1 Reve adanshi A̱sulazuva a̱a̱ ta̱wa̱ ya̱'a̱ va̱ ana, 2 <<She vu yuwan lolo vu matsan muwun mo olobo ne esheli uba̱ta̱ u nda wan. 3 Adama a na apa ili i na A̱sulazuva a dammai a aci a̱ muwun mo olobo ne esheli a na a matsain e iɗa i nda'a, oɓolo na̱ a̱ma̱ci a na a matsan nle na ali a na a matsan nle fo. 4 A̱ ta̱ kuwa̱ na̱ mɓa̱la̱ n wuya. Agba babu za na a̱ shon adama o ukwisa̱ u le, ko a̱ ciɗo le. O to o'wo edemu. Matsun me pe'eni na ambulu a ɗa o una le, a̱vu a̱kwa̱kwa̱ e le o o'wo ilyalya yi nnunu oɓolo ni inama yu una.>>

5 Apa ili i na A̱sulazuva a̱ da̱shi dammisai ana, <<She vu uwa o u'wa u na a yuwusan mesun mo ukwa̱, ko vu 'ya̱wa̱ uba̱ta̱ u na a yuwusan a̱tsuma̱la̱ngu, she vu la̱nga̱ a̱a̱tsuma̱ adama e le wan, adama a na n tawa ta̱ ɗe aba'un a̱ va̱, ni icigi i va̱, ni iliyali i va̱, diga uba̱ta̱ wa ama a nda.>> Ne ɗa A̱sulazuva a dammai. 6 <<Zagbain na̱ mawun suru a̱ ta̱ kuwa̱ e iɗa i nda. Agba a̱ ciɗo le shi, ko a yuwan a̱tsuma̱la̱ngu adama e le shi. Agba babu za na a kyu'wan lipu va̱ yi, ko u puna ogbondo adama e le, adama a na A̱sulazuva a̱ usuwa̱ le a yuwan ne shi.✝ 7 Agba za lo na wa ca za vu nden n wirota̱ ilyalya adama o ucasu wa adanshi adama a̱ a̱kwa̱kwa̱'a̱ shi, ko shi za ro ca ili yo oso adama u ca dada ko mma va̱ yi adanshi shi. 8 She vu uwa o u'wa u na a yuwusan a̱buki vu da̱nu, adama vu lyuwa vu sowo wan. 9 Adama a na apa ili i na A̱sulazuva oɓolo a̱ a̱soja a zuva, A̱sula̱ a Isra'ila a dammai, ka̱lyuwa̱, e esu a̱ wu a ɗa, waru a̱tsuma̱ a rana va̱ wu ɗa, ma̱a̱ ta̱wa̱a̱ nu ukosu wu uɗyo u mere na̱ ma̱za̱nga̱, wu uɗyo u vali vu ka sa'avu na̱ ka sa'avu diga uba̱ta̱ u nda.>>

10 <<A mantsa ma na vu dammai ama a nda idanshi i nda suru, a̱ ta̱ gba a damma wu, <Nye i zuwai A̱sulazuva a lyawai a̱ba̱jini a̱ meleshe ma nda a aci a̱ tsu? Cu'un vi iwuya i ne ɗa tsu yuwain? Cu'un vu unusu u ne ɗa tsu yuwayin A̱sulazuva A̱sula̱ a̱ tsu?> 11 A̱vu vu damma le cu'un nda fara ta̱, <Adama a na nkaya n ɗu mu kasa ta̱ na̱ mu,> Ne ɗa A̱sulazuva a dammai. <A̱vu a̱ kuru musula̱ n ro, a̱ ka̱ɗa̱to wa̱ le a yuwaan le a̱ga̱nda̱. Reve a kasa na̱ mu, agba a yuwan tsutoni na̱ wila̱ u va̱ shi. 12 Agba a̱ɗu i la'a ta̱ yuwan iwuya ula'awu na̱ nkaya nɗu. Ka̱lyuwa̱, cine za suru a̱tsuma̱ a̱ɗu a̱ ri a̱ kurusu aciyogbamu o okolo a̱ yi, o una̱ u na aa yuwan mu tsutoni. 13 Adama o ndolo, n ta̱ vari ɗu alanga diga e iɗa i nda a̱ tyo e iɗa i ro, e iɗa i na ko a̱ɗu ko nkaya n ɗu n revei shi. Ɗe uba̱ta̱'a̱ i ta̱ yuwaan musula̱ n ro tsugbashi usana na ayin, adama a na moo roco ɗu iliyali shi.> >>

14 Amma a̱vu A̱sulazuva a damma, <<Rana ta̱ lo a̱ ta̱wa̱, o una̱ u na a̱a̱ da̱shi damma, <Nna̱ A̱sulazuva a̱ ri wuma, za na o uta̱yi aza a Isra'ila diga e iɗa ya Masar,> 15 u ta la'aa le a damma, <N na̱ A̱sulazuva a̱ ri wuma, za na uta̱yi aza a Isra'ila diga e iɗa yu ugana na̱ diga a nɗa n na waru u gba̱ra̱ nle suru,> Adama a na n ta̱ ka̱mbuwa̱ le e iɗa i na n cayi nkaya nle.

16 <<Amma gogo n ta̱ lyungu n'yuwatan ma̱ a̱bunda̱, aza a na e reme ama a nda, tsa̱ a̱za̱ e mereme ma mugula,>> ne ɗa A̱sulazuva a dammai. <<Na̱ a̱yi ndolo koto, reve n lyunguwisa̱ e ɗe a̱za̱ o ugenge a̱bunda̱ a̱ ta̱wa̱, a yuwan ugenge u le tsa̱ a̱za̱ o ugenge, diga aatali suru na nsasan na agaɗi biti, hali fo na̱ a̱bunu atali. 17 Adama a na esu a̱ va̱ a̱ ta̱ a̱ re le suru, a̱ ri usokowu ya̱'a̱ va̱ shi. Waru nusu le a̱ ri usokowu esu a̱ va̱ shi. 18 N ta tsupa le udoɓonuwu, o una̱ wi iwuya i le nu unusu u le, adama a na a̱ lungusa̱ ta̱ iɗa i va̱, na̱ musula̱ n na n ri wuma shi vi idaba i le. Reve fo o shiton ili ya agadu a̱ va̱ na̱ musula̱ n le vi idaba.>>

19 A̱sulazuva, a̱vu ɗa ucira u va̱

nu uba̱ta̱ wu upa'atan wu ucira u va̱,

uba̱ta̱ o upa'atan u va̱

a mantsa ma̱ a̱tsuma̱lima̱,

uba̱ta̱ wa̱ wu u ɗa nɗa ma̱ ta̱wa̱,

diga o utyo wu uvaɗi a̱vu a damma,

<<Agadu a na nkaya n tsu n ri na̱ yi,

a̱yi ɗa musula̱ me epen goon,

a̱ma̱li a̱ pere a na

a yuwaan nle ulinga shi.

20 Vaɗilima̱ ta gura yuwaan aciya̱yi musula̱?

Ee, amma ele ndolo gba musula̱ n ɗa shi!>>

21 A̱vu A̱sulazuva a̱ usu u damma,

<<Adama o ndolo gba

n ta lyawa le a̱ reve

nu ucira u va̱ nu ukadu u va̱,

waru e te reve ana,

ala a̱ va̱ a ɗa A̱sulazuva.>>