1 A̱sulazuva a damma ta,

<<A̱ she'en ta̱ unusu wa aza a Yahuda

na̱ maɗanutsu ma̱ rumu vu ugba̱mu.

A ɗana ta̱ nusu le na aɓaci

aatali na ri tsa agali o okolo e le.

A ɗana ta̱ nusu le o okolo e le,

na avana a masa'a mo ukula̱tosu u kucci u le.

2 Ama e le fo a ta cuwusan

na̱ musa'a na̱ a̱shuwutsu a Ashera,

zuzu na̱ ɗanga na ri kpa̱la̱m

ni irumbu pici,

na̱ zuva va agaɗi biti,

3 na̱ zuva vu nsasan n va̱ mi iɗa'a,

nu utsuru u ɗu suru

nu uzuwa u ɗu suru,

n ta zuwa le o o'wo itana

i na a̱ pura̱i uba̱ta̱ uvon,

oɓolo na̱ ba̱ta̱ va̱ a̱ga̱nda̱ a̱ a̱ma̱li a̱ ɗu,

adama o unusu u na u ri ba̱ta̱ suru

a̱tsuma̱ e iɗa i ɗu.

4 Adama a̱ nusu ɗu i ta lamba

agadu a na n ca nɗu,

n ta zuwa ɗu tsugbashi

e ekere a n'yuwatan n ɗu

e iɗa i na i revei shi.

Adama a na i 'ya̱sa̱n ta̱ upan u va̱

waru u ta lyuwa elime

na̱ ma̱kula̱ tsa akina hali hali.>>

5 Apa ili i na A̱sulazuva a dammai,

<<Una̱ u te reme vuma na zuwai ucira

wa̱ yi e ekere a vaɗilima̱,

za na zuwai ucira wa̱ yi a̱ lipu goon,

za na waru okolo a̱ yi

a vadalaa yi A̱sulazuva ucina̱.

6 U to o'wo tsa atsusa a̱tsumona,

wee ene ulyuwu we elime

a mantsa ma na u ta̱wa̱i shi,

u ta̱ da̱nu uba̱ta̱ o u'yewu a̱ a̱tsumona,

e iɗa ya akpaɗi uba̱ta̱ u na za ri shi.>>

7 <<Amma za va aba'un ɗa za na aa zuwusa

ucira wa̱ yi uba̱ta̱ wa̱ A̱sulazuva,

za na A̱sulazuva a ɗa ucira wa̱ yi.

8 U to o'wo tsu uɗanga

u na a̱ shuwa̱i zuzu nu uɗolu,

na buba̱ruwa̱i aralu a̱ yi a̱ tyo a̱ mini'i,

u tsu uwwa wovon a mantsa ma na

usuɗu u ta̱wa̱i shi,

a̱vu'un a̱ yi a̱ tu uta̱nu mantsa biti.

Ili i tsu ɓa̱la̱ yi a mantsa mo u'yewu shi,

waru u tsu bula̱ a ca muwun shi.>>

9 <<Okolo a la'a ta̱ ili suru nsata,

waru tapu ɗa u ri ni iwuya.

U la'a ta̱ ucira u na za o'wo gbaga,

zane ɗa a gura reve yi?

10 <<A̱mu A̱sulazuva n tsu

petelyuwe ta̱ okolo,

reve mi idana majiyan,

adama n tsupaa za suru

a̱tyo e re wuma wa̱ yi

na̱ linga va̱ yi.>>

11 <<Tsa manunu ma na ma̱ va̱pa̱i okowo

a na a̱ ri a̱za̱ a̱ yi shi,

ne ɗa u ri e ekere a vuma na tsura̱i utsuru

o ure u na u ri babu ulobonu.

O uɓatsulai u wuma wa̱ yi

utsuru'u u ta kakasa na̱ a̱yi,

acina ukosu waru u to o'wo ulo.>>

12 Reve n damma,

A̱sulazuva, diga ɗe o ufaru

vu ta̱ nden o ootogu o tsugono

tsa tsugbain tsa̱ wu ɗe zuva,

waru a̱vu ɗa uba̱ta̱ o upa'atan u tsu.

13 <<A̱sulazuva uzuwu wo okolo a Isra'ila!

Aza a na a lyawa nuwu suru,

o to sowo wono.

Aza a na a vadala nuwu

ucina̱, a̱ ta̱ puwa̱a̱n

tsa̱ aala a na a ɗanai a̱ ma̱bula̱,

adama a na a kakasa ta̱ na̱ A̱sulazuva

lyusu mini ma wuma.>>

14 <<A̱sulazuva, yuwaan mu opocino,

agba n to o'wo gbaga.

Vu wawa mu,

n ta̱ gba a̱ tsura̱ iwawi,

adama a na a̱vu ɗa

maa yuwusaan ica!>>

15 A lyuwa ta̱ elime a dansaa mu,

<<A̱ te ɗa gba adanshi a̱ A̱sulazuva a̱ ri?

Lyawa u shiwan gogo!>>

16 <<Amma a̱mu gba

n suma n lyawa ulinga

wu za va aguɓa a̱ wu shi,

a̱vu vu reve ta̱,

n ciga urana wa addama shi.

Ili i na yu uta̱i diga o una̱ u va̱ suru,

u ta alanga eteshe elime a̱ wu.

17 She vo o'wo mu ili i wovon wan,

a̱vu ɗa upa'atan u va̱

o urana wa̱ a̱tsuma̱lima̱.

18 Lyawa aza a na a casu mu

a̱tsuma̱lima̱ o sowo wono,

amma she vu lyawa mu

n sowo wono wan.

Lyawa a da'wan,

amma she vu lyawa mu

n dada'wan wan.

Lyunguwa̱a̱ le

nu urana wa̱ a̱tsuma̱lima̱

reve vu kototo le

nu ukototosu udoɓonuwu!>>

19 Apa ili i na A̱sulazuva a damma numu, <<'Ya̱wa̱ vi isawan o una̱ntsu u lyuci, uba̱ta̱ u na ngono ma Yahuda n tsu uwusa no o uta̱sa̱yi. Reve fo vi isawan a akapi a̱ na̱ntsu va̱ Urishelima suru. 20 Reve vu damma le, <Uwwai adanshi a̱ A̱sulazuva, a̱ɗu ngono ma Yahuda, na akapi ama a Yahuda suru, na akapi aza a na a̱ ri nden Urishelima, aza a na a̱ tsu kurusu na̱ na̱ntsu nda. 21 Apa nda ili i na A̱sulazuva a dammai, i yuwan ugbozu, she i tanu itana o urana wa ashibi, ko i uwa ni itana na̱ na̱ntsu lyuci va̱ Urishelima wan. 22 She i tanu itana yu uta̱ na̱ yi diga a 'wa ɗu o urana wa ashibi wan, ko gba i yuwan ulinga u ro o urana'a wan. O una̱ u ndolo i tawa urana wa ashibi'i wo o'wo na akiza, ununa n dammai nkaya n ɗu.✝ 23 Amma na̱ ne suru, nkaya nɗu m poloo mu atsuvu shi, ko a̱ ka̱mbuwa̱ ugbozu shi. Amma a̱vu a yuwan aciyogbamu, adama she a uwwa ko a̱ usu tsuɓari'i shi.> 24 Amma a̱vu A̱sulazuva a damma, nna̱ i ka̱mbuwa̱ ugbozu i yuwan tsutoni na̱ mu, a̱vu i kuɗa̱ a uwa ni itana na̱ na̱ntsu u lyuci'i o urana wa ashibi, a̱vu i tawa urana wa ashibi wo o'wo na akiza, hali fo i kuɗa̱ a yuwan ulinga o urana'a, 25 n ta̱ gba zuwa ngono nna n ri nden ootogu o tsugono tsa̱ Da̱wuda a uwa na̱ na̱ntsu u lyuci'i oɓolo na azagbain e le. Ele na azagbain e le a ta uwa zuva vi ikeke yi ido i le ni ido, ama a Yahuda a̱ shewusun le oɓolo na aza a na a̱ ri nden a̱tsuma̱ a̱ Urishelima. Waru lyuci nda ta̱ da̱na̱ na ama hali hali. 26 Ama a̱ ta̱ ta̱wa̱ diga e ilyuci ya Yahuda na̱ mulyuci na n ri uka̱nda̱ruwu na̱ Urishelima, diga o upasu wi iɗa ya Banyami na̱ Shefela, na̱ diga o upasu u mugaɗi ma̱ a̱livu, nu upasu wi iɗa i mugaɗi oɓolo na̱ Nege, a̱ ta̱wusa̱a̱ na̱ kucci vu ukula̱tosu, ni ikucci i ro na̱ kucci vi ishina, na̱ za ma̱guru, na̱ ne'e vu ugodyusho o u'wa wa̱ A̱sulazuva. 27 Amma ni i 'yuwan o poloo mu atsuvu, a̱vu i kuɗa̱ a tara urana wa ashibi na akiza, a̱vu i tanu itana i ro a mantsa ma na yaa zama i uwa na̱ na̱ntsu va̱ Urishelima o urana wa ashibi, to, n ta̱ gba daɓa na̱ntsu va̱ Urishelima na akina a na aa gura kimusa̱ shi, na a alyuwa ba̱ta̱ vu cira va̱ yi.>>