1 Apa adanshi a na a̱ A̱sulazuva a dammai vumava̱sula̱ Irimiya adama a Babila, na adama e iɗa ya aza a Babila.

2 <<I damma nɗa, reve i lapa ulingi,

i 'ya̱sa̱n atuta, reve i damma,

she i soko ili i ro wan,

amma i damma,

<A ta lyuwa Babila nu uvon,

waru a ta ca Bel ma̱sula̱ wono,

Merodak a̱ma̱li ta shiwan na̱ wono.

Yironishi ya̱ yi i ta̱ sowo wono,

waru a̱ma̱li a̱ yi a ta shiwan na̱ wovon.> >>

3 <<Nɗa diga o upasu wu ugana

n ta̱ riya̱a̱ yi nu uvon,

a̱vu u ka̱mbuwa̱i okongo.

Babu vuma na a̱ da̱nu pe,

vaɗilima̱ ni inama biti a ta suma,

a lyawa uba̱ta̱'a̱.>>

4 <<A̱tsuma̱ a rana ndolo,

na a mantsa mo ndolo,

a ama a Isra'ila na̱ Yahuda wirota̱,

a̱ ta̱ ta̱wa̱ a̱tsuma̱ a̱ mesun,

adama a zami A̱sulazuva A̱sula̱ e le.

5 E te ece ure a̱ tyo Sihiyona,

reve waru a vadala urewesu le uba̱ta̱ wa̱ yi,

a̱ ta̱ ta̱wa̱ a suraa A̱sulazuva.

A̱tsuma̱ a nzuwulai ma hali hali,

za na a̱ kuɗa̱ e icina na̱ yi suru suru.>>

6 <<Ama a̱ va̱ a̱ ta̱ tsi ikyon i na i puwa̱yin,

aza a na azaguɓa e le

a lyawa n le a̱ puwa̱yin.

Reve a zuwa le a̱ da̱na̱

agara a̱tsuma̱ a nsasan.

A̱ da̱na̱ e igaru zuva vu nsasan na agaɗi,

hali e icina nu uba̱ta̱ u wivuwun u le.

7 Za na biti cina n le

to kototo le,

n'yuwatan n le n damma ta̱,

<Tsu ri nu unusu shi,

adama a na a yuwaan ta̱ A̱sulazuva unusu,

za na a̱ yi ɗa uba̱ta̱ wa alyuna a amayun e le,

A̱sulazuva a na a̱ yi ɗa ucawu wo okolo a nkaya n le.> >>

8 <<Suma yi diga Babila,

i lyawa iɗa ya aza a Babila,

yo o'wo tsa̱ mgbele nna n ronoi ikyon aaɗanga.

9 Adama a na n ta̱ 'ya̱sa̱n

nɗa m gbagbain mu upasu wu ugana,

adama o ɓolo a aci a yuwan uvon na̱ Babila,

a̱ ta̱ ta̱wa̱ a dara

adama a yuwan uvon na̱ yi,

waru a lyuwa yi nu uvon

diga o upasu wu ugana.

Iliya i le i ta̱ da̱na̱ tsa nan yali ya̱ a̱soja,

aza a na a̱ tsu ka̱mba̱ ekere lya̱nga̱,

diga uba̱ta̱ o uvon shi.

10 Adama o ndolo Babila

o to o'wo akunda e itana i na

a̱ pura̱i uba̱ta̱ wu uvon,

aza a na a usa niyi suru a̱ ta̱ cuwa̱n.>>

Ne ɗa A̱sulazuva a dammai.

11 <<Adama o ndolo i ta̱ a̱ mere na̱ ma̱za̱nga̱,

a̱ɗu na i pura̱i agadu a̱ va̱,

waru i ta tsu'yan she damma

nan na tsura̱i osoroto,

agba i to oruwuso

cine vu revei oɓolo e ido.

12 Mma ɗu to sowo wono wa̱ a̱bunda̱ lon,

a̱ yi na u matsan n ɗu wono u ta̱ ɓa̱ru yi.

U to o'wo iɗa i na i la'ai uka̱la̱mu a̱tsuma̱ a nɗa,

tsa̱ a̱tsumona ni iɗa yu 'yewu,

ɓolo na̱ a̱tsumona a na a̱ ri babu za.

13 Adama o upan wa̱ A̱sulazuva

babu za na a̱ da̱nu pe,

amma u to o'wo okongo suru.

Za na suru ka̱ra̱la̱i nu upasu wa Babila,

u ta lamba ili i na waa damma,

u ta cira adama addama a na acina niyi.

14 <<Darai i ka̱nda̱ruwa̱ Babila,

a̱ɗu na i tsu rono utan suru.

Tawan niyi!

Waru she i buwaa aya wan.

Adama a na u yuwaan ta̱ A̱sulazuva unusu.

15 Ka̱nda̱ruwa̱ niyi na̱ yisali yu uvon mɓa̱nga̱ biti!

U 'ya̱sa̱n ta̱ ekere a̱ yi

e izami ya asuvu nde,

ukari wa̱ yi u riya̱ ta̱,

waru uɓaɓu wa̱ yi wo oco ta̱.

Adama a na a̱ yi nda

atsupu a ɗa diga uba̱ta̱ wa̱ A̱sulazuva,

Tsupa yi a aci a̱ yi,

yuwaan niyi cine u yuwain akapi.

16 She i lyawa a yuwan ca̱'a̱n

ko a yuwan ugasa a̱tsuma̱ a Babila wan.

Adama a matsun me pe'eni ma n'yuwatan,

lyawa za suru ka̱mba̱ uba̱ta̱ wa ama a̱ yi,

lyawa za suru suma u ka̱mba̱ e iɗa ya̱ yi.>>

17 <<Isra'ila tu ubete'u

cine vu revei ikyon

i na ikamu i gba̱ra̱i.

Nu ufaru mogono ma Asuriya ɗa

fara lyuwa niyi nu uvon.

A̱ tyo o ukosu reve mogono Nebukanaza va Babila

kukuɗa etele a̱ yi.

18 Adama o ndolo apa ili i na A̱sulazuva oɓolo a̱ a̱soja a zuva

a̱ A̱sula̱ a Isra'ila a dammai,

<N ta ca mogono ma Babila oforo

oɓolo ni iɗa ya̱ yi,

ununa n cayi mogono ma Asuriya oforo.

19 Amma n ta̱ ka̱mbuwa̱ Isra'ila

a̱tsuma̱ e iɗa ya̱ yi,

u ta lyuwa u cuwa̱n a masasan ma gbain

ma Kame na̱ Bashan,

waru u ta tawa maluwa ma̱ yi

agaɗi a Ifiramu nu upasu wa Giliyadu.

20 A rana ndolo na a mantsa ma nda,

a ta zami unusu wa Isra'ila

agba a̱ tsura̱i shi,

waru a ta zami nusu va Yahuda,

agba a̱ tsura̱ le shi.

Adama a na n ta yuwaan

akapi a na n lyawai gafura.> >>

Ne ɗa A̱sulazuva a dammai.

21 <<I riya̱a̱ iɗa ya Meratayim,

oɓolo na aza a na a̱ ri nden

a̱tsuma̱ a̱ Peko nu uvon.

Saɓa nle, yu una le,

waru i kototo le suru suru.

I yuwan ili i na n damma nɗu.

Ne ɗa A̱sulazuva a dammai.

22 Yisali yu uvon i ta̱ pe a̱tsuma̱ a̱ lyuci'i

yisali ya̱ a̱ba̱jini o ukototosu!

23 Ka̱lyuwa̱, ne'e cine a kukuɗai Babila,

a tawa ta̱ ma̱ka̱ta̱ a na a̱ shi a lapai uvaɗi

a mantsa ma na ma̱ ka̱ra̱i ɗe nu ufaru!

Ukototosu wa̱ yi u ca ta̱ nɗa suru wovon!

24 A̱vu Babila, a̱mu A̱sulazuva

ma azuwa wu ta̱ maza,

waru maza'a u reme wu ta̱,

babu a̱vu urevu.

A cina wu ta̱ a̱vu e reme wu,

adama a na vu yuwan ta̱ tsushu'un na̱ mu.

25 A̱sulazuva a̱ kpa̱tu'wa̱ ta̱

asula e izuwa yi itana yu uvon ya̱ yi,

reve wu uta̱a̱ ni itana yu upan ya̱ yi,

adama a na A̱sulazuva oɓolo a̱ a̱soja a zuva

a̱ ta̱ nu ulinga u na u cigai na waa yuwan

a̱tsuma̱ e iɗa ya Babila.

26 Ta̱wa̱i i riya̱a̱ Babila diga e iɗa ya alanga.

I katsu'wa asula e izuwa ya̱ yi,

reve i ka̱mbuwa̱i tsa̱ a̱ edemu.

I kototo yi suru,

she i buwa yi ili i ro wan.

27 Yu una ogono e inan ya̱ yi suru,

lyawa a̱ zura̱ a̱ tyo uba̱ta̱ u mapaɗa!

A̱tsuma̱lima̱ a ta cina le!

Adama a na urana u le u rawa ta̱,

mantsa ma yuwan ta̱ a na a ca le oforo.

28 Uwwa ne'e, ilama ya aza a na a̱ ri e ilaɗi

adama a la'a na̱ wuma u le,

na aza a na a zama uba̱ta̱ u na pa'an

diga e iɗa ya Babila.

A ta dansa a̱tsuma̱ a̱ Sihiyona,

ununa A̱sulazuva a̱ A̱sula̱ a̱tsu

a tarai na waa yuwan atsupu,

atsupu adama A̱a̱'isamapaɗa a̱ yi.>>

29 <<Ɗeyi a̱za̱ e ibata a aci aza a Babila,

aza a na a gurai morono mo utan suru.

I va̱la̱ uka̱nda̱ruwu na̱ yi suru,

she i lyawa nanza la'a wan.

I tsupa a aci a̱ yi

o una̱ wu linga va̱ yi,

i tsupa yi o una̱ wi ili i na u yuwain,

adama a na u goro ta̱ A̱sulazuva,

Za va Akiza a Isra'ila.✝

30 Adama ndolo, olobo a̱ yi

a̱ ta̱ riya̱ a̱ re lyuci,

waru a̱ ta̱ o una a̱soja a̱ yi suru

a̱tsuma̱ o urana u ndolo.>>

Ne ɗa A̱sulazuva a dammai.

31 <<Ka̱lyuwa̱, a̱vu Babila

n ta̱ tsushu'un na̱ a̱vu,

a̱vu za va aciyogbamu.

Adama a na urana wa̱ wu u ta̱wa̱ ta̱,

urana u na a ca wu oforo.

Ne ɗa A̱sulazuva o oɓolo a̱ a̱soja a zuva a dammai.

32 A̱vu za va aciyogbamu,

vu ta̱ ta̱ɗa̱tsa̱ vu riya̱,

agba babu za na a̱ 'ya̱sa̱n wu.

N ta̱ kula̱to ilyuci ya̱ wu na akina,

a na a lyuwa suru aza a na

a̱ ri uka̱nda̱ruwu na̱ vu suru.>>

33 <<Apa ili i na A̱sulazuva o oɓolo a̱ a̱soja a zuva dammai,

o ɓongi ta̱ ama a Isra'ila,

waru o ɓongi ta̱ fo ama a Yahuda.

Aza a na e reme nle suru

a tsu ɓana na le ta̱ ugbamu,

agba a tsu 'yuwan ta̱

a na a lyawa le a̱ ka̱ra̱.

34 Na̱ ne suru, za vi iwawi i le

i tu nu ucira lon,

A̱sulazuva o oɓolo a̱ a̱soja a zuva ɗa Ala a̱ yi.

Na amayun u ta̱ ee isawaan le,

adama u ta̱wa̱a̱ na̱ wivuwun a̱tsuma̱ e iɗa i le,

amma u ta̱wa̱ nu ulambu u wivuwun

e ekere aza a na a̱ ri nden a̱tsuma̱ a Babila.>>

35 <<A̱sulazuva a damma ta̱,

matsun me pe'eni ma̱ ta̱ da̱na̱

a aci aza a Babila!

Na a aci a̱ nda̱na̱ta̱ ma Babila,

na a aci azagbain e le na̱ a̱za̱ o urevu u le!

36 Matsun me pe'eni fo ma̱ ta̱ da̱na̱

a aci ama̱sula̱ epen e le!

O to o'wo olo!

Na̱ matsun me pe'eni a aci a̱soja i le,

a ta shiwan na̱ wovon lon!

37 Matsun me pe'eni ma̱ ta̱ da̱na̱

a aci e ido i le,

ni ikeke yi ido i le!

Na a aci omoci a̱soja a na a̱ ri

a̱tsuma̱ a̱soja o uvon u le!

O to o'wo a̱ma̱ci.

Matsun me pe'eni ma̱ ta̱ da̱na̱

a aci asula e izuwa ya̱ yi!

A̱ ta̱ pura̱ le suru o o'wo itana

i na a̱ pura̱i uba̱ta̱ wu uvon!

38 Nu ulambu u mini a̱ ba̱ta̱ mini ma̱ yi,

a ta kwa suru!

Adama a na iɗa i ɗa ya̱ a̱ma̱li,

a̱ma̱li a na a jaara na̱ wovon!>>

39 <<Adama o ndolo inama yu una

na̱ nkunzu n ɗa a̱ da̱nu ɗe,

ɗe ɗa fo vori a̱ da̱nu.

A̱ da̱shi da̱nu pe shi,

adama a na uba̱ta̱'a̱ u to o'wo okongo

diga a mantsa a̱ tyo a mantsa.

40 Ununa A̱sulazuva a̱ kototoi Sodom na̱ Gomora,

ni ilyuci i na i ri zuzu ne le,

ne ɗa o kototo Babila.

Babu vuma na a̱ da̱nu pe,

babu vaɗilima̱ na a buwa uba̱ta̱'a̱.>>

Ne ɗa a̱ A̱sulazuva a dammai.

41 <<Ka̱lyuwa̱, a̱soja a̱ ta̱ lo a̱ ta̱wa̱

diga o upasu wu uyagi

iɗa i gbain na̱ ngono ma̱ a̱bunda̱ lon,

a̱ ta̱ lo a̱ ta̱wa̱ diga o ukosu wu uvaɗi.

42 A̱ tu uguzu nu utan ni ibata,

ama a avama a ɗa

a̱ tsee ene iliyali shi ko ke'en.

Ilama i le i ta̱ tsi ilama i mala,

a mantsa ma na a̱ ri ukatsu e ikeke yi ido i le.

A̱ ta̱ ta̱wusa̱ she damma ama a na a darai

adama o uvon,

adama a̱ riya̱ wu nu uvon,

a̱vu Usheli Babila.

43 Mogono ma̱ Babila ma uwwa ta̱

aɗa adama e le,

reve ekere a̱ yi a̱ kuwa̱.

A̱tsuma̱lima̱ a cina yi ta̱,

usuɗuwu tsa ka na da̱nuyi e teri.

44 Ununa vu revei kamu tsu uta̱

a̱tsumona wu Uɗolu wa̱ Urudu

a̱vu u gba̱ra̱ oɓolo e ikyon

diga uba̱ta̱ wa alyuna,

ne ɗa ma̱a̱ ta̱wa̱ n gba̱ra̱ aza a Babila nu uta̱

diga a̱tsuma̱ e iɗa'a.

Zagbain na maa ɗangula,

a̱ yi ɗa waa yuwan tsugono tsa̱ yi.

Adama a na zane ɗa ri tsa̱ va̱?

Waru zane ɗa a gura 'ya̱wa̱ na adanshi a̱ va̱?

A te ɗa za va aaguɓa a na a gura

isawan u yuwan tsushu'un na̱ a̱mu?>>

45 <<Adama o ndolo, apa ili i na A̱sulazuva

o foɓoi a aci a Babila,

ili i na u foɓoi e ekere

aza a na a̱ ri nden a̱tsuma̱ a Babila.

A̱ ta̱ gba̱ra̱ muwun nle a̱ ka̱ra̱

reve o to kototo iɗa i le

adama e ili i na a yuwain.

46 Diga na uwwa a lyuwa ta̱ Babila nu uvon

reve uvaɗi u jinga̱ɗa̱,

waru a ta uwwa yisali ya̱ yi

a̱tsuma̱ a nɗa suru.>>