1 A̱vu Nebukanaza va Babila katala Zedekiya ulobo wa̱ Josiya wo o'wo mogono ma Yahuda o una̱ u Mogono Yekoniya ulobo wa̱ Jehoyakim.✝ 2 Amma a̱yi na aza a na a yuwusan yi a̱ga̱nda̱ oɓolo na ama e iɗa'a o polo atsuvu adanshi a̱ A̱sulazuva za na u yuwaan le o una̱ wa̱ Irimiya vumava̱sula̱ shi.

3 A̱vu mogono Zedekiya lyungu Yehukal ulobo wa̱ Shelemiya oɓolo na̱ Zafaniya ganu ulobo wa̱ Ma'aseya a̱ tyo ya̱ Irimiya vumava̱sula̱ ni ikaka i nda, <<Vu yuwan ankuri vu yuwan avasa a̱ tyo uba̱ta̱ wa̱ A̱sulazuva A̱sula̱ a̱ tsu o una̱ u tsu.>>

4 A mantsa mo ndolo koto a̱ shi a zuwa Irimiya o u'wa wa ali shi. Waru u da̱na̱ ta̱ nu ucira u na wa uwa a̱tsuma̱ ama ununa u cigai. 5 Ele lo a̱vu a̱soja o mogono a Firi'awuna va Masar o uta̱ diga Masar reve a saɓa a̱ tyo Urishelima. Ana a̱soja a Babila aza a na a̱ ka̱nda̱ruwa̱i Urishelima nu uvon a uwwai adama a ɗa e le, a̱vu a̱ ta̱ra̱nu na̱ a̱ca̱pa̱ a lyawa Urishelima.

6 A̱vu a̱ A̱sulazuva a yuwan adanshi na̱ vumava̱sula̱ Irimiya u damma, 7 <<Apa ili i na A̱sulazuva a̱ A̱sula̱ a Isra'ila dammai, vu damma mogono ma Yahuda, za na lyunguyi a zami mu ana, <A̱soja a̱ Firi'awuna a na o uta̱i adama a kamba wu, a̱ ta̱ ka̱mba̱ e iɗa i le Masar. 8 Agba waru a̱soja a Babila a̱ ta̱ ka̱mba̱ a yuwan uvon na̱ lyuci nda. Waru a ta lyuwa yi, a̱vu a̱ kula̱to yi na akina.> >>

9 <<Apa ili i na A̱sulazuva a dammai, she i luluma̱ aciya̱ɗu a majiyan adansa, <Na amayun a̱soja a Babila a lyawa tsu ta̱.> O'o, aa lyawa ɗu shi! 10 Ko na̱ shi a damma i ta lyuwa oɓolo a̱soja a Babila aza a na a yuwusan uvon na̱ ɗu nu uvon, akapi aza a na a uwwai usa̱n a na ri nven a̱tsuma̱ ogodo e le, a̱ ta̱ 'yon a daɓa lyuci'i akina.>>

11 Ele lo a̱vu oɓolo a̱soja a Babila a lyawa uvon na̱ Urishelima adama o uta̱wu wa̱ a̱soja o mogono a Firi'awuna va Masar, 12 reve Irimiya lyawa lyuci'i adama u 'ya̱wa̱ upasu wi iɗa ya Banyami adama u ushiyi akunda agadu a̱ yi uba̱ta̱ wa ama a na a̱ ri ɗe. 13 Amma a mantsa ma na u rawai o una̱ntsu u na e ɗesu una̱ntsu wa Banyami, a̱vu u cina yali ya̱ a̱soja ro wa̱ a̱za̱ e ipiri uba̱ta̱'a̱, za va ala Irija ulobo wa̱ Shelemiya ulobo wa Hananiya. Reve Irija reme Irimiya vumava̱sula̱ u damma, <<Vu ta̱ e ilaɗi adama a̱soja a Babila!>>

14 Amma a̱vu Irimiya damma,<<Amayun a ɗa shi! N ri e ilaɗi adama a̱soja a Babila shi!>> Amma Irija zuwaa Irimiya atsuvu shi, o una̱ u ndolo, reve u reme Irimiya u tyowetyo yi uba̱ta̱ wa azagbain o mogono. 15 A̱vu azagbain o mogono'o a yuwan upan na̱ Irimiya, reve a kada yi, a̱vu a̱ nla̱ yi o u'wa wa Jonata za vi iɗana i mogono, adama a na a̱ ka̱mbuwa̱i ɗe u'wa'a wo o'woi u'wa wa ali.

16 A̱vu a zuwa Irimiya a̱tsuma̱ a̱ka̱ri a̱tsuma̱ o u'wa wa ali, waru u yuwan ta̱ rana a̱bunda̱ uba̱ta̱'a̱.

17 Reve mogono Zedekiya lyungu a̱ ta̱wa̱ na̱ yi, reve a̱ ta̱wa̱ na̱ yi o ukobu. Uba̱ta̱ u na u yuwan niyi yeci usokowu u damma, <<Adanshi o ro a̱ ta̱ lo diga uba̱ta̱ wa̱ A̱sulazuva?>>

A̱vu Irimiya usu, <<Ee, adanshi a̱ ta̱ lo!>> A̱vu u lyuwa elime na adanshi u damma, <<A ta ca wu ekere o mogono ma Babila!>>

18 Reve Irimiya damma mogono Zedekiya, <<Unusu u ne ɗa n yuwaan nuwu na azagbain a̱ wu ko a ama a nda, a na vu zuwai a vari mu a̱tsuma̱ o u'wa wa ali? 19 A̱ te ɗa ama̱sula̱ a̱ wu a̱ ri, aza a na a̱ da̱na̱i a yuwusaan wu adanshi e ikaka ana, <Mogono ma Babila a̱ ta̱wa̱a̱ wu nu uvon a̱tsuma̱ a̱ lyuci'i shi>? 20 Amma gogo, wuma wa̱ wu ujima, zagbain va̱, uwwa ne'e, lyawa n ta̱wa̱ na̱ mesun ma̱ va̱ elime a̱ wu. She vu da̱shi ka̱mba̱to mu o u'wa wa Jonata za vi iɗana wan, na̱ ne ɗa shi n ta̱ kuwa̱ ɗe.>>

21 <<A̱vu mogono Zedekiya ca udammu a̱ ɓa̱ru Irimiya o ukowo a̱ nge'en mu upasu wa̱ a̱za̱ e ipiri. A̱vu a lyuwa elime a casu yi a̱ a̱a̱kutsu opopofu diga o upasu wa aza a na a̱ zunsu opopofu urana biti, hali acina mantsa ma na opopofu a̱ lyuci'i o kotoi. Adama o ndolo a ɗa Irimiya da̱nuyi o ukowo a̱ nge'en mu upasu wa̱ a̱za̱ e ipiri.>>