1 <<A mantsa mo ndolo n to o'wo A̱sula̱ a ama o u'wa wa Isra'ila suru, waru ele o to o'wo a ama a̱ va̱,>> ne ɗa A̱sulazuva a dammai.

2 Apa ili i na A̱sulazuva a dammai,

<<Ama a na a la'ai diga e meleshe

ma matsun me pe'eni,

a̱ ta̱ a̱tsura̱ isa'ani a̱ a̱tsumona,

a mantsa ma na aza a Isra'ila a zamiyi wivuwun.>>

3 A̱sulazuva o roco tsu ta̱

aciya̱yi ɗe nu ufaru adansa,

<<N ta̱ e icigi ya̱ wu,

ni icigi i na i tsu koto shi,

n ta̱wa̱to wu ta̱ uba̱ta̱ u va̱,

ni icigi i na i tsu vadala shi.

4 N ta̱ da̱shi suwisa wu,

waru vu ta uwwa usuwu,

a̱vu Usheli Isra'ila.

Waru vu ta̱ da̱shi tarisa aganga a̱ wu,

reve vu uwa uje'en wa̱ a̱za̱ a̱ ma̱za̱nga̱.

5 Vu ta̱ da̱shi shuwisa̱ a̱ɗuma̱ a̱ inabi,

zuva va agaɗi a Samariya.

Acimbi a ɗa a̱ shuwa̱ le,

a̱vu a uwwa uyo'o wu umatsun u le.

6 Adama a na urana u ta̱ lo a̱ ta̱wa̱,

na a̱za̱ e ipiri diga a aagaɗi a Ifiramu

o uta̱a̱ uɗyo a sala a damma,

<Ta̱wa̱yi, tsu ka̱ra̱i a gawan a̱ tyo Sihiyona,

a̱ tyo uba̱ta̱ wa̱ A̱sulazuva A̱sula̱ a̱ tsu.> >>

7 Adama a na apa ili i na A̱sulazuva a dammai,

<<I cana ishipa i ma̱za̱nga̱

adama o ugundo wa Yakubu!

I 'ya̱sa̱n uɗyo

adama a za na la'ai tsugbain a̱tsuma̱ a nɗa!

Lyawa a uwwa ica i ɗu,

reve i damma,

<A̱sulazuva vu wawa ama a̱ wu,

vu wawa akapi ama a̱ wu Isra'ila!>

8 Ka̱lyuwa̱, n ta̱ ta̱wa̱ ne le

diga e iɗa yu upasu wu ugana,

reve m ɓoloto le diga o ukosu wu uvaɗi.

A̱tsuma̱ e le a̱ ta̱ da̱na̱ na̱ nrumba̱ na̱ a̱kutsuma̱,

na̱ a̱ma̱ci a̱ a̱tsuma̱, na̱ a̱ma̱ci a na a̱ ri e teri,

na amayun ama a̱bunda̱ a ɗa a̱ ka̱mba̱.

9 A̱tsuma̱ a̱ mesun a ɗa

a̱ ta̱wa̱ a yuwusan avasa

a mantsa ma na ma̱a̱ ka̱mbusa̱ le.

N to toni ne le na̱ mɓa̱nga̱ mu uyene u mini

reve n toni ne le o ure u na u ri mejege,

u na a̱ ta̱ɗa̱tsa̱ shi.

Adama a na a̱mu dada va Isra'ila ɗa,

waru Ifiramu mawun mo ufaru ma̱ va̱ ma ɗa.

10 <<Uwwai adanshi a̱ A̱sulazuva a̱ɗu nɗa,

i cuɗuwa adanshi a̱ yi a pasu

vu nge'en m mala, i damma,

<A̱yi na u bete'wei Isra'ila,

a̱yi ɗa waru woo ɓoloto le,

waru u ta̱ e indana iɓolo ya̱ yi,

ununa za va aguɓa tsi indana ikyon ya̱ yi.>

11 Adama a na a̱ A̱sulazuva a wawa ta̱ Yakubu,

reve u tsupaa le ekere aza a na a la'a nle ucira.

12 A̱ ta̱ ta̱wa̱ a cana ishipa nu ucira,

zuva va aagaɗi a̱ Sihiyona,

urewesu u le u ta yuwan ma̱za̱nga̱

adama e isa'ani ya̱ A̱sulazuva

na̱ ma̱za̱nga̱ ma na a̱ tsura̱i ishina,

na̱ masayan ma̱ ina̱bi oɓolo na̱ mani'in ma̱ zetun,

na̱ ma̱za̱nga̱ ma na a̱ tsura̱i

muwun mi ikyon ni inan.

O to o'wo tsa̱a̱ a̱a̱rumbu a na a casu mini,

agba a̱a̱ da̱shi yuwisan a̱tsumola̱ngu shi.

13 A mantsa mo ndolo muwun ma̱ esheli n ta yuwan uje'en

waru a yuwan ma̱za̱nga̱,

ne ɗa fo muwun mo olobo na̱ mbara.

N ta vadala mesun

ma̱ a̱tsumola̱ngu e le a̱ tyo a̱ ma̱za̱nga̱,

reve n ca le adanshi,

a̱vu fo n ca le ma̱za̱nga̱

o una̱ wa̱ a̱tsumola̱ngu.

14 N ta̱ cuwa̱ton nan ganu

ni ilyalya ya̱a̱ a̱bunda̱,

waru ama a̱ va̱ a̱ ta̱ cuwa̱n

ni isa'ani ya̱a̱ a̱bunda̱ a̱ va̱.>>

Ne ɗa A̱sulazuva a dammai.

15 Apa ili i na A̱sulazuva a dammai,

<<A uwwa ta̱ uɗyo a Rama,

uɗyo wo a̱tsumola̱ngu na̱ za mesun nu ucira,

Rahila ɗa ri e mesun adama a̱ muwun ma̱ yi,

waru u 'yuwan ta̱ a̱ usu wa̱a̱ a̱sa̱la̱

adama a na muwun ma̱ yi,

m buwa lo shi.✝>>

16 Apa ili i na A̱sulazuva a dammai,

<<Vu rungwa̱ mesun,

vu ta'asa aɓara diga e esu a̱ wu.

Adama a na vu ta̱ tsura̱

iliyinkapa yu ulinga wa̱ wu,

waru a̱ ta̱ ka̱mba̱ diga e iɗa yi n'yuwatan.

Ne ɗa A̱sulazuva a dammai.

17 Adama o ndolo uzuwu wo okolo a̱ ta̱ lo

nda a̱ tyo we elime,>>

waru muwun ma̱ wu n ta̱ ka̱mba̱ e iɗa i le,

ne ɗa A̱sulazuva a dammai.

18 <<Na amayun, mu uwwa ta̱

a̱tsumola̱ngu a Ifiramu, a na wa dansa,

<Vu ca mu ta̱ oforo tsa̱ ma̱dindim ma na

ma tsu uwwa adanshi shi,

waru mu uwwa ta̱ oforo'o.

Vu ka̱mba̱to mu,

waru n ta̱ gba ka̱mba̱,

adama a na a̱vu ɗa

A̱sulazuva A̱sula̱ a̱ va̱.

19 A mantsa ma na n shi n lyawai ure,

reve n vadala a̱ ka̱mba̱.

Mantsa ma na n ta̱wa̱i n revei

reve n ka̱ɗa̱to aci,

mu uwwa ta̱ wono na̱ a̱tsuma̱lima̱

adama a na n tu utanuwu

na̱ wono u tsulolobo tsa̱ a̱ va̱.> >>

20 <<Ashe, Ifiramu macigata

ma mawun ma̱ va̱ ma ɗa shi?

Ko na wo o'woi n tsu yuwusan ta̱

adanshi e iwuya ya̱ yi kuci,

na̱ ne suru a̱tsuma̱ e icigi

n tsu cuwan ta̱ na̱ a̱ yi.

Adama a na okolo a̱ va̱

a ta maluwa ma̱ yi,

waru na amayun n ta̱ ene iliyali ya̱ yi lon,>>

ne ɗa A̱sulazuva a dammai.

21 <<Vu shuwa̱a̱ aciya̱wu iroci o ure,

vu shuwa̱a̱ aciya̱wu

iroci i na yoo o roco wu ure.

Vi idana ure u gbain ulobonu,

ure u na vu toniyi.

Vu ka̱mba̱, a̱vu Usheli Isra'ila,

vu ka̱mba̱ a̱ tyo e ilyuci ya̱ wu.

22 Hali acina mantsa ma̱ ne ɗa

va̱a̱ da̱na̱ a agara e iwau,

a̱vu Usheli wu ulambu wa̱ a̱ɓula̱?

A̱sulazuva a̱ ta̱ e ifoɓi i na wa yuwan

ili i sa'avu a̱tsuma̱ o uvaɗi

na a damma ka ɗa aa yuwaan vali mapari.>>

23 Apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila a dammai, <<A mantsa ma na n ka̱mba̱to n le diga uba̱ta̱ u tsugbashi tsa ama e iɗa ya Yahuda oɓolo ni ilyuci ya̱ yi, a̱ ta̱ da̱shi yuwisan ulinga ni idanshi i nda.

<<<Lyawa A̱sulazuva a zuwa wu aba'un,

a̱vu nda̱na̱ta̱ ma̱ a̱ɓula̱, a̱vu aagaɗi a Akiza!>

24 Ama a̱ ta̱ da̱nu oɓolo a̱tsuma̱ a Yahuda oɓolo ni ilyuci ya̱ yi suru, acimbi na aza a na a yuwusan agara aguɓa oɓolo e ikyon i le. 25 Adama a na n ta kamba aza a na a̱ kuna̱i, reve fo n cuwa̱ton aza a na a̱ ta̱ka̱lyuwa̱i.>>

26 <<Adama o ndolo, a̱vu a̱mu Irimiya n 'yon diga a nlavu n damma, Na amayun nlavu nda n yo'ono mu ta̱!>>

27 Reve A̱sulazuva a damma, ka̱lyuwa̱, <<Rana ta̱ lo a̱ ta̱wa̱ na ma̱a̱ da̱shi u'wa wa Isra'ila na̱ Yahuda oɓolo na a ama ni iliyamunga a̱bunda̱. 28 Ununa mi indana n le, adama n mula̱ le, waru o ɓoso le, a̱vu fo a̱ lyungusa̱, o kototo waru a̱ ta̱wa̱a̱ na addama, ne ɗa mee e indana le adama a̱ tsura̱ usuwu waru a̱ tsura̱ ushuwu.>> Ne ɗa A̱sulazuva a dammai. 29 A rana ndolo ama a̱a̱ da̱shi damma,

<< <Nan dada a ɗa a tamai muwun n ina̱bi ma alamu,

agba anga a̱ muwun nle ɗa n kuwa̱i shi.> >>

30 <<Amma za suru ta̱ kuwa̱ adama o unusu wa̱ yi, za na suru tamai muwun n ina̱bi ma alamu, anga a̱ yi ɗa a̱ kuwa̱ goon.>>

31 <<Reve A̱sulazuva a damma, ka̱lyuwa̱, rana ta̱ lo a̱ ta̱wa̱ a na maa yuwan nzuwulai n sa'avu nu u'wa wa Isra'ila na̱ Yahuda.✝✝ 32 Wa̱a̱ da̱na̱ tsa nzuwulai n na n yuwain na̱ nkaya nle a mantsa ma na m ɓana nle ukere na n ronoo nle aɗanga o uta̱ diga e iɗa ya Masar shi. Adama a na a kuɗa ta̱ nzuwulai n va̱, ko na wo o'woi n ta̱ tsa vali uba̱ta̱ u le. Ne ɗa A̱sulazuva a dammai. 33 Gogo apa nzuwulai n na maa yuwan nu u'wa wa Isra'ila na̱ a̱yi nda koto.>>

N ta zuwa wila̱ u va̱ a majiyan ma̱ ele,

reve waru n ɗana le a akpata o okolo e le.

N to o'wo A̱sula̱ e le,

reve ele fo o'wo ama a̱ va̱.✝

Ne ɗa A̱sulazuva a dammai.

34 <<Vuma ro buwa o roco moron ma̱ nden ma̱ yi,

ko u damma yi,

<Reve A̱sulazuva,> shi

adama a na suru nle a̱ ta̱ reve mu,

diga a za ke'en a̱ tyo a zagbain a̱tsuma̱ e le.

N ta yuwaan le gafura vi iwuya i le,

waru ma̱a̱ da̱shi cuwan na̱ nusu le shi.✝>>

35 <<Apa ili i na A̱sulazuva a dammai,

a̱yi na u shuwa̱i urana

adama o o'wo ekan yu urana,

a̱yi na u zuwai woto na̱ italyo'o

adama oo o'wo ekan na ayin,

a̱yi na u tsu zuru'wa̱ mala

adama ikeɗu i mala i le i gugwa̱

A̱sulazuva o oɓolo a̱ a̱soja a zuva a ɗa ala a̱ yi.>>

36 <<N na̱ udammu u va̱ u nda na n yuwain

puwa̱a̱n diga elime a̱ va̱,

to, ɗaɗa ugundo wa Isra'ila waa buwa

a̱ nden mi iɗa ekere a̱ va̱ shi,

ne ɗa A̱sulazuva a dammai.>>

37 Apa ili i na A̱sulazuva a dammai,

<<N na a ta gura rito zuva,

reve waru a gura reve

cine uvaɗi pe za̱la̱ wo o'woi,

to, ɗaɗa gba ma 'yuwan

ugundo wa Isra'ila suru,

adama e ili i na a yuwain suru.>>

Ne ɗa A̱sulazuva a dammai.

38 Reve A̱sulazuva a damma, <<Ka̱lyuwa̱, rana ta̱ lo a̱ ta̱wa̱, a na a̱da̱shi suwisa lyuci nda adama a̱ va̱, diga o Usaa wu ugaɗi wa Hanane hali a̱ tyo o Uwata wu Mɓa̱nga̱. 39 Amunga o uritosu u ta̱ ba̱ruwa̱ diga ɗe, reve u saɓa a̱ tyo aagaɗi Gare, reve u vadala a̱ tyo Gowa. 40 Ka̱ri na ocosu a̱kwa̱kwa̱ no okomo suru, ni iɗa'a suru hali a̱ tyo Uka̱ri wa̱ Kidron, hali fo a̱ tyo o Una̱ntsu wu nven wi Ido ya asana, o to o'wo na akiza adama a̱ A̱sulazuva. Waru a buwa a̱da̱shi mula̱ lyuci'i shi, ko gba shi o ɓuɓoso yi shi ko ke'en.>>