,

u yuwan majiyan cine wuma wa̱a̱ da̱na̱ elime shi.

Adama o ndolo uriyu wa̱ yi u wuyana ta̱ lon,

babu za na aa ca yi adanshi.

Reve u damma, <<A̱sulazuva, ka̱lyuwa̱ a̱tsuma̱lima̱ a̱ va̱,

adama a na ma'yuwatan ma lyuwa ta̱ aci.>>

10 Ma'yuwatan ma̱ pura̱ ta̱

itana yi ikebe ya̱ yi suru.

Urishelima ene ta̱ ma'yuwatan ma̱ yi

a uwusa a̱ A̱a̱'isa̱ a̱ yi,

aza a na vu putsayi she a uwa

a̱tsuma̱ e iɓolo ya ama a̱ wu wan.

11 Ama a̱ yi suru a̱ te i'wan

e izami yi ilyalya.

A wina ta̱ itana yi ikebe i na a̱ ri ne ele suru

adama a̱ tsura̱ ilyalya na a̱ da̱na̱ wuma.

Reve Urishelima damma, <<A̱sulazuva, ka̱lyuwa̱ ve ene

cine a tara numu ili shi.>>

12 <<U ɓa̱la̱ ɗu shi, a̱ɗu na ya̱a̱ ka̱ra̱sa̱?

Ka̱lyuwa̱i yee ene.

A̱tsuma̱lima̱ o ro o ta̱ lo tsa za va̱,

za na a fabaa numu

za na A̱sulazuva a̱ ta̱wa̱a̱ numu

o urana wu upan wu usuɗuwu wa̱ yi?

13 <<U lyungu ta̱ akina diga zuva,

za na uwai she e etele a̱ va̱.

Wa azuwaa ta̱ ana a̱ va̱ igolo,

a̱vu u rono mu a̱ ka̱mba̱ a̱ca̱pa̱.

U lyawa mu ta̱ a̱ nde'en,

ulimu urana ma̱ɓula̱.

14 <<Wu nla̱ ta̱ unusu u va̱ tsa̱ a̱a̱gba̱la̱,

nu ukere wa̱ yi u ɗa u ɓoloto nle.

A zuwa le ta̱ a̱ yinlu i va̱

a̱vu u zuwa ucira u va̱ u ga̱sa̱.

U zuwa mu ta̱ e ekere a aza a na

maa gura isawan a̱ ma̱ka̱ka̱n me le shi.

15 <<A̱sulazuva a 'yuwan ta̱

ama a̱ va̱ a na a gurai uvon suru,

a̱vu u zuwa oɓolo a̱ a̱soja nla̱ngi na̱ a̱mu

adama a̱ rukutsa̱ olobo a̱ va̱.

A̱sulazuva a dasa ta̱ ama a Yahuda

uba̱ta̱ u mokpoko ma masayan ma̱ yi.

16 <<Adama e ili i nda i ɗa n ri e mesun,

aɓara oo ocusho e esu a̱ va̱.

Ko za lo zuzu na waa ca mu adanshi shi,

za lo na waa jisan ruhu va̱ shi.

Muwun n va̱ mo o'wo ta̱ uvariyi

adama a na ma'yuwatan ma lyuwa ta̱ aci e le.>>

17 Sihiyona buba̱ruwa̱ ta̱ ekere a̱ yi,

agba za lo na aa ca yi adanshi shi.

A̱sulazuva a ca ta̱ udammu a aci a Yakubu

na nron mu nden yi ma̱ moo o'wo n'yuwatan ma̱ yi.

Urishelima o'wo ta̱

ili yi idaba uba̱ta̱ u le.

18 Reve u damma, <<A̱sulazuva a yuwan ta̱ mejege,

adama a na n 'ya̱sa̱a̱n ta̱ adanshi a̱ yi aci.

Poloi atsuvu a̱ɗu ama suru,

yee ene a̱tsuma̱lima̱ a̱ va̱.

Esheli a̱ va̱ no olobo a̱ va̱

a tara le ta̱ a̱ 'ya̱wa̱ tsugbashi.

19 <<N ɗe ta̱ nɗa n na n ciga numu,

agba a̱vu a̱ luluma̱ mu.

Nan ganu a̱ va̱ na̱ mbara n va̱

ele e izami yi ilyalya

adama a̱ da̱na̱ wuma

ɗaɗa a̱ kuwa̱i a̱tsuma̱ a̱ lyuci'i.

20 <<A̱sulazuva, ka̱lyuwa̱ cine n ri a̱tsuma̱lima̱!

N ta̱ oo sowuso a̱tsuma̱lima̱ lon,

okolo a̱ va̱ waru e te meje'en,

adama a na n 'ya̱sa̱a̱n wu ta̱ aci.

A alanga matsun me pe'eni ma̱ to unusa,

a̱tsuma̱ a 'wa waru ukwa̱ u ɗa nda.

21 <<Ama a uwwa ta̱ i'wan i va̱,

agba ko za lo na waa caa mu adanshi shi.

N'yuwatan n va̱ suru mu uwwa ta̱ aɗa a̱ a̱tsuma̱lima̱ a̱ va̱,

a̱ za̱nga̱na̱ ta̱ ni ili i na vu yuwaan numu.

Ta̱wa̱a̱ nu urana u na vu yuwain adanshi a̱ yi

adama o o'wo tsa̱ va̱.

22 <<Lyawa iwuya i le suru i rawa uba̱ta̱ wa̱ wu,

vu yuwan ne ele

cine vu yuwain na̱ a̱mu

adama a̱ a̱bunda̱ a̱ nusu va̱ suru.

I'wan i va̱ i yuwan ta̱ a̱bunda̱,

waru okolo a̱ va̱ a kuɗa ta̱.>>