1 A mantsa ma na Irimiya kotoi adansaa ama a nda suru idanshi i na A̱sulazuva a̱ A̱sula̱ e le a̱ lyungu niyi u damma le, 2 a̱vu Azariya ulobo wa̱ Hoshaya na̱ Yohanan ulobo wa̱ Kareya na ali a na a̱ ri ugbawu suru a damma Irimiya, <<Epen ɗa vaa yuwusan! A̱sulazuva A̱sula̱ a̱ tsu a̱ lyungu wu vu damma, <She tsu ka̱ra̱ tsu 'ya̱wa̱ Masar tsu da̱nu ɗe shi!> 3 Amma Baruk ulobo wa Neriya ɗa a̱a̱ da̱shishi wu a aci a̱ tsu, adama vu ca tsu e ekere a̱soja a Babila, adama o una tsu, ko gba shi a̱ ka̱ra̱ na̱ tsu a̱ tyo e iɗa ya Babila tsugbashi!>> 4 Reve Yohanan ulobo wa̱ Kareya, oɓolo na̱ nan yali ya̱ a̱soja, na akapi a ama'a suru a 'yuwan a yuwan tsutoni nu udammu wa̱ A̱sulazuva a na a̱ da̱nu a̱tsuma̱ e iɗa ya Yahuda. 5 O una̱ u ndolo, a̱vu Yohanan ulobo wa̱ kareya oɓolo na̱ nan yali ya̱ a̱soja'a a̱ pura̱ akapi a ama a Yahuda'a, aza a na a̱ ka̱mba̱i adama a̱ da̱nu a̱tsuma̱ a Yahuda diga a̱tsuma̱ a nɗa nna a̱ shi a̱ gba̱ra̱ nle a̱ tyo. 6 Reve fo a̱ pura̱ ali suru, na̱ a̱ma̱ci na̱ muwun ne esheli o mogono, aza a na Nebuzarada zagbain va aza a na a yuwusan ipiri i mogono shi lyawai e ekere a Gedaliya ulobo wa Ahikam ulobo wa Shafa, oɓolo na̱ Irimiya vumava̱sula̱ na̱ Baruk ulobo wa Neriya. 7 Adama o ndolo reve a uwa Masar a̱tsuma̱ o ure wu ulambu wa̱ a̱ɓula̱ a̱ tyo e ekere a̱ A̱sulazuva, hali fo acina lyuci va Tapanes. 8 Ɗe a̱tsuma̱ Tapanes a̱ A̱sulazuva a yuwan ta̱ adanshi na̱ Irimiya u damma, 9 <<Vu pura̱ aatali a gbagbain o ukere wa̱ wu, a̱vu vu ciɗo le uba̱ta̱ u na a̱ ru'wa̱i wu udasata wu una̱ntsu wu uwata wu u'wa u mogono Firi'awuna a̱ lyuci va Tapanes. Vu yuwan ne e esu a ama a Yahuda.>> 10 Reve vu damma le, <<Apa ili i na a̱ A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, ka̱lyuwa̱, n ta̱ lyunguwa̱a̱ aagbashi a̱ va̱ mogono Nebukanaza va Babila ta̱wa̱ uba̱ta̱ u nda. Waru n ta̱ shuwa̱ Ootogu o tsugono tsa̱ yi zuva va atali a nda a na Irimiya soko yi. Nebukanaza gba ta̱ shuwa̱ a̱ba̱jini Oogodo o tsugono tsa̱ yi uba̱ta̱'a̱. 11 U ta̱ ta̱wa̱ u lyuwa Masar nu uvon, u ta̱ ta̱wa̱ nu ukwa̱ e ekere aza a na a zuwai na̱ ukwa̱, na̱ nde n tsugbashi e ekere aza a zuwai na̱ a̱ 'ya̱wa̱ tsugbashi, oɓolo na̱ matsun me pe'eni e ekere aza a na a zuwai na̱ kuwa̱ na̱ matsun me pe'eni. 12 U ta̱ kula̱to a̱a̱'isa̱ a̱ musula̱ mi iɗa ya Masar, agba u ta̱ kula̱to musula̱ n le a̱vu u pura̱ musula̱ n le a̱ tyo tsugbashi. Ununa za va aguɓa tsu ka̱nda̱'wa̱ aapalutsu a̱ yi uka̱nda̱ruwu na̱ yi, ne ɗa wa̱ ka̱nda̱'wa̱ Masar reve u 'yon u ka̱ra̱ gbaga. 13 U to ɓuɓoso a̱a̱'isa̱ o urana a na a̱ ri pe a̱tsuma̱ a Masar, a̱vu u kototo a atsura a akiza, reve u kula̱to a̱'isa̱ a̱ musula̱ ma Masar.>>