1 Adama aza a Amon,

apa ili i na A̱sulazuva a dammai,

<<Isra'ila ri na̱ muwun mo olobo shi?

Ko u ri na̱ za na a lyuwa agadu a̱ yi shi?

To, nye i zuwai aza a na a yuwusaan Mole a̱ga̱nda̱

a usai iɗa ya Gadu?

Nye i zuwai ama a̱ yi

a̱ da̱nuyi a̱tsuma̱ e ilyuci ya̱ yi?>>✝

2 <<Amma rana ta̱ lo a̱ ta̱wa̱,

ne ɗa A̱sulazuva a dammai,

na ma zuwa Raba lyuci gbain va Amon

uwwa mesun ma aavana o uvon.

Raba to o'wo okongo,

a̱ ta̱ kula̱to mulyuci ma̱ yi na akina.

Reve Isra'ila gba̱ra̱

aza a na a̱ shi a̱ gba̱ra̱ ni yi ɗe.

Ne ɗa A̱sulazuva a dammai.

3 <<Yuwain yisali, a̱ɗu a ama a̱ Heshibon,

adama a na o kototo ta̱ lyuci va̱ Ai!

I 'ya̱sa̱n uɗyo u mesun a̱ɗu nda̱na̱ta̱ ma Raba!

Yoo oto akashi amuna

reve i yuwan a̱tsuma̱la̱ngu.

Reve i suma i 'ya̱wa̱ ni i ta̱wi,

a̱tsuma̱ o ukari u lyuci'i.

Adama a na ma̱sula̱ Mole ma̱ ta̱ 'ya̱wa̱ tsugbashi,

oɓolo na̱ nan ganu a̱ yi,

na azagbain a̱ yi.

4 Adama nye ya yuwusan uvaɗu

adama o uka̱ri u ɗu,

adama o uka̱ri u ɗu

u na u ri ulobonu?

A̱vu usheli wu ulambu wa̱ a̱ɓula̱,

vu zuwaa ta̱ utsuru wa̱ wu ucira,

reve vu damma,

<Zane ɗa a̱ riya̱a̱ mu nu uvon?>

5 Ka̱lyuwa̱, n ta̱ ta̱wa̱a̱

na̱ tsuda'un a aci a̱ wu,

diga uba̱ta̱ wa aza a na a̱ ri

uka̱nda̱ruwu na̱ a̱ vu,

a̱ ta̱ gba̱ra̱ za suru a̱tsuma̱ a̱ ɗu,

waru babu za na a gura ɓoloto

aza a na a zama a la'a.>>

Ne ɗa A̱sulazuva oɓolo a̱soja a zuva dammai.

6 <<Na̱ ne suru, a̱ ta̱wa̱ elime n ta̱ ka̱mbuwa̱a̱

a̱za̱ a̱ Mowa na aba'un e le.>>

Ne ɗa A̱sulazuva a dammai.

7 Adama a̱ Edom,

apa ili i na a̱ A̱sulazuva o oɓolo a̱ a̱soja a zuva dammai,

<<Babu urevu a̱tsuma̱ a̱ Teman ɗa?

A̱sa̱la̱ a̱ la̱nga̱ ta̱ e ekere a̱za̱ o urevu ɗa?

Urevu u le u puwa̱a̱n ta̱ ɗa?

8 Vadalai i suma,

i pa'an a̱tsuma̱ oko'o a̱ru'un,

a̱ ɗu na ri nden a̱tsuma̱ a̱ Dedan,

adama a na n ta̱ ta̱wa̱a̱ Isuwa na addama,

a mantsa ma na maa ca yi oforo.

9 Nna aza a na a tsu taɓusa icu'un ina̱bi

a̱ ta̱wa̱ uba̱ta̱ wa̱ wu,

ashe, a tsu lyawa ozo o ro shi?

Nna̱ e evu a̱ ta̱wa̱ na ayin,

ashe, a tsu tara ili i na a cigai goon shi?

10 Agba a̱mu n ta lyawa Isuwa ataɓu,

a̱vu n kpa̱tu'wa̱ ba̱ta̱ vu pa'atan va̱ yi,

hali na wa̱ kuɗa̱ pa'aton aciya̱yi!

O to kototo muwun ma̱ a̱ yi,

na̱ a̱za̱ a̱ yi na̱ nron mu nden ma̱ a̱ yi,

hali na babu za na a buwa.

11 Lyawaa mu mkpa'an ma̱ wu,

n ta̱ gba e idana le.

Waru lyawa nruna̱ ma̱ wu

n zuwa ucira u le ya̱'a̱ va̱.>>

12 Apa ili i na A̱sulazuva a dammai, <<Nna̱ aza a na a ntsaayi a ca oforo shi o sowo oforo, adama a̱ nye a̱ ɗu yoo sowo oforo shi? Yaa la'a shi, na amayun n ta ca ɗu oforo! 13 A̱mu n kucina ta̱ na Ala a̱ va̱ ana, Bozura to o'wo okongo, ni ili i wono, ni ili i wovon, ni ili i na a yuwayin una̱. Waru ilyuci ya̱ yi suru o to o'wo okongo hali hali.>>

Ne ɗa A̱sulazuva a dammai.

14 Ɗaɗa Irimiya dammai,

<<N ushi ta̱ ikaka diga uba̱ta̱ wa̱ A̱sulazuva,

a̱ lyungu ta̱ malingata a̱tsuma̱ a nɗa adansa,

i ɓoloto aciya̱ɗu adama i riya̱a̱ Edom nu uvon!

'Yoyin adama o uvon!

15 Ka̱lyuwa̱, a̱vu Edom,

n ta̱ ka̱mbuwa̱ wu vo o'wo ke'en a̱tsuma̱ a nɗa,

ni ili yu ugoruso e ekere a vaɗilima̱.

16 Wovon u na vu zuwai a uwwai,

oɓolo na aciyogbamu o okolo a̱ wu

a̱ luluma̱ wu ta̱.

A̱vu na vu ri nden a̱ wungu wa atali,

a̱vu na vu ri zuva va aagaɗi.

Ko no wo o'woi vu yuwan ta̱ u'wa wa̱ wu

ɗe aagaɗi tsa̱ a̱a̱kuru,

na̱ ne suru, n ta vari wu

e iɗa diga uba̱ta̱'a̱,>>

ne ɗa A̱sulazuva a dammai.

17 <<Edom o to o'wo ili i wovon.

Za na ka̱ra̱i lo uba̱ta̱'a̱ suru

u ta lamba ili i na waa damma,

reve u cira,

adama a̱bunda̱ addama a na acina niyi.

18 Ununa o kototoi Sodom na̱ Gomora

ni ilyuci i na i ri zuzu ne le,

ne ɗa a tawa Edom.

Babu za na a̱ da̱nu pe,

waru babu vaɗilima̱

na a buwa pe a̱tsuma̱ yi,

ne ɗa A̱sulazuva a dammai.

19 Ununa vu revei kamu tsu uta̱

a̱tsumona wu Uɗolu wa̱ Urudu

a̱vu u gba̱ra̱ oɓolo e ikyon

diga uba̱ta̱ wa alyuna,

ne ɗa ma̱a̱ ta̱wa̱ n gba̱ra̱ a̱za̱ a̱ Edom nu uta̱

diga a̱tsuma̱ e iɗa'a.

Zagbain na maa ɗangula,

a̱ yi ɗa waa yuwan tsugono tsa̱ yi.

Adama a na zane ɗa ri tsa̱ va̱?

Waru zane ɗa a gura 'ya̱wa̱ na adanshi a̱ va̱?

A te ɗa za va aaguɓa a na a gura

isawan u yuwan tsushu'un na̱ a̱mu?>>

20 <<Adama o ndolo, apa ili i na A̱sulazuva

o foɓoi a aci a̱za̱ a̱ Edom,

ili i na u foɓoi e ekere

aza a na a̱ ri nden a̱tsuma̱ a Teman.

A̱ ta̱ gba̱ra̱ muwun nle a̱ ka̱ra̱

reve o to kototo iɗa i le

adama e ili i na a yuwain.

21 Ilama ya̱a̱ a̱risa̱ a̱ Edom

a ta zuwa uvaɗi u jinga̱ɗa̱,

waru a ta uwwa uɗyo u mesun u le

a Mala ma̱ Shili.

22 Ka̱lyuwa̱, a̱a̱kuru a̱ ta̱ 'yon zuva

reve u ɗa̱luwa̱ a̱ tyo e iɗa,

wu ba̱ruwa̱ evelu a̱ yi

reve u cipa̱ a aci Bozura.

O urana u ndolo okolo a̱soja a̱ Edom a̱ ta̱ 'yon

tso okolo a ka na ri e teri.>>

23 Adama aza a Dimaska,

<<Hamat na̱ Afa a̱ ra̱pula̱ ta̱,

adama a na a uwwa ta̱

alabari a na a̱ ri uyo'o shi.

O uta̱ ta̱ okolo adama o wovon,

waru a̱ ta̱ meje'en

tsa mala ma na ma gura rungwa̱i kpen shi.

24 Dimaska wo o'wo ta̱ babu ucira,

reve u vadala adama u suma.

A̱tsuma̱lima̱ na addama a cina yi ta̱,

a̱tsuma̱lima̱ tsa ka na ri e teri.

25 Amma a Dimaska a dammulai ta̱,

ka̱lyuwa̱ ne'e lyuci tsu na shi yuwain ala,

za na shi tsu zuwa tsu ma̱za̱nga̱ o'woi okongo!

26 Na amayun, olobo a̱ yi

a̱ ta̱ kuwa̱ alanga eteshe a̱ lyuci'i,

waru a̱ ta̱ pura̱ a̱soja a̱ yi suru o urana u ndolo.

27 N ta daɓa ukari u lyuci wa̱ Dimaska akina,

waru u ta lyuwa ba̱ta̱ vu ucira u mogono Ben Hada.>>

Ne ɗa A̱sulazuva o oɓolo a̱ a̱soja a zuva a dammai.

28 Adama a Keda na̱ tsugono tsa Hazo, aza a na Mogono Nebukanaza ma Babila ma lyuwai nu uvon.

Apa ili i na A̱sulazuva a dammai,

<<'Yoyin i riya̱a̱ Keda nu uvon,

reve fo i kototo a ama a asana!

29 A ta usa ogodo e le

no oɓolo e ikyon i le,

reve a̱ pura̱ uba̱ta̱ u wivuwusan u le,

oɓolo ni itana i le na arakumi e le.

Ama a ta saala le a damma,

<U'ya̱susa̱n wu ugbozu

u ɓa̱ru tsu ta̱ mɓa̱nga̱ biti!>

30 Jika̱i i suma!

I da̱nu a̱ a̱ba̱nu a̱ru'un,

a̱ɗu na i ri nden a̱tsuma̱ a Hazo!

Nebukanaza mogono ma Babila

ma yuwan ta̱ ifoɓi a aci a̱ ɗu,

u yuwan ta̱ ifoɓi yi iwuya a aci a̱ ɗu.

Ne ɗa A̱sulazuva a dammai.

31 <<'Yoyin, a̱ɗu a̱ a̱soja a Babila,

i riya̱a̱ nɗa nna yenei

she damma a̱ ta̱ nden n lafiya

na asuvu nden,

nɗa nna n ri na̱ na̱ntsu

ko aɗanga e irumu shi,

nɗa nna n ri a̱ nden a̱ nde'en.

Ne ɗa A̱sulazuva a dammai.

32 A̱ ta̱ pura̱ arakumi e le,

iliyamunga i le ya̱a̱ a̱bunda̱ i to o'wo

itana i na a̱ pura̱i uba̱ta̱ wu uvon.

N ta̱ bete'we aza a na a̱ ri

ba̱ta̱ va alanga uba̱ta̱ suru,

waru n ta̱ ta̱wa̱a̱ le na addama mɓa̱nga̱ biti.

Ne ɗa A̱sulazuva a dammai.

33 Hazo to o'wo uba̱ta̱ wu nden

n musa̱n mu una.

Babu za na a̱ da̱nu pe,

waru babu vaɗilima̱ na a̱ da̱nu pe uba̱ta̱'a̱.>>

34 Apa ikaka i na a̱ A̱sulazuva a dammai vumava̱sula̱ Irimiya, adama a̱ Elam, a̱tsuma̱ a aa'wan o ufaru u tsugono tsa̱ Zedekiya va Yahuda.

35 Apa ili i na A̱sulazuva oɓolo a̱ a̱soja a zuva a dammai,

<<N ta̱ kototo aza a na a yuwusan uvon

ni ibata nu utan ya̱ Elam

aza a na e le ɗa ucira wa̱ a̱soja a̱ yi.

36 N ta zuwa upepu diga a̱ mɓa̱nga̱ n na̱shi mu uvaɗi,

n lapa Elam diga a̱ mɓa̱nga̱ biti.

N ta̱ bete'we a ama'a

a̱ tyo a̱ mɓa̱nga̱ n na̱shi'i,

hali na babu nɗa nna

a lamba aza a Elam pe.

37 N ta zuwa a ama a̱ Elam e je'en lipu

elime a n'yuwatan nle

aza a na a zama wuma u le.

N ta̱ ta̱wa̱ na addama a aci e le

nu upan wu usuɗuwu u va̱,

reve n saɓa le na̱ matsun me pe'eni,

hali she na̱ me ene ukosu u le.

Ne ɗa A̱sulazuva a dammai.

38 N ta̱ shuwa̱ ootogu o tsugono tsa̱ a̱ va̱ a̱tsuma̱ a̱ Elam

a̱vu n kototo mogono ma̱ yi na azagbain a̱ yi,

ne ɗa A̱sulazuva a dammai.

39 <<Na̱ ne suru, a̱tsuma̱ a rana na a̱ ta̱wa̱,

n ta̱ ka̱mbuwa̱a̱ a ama Elam na aba'un e le.

Ne ɗa A̱sulazuva a dammai.>>