1 Apa ili i na A̱sulazuva a dammai, <<Irimiya, ka̱ra̱ a̱cipa̱ o ukobu u mogono ma Yahuda reve vu damma ɗe adanshi a nda, 2 <Uwwa adanshi a̱ A̱sulazuva, a̱vu mogono ma Yahuda, a̱vu za na vu da̱nuyi ootogu o tsugono tsa̱ Da̱wuda, a̱vu na azagbain a̱ wu, oɓolo na ama a̱ wu a na a uwusa na̱ na̱ntsu nda.> 3 <Apa ili i na A̱sulazuva a dammai, i yuwan ili i na i ri amayun na̱ mejege. I wawa za na a yuwain a'usa diga ekere a̱za̱ o ɓongishi. Waru she i yuwaan omocin ili yu uwuyanu ko i palaa yi wan, ko mkpa'an ko nra̱na̱, waru she yo oco mpasa ma aza a babu unusu uba̱ta̱ u nda wan. 4 Na amayun, nni i yuwan tsutoni nu udammu u nda, ngono nna n ri nden ootogu o tsugono tsu u'wa wa Da̱wuda n ta uwa nu una̱ntsu wu ukobu u nda, zuva vi ikeke yi ido ni ido, za suru na azagbain a̱ yi na ama a̱ yi. 5 Amma ni i yuwan tsutoni na adanshi a nda shi, n kucina ta̱ na aciya̱va̱, ukobu u mogono u nda u to o'wo okongo.> >> Ne ɗa A̱sulazuva a dammai.✝ 6 Adama a na apa ili i na A̱sulazuva a dammai adama o ukobu u mogono ma Yahuda,

<<Ulobonu wa̱ wu u ta̱

tsa̱ Giliyadu uba̱ta̱ u va̱,

waru tsa̱ a̱ba̱jini a agaɗi a Lebanon.

Na amayun n ta̱ ka̱mba̱to wu

tsa̱ a̱tsumona,

lyuci gbain na ri na̱ za shi.

7 N ta̱ lyungu aza a na o kototo wu,

za suru ni itana yu uvon ya̱ yi.

A ta gagasa atsura

a sida o ulobonu wa̱ wu,

reve a vari le akina.>>

8 Ama a nɗa na̱ a̱bunda̱ a̱ ta̱ kuru na̱ nge'en n lyuci gbai'in, za suru ta damma moron ma̱ nden ma̱ yi ana, <<Nye i zuwai A̱sulazuva a yuwain tsunda na̱ lyuci gbai'in? 9 Reve a̱ usu a damma,<Ili i na i zuwai a̱ yi ɗa, a kuɗa ta̱ akucunu a̱ A̱sulazuva A̱sula̱ e le, reve a yuwaan musula̱ n ro a̱ga̱nda̱, a̱vu fo aa yuwaan le ulinga.> >>

10 <<She i shon adama o mogono

ma na ma̱ kuwa̱i wan,

ko i yuwan a̱tsumola̱ngu adama

o ukwisa̱ wa̱ yi wan.

Amma o una̱ ndolo,

i shon lon adama a za na

a tarai a̱ tyo tsugbashi,

adama a na wa̱a̱ da̱shi ka̱mba̱ shi,

ko u da̱shi ene iɗa

i na a matsan niyi shi.>>

11 <<Apa ili i na A̱sulazuva a dammai, adama a Shalum* ulobo wa Josiya, zana o'woi mogono o una̱ wa dada va̱ yi mogono ma Yahuda, agba u lyawa ta̱ uba̱ta̱ u nda, waru wa̱a̱ da̱shi ka̱mba̱ pa shi.✝ 12 Amma uba̱ta̱ u na a tara niyi a̱ tyo tsugbashi, ɗe ɗa wa̱ kuwa̱, wa̱a̱ da̱shi ene iɗa i nda shi.>>

13 <<A̱tsuma̱lima̱ a ta cina

za na suwai ukobu wa̱ yi

a̱tsuma̱ o ure wu ulambu wa̱ a̱ɓula̱,

oɓolo na asula a zuva

a̱tsuma̱ o ure wa amayun shi,

za na a zuwusa a ama

e iɗa ya̱ yi ulinga wa̱ pere,

agba wa tsupusa melen me le shi.>>

14 Agba u ta dansa,

<<N ta suwaa aciya̱va̱ a̱ba̱jini o ukobu,

na̱ a̱ba̱jini a̱ba̱jini asula a zuva.

A̱vu u yuwaan le uba̱ta̱ wu usowoto wu upepu,

reve wu kala ɓaɓu va̱ yi na̱ ɗanga sida,

a̱vu wu kala yi ni ili i shili.>>

15 <<Ili ya nda i to o'woto wu mogono

nna̱ vu ri na̱ ɗanga sida va̱ a̱bunda̱?

Ashe dada va̱ wu da̱na̱

ni ilyalya ni ili yo oso shi?

U yuwan ta̱ amayun na̱ a̱ɓula̱,

a̱yi ɗa i zuwai u tsura̱i ulyuwu we elime.

16 U da̱na̱ ta̱ o ucina̱

wa̱ a̱za̱ o ulambu

na aza a na a cigai ikambishi,

a̱ yi ɗa i zuwai u tsura̱i

ulyuwu we elime.

A̱yi nda a̱ yi ɗa

a tsu damma urevu u va̱ shi?

Ne ɗa A̱sulazuva a dammai.

17 Amma a̱vu, vu zuwa ta̱ esu a̱ wu,

no okolo a̱ wu

e izami yu uda̱shiwu u na u ri ulobonu shi,

na̱ wocosu wu mpasa

wa aza a na a̱ ri nu unusu shi,

ni ɓongishi nu u'ya̱susa̱n wu ugbozu.>>

18 Adama o ndolo,

apa ili i na A̱sulazuva adansa,

adama o mogono Jehoyakim

ulobo wa̱ Josiya mogono ma Yahuda,

<<A yuwan mesun adama a̱ yi shi,

<Ayya, mawun ma a̱na̱wun mo ulobo ma̱ va̱!>

Ayya, mawun ma a̱na̱wun mo usheli ma̱ va̱!

A yuwan mesun adama a̱ yi shi,

<Ayya, zagbain tsu!>

<Ayya, za tsugbain!>

19 A̱ ta̱ ciɗo yi tso mololi,

o to rono yi a vari yi

o ucina̱ wu na̱ntsu va̱ Urishelima.>>

20 <<A̱vu Urishelima,

gawan a̱ tyo Lebanon vu sala,

lyawa a uwwa uɗyo wa̱ wu a Bashan,

vu sala diga a Abarim,

adama a na o kototo ta̱

a̱za̱ e icigi ya̱ wu suru.>>

21 A̱mu A̱sulazuva, n rono wu ta̱ atsuvu

a mantsa ma na vu da̱na̱i na asuvu nden,

amma reve vu damma,

<<Moo polo asuvu shi!>>

A̱yi nda a̱ yi ɗa wuma wa̱ wu

diga a̱vu o tsulolobo,

vu 'yuwan ta̱ a yuwaan mu tsutoni.

22 <<Upepu wu ucira u ta̱

pura̱ azagbain a̱ wu,

aza a na a ciga nuwu waru

a̱ ta̱ 'ya̱wa̱to le tsugbashi.

Vu ta̱ gba o sowo wono nu ulamu,

adama e iwuya ya̱ wu suru.

23 A̱vu na vu ri nden a Lebanon*,

u'wa u na a yuwain na̱ ɗanga sida,

vu ta yuwan ma̱nga̱ a mantsa

ma na usuɗuwu u ta̱wa̱ nuwu,

cu'un va̱ a̱tsuma̱lima̱ a ka na

da̱nuyi teri!>>

24 Reve A̱sulazuva a damma, <<Nna̱ n ri wuma,>> Ko na̱ shi a damma a̱vu mogono Yekoniya* ulobo wa̱ Jehoyakim va Yahuda, makawani mo urotsu wu ukere usa'ani u va̱ u ɗa, na̱ ne suru n to foɗo wu,✝ 25 <<n cawu e ekere aza a na a zama wuma wa̱ wu, e ekere aza a na vaa uwwusa wovon, e ekere mogono Nebukanaza va Babila ne e ekere aza a Babila. 26 N ta vari wu a̱vu na̱ mma va̱ wu na matsan nuwu, e iɗa i ro uba̱ta̱ u na a matsan n ɗu shi, ɗe ɗa ya̱ kuwa̱. 27 Iɗa i na gba vu ri a maluwa ma na va̱a̱ ka̱mba̱ a̱tsuma̱ a̱ yi, va̱a̱ ka̱mba̱ a̱tsuma̱ a̱ yi shi.>>

28 <<Cine a yuwain Yekoniya

o o'woi meden ma na mo ɓosoi,

meden ma na za ri o ulinga na̱ yi shi!

Nye i zuwai a vari niyi,

a̱yi na̱ muwun ma̱ yi,

e iɗa i na e revei shi?>>

29 <<A̱vu iɗa, a̱vu iɗa, a̱vu iɗa!

Vu uwwa adanshi a̱ A̱sulazuva!

30 Apa ili i na A̱sulazuva adansa,

<Vu lyawa vuma nda'a

she damma za na ri na̱ limatan shi,

vuma na a̱ tsura̱ ulyuwu wa aci

a̱tsuma̱ a rana wuma wa̱ yi shi.

Adama a na babu za ro diga

a̱tsuma̱ o ugundo wa̱ yi na̱ tsura̱ ulyuwu wa aci,

babu za na a̱ da̱nu ootogu o tsugono tsa̱ Da̱wuda,

ko gba shi u yuwan tsugono a̱tsuma̱ a Yahuda.> >>