1 Apa adanshi a na A̱sulazuva a yuwayin Irimiya, ana, 2 isawan o una̱ntsu wu u'wa wa̱ A̱sulazuva, reve vu damma ikaka i nda, << <Uwwai adanshi A̱sulazuva, a̱ɗu ama a Yahuda suru, aza a na a̱ ta̱wa̱i nu una̱ntsu u nda adama a yuwaan A̱sulazuva a̱ga̱nda̱.> >> 3 <<Apa nda ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila a dammai, lapulai re na̱ linga ɗu, a̱vu n lyawa ɗu i da̱nu uba̱ta̱ nda.>> 4 She i zuwa ucira u ɗu adanshi a̱za̱ e epen i damma, <<A̱yi nda ɗa A̱a̱'isa̱mapaɗa a̱ A̱sulazuva, A̱a̱'isa̱mapaɗa a̱ A̱sulazuva, A̱a̱'isa̱mapaɗa a̱ A̱sulazuva wan!>>

5 <<Ni i lapula re na̱ linga ɗu na amayun, waru i yuwulai a̱ɓula̱ ca ɗu, 6 ni iɓongi omoci na̱ mkpa'an shi, ko nra̱na̱, ko yoo oco mpasa ma za babu unusu pa nda shi, ko i kuru musula̱ mo omocin n ro nna ma̱a̱ ta̱wa̱ wu kototosu shi, 7 ne ɗa maa lyawa ɗu i da̱nu uba̱ta̱ u nda, a̱tsuma̱ e iɗa i na n cayi nkaya nɗu hali hali hali.

8 <<Ka̱lyuwa̱, i zuwa ta̱ ucira adanshi epen a na a̱ ri na̱ a̱ɓula̱ shi.

9 <<Reve i yuwusan wivu na̱ mona, ni i yuwusayin tsipere, na akucunu epen, ni i casuyi Ba'al kuci, ni i kurusu yi musula̱ n ro nna i revei shi,>> 10 gogo nda a̱vu i ta̱wa̱ yi isawan a̱ ma̱ka̱ka̱n ma̱ va̱ o u'wa u nda na e ɗesu na Aala a̱ va̱, adansa, <<Tsu la'a ta̱,>> Tsu la'a ta̱ na tsa lyuwa elime na̱ mayan me ili yi idaba i nda shi? 11 <<U'wa u nda, na e ɗesu na Aala a̱ va̱, wo o'wo ta̱ a̱ka̱ri evu e wenu u ɗu? Amma n ta̱ a̱ka̱nla̱.✝ Ne ɗa A̱sulazuva a dammai. 12 Amma gogo ka̱ra̱i a̱ tyo Uba̱ta̱ u va̱ u na u ri a̱ Shilo, uba̱ta̱ u na n ɗangwai Aala a̱ va̱ a̱ da̱na̱ nu ufaru, tsura̱ yee ene ili i na n yuwain na̱ yi, adama a̱bunda̱ e iwuya ya ama a̱ va̱ Isra'ila.>>✝ 13 Reve A̱sulazuva a damma, mantsa ma na yaa yuwusan ili i nda suru,<<N yuwan ta̱ adanshi na̱ ɗu kuci kuci, agba i zuwaa mu atsuvu shi, reve n ɗe ɗu, amma suru na̱ ne i usu mu shi. 14 Adama o ndolo, n ta yuwan nu u'wa u na e ɗesu na Aala a̱ va̱, na i zuwayi ucira, nu uba̱ta̱ u na n ca nɗu na̱ nkaya nɗu, cine n yuwain na̱ Shilo. 15 Waru n ta kakasa ɗu nu urewesu u va̱, cine n kakasai na̱ a̱za̱ ɗu suru, ama a Ifiramu.>>

16 <<A̱vu waru Irimiya, she vu yuwan avasa adama a ama a nda wan, she vu shon ko vu yuwan avasa adama e le wan, ko vu pati mu wan, adama a na ma uwwa wu shi. 17 Vee ene ili i na a yuwusan e ilyuci ya Yahuda na̱ re va̱ Urishelima shi? 18 Muwun n tsu ɓoloto ta̱ ɗanga, reve nan dada a gba'ato akina, waru a̱ma̱ci a tsu uban ta̱ yira tsura̱ a yuwan akala adama a̱ ma̱sula̱ ma na a̱ tsu ɗe Egbere va Zuva. Waru o tso oco ta̱ kuci vo oso uba̱ta̱ u musula̱ n ro, tsura̱ a zuwa mu n yuwan upan.✝ 19 Amma a̱mu ɗa a suɗatosu asuvu? Ne ɗa A̱sulazuva a dammai. Ashe aciyele a ɗa a palasa, a casu aciyele wono shi?>>

20 Adama o ndolo apa ili i na A̱sulazuva A̱sula̱ a dammai, <<Ka̱lyuwa̱, n ta̱ tsun upan u va̱ na̱ a̱tsumola̱ngu a̱ va̱ uba̱ta̱ u nda, a aci ama ni inama, na̱ zuva vu ɗanga na̱ a̱ɗuma̱ ni itana yi ca̱'a̱n vi iɗa, waru u ta̱ kula̱ agba a gura kimusa̱ yi shi.>>

21 Apa ili i na A̱sulazuva o oɓolo a̱ a̱soja a zuva, A̱sula̱ a Isra'ila, a dammai, <<Lyuwai elime i da̱shi kucci vu ukula̱tosu ɗu e ekere e ikucci i ɗu, a̱vu i tama inama na aciya̱ɗu! 22 A̱tsuma̱ o urana u na mu uta̱a̱ yi nkaya nɗu diga a̱tsuma̱ e iɗa ya Masar, shi n yuwan adanshi ne le, ko n damma le, adama a ɗa a̱ kucci vu ukula̱tosu nu ucasu shi. 23 Amma n ca le ta̱ udammu u nda, <Yuwain tsutoni na̱ a̱mu, waru n to o'wo A̱sula̱ a̱ ɗu, waru a̱ɗu i to o'wo ama a̱ va̱. I yuwan mmalu a̱tsuma̱ a̱ re vu udammu u na n ca nɗu, adama ili i wala ɗu mejege.> >> 24 <<Amma a uwwa shi ko o polo atsuvu shi, reve a̱ kuru a̱sa̱la̱ nu ugbawu wo okolo a vama e le, reve a̱ ka̱mba̱ a̱ca̱pa̱ o una̱ u na a lyuwa elime. 25 Diga a mantsa ma na nkaya nɗu mu uta̱i e iɗa ya Masar hali acina ana'an, urana biti, n lyungusu ta̱ agbashi a̱ va̱ ama̱sula̱ suru ya̱'a̱ le. 26 Na̱ ne suru a̱ kuɗa̱ ta̱ a uwwa mu, ko o poloo mu atsuvu e le. Reve a gbawato okolo e le a̱vu a yuwan iwuya ula'awu na̱ nkaya n le.>>

27 <<A mantsa ma na vu damma n le ili i nda suru, o poloo wu atsuvu shi, a mantsa ma na vu ɗe nle, a̱a̱ usu shi. 28 Adama o ndolo vu damma le ana, apa nda iɗa i na i kuɗa̱i a yuwan tsutoni na̱ A̱sulazuva A̱sula̱ e le, waru a̱ usu tsuɓari tsa̱ yi shi. Waru amayun o lo shi, u puwa̱a̱n ta̱ a̱ na̱ le. 29 <Punai a̱nji aci a̱ ɗu adama a̱tsumola̱ngu, reve yo oco le. I cana ishipa ya̱ a̱tsumola̱ngu agaɗi, adama a na A̱sulazuva a 'yuwan ta̱ ama gogo nda, wu kasa ta̱ ne le adama o upan u na a zuwa niyi.> >>

30 <<Ama a Yahuda a yuwan ta̱ iwuya esu a̱ va̱,>> ne ɗa a̱ A̱sulazuva a dammai. <<A̱ shuwa̱ ta̱ a̱ma̱li e idaba a̱tsuma̱ o U'wa a na e ɗesu na ala a̱ va̱, reve a̱ lungusa̱ yi. 31 A suwa ta̱ ba̱ta̱ va̱ a̱ga̱nda̱ va̱ Tofe, za na a̱ yi ɗa Uka̱ri wa̱ Ben Hinom, adama a̱ kula̱to muwun mo olobo n le ne esheli a̱tsuma̱ akina, agba n zuwa le a yuwan ne shi, waru u ta̱wa̱ mu okolo shi.>>

32 <<Adama o ndolo uwwai, urana u ta̱ lo a̱ ta̱wa̱,>> ne ɗa A̱sulazuva a dammai, <<Ana a̱ da̱shi ɗe yi Tofe shi, ko Uka̱ri wa̱ Ben Hinom shi, amma Uka̱ri u mapaɗa, adama a na a̱ ta̱ ciɗo a̱kwa̱kwa̱ a̱tsuma̱ a̱ Tofe hali she na̱ a lamba uba̱ta̱ wa̱ a̱ciɗa̱. 33 Lipu va̱ a̱kwa̱kwa̱ a ama a nda'a o to o'wo ilyalya yu nnunu, ni inama yu uvaɗi, waru babu za na a̱ gba̱ra̱ le. 34 N ta̱ ta̱wa̱ nu ukosu we elemu a̱ ma̱za̱nga̱ na̱ mere, nu uɗyo u vali sa'avu na̱ ka sa'avu a̱tsuma̱ a̱ lyuci gbain va Yahuda na̱ re va̱ Urishelima, adama a na iɗa'a i to o'wo okongo.>>