1 <<A̱ shi a damma,

a̱mu na aciya̱va̱

oko'o a̱ mini a ɗa,

esu a̱ va̱ waru iɓula i mini,

n shi ta̱ shon usana na ayin

adama ama a̱ va̱ a na o unai.

2 O'o, a̱ shi a damma

n ta̱ ɗe a̱tsumona

uba̱ta̱ u na aza

a mmalu a̱ shi a cu'wan,

n she ta̱ a lyawa ama a̱ va̱

n ka̱ra̱ adama n lyawa le,

adama a na suru nle

a̱za̱ a̱ tsipere a ɗa,

iɓolo yaa a ama

o ulambu wa̱ a̱ɓula̱.>>

3 <<O foɓo ta̱ elentsu e le tsu utan

azama a na e tewin epen,

agba a̱tsuma̱ amayun a ɗa

a̱ tsura̱sa̱ ulyuwu we elime

a̱tsuma̱ e iɗa'a shi.

A̱ tsu 'yon ta̱ diga o unusu u nda

a̱ tyo o unusu u nde'en,

agba e reve mu shi,>>

ne ɗa A̱sulazuva a dammai.

4 <<Vu yuwan ugbozu

ni i'utsa̱ ya̱ wu,

she vu soɗuwoo mawun

ma̱ a̱na̱wun ma̱ wu

ma̱tsa̱n wan,

adama a na mawun

ma̱ a̱na̱wun suru

za yipalishi ɗa,

i'utsa̱ waru suru

za vu ulungusu wa aala a ɗa.

5 I'utsa̱ i tsu luluma̱ ta̱ i'utsa̱

agba babu za na

tsu dansa amayun.

O rito ta̱ elentsu e le

mayan me epen,

reve a̱ kuna̱to aciyele

na̱ mayan mo unusu.>>

6 <<A̱vu Irimiya, vu ta̱ nden

e memere ma aza a yipalishi,

a̱tsuma̱ a yipalishi i le

a̱ kuɗa̱ ta̱ a na e reve mu,>>

ne ɗa A̱sulazuva a dammai.

7 Adama o ndolo apa ili i na A̱sulazuva

oɓolo a̱ a̱soja a zuva a dammai,

<<Ka̱lyuwa̱i, n ta̱ jeruweto le

reve n lyungwa̱ le,

adama a na, nye ɗa m buwai a yuwan

adama o unusu wa a ama a̱ va̱?>>

8 <<Elentsu e le iliya i ɗa i tsukono,

u ta dansa epen.

Nu una̱ wa̱ yi u ɗa

u tsu dansaa moron ma̱ nden ma̱ yi

adanshi asuvu nden,

amma a̱tsuma̱ okolo a̱ yi,

maza ma ɗa woo foɓuso yi.>>

9 Reve A̱sulazuva a damma,

<<Wuntsaa n ca le oforo

adama a nda shi?

Wuntsaa na ma tsupa a aci

a̱ cu'un vu nɗa nda shi?>>

10 <<N ta̱ shon, mo oruwo, adama a nsasan,

a̱vu waru n yuwan a̱tsumola̱ngu

adama o uba̱ta̱ wa alyuna a̱tsumona.

O o'wo ta̱ okongo

waru babu za na tsu kuru pe,

agba a tsu uwwa mesun me inan pe shi,

nnunu n suma ta̱,

inama suru i bete'we ta̱.>>

11 <<N to o'wo to Urishelima edemu okongo,

uba̱ta̱'a̱ u to o'wo uba̱ta̱

wu nven yi musa̱n yu una.

Waru n ta̱ ka̱mba̱to

ilyuci ya Yahuda o o'wo ofoli,

adama o ndolo babu za na a̱ da̱nu ɗe.>>

12 Reve a̱mu Irimiya n yuwan yeci n damma, <<Vuma ne ɗa ri nu ugbozu wa̱ a̱bunda̱ na waa gura reve ili i nda? Zane ɗa A̱sulazuva a zuwai na waa gura ca ucuɗuwu u nda? Nye i zuwai a̱ lungusa̱i iɗa'a wo o'woi okongo tsa̱ a̱tsumona hali na za a gura ɓatsa pe shi?>>

13 Reve A̱sulazuva a damma, <<Ili ya nda i fara ta̱ adama a na a lyawai wila̱ u va̱, za na n zuwaa nle a̱ kuru, a yuwaan mu tsutoni ko o toni wila̱ u va̱ shi. 14 Na̱ ne suru, reve a yuwan aciyogbamu, a̱ kuru majiyan mo okolo e le aa yuwusaan Ba'al a̱ga̱nda̱, cine nkaya n le n rito nle.>> 15 Adama o ndolo apa ili i na A̱sulazuva o oɓolo a̱ a̱soja a zuva A̱sula̱ a Isra'ila a dammai. <<Ka̱lyuwa̱i, n ta zuwa ama a nda a lyuwa ilyalya yo okono waru o sowo mini ma yaza. 16 N ta̱ bete'we le a̱tsuma̱ a nɗa, za na e le ko nkaya n le n revei shi, waru n ta gbagba le na̱ matsun me pe'eni, hali she na̱ n kototo le.>>

17 Apa ili i na A̱sulazuva

oɓolo a̱ a̱soja a zuva a dammai,

<<Ka̱lyuwa̱i gogo! Ɗeyi a̱ma̱ci a na a̱ ri

a̱ nden n wiruta̱ a̱ ta̱wa̱,

a̱vu fo i lyunguwa̱a̱ a̱ a̱ma̱ci

a na a gurai mesun a̱ ta̱wa̱.>>

18 <<Lyawa le a̱ ta̱wa̱ gogo,

adama a yuwan mesun adama a̱ tsu,

hali she ne esu a̱ tsu a shiwan na aɓara

hali a̱ga̱pa̱na̱ a̱ tsu waru e re'we na̱ mini.>>

19 <<A uwwa ta̱ mesun ma̱ a̱tsumola̱ngu

diga Sihiyona,

<O'o! Ka̱lyuwa̱ cine o kototo n tsu!

Ka̱lyuwa̱ ne'e cu'un va̱ a̱ba̱jini

o wono a na tsu sowoi!

Ko na̱ shi tsu ciga tsu 'yuwan

tsu lyawa iɗa'a,

adama a na 'wa tsu

o o'wo ta̱ okongo.> >>

20 <<Gogo a̱ɗu a̱ma̱ci,

uwwai adanshi a̱ A̱sulazuva,

i polo atsuvu e idanshi yu una̱ ya̱ yi.

I rito muwun me esheli n ɗu

mesun mo a̱tsumola̱ngu

za suru rito moron ma̱ nden ma̱ yi,

ishipa ya̱a̱ a̱tsumola̱ngu.

21 Ukwa̱ u gawan ta̱ a̱ tyo

uba̱ta̱ wu usowoto wu upepu u tsu,

hali u uwa a̱ ba̱ta̱ vu ucira tsu wu una

muwun diga a̱tsuma̱ a̱ re,

waru wu una ta̱ muwun mo olobo

diga a̱tsuma̱ agalaci a̱ lyuci.>>

22 Vu damma,

<<Apa ili i na A̱sulazuva a dammai,

<a̱kwa̱kwa̱ a̱ lipu a ama o to oco

tse everi a agalaci,

tsa̱ moɓolo me ishina

na za vu ugasa kotoi kya'an,

waru za lo na wo ɓoloto le shi.> >>

23 Apa ili i na A̱sulazuva a dammai,

<<She za vu ugbozu yuwan

uvaɗu nu ugbozu wa̱ yi wan,

ko za na ri nu ucira yuwan

uvaɗu nu ucira wa̱ yi wan,

ko za vu utsuru yuwan

uvaɗu nu utsuru wa̱ yi wan,

24 amma lyawa za na

cigai na wa yuwan uvaɗu

u yuwan uvaɗu e ili ya nda,✝

a na u ri nu ugbozu waru u reve numu,

a na a̱mu ɗa A̱sulazuva,

za na tsu roco isa'ani na amayun,

oɓolo na̱ a̱ɓula̱ a̱tsuma̱ o uvaɗi,

adama a na a̱ cu'un vi ili i ndolo i ɗa

n tsu uwwusa uyo'o,

ne ɗa A̱sulazuva a dammai.>>

25 <<Gogo rana ta̱ lo a̱ ta̱wa̱,>> ne ɗa A̱sulazuva a dammai, <<ana ma̱a̱ ge'eto aza a na a paɗai uryumbu u lipu goon suru, 26 aza a Masar na aza a Yahuda na̱ a̱za̱ a̱ Edom na aza a Amon na̱ a̱za̱ a̱ Mowa na aza a na a̱ ri nden o upasu wa̱ a̱tsumona, aza a na a̱ ri e iɗa ya alanga. Adama a na nɗa nda suru a̱za̱ o ulambu wa̱ a̱ɓula̱ a ɗa, hali fo nu u'wa wa Isra'ila suru a̱za̱ o ulambu wa̱ a̱ɓula̱ o okolo a ɗa.>>