1 A mantsa ma na mogono Nebukanaza va Babila oɓolo na̱ a̱soja a̱ yi suru, nu uba̱ta̱ u tsugono tsa̱ a̱ yi suru, oɓolo na ama o tsugono a na a̱ ri za̱la̱ tsugono tsa̱ a̱ yi, na aa yuwusan uvon na̱ Urishelima oɓolo na̱ mulyuci nna n ri uka̱nda̱ruwu ne ele, reve adanshi a nda a̱ ta̱wa̱ uba̱ta̱ wa̱ Irimiya diga uba̱ta̱ wa̱ A̱sulazuva adansa,✝ 2 <<Apa ili i na A̱sulazuva A̱sula̱ a Isra'ila a dammai, Irimiya, ka̱ra̱ vu yuwan adanshi na̱ mogono Zedekiya va Yahuda vu damma yi, <Apa ili i na A̱sulazuva a dammai, n yuwan ta̱ zuzu na maa ca lyuci nda e ekere o mogono ma Babila, waru u ta̱ kula̱to yi. 3 Agba a̱vu mogono Zedekiya vaa la'a diga e ekere a̱ yi shi, amma na amayun a̱ ta̱ e reme wu, reve waru a ca wu e ekere a̱ yi. Vu ta̱ ene mogono ma Babila esu ne esu, waru vu yuwan adanshi na̱ yi una̱ nu una̱. Ko vu 'yuwan vu ciga, vu ta̱ gba a̱ ka̱ra̱ a̱ tyo Babila.> >>

4 <<Amma na̱ ne suru, a̱vu mogono Zedekiya va Yahuda uwwa ne'e nzuwulai n na A̱sulazuva a yuwain. Apa ili i na A̱sulazuva a dammai a aci a̱ wu, va̱a̱ kuwa̱ e ekere a matsun me pe'eni shi! 5 Vu ta̱ kuwa̱ na asuvu nden, cine ama a̱ tsu gba'ato akina a̱ a̱ciɗa̱ adama a ca nkaya ma̱ wu tsugbain, ngono nna n kuwa̱i elime a̱ wu, ne ɗa a gba'ato akina adama a ca wu tsugbain na adama a̱ a̱tsumola̱ngu a̱ wu adansa, <Ayya, zagbain tsu kuwa̱ ta̱!> >> Ne ɗa A̱sulazuva a dammai.

6 Reve vumava̱sula̱ Irimiya damma Mogono Zedekiya va Yahuda suru adanshi a nda a̱tsuma̱ a̱ Urishelima. 7 Mantsa ma na a̱soja o mogono ma Babila a̱ da̱na̱i a yuwusan uvon na̱ Urishelima oɓolo na akapi e ilyuci ya Yahuda i na i buwai suru, lyuci va Lakish na̱ Azeka. Adama a na ele nda ɗa goon ilyuci ya Yahuda i na i buwai na̱ kari.

8 <<Adanshi'i u ta̱wa̱ ta̱ uba̱ta̱ wa̱ Irimiya cina mogono Zedekiya yuwan nzuwulai na ama Urishelima suru adama a ca ucuɗuwu wa aza a na a̱ ri a tsugbashi a̱ da̱na̱ fa̱a̱n. 9 O una̱ wu nzuwulai'i za suru ta lyawa agbashi a̱ yi, ali na̱ a̱ma̱ci, aza a na a̱ ri Mmaci ma Ibrahim. She za guza̱ aagbashi a na ri vuma va Yahuda wan ko vali ko ka wan, suru nɗu edenge ɗa i ri.>> 10 <<Adama o ndolo ɗaɗa azagbai'in suru na a ama'a suru a yuwain nzuwulai'i na za suru ta lyawa agbashi a̱ yi ali na̱ a̱ma̱ci, waru a buwa da̱shi guza̱ le shi. Reve a̱ usula̱i, reve a lyawa le a̱ ka̱ra̱.>> 11 Agba a̱ 'ya̱wa̱ elime a̱vu a avadala majiyan me e le, reve a̱ ka̱mbuwisa̱ agbashi'i ali na̱ a̱ma̱ci, aza a na a̱ shi a lyawai, a̱vu a̱ da̱shi ka̱mba̱to le agbashi.

12 Reve adanshi A̱sulazuva a̱ ta̱wa̱ uba̱ta̱ wa̱ Irimiya adansa, 13 <<Apa ili i na A̱sulazuva a̱ A̱sula̱ a Isra'ila a dammai, n yuwan ta̱ akucunu na̱ nkaya n ɗu, a mantsa ma na mu uta̱a̱ nle e iɗa ya Masar, o uwa wa ali, na n dammai, 14 <A̱tsuma̱ aa'wan a̱ cindere biti, ko za 'yuwan u ciga u lyawa Mmaci ma Ibrahim nna u tsulai. Cina u yuwaan ɗu tsugbashi a'wan a̱ ta̱li, ko shi i 'yuwan i ciga i lyawa yi u ka̱ra̱ fa̱a̱n. Amma nkaya nɗu mu uwwa shi waru o poloo mu atsuvu shi.✝ 15 Ko ta̱ shi i jima a na i vadalai shi, hali i yuwan ili i na i ri mejege elime a̱ va̱, a̱vu za suru a̱tsuma̱ ɗu ca ucuɗuwu u na wa lyawa za va̱ yi fa̱a̱n. Waru i yuwan ta̱ nzuwulai'i elime a̱ va̱, a̱tsuma̱ o u'wa u na e ɗesu na Aala a̱ va̱. 16 Amma gogo a̱ yi ɗa nda i vadalai yoo o o'wotoi Aala a̱ va̱ ili yi idaba, na za suru a̱tsuma̱ ɗu ka̱mba̱toi agbashi a̱ yi ali na̱ a̱ma̱ci aza a na i lyawai fa̱a̱n a yuwan ili i na a cigai. Amma a̱vu i da̱shi zuwisa le ko na̱ shi a 'yuwan o o'wo agbashi a̱ ɗu.> >>

17 <<Adama o ndolo, apa ili i na A̱sulazuva a dammai, i yuwaan mu ta̱ ulambu u tsutoni, i yuwan adanshi a na mawun ma̱ a̱na̱wu ma̱ ɗu mo o'wo fa̱a̱n shi. Adama o ndolo gogo n yuwaan ɗu ta̱ adanshi a na yo o'wo fa̱a̱n, ne ɗa A̱sulazuva a dammai, ugana u na ya̱a̱ kuwa̱ o ure u matsun me pe'eni, mɓa̱la̱ na ambulu. Waru n ta zuwa ɗu yo o'wo ili yi idaba e ekere a̱za̱ o tsugono tsu uvaɗi. 18 Ama a na a kuɗai nzuwulai n va̱, reve a 'yuwan o shiton nzuwulai nna a yuwain elime a̱ va̱, n ta̱ gba a yuwan ne le tsa̱ ma̱dindim ma na a tsu ɓatsalai ure*, reve a̱ kuru na̱ memere ma̱ yi. 19 Azagbain a Yahuda na̱ a̱za̱ a̱ Urishelima suru, na azagbain o ukobu na̱ nan ganu, oɓolo na ama e iɗa'a suru na toniyi nu upasu u na e ne'eshein ma̱dindim mo ndolo pasu re, 20 n ta̱ gba ca le e ekere a n'yuwatan n le aza a na a zama wuma u le. Waru a̱kwa̱kwa̱ a̱ lipu le to o'wo ilyalya ya asala ni inama yu una.>>

21 <<Amma n ta ca mogono Zedekiya va Yahuda na azagbain a̱ yi e ekere a n'yuwatan n le, aza a na a zama wuma u le e ekere a̱soja o mogono ma Babila, aza a na o ronoi na̱ a̱ca̱pa̱ a lyawa nɗu. 22 Ka̱lyuwa̱, gogo n ta ca mogono ma Babila a̱ yi na̱ a̱soja udammu, waru n ta̱ ka̱mba̱to le a̱ lyuci nda. Agba a ta yuwan uvon na̱ lyuci'i, reve a usa yi, a̱vu a daɓa lyuci'i akina. Waru n ta zuwa ilyuci ya Yahuda yo o'wo okongo, adama she za da̱nu pe wan.>> Ne ɗa A̱sulazuva a dammai.