1 Apa adanshi a na a̱ ta̱wa̱i uba̱ta̱ wa̱ Irimiya diga uba̱ta̱ wa̱ A̱sulazuva, a̱tsuma̱ a a'wan a kupa o tsugono tsa̱ Zedekiya mogono ma Yahuda, za na da̱na̱i a'wan kupa na̱ kula̱ tso tsugono tso mogono Nebukanaza va Babila.✝ 2 A mantsa mo ndolo a̱soja o mogono ma Babila a̱ ka̱nda̱ruwa̱ ta̱ Urishelima nu uvon, vumava̱sula̱ Irimiya da̱na̱ ta̱ uɓa̱ruwu agalaci a̱ mɓa̱nga̱ ma aza a na a yuwusan ipiri a̱tsuma̱ o u'wa u mogono ma yahuda.

3 Agba mogono Zedekiya va Yahuda ɗa shi ɓa̱ru niyi ɗe, adansa, <<Adama a̱ nye vaa a yuwusan adanshi e ikaka? Vu damma, <Apa ili i na A̱sulazuva a dammai, n yuwan ta̱ zuzu na ma ca lyuci nda e ekere o mogono ma Babila, waru u ta lyuwa lyuci'i nu uvon. 4 Agba Zedekiya mogono ma Yahuda maa la'a diga e ekere aza a Babila shi, amma na amayun a ta cayi e ekere o mogono ma Babila, waru u ta yuwan adanshi na̱ yi una̱ nu una̱, reve waru we enei esu na̱ esu. 5 U ta tara Zedekiya a̱ tyo Babila, uba̱ta̱ u na wa̱a̱ da̱na̱ hali she na̱ n ca yi oforo, ne ɗa A̱sulazuva a dammai. Ko na̱ shi vu yuwan uvon na aza a Babila vaa lyuwa aci shi.> >>

6 Reve Irimiya usu u damma, <<Apa adanshi a na a̱ A̱sulazuva a damma numu, 7 ka̱lyuwa̱, Haname ulobo wa Shalum edenge a dada va̱ wu, u ta̱ lo a̱ ta̱wa̱ ya̱'a̱ wu u damma, <Tsula atsusa a̱ va̱ a na a̱ ri a̱tsuma̱ a Anatot, a na wo o'woi vu ri a̱ nden mee edenge a̱ va̱ a̱ zuzu, na amayun ili yi lo shi, a̱vu ɗa vu ntsayi vu tsula yi.> >>

8 <<Ɗaɗa gba ununa A̱sulazuva a dammai'i, edenge a̱ va̱ Haname ta̱wa̱i uba̱ta̱ u va̱, agalaci a̱ mɓa̱nga̱ ma̱ a̱za̱ e ipiri u dammai, <Tsula atsusa a̱ va̱ a na a̱ ri a̱tsuma̱ a Anatot na ri o upasu wa Banyami. A na wo o'woi vu ta̱ nu ucira u na va tsula yi waru wo o'wo agadu a̱ wu, vu tsula yi adama aci ya̱ wu.> >>

<<Ɗaɗa n gura revei a na a̱ yi nda adanshi A̱sulazuva a ɗa.>>

9 <<Adama o ndolo a ɗa gba n tsulai atsusa a na a̱ ri a̱tsuma̱ a Anatot diga o ukere wa Haname, mawun ma̱ a̱na̱wun ma dada va̱ o una̱ u makundatsu u azurufa ume kupa na̱ a̱za̱ a̱ cindere. 10 Reve n zuwa ukere a aatagada, a̱vu n sura nzuwulai'i, a̱vu fo n zami esu n rito azurufa'a na̱ makundatsu. 11 Reve n tara aatagada e iroci i na n tsulai uba̱ta̱'a̱ oɓolo nu udammu u na u ri pe adama atsulu'u o una̱ u wila̱ u na u ri pe a̱vu n sura za ta̱ reve n lyawa za ta̱ babu usuru, 12 reve n ca Baruk ulobo wa̱ Neriya mawun ma tsukaya ma Ma'aseya. A̱vu n ca yi aatagada'a elime a Haname mawun ma̱ a̱na̱wun ma dada va̱, oɓolo ne elime esu a na a zuwai ukere a̱tsuma̱ aatagada'a oɓolo ne elime a ama a Yahuda suru, aza a na a̱ ri nden agalaci a̱ mɓa̱nga̱ ma̱ a̱za̱ e ipiri'i. 13 Elime le ɗa n ronoi Baruk atsuvu a na dammai, 14 apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila a dammai, <Tara atagada a nzuwulai'i na a surai na̱ za na a surai shi, vu zuwa le a̱tsuma̱ o upondo u ci'in adama she a̱ la̱nga̱ wan. 15 Adama a na apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, a̱ ta̱ da̱shi tsulisa 'wa na̱ ba̱ta̱ oɓolo na̱ a̱ɗuma̱ a̱ ina̱bi e iɗa i nda.> >>

16 <<Ele lo, a mantsa ma na a̱mu Irimiya n cayi Baruk ulobo wa̱ Neriya atagada e iroci i na a tsulai uɗuma̱'a̱, reve n yuwan avasa uba̱ta̱ wa̱ A̱sulazuva n damma, 17 <O'o, A̱sulazuva, A̱sula̱! Ka̱lyuwa̱, a̱vu ɗa vu yuwain zuva ni iɗa o ure wu ukere wa̱ wu wu ucira na̱ linga va asalama a̱ wu! Babu ili i na i la'ai ucira wa̱ wu. 18 Vu tsu roco ta̱ icigi ya̱ wu i na i tsu vadala shi uba̱ta̱ a ama kpaku kupa va̱ a̱bunda̱, amma vu tsu lyawa ta̱ oforo o unusu u nan dada reme muwun. A̱sula̱ zagbain na̱ za vu ucira, za na ala a̱ yi a ɗa A̱sulazuva oɓolo a̱ a̱soja a zuva, 19 ifoɓi ya̱ wu suru i ta̱ mgbain, waru linga va̱ wu fo a̱ ta̱ mgbain. Esu a̱ wu a̱ ta̱ e inda ulinga wu uvaɗilima̱ suru, waru vu tsu tsupa ta̱ za suru a̱tsuma̱ a̱ re wuma wa̱ yi na̱ linga va̱ yi. 20 A̱vu ɗa vu yuwain iroci na̱ linga va asalama a̱tsuma̱ e iɗa ya Masar. Hali na ana'an vu ta yuwusan le a̱tsuma̱ a Isra'ila oɓolo nu uba̱ta̱ wu vaɗilima̱. Waru vu yuwan ta̱ ala a na a cuwusan na̱ yi hali acina ana'an. 21 Vu uta̱ ta̱ ama a̱ wu Isra'ila diga a̱tsuma̱ a Masar a̱tsuma̱ e iroci yi linga va asalama, oɓolo nu ukere wu ukadu nu ukere wu ucira lon, oɓolo nu u casu u wovon. 22 Reve vu ca le iɗa i na vu kucinayi nkaya n le na va ca le. Iɗa i ɗa i na i ri e yee yeneshe maani ni ishiki lon. 23 Reve nkaya nle n uwwa a usa iɗa'a. Amma a yuwan tsutoni nu uɗyo wa̱ wu shi, waru a yuwan mmalu a̱tsuma̱ o ure u wila̱ wa̱ wu shi. Agba a yuwan tsutoni ni ili i na vu damma n le shi. Adama o ndolo a ɗa vu ta̱wa̱yi na addama a nda suru a aci e le. 24 Ka̱lyuwa̱, agba a̱ yi ɗa nda o ɓolotoi ɗe ma̱bula̱ adama a katsa o ɓoso ukari u lyuci'i adama o uvon. E ekere a matsun me pe'eni na ambulu na̱ mɓa̱la̱ a ca ta̱ lyuci va̱ Urishelima e ekere aza a Babila aza a na a̱ ri o uvon na̱ yi gogo. Ili i na vu dammai i fara ta̱, ununa vee eneshe gogo.> >> 25 Amma na̱ ne suru, A̱sulazuva zagbain, vu damma mu ta̱, <<Tsula uɗuma̱'a̱ ni ikebe, reve n zami aza a na e isawan mu esu,>> ko na wo o'woi a ta ca lyuci'i e ekere aza a Babila.

26 Reve A̱sulazuva a yuwan adanshi na̱ Irimiya u damma, 27 <<Ka̱lyuwa̱, a̱mu ɗa A̱sulazuva A̱sula̱ a vaɗilima̱. Ili i ta̱ lo na la'ai ucira u va̱? 28 Adama o ndolo, apa ili i na A̱sulazuva a dammai, n yuwan ta̱ zuzu na ma ca lyuci nda e ekere aza a Babila, oɓolo na̱ Nebukanaza mogono ma Babila za na a lyuwai nu uvon. 29 Aza a Babila a na a̱ ri a̱ nla̱ngi na̱ lyuci'i a̱ ta̱ ta̱wa̱ a daɓa yi akina reve a̱ kula̱to yi, oɓolo na̱ 'wa uba̱ta̱ u na ama a zuwa numu n yuwain upan, a̱tsuma̱ o ure wu ukula̱tosu wi ili i ma̱guru zuva vi igungu adama a Ba'al, reve fo o oco kucci vi ili yo oso uba̱ta̱ u musula̱ n ro. 30 Na amayun, a ama a Isra'ila na̱ Yahuda a yuwan ulinga u ro elime a̱ va̱ shi, she iwuya goon. Babu ili i na a yuwain she de a na a zuwa numu n yuwain upan adama a linga ve ekere le. Ne ɗa A̱sulazuva a dammai. 31 Adama a na diga a mantsa ma na a suwa niyi hali acina gogo, lyuci nda'a u 'ya̱sa̱n ta̱ upan wu usuɗuwu u va̱ lon. Ko shi a 'yuwan a ciga o kototo le diga elime a̱ va̱. 32 Ama a Yahuda na̱ Isra'ila a zuwa mu ta̱ n yuwan upan na̱ ngono n le na azagbain e le na̱ nan ganu e le na ama̱sula̱ e le na ama a Yahuda na̱ nda̱na̱ta̱ ma̱ Urishelima suru adama e iwuya i na a yuwain. 33 A vadalaa mu ta̱ ucina̱, agba a ca mu urewesu u le shi. Ko na wo o'woi n ritosu le ta̱ kuci, o poloo mu atsuvu shi, waru a̱ usu tsuɓari tsa̱ a̱ va̱ shi. 34 A̱ shuwa̱ ta̱ musula̱ n le me idaba a̱tsuma̱ o u'wa u na e ɗesu na ala a̱ va̱, reve o o'woto yi ili yi idaba.✝ 35 A suwa ta̱ ba̱ta̱ va̱ a̱ga̱nda̱ a̱ma̱li a Ba'al o Uka̱ri wa̱ Ben Hinom, adama a ca muwun nle olobo ne esheli kucci uba̱ta̱ u musula̱ ma̱ Mole. Agba a̱mu n damma le a yuwan ne shi, waru fo n yuwan majiyan me ili yi idaba i nda shi. Ne ɗa a zuwai Yahuda yuwain unusu.>>✝

36 Agba apa ili i na A̱sulazuva A̱sula̱ a Isra'ila a dammai adama a̱ lyuci nda, <<A̱tsuma̱ o ure u matsun me pe'eni na ambulu na̱ mɓa̱la̱ n ɗa a ca yi e ekere o mogono ma Babila, 37 na amayun, n ta̱ e ifoɓi i na moo ɓoloto le, diga o ukosu wu ba̱ta̱ na m gba̱ra̱ nle a̱tsuma̱ o upan u va̱, nu upan wu usuɗuwu u va̱. N ta̱ gba ka̱mba̱to le uba̱ta̱ u nda, reve waru n zuwa le a̱ da̱nu gbaga. 38 O to o'wo a ama a̱ va̱, reve a̱mu fo mo o'wo A̱sula̱ e le. 39 N ta ca le okolo a̱ ta̱ na̱ majiyan ma̱ ta̱, adama mantsa suru a̱ da̱na̱ a uwwusa wovon u va̱, adama u yuwaan le urana, ele na̱ muwun nle na a matsan a̱ca̱pa̱ e le. 40 N ta yuwan nzuwulai n na n ri nu ukosu shi ne e le adansa, ma̱a̱ kuɗa̱ o roco le isa'ani shi. Waru n ta zuwa le a uwwa wovon u va̱, adama she a vadala diga e itoni i va̱ wan. 41 N ta yuwan ma̱za̱nga̱ a na moo rocosu le isa'ani, na amayun n ta zuwa le a̱ shuwa̱ a̱tsuma̱ e iɗa i nda, no okolo a̱ ta̱ na̱ wuma u va̱ suru.>>

42 <<Apa ili i na A̱sulazuva a dammai, ununa n ta̱wa̱i na̱ cu'un va̱a̱ a̱ba̱jini addama a nda a aci a ama a nda, ne ɗa fo ma̱a̱ ta̱wa̱a̱ le ni isa'ani i na n yuwaan nle nzuwulai suru. 43 A̱ ta̱ da̱shi tsulisa atsusa a̱tsuma̱ a nɗa nda na i dammai, <Okongo a ɗa, u ri na̱ vuma ko nama shi, adama a na a ca yi ta̱ e ekere aza a Babila. 44 A ta tsula atsusa'a na̱ azurufa, waru a ta zuwa ukere a aatagada a nzuwulai'i a̱vu a sura yi esu aza a na e isawai'in diga o upasu wi iɗa ya Banyami, na̱ mulyuci na ri uka̱nda̱ruwu na̱ Urishelima na̱ a̱tsuma̱ e ilyuci ya Yahuda, oɓolo ni ilyuci i na i ri e iɗa ya aagaɗi, ni ilyuci i na i ri za̱la̱ va agaɗi, ni ilyuci i na i ri Nege. Adama a na n ta̱ ka̱mbuwa̱a̱ le na aba'un e le. Ne ɗa A̱sulazuva a dammai.> >>