1 A̱tsuma̱ o ufaru u tsugono tsa̱ mogono Zedekiya ulobo wa̱ Josiya va Yahuda, A̱sulazuva a damma ta̱ Irimiya adanshi a nda,✝ 2 <<apa ili i na A̱sulazuva a damma numu, vu yuwaan aciya̱wu a̱a̱gba̱la̱ e inan yi iluma, waru vu yuwan amunga o ukwa, reve vu nla̱ a̱a̱gba̱la̱'a̱ a̱ yinlu ya̱ wu. 3 A̱vu vu lyungu ni ikaka a̱ tyo ya̱ mogono ma̱ Edom na̱ mogono ma Mowa na̱ mogono ma Amon na̱ mogono ma Taya oɓolo na̱ mogono ma̱ Sidon e ekere a nlingata nle nna n ta̱wa̱i Urishelima adama a na ene mogono Zedekiya va Yahuda. 4 Waru vu damma le a̱ ka̱ra̱ a̱ 'ya̱wa̱ a damma azagbain e le, ikaka i nda na yu uta̱i diga uba̱ta̱ wa̱ A̱sulazuva oɓolo a̱ a̱soja a zuva, A̱sula̱ a Isra'ila ana, 5 A̱mu ɗa nu ukere wu ucira u va̱ na̱ linga gbagbain va asalama a̱ va̱ n yuwain uvaɗi, oɓolo na̱ vaɗilima̱ suru, ni iliyamunga ya̱ yi suru na ri pe a̱tsuma̱ a̱yi. Waru n ca yi ta̱ e ekere a za na me enei n ta gura ca. 6 Gogo n ca ta̱ iɗa i ɗu suru e ekere mogono Nebukanaza va Babila, hali fo ni inama yu una a ta yuwayin ulinga. 7 Nɗa suru n ta yuwayin tsugbashi, a̱yi na̱ mawun ma̱ yi, na̱ mawun ma tsukaya ma̱ yi, hali acina mantsa ma na n zuwai iɗa ya̱ yi i riya̱. A̱vu nɗa na̱ a̱bunda̱ na̱ ngono m gbagbain n la'a ucira wa̱ yi.>>

8 <<Amma nna̱ nɗa n ro ko tsugono tso o ro tsa 'yuwan aa yuwaan mogono Nebukanaza va Babila tsugbashi, ko u 'yuwan a ca aci za̱la̱ vu ucira mogono'o, ununa nan vi iluma tsu ca yinlu a zuwayi a̱a̱gba̱la̱, n ta̱ ge'eto nɗa ndolo na̱ matsun me pe'eni na ambulu na̱ mɓa̱la̱, hali she na̱ n kototo nɗa nda e ekere Nebukanaza.>> Ne ɗa A̱sulazuva a dammai. 9 Adama o ndolo, she i poloo ama̱sula̱ a̱ɗu atsuvu wan, na̱ a̱za̱ a̱ yindi, na aza a na a tsu cuɗuwusa alavu, ko aza a na o ɓoloso aci na̱ ruhu va̱ a̱kwa̱kwa̱, ko a̱za̱ a̱ nkunu wan, aza a na a dansaa ɗu, <<Yaa yuwaan mogono ma Babila tsugbashi shi.>> 10 <<Na amayun a ta yuwusan ɗu adanshi e ikaka ye epen ɗa, za na a zuwa a̱ 'ya̱wa̱to ɗu e iɗa i ro i na i ri zuzu ni iɗa i ɗu shi. N ta̱ gba̱ra̱ ɗu yu uta̱ diga a̱tsuma̱ e iɗa i ɗu, waru i ta̱ kuwa̱ e iɗa i ro. 11 Amma iɗa i na i cayi aciya̱yi suru, za̱la̱ va̱ a̱gba̱la̱ o ucira u mogono ma Babila adama u yuwayin a̱ga̱nda̱, n ta lyawai e iɗa ya̱ yi, adama u cimba yi, waru u da̱nu pe a̱tsuma̱ a̱yi. Ne ɗa A̱sulazuva a dammai.>>

12 N damma ta̱ mogono Zedekiya va Yahuda adanshi a nda ana,<<Vu ca aciya̱wu za̱la̱ va̱ a̱gba̱la̱ o ucira u mogono ma Babila, vu yuwayin a̱ga̱nda̱ oɓolo na ama a̱yi, vu ta̱ gba a̱ da̱na̱ wuma. 13 Adama nye a̱vu na ama a̱ wu ya̱a̱ kuwa̱ o ure u matsun me pe'eni, na ambulu na̱ mɓa̱la̱, ununa A̱sulazuva a dammai yaa fara na̱ nɗa suru na 'yuwain a yuwaan mogono ma Babila tsugbashi? 14 Waru she yu uwwa adanshi ama̱sula̱ a̱ɗu a na a dansaa ɗu ana, <She i yuwaan mogono ma Babila a̱ga̱nda̱ wan,> Adama a na adanshi e ikaka ye epen a ɗa a yuwusan ɗu, 15 adama a na n lyungu le shi.>> Ne ɗa A̱sulazuva a dammai. <<A̱yi nda ta zuwa mu m gba̱ra̱ ɗu a̱tsuma̱ e iɗa i ɗu, agba i ta̱ kuwa̱, a̱ɗu na ama̱sula̱ a̱ɗu a na a yuwusaan ɗu adanshi e ikaka ye epen.>>

16 Ana n kotoi a yuwusan adanshi na̱ mogono, reve a̱mu Irimiya n ka̱ra̱ n yuwan adanshi na̱ nan ganu oɓolo na ama suru ana, <<Apa ili i na A̱sulazuva a dammai, <She i poloo ama̱sula̱ a nda atsuvu aza a na a dansa, <<Ka̱lyuwa̱, a jima shi, a̱ ta̱ ka̱mbuwa̱ ni itana i na a̱ pura̱i suru diga o u'wa wa̱ A̱sulazuva a̱ tyo Babila.>> Adanshi e ikaka ye epen i ɗa goon a yuwusaan ɗu. 17 She yu uwwa ama̱sula̱ a nda wan. A̱ɗu de i yuwaan mogono ma Babila tsugbashi, i ta̱ gba da̱na̱ wuma. Adama nye yaa zuwa o ɓoso lyuci nda, a̱ ka̱mbuwa̱i okongo? 18 Nna amayun a ɗa e le ama̱sula̱ a na a̱ ri ni ikaka ya̱ A̱sulazuva a ɗa, to, lyawa a pati A̱sulazuva oɓolo a̱ a̱soja a zuva, adama akapi e itana i na i buwai o u'wa wa̱ A̱sulazuva o u'wa u mogono ma Yahuda, oɓolo na̱ lyuci gbain va̱ Urishelima, adama she a̱ ka̱ra̱ na̱ le a̱ tyo Babila wan. 19 Adama a na apa ili i na A̱sulazuva o oɓolo a̱ a̱soja a zuva dammai, i cuwan mogono Nebukanaza va Babila lyawa ta̱ atsura oɓolo na̱ a̱ba̱jini akwanu na a̱ tsu ɗe Mala, ni ili i mishin i na a tsu tawa, na akapi e itana i ro lo a̱ lyuci'i. 20 Mogono Nebukanaza pura̱ le shi, a mantsa ma na u ka̱ra̱i na̱ mogono Yekoniya ulobo wa̱ Jehoyakim va Yahuda, oɓolo na azagbain ama a Yahuda diga Urishelima a̱ tyo Babila. 21 Na amayun, apa ili i na A̱sulazuva o oɓolo a̱ a̱soja a zuva A̱sula̱ a Isra'ila a dammai, adama akapi e itana i na a lyawai a̱tsuma̱ o u'wa wa̱ A̱sulazuva, na̱ a̱tsuma̱ o u'wa u mogono ma Yahuda na̱ a̱tsuma̱ a̱ Urishelima, 22 <<a̱ ta̱ pura̱ le a̱ tyo Babila. Ɗe ɗa a̱ da̱na̱, hali acina urana u na maa cuwan ne le,>> Ne ɗa A̱sulazuva a dammai. <<Reve n ka̱mba̱to le n zuwisa le uba̱ta̱ u nda.>> > >>