1 Zedekiya da̱na̱ ta̱ na̱ aa'wan ushin na̱ za ta̱ a mantsa ma na u temei tsugono. U yuwan ta̱ tsugono a̱tsuma̱ a̱ Urishelima a'wan kupa na̱ za ta̱. Aala mma va̱ yi ɗa Hamuta usheli u vuma ro na a tsu ɗe Irimiya vuma va Libina. 2 U yuwan ta̱ iwuya elime a̱ A̱sulazuva, ununa mogono Jehoyakim yuwain. 3 Na amayun Urishelima na̱ Yahuda a zuwa ta̱ A̱sulazuva a yuwan upan, hali u tawa le diga a̱ ma̱ka̱nka̱ ma̱ yi.

Zedekiya gba 'ya̱sa̱a̱n ta̱ mogono ma Babila a aci. 4 A̱tsuma̱ a aa'wan a̱ kucci o tsugono tso o mogono Zedekiya, o urana wa kupa o woto wa kupa, a̱vu Nebukanaza mogono ma Babila ta̱wa̱ na̱ a̱soja a̱ yi suru adama a na a yuwan uvon a̱tsuma̱ a̱ Urishelima. A̱vu u uka̱nda̱ruwa̱ lyuci'i nu uvon, a̱vu a suwa ukari a̱ ka̱nda̱ruwa̱ adama o uvon. 5 Lyuci'i u da̱na̱ ta̱ uka̱nda̱ruwu na̱ a̱ a̱soja o uvon, hali acina a'wan kupa na̱ za ta̱ o tsugono tso mogono Zedekiya.

6 O urana wa̱ kucci o woto wa̱ na̱shi, a mantsa ma na ambulu a yuwain a̱bunda̱ lon a̱tsuma̱ a̱ lyuci'i, hali na babu ilyalya i na a ama a lyuwa, 7 reve a̱ ba̱ma̱ uɓaɓu u lyuci'i. Reve a̱ a̱soja'a a suma o uta̱ diga a̱ lyuci'i na ayin. Reve o toni nu una̱ntsu u na u ri e memmere ma ɓaɓu re, za na ri zuzu na̱ a̱a̱rumbu o mogono, ko na wo o'woi a̱ a̱soja a Babila a̱ da̱na̱i uka̱nda̱ruwu na̱ lyuci'i. Reve a suma a saɓa Uka̱ri wa̱ Araba. 8 Amma a̱vu a̱ a̱soja a Babila o toni mogono Zedekiya, a̱vu e reme yi a agalaci a̱ Jeriko. A̱vu a̱ a̱soja a Zedekiya suru a kasa na̱ yi, e bete'we a lyawa yi. 9 Ana e remei Zedekiya'a, a̱vu a tara yi a̱ tyo uba̱ta̱ u mogono Nebukanaza va Babila a̱ lyuci va̱ Ribla wa Hamat. Uba̱ta̱ u na a paɗa niyi ugana. 10 A̱vu mogono Nebukanaza va Babila zuwa o una muwun ma ali ma̱ Zedekiya esu a̱ yi. Reve fo u zuwa o una azagbain a Yahuda suru a̱ lyuci va Ribla. 11 Reve Mogono Nebukanaza fufoɗo esu o mogono Zedekiya, a̱vu wunla̱ yi na akani a̱ rumushili, a̱vu u ka̱ra̱ na̱ yi a̱ tyo Babila, uba̱ta̱ u na u zuwa niyi o u'wa wa ali, hali acina uranu u na Zedekiya'a u kuwa̱i.

12 A̱tsuma̱ o urana wa kupa o woto wa tawun wa aa'wan a kupa na̱ kucci o tsugono tso mogono Nebukanaza va Babila, reve Nebuzarada zagbain va̱ a̱za̱ e ipiri yu u'wa u mogono ma̱ ta̱wa̱ Urishelima. 13 Ana u uwwai a̱tsuma̱ a̱ lyuci'i, a̱vu Nebuzarada kula̱to u'wa wa̱ A̱sulazuva nu u'wa u mogono, oɓolo na̱ 'wa va azagbain a̱ Urishelima. 14 Reve akapi a̱ a̱soja a Babila a na a̱ da̱na̱i oɓolo na̱ yi suru o ɓoso kari va̱ Urishelima. 15 A̱vu Nebuzarada pura̱ akapi a ama a̱ Urishelima na a buwai a̱ tyo nden tsugbashi, oɓolo na alambi o ro, oɓolo na̱ a̱za̱ o ro a na a sumai a cayi aciyele e ekere a̱ yi, oɓolo no ozo o ulinga wu ukere o ro aza a na a buwai a̱tsuma̱ a̱ lyuci'i, u tara le ta̱ suru a̱ tyo nden n tsugbashi uba̱ta̱ u mogono ma Babila. 16 Amma Nebuzarada lyawa ta̱ pe ozo o ro a na a la'ai ulambu a̱tsuma̱ a̱ lyuci'i adama a yuwan ulinga a̱tsuma̱ o uɗuma̱ u ina̱bi na akapi a̱ ɗuma̱.

17 A̱vu a̱ a̱soja a Babila o ɓuɓoso atsura e irumushili na ri pe a̱tsuma̱ o u'wa wa̱ A̱sulazuva, oɓolo na̱ wisawatan na ri pe a̱tsuma̱ o u'wa'a, na̱ a̱a̱ba̱jini o ura'atsu wu rumushili a na a̱ tsu ɗe Mala. Reve a̱ a̱soja'a a̱ pura̱ le a̱ tyo Babila. 18 Reve fo a̱ pura̱ mpondo, na akana a na a tsu paɗa a̱punda̱ a fitila, ni ili i mekene ma akina, na akwanu a gbagbain, na akwanu, na̱ cu'un vi itana yi rumushili biti aza a na nan ganu a tsu yuwusan ulinga ne le adama o ulinga wa̱ A̱a̱'isa̱mapaɗa a̱ A̱sulazuva. 19 A̱vu fo a̱ da̱shi pura̱, asa'atsu a gbagbain, na akwanu a̱ ma̱pura̱ ma akinkina a akina, na akwanu e keke'en na̱ mpondo, na aɗanga na a̱ tsu guza̱ ifitila, na akwanu e irumu, na̱ mukkoto biti, na̱ cu'un vi ili i na a yuwain biti na̱ zinariya can ko azurufa can. 20 Ume wu rumushili na mogono Sulemanu yuwayin ulinga na̱ yi adama a ruma ili i nda'a a̱ A̱a̱'isa̱mapaɗa a̱ A̱sulazuva a la'a ta̱ ucira u na a̱ kunzu le, ele atsura e re o ndolo na̱ a̱ba̱jini akwanu a na e ɗesu Mala, no ogono e inan kupa ne ejere na ri za̱la̱ Mala'a, ni ili i mishin i na a tsu tawa. 21 Atsura biti udasuwu ushin na̱ a̱za̱ cindere ɗa, waru washin wa̱ yi u rawa ta̱ udasuwu kupa na̱ kunla̱ wu za ta̱ suru. Za ta̱ le suru ta̱ na̱ wungu pe, waru ugba̱mu u lipu u le u rawa ta̱ washin wa akatsu a̱ na̱shi. 22 Zuva va atsura biti a yuwaan yi ta̱ aci a̱ rumushili, aci biti mishin ma̱ yi udasuwu u cindere ɗa na akapi, waru u ta̱ ni yiɗanishi, yi ili i yinlu wi iroci yu ɗanga muwun m peme uka̱nda̱ruwu na aci biti, waru a̱za̱ a̱ rumushili ɗa suru. 23 A̱ da̱na̱ ta̱ na̱ ɗanga muwun m peme ukpaku kupa kucci na̱ a̱za̱ a̱ ta̱li uka̱nda̱ruwu na akwanu atsura'a. Ɗanga muwun m peme na ri suru zuva yironishi yi ili i yinlu'u ukpaku (100) u ɗa.

24 Yali ya̱ a̱za̱ e ipiri yu u'wa u mogono ma Babila u tara ta̱ Seraya zagbain nan ganu na̱ Zafaniya za na o to yi, oɓolo na̱ ama a ta'atsu a aza a na a yuwusan ipiri yu una̱ntsutsu wa̱ A̱a̱'isamapaɗa a̱ A̱sulazuva. 25 A̱tsuma̱ a̱ lyuci'i u tara ta̱ yali ya̱ a̱soja ro, na ama e cindere aza a na a casu mogono a̱sa̱la̱, aza a na a cina nle a̱tsuma̱ a̱ lyuci'i. Reve fo u tara za vi iɗana na tsu ɓolotosu nan soja a̱ lyuci'i, na ama gbagbain kupota̱li na a cinai pe a̱tsuma̱ a̱ lyuci'i. 26 Nebuzarada pura̱ ta̱ a ama a nda suru u ta̱wa̱ na̱ le uba̱ta̱ u mogono ma Babila a Ribla. 27 A̱vu mogono ma Babila mo una le a̱tsuma̱ o upasu wa̱ Ribla wi iɗa ya Hamat. Ne ɗa o uta̱yi a ama a Yahuda a̱ tyo tsugbashi diga e iɗa i le.

28 Apa a̱bunda̱ ama a na Nebukanaza remei a̱ tyo tsugbashi. A̱tsuma̱ aa'wan cindere o tsugono tsa̱ yi, u pura̱ ta̱ aza a Yahuda ukpaku kupa uta'atsu nu ushin na aza ta'atsu (3,023). 29 A̱tsuma̱ a aa'wan kupa na̱ kula̱ o tsugono tsa̱ yi, u pura̱ ta̱ a ama ukpaku kupa na̱ mata'atsu ne ejere (832) diga a̱ Urishelima. 30 A̱tsuma̱ a aa'wan ushin na aza a ta'atsu o tsugono tsa Nebukanaza, Nebuzarada zagbain vu u'wa wa̱ yi pura̱ ta̱ aza a Yahuda ukpaku ucindere na amunga no ozo ton (745).

A̱bunda̱ ama a na a̱ pura̱i a̱ tyo tsugbashi o ukere wa̱ Nebukanaza, a ama ukpaku kupa una̱shi na̱ kupota̱li (4,600) ɗa.

31 Mogono Yekoniya va Yahuda yuwan ta̱ a'wan mata'atsu na̱ a̱za̱ e cindere o u'wa wa ali a Babila. A̱tsuma̱ o urana wu ushin no ozo o ton o woto wa kupa ne ejere aa'wan a na Ebilmeroda o o'woi mogono ma Babila, reve u roco mogono Yehoyakin va Yahuda isa'ani wu uta̱ yi diga a̱tsuma̱ o u'wa wa ali. 32 Mogono Ebilmeroda maa yuwaan yi ta̱ adanshi a sa'ani, reve u ca yi tsugbain ula'awu na̱ ngono nna n da̱na̱i oɓolo na̱ yi a̱tsuma̱ a Babila. 33 Reve Yekoniya foɗo itana ya̱ yi yu u'wa wa ali, a̱vu u teme a lyuwusa ilyalya apada oɓolo na̱ Mogono Ebilmeroda, hali acina ukosu wu rana wuma va̱ yi suru. 34 Reve mogono Ebilmeroda va Babila ma zuwa a casu Yekoniya mu kebe wa'a wa'a wa ana'an na̱ nfa'an, acina ukosu wu rana wuma va̱ yi suru.