1 A̱tsuma̱ a aa'wan a̱ na̱shi o tsugono tsa̱ Jehoyakim ulobo wa̱ Josiya mogono ma Yahuda, A̱sulazuva a yuwan ta̱ adanshi na̱ Irimiya vumava̱sula̱✝ u damma, 2 <<Tara aatagada o ukutsuluwu vu ɗana idanshi i na n damma nuwu adama a Isra'ila na̱ Yahuda oɓolo na akapi a nɗa suru. Vu ɗana suru ili i na n damma nuwu suru diga o urana u na n yuwain adanshi na̱ a̱vu, diga a rana tsugono tsa̱ Josiya hali acina ana'an. 3 U ta gura o'wo nna̱ u'wa wa̱ Yahuda uwwa addama a na n foɓoo nle suru na n foɓoi a aci e le, u ta gura o'wo za suru a̱tsuma̱ e le ta gura vadala diga a̱tsuma̱ o ure wi iwuya ya̱ yi, adama n yuwaan le gafura vi iwuya i le na̱ nusu le.>>

4 Adama o ndolo ɗaɗa Irimiya ɗeyi Baruk ulobo wa̱ Neriya, ɗaɗa u dansaa niyi idanshi i na A̱sulazuva a damma niyi suru, reve Baruk ɗana le pe a̱tsuma̱ aatagada o ukutsuluwu. 5 A̱vu Irimiya damma Baruk, <<A putsa mu ta̱ a̱ 'ya̱wa̱ a̱tsuma̱ a̱ A̱a̱'isamapaɗa a̱ A̱sulazuva. 6 Adama o ndolo, a̱vu vu ka̱ra̱ a̱ 'ya̱wa̱ a̱ A̱a̱'isamapaɗa a̱ A̱sulazuva a̱tsuma̱ o urana wa akuli, reve vu yuwaan ama ɗesununa̱ diga a̱tsuma̱ e idanshi ya̱ A̱sulazuva a na n dansaa nuwu'u. Vu yuwan ɗesununa̱ atsuvu a ama a Yahuda aza a na a̱ ta̱wa̱i diga e ilyuci i le. 7 U ta gura o'wo a yuwaan A̱sulazuva ipati yi izami yi iliyali, a̱vu za suru vadala diga a̱tsuma̱ a̱ re vi iwuya ya̱ yi, adama a na upan nu upan wu usuɗuwu u na a yuwain adanshi a aci a ama a nda ili i ma̱gigi i ɗa.>> 8 A̱vu Baruk ulobo wa̱ Neriya ka̱ra̱ u yuwan suru ili i na vumava̱sula̱ Irimiya damma niyi u yuwan. A̱vu u ɗe idanshi ya̱ A̱sulazuva nu una̱ diga a̱tsuma̱ aatagada o ukutsuluwu a̱tsuma̱ a̱ A̱a̱'isamapaɗa a̱ A̱sulazuva.

9 A̱tsuma̱ o woto wa̱ kucci wa aa'wan a tawun o tsugono tso mogono Jehoyakim ulobo wa̱ Josiya va Yahuda ɗa a lapai ulingi adama a yuwan akuli elime a̱ A̱sulazuva. Akuli'i u reme ta̱ fo na̱ nda̱na̱ta̱ ma̱ Urishelima suru, oɓolo na ama a na a̱ ta̱wa̱i diga e ilyuci ya Yahuda. 10 Reve Baruk yuwan ɗesununa̱ atsuvu ama'a suru yi idanshi ya̱ A̱sulazuva diga o una̱ wa̱ Irimiya, aza a na u ɗanai a̱tsuma̱ a aatagada o ukutsuluwu'u. A̱vu u ɗe yi a̱tsuma̱ o u'wa wa̱ A̱sulazuva o ukobu wa̱ Gemariya ulobo wa̱ Shafa za vi iɗana. Ukobu'u u da̱na̱ ta̱ lo zuzu nu uba̱ta̱ wu Uwata Usa'avu wu Una̱ntsu wu u'wa wa̱ A̱sulazuva.

11 Ana Mikaya ulobo wa̱ Gemariya ulobo wa̱ Shafa uwwai suru idanshi ya̱ A̱sulazuva a na a ɗanai a̱tsuma̱ a aatagada'a, 12 ɗaɗa u ka̱ra̱i a̱ cipa̱ a̱ tyo aasula za vi iɗana mogono, uba̱ta̱ u na azagbain a̱ ri nden suru, Elishama za vi iɗana na̱ Delaya ulobo wa̱ Shemaya na̱ Elinatan ulobo wa Akbo na̱ Gemariya ulobo wa̱ Shafa na̱ Zedekiya ulobo wa Hananiya oɓolo na akapi a azagbai'in suru. 13 Ana Mikaya ka̱mbuwa̱ n le idanshi i na wu uwwai Baruk yuwayin ama ɗesununa̱ suru diga a̱tsuma̱ aatagada o ukutsuluwu, 14 a̱vu azagbai'in suru a̱ lyungu Yehudi ulobo wa̱ Netaniya, ulobo wa̱ Shelemiya ulobo wa̱ Kush, na waa damma Baruk ana, <<Vu tara aatagada a na vu yuwayin ama ɗesununa̱ reve vu ta̱wa̱.>> Ɗaɗa Baruk ulobo wa̱ Neriya ka̱ra̱i a̱ 'ya̱wa̱ uba̱ta̱ u le na aatagada o ukutsuluwu'u o ukere wa̱ yi. 15 Reve a damma yi, <<Da̱nu vu yuwan tsu ɗesununa̱ tsu uwwa.>> Ɗaɗa gba Baruk yuwaan le ɗesununa̱, a̱vu a uwwa na atsuvu e le. 16 A mantsa ma na a uwwai idanshi i nda suru, reve a̱ ka̱la̱la̱i a̱tsuma̱ o wovon, a̱vu a damma Baruk, <<Ili i ro yi lo shi, tsu ta̱ ka̱mbuwa̱ mogono idanshi i nda suru.>> 17 Reve ece Baruk, <<Damma tsu, cine vu yuwain vu ɗanai idanshi i nda suru? Irimiya ɗa dansaa nuwu?>>

18 Reve Baruk usu u damma, <<Ee, a̱ yi ɗa u dansaa numu idanshi i nda'a, a̱vu a̱mu n ɗanasa le na̱ maɗanutsu a̱tsuma̱ a aatagada.>>

19 Reve azagbai'in a damma Baruk, <<Suma vu pa'an, a̱vu na̱ Irimiya! Waru she i lyawa nanza reve uba̱ta̱ u na i pa'ain wan.>>

20 A mantsa ma na a zuwai aatagada o ukutsuluwu aasula a̱ Elishama za vi iɗana, reve a̱ ka̱ra̱ a̱ tyo uba̱ta̱ u mogono o ukowo u na u ri a̱tsuma̱ o u'wa u mogono, a̱vu a̱ ka̱mbuwa̱ yi ili'i suru. 21 A̱vu mogono ma̱ lyungu Yehudi u tara aatagada o ukutsuluwu'u a̱ ta̱wa̱, diga aasula a Elishama za vi iɗana, reve u yuwaan mogono ɗesununa̱ oɓolo na azagbain o mogono a na a̱ ri mishin zuzu na̱ yi. 22 O woto wa̱ kucci u ɗa u da̱na̱i a mantsa mo uta̱nu, waru mogono'o u da̱na̱ aasula a na u tsu da̱nu a mantsa mo uta̱nu, a uwwusa sheshen wa akina a na a̱ ri pe a̱tsuma̱ a mataɗa. 23 A mantsa ma na Yehudi ɗeyi nu una̱ u ka̱ra̱ ugeru uta'atsu ko a̱za̱ a̱ na̱shi shi diga a̱tsuma̱ aatagada'a, reve mogono ma tara matsun mo ulapulu u maɗanutsu, u paɗa upasu wa aatagada'a a̱vu u tsun yi pe a̱tsuma̱ akina a na a̱ ri a̱tsuma̱ a mataɗa'a, reve u yuwusan ne hali u kula̱to aatagada o ukutsuluwu'u suru. 24 Na̱ ne suru, ko mogono ko azagbain a̱ yi aza a na a uwwai idanshi ya aatagada a nda, ko za da'wan ko wukara utugu wa̱ yi adama u roco a̱tsumola̱ngu shi. 25 <<Ko na o'woi Elinatan na̱ Delaya na̱ Gemariya a̱ pati ta̱ mogono she u ukuloto aatagada'a wan, na̱ ne suru u poloo le atsuvu shi.>> 26 <<O una̱ u ndolo, reve mogono ma damma ulobo wa̱ yi Yerameye na̱ Seraya ulobo wa̱ Aziriyel na̱ Shelemiya ulobo wa̱ Abideyel e reme Baruk za vi iɗana na̱ Irimiya vumava̱sula̱. Amma a̱vu A̱sulazuva o soko le.>>

27 A mantsa ma na mogono ma̱ kula̱toi aatagada o ukutsuluwu a na a̱ ri ni idanshi i na Irimiya dansaa yi Baruk ɗana, reve a̱ A̱sulazuva a yuwan adanshi na̱ Irimiya ana, 28 <<Vu tara aatagada o ukutsuluwu o ro a̱vu vu ɗana idanshi i na i da̱na̱i aatagada o ufaru e de ɗe, za na mogono Jehoyakim va Yahuda kula̱toi.>> 29 Reve vu damma mogono Jehoyakim va Yahuda, <<apa ili i na A̱sulazuva a dammai, a̱vu ɗa vu kula̱toi aatagada o ukutsuluwu a nda a̱vu vu damma, <adama a̱ nye vu ɗanai pe a̱tsuma̱ a̱ yi ana, ili i ro yi lo shi mogono ma Babila ma̱ ta̱ ta̱wa̱ u kototo iɗa i nda, a̱vu waru wu una a ama a̱ yi ni inama ya̱ yi?> >> 30 <<Adama o ndolo apa ili i na a̱ A̱sulazuva a dammai adama o mogono Jehoyakim va Yahuda. Va̱a̱ tsura̱ za ro diga o ugundo wa̱ wu na a̱ da̱nu ootogu o tsugono tsa̱ Da̱wuda shi. A ta vari a̱kwa̱kwa̱ a̱ lipu a̱ wu alanga adama u sowo urana reve u sowo uta̱nu waru na ayin. 31 N ta ca yi oforo oɓolo na̱ muwun ma̱ yi na aza a na a yuwusaan yi a̱ga̱nda̱ adama e iwuya i le. N ta̱ ta̱wa̱ na addama a aci e le suru na n yuwain adanshi aci a̱ yi, oɓolo na̱ nda̱na̱ta̱ ma̱ Urishelima na̱ Yahuda. Adama a na i 'yuwain a uwwa.>>

32 Reve Irimiya tara aatagada o ukutsuluwu o ro, u ca Baruk za vi iɗana ulobo wa̱ Neriya, nu u dansaa niyi ili i na A̱sulazuva a damma niyi, a̱vu Baruk ɗana a̱tsuma̱ aatagada'a suru idanshi i na i da̱na̱i a̱tsuma̱ aatagada a na mogono Jehoyakim va Yahuda kula̱toi a̱tsuma̱ akina. Reve a̱ da̱shi yuwisan adanshi na̱ a̱bunda̱ cu'un vu za vu ufaru.