1 <<A̱sulazuva, a̱vu za va̱ a̱ɓula̱ ɗa kuci,

a mantsa ma na n ta̱wa̱yi

na adanshi ya̱'a̱ wu.

Na̱ ne suru n ta yuwan adanshi na̱ a̱vu

adama o uge'etosu wa̱ wu.

Nye i zuwai re va̱ a̱za̱ e iwuya a balasa?

Nye i zuwai a̱za̱ o ule'e

a̱ ri a̱ nden n lafiya?

2 A̱vu ɗa vu shuwa̱ nle tsa ɗanga,

a̱vu a yuwan aralu,

a̱vu a kungwa,

reve a matsan lon,

mantsa suru aala a̱ wu

a̱ ta̱ o una̱ u le,

amma u ta alanga

no okolo e le.

3 Adama o ndolo vu rono le

tsi ikyon i na aa paɗa!

Vu tawa le,

adama o urana u mapaɗa!>>

Amma a̱mu, A̱sulazuva,

vu reve mu ta̱,

vu ta̱ enishe mu,

vu lyungwa̱ majiyan ma̱ va̱

adama a ɗa a̱ wu.

4 Hali a cina mantsa ma̱ ne ɗa iɗa'a

yaa yuwan a̱tsuma̱la̱ngu,

anlya a atsusa waru a̱ 'yewe?

Adama e iwuya yaa ama

a na a̱ ri nden iɗa'a,

iliyamunga na̱ nnunu a̱ kuwa̱ ta̱.

Na̱ ne suru, a ama a ta dansa,

<<Waa gura ene ili i na

yaa farasa na̱ tsu shi.>>

5 A̱sulazuva a damma ta̱,

<<Nna̱ ala'anlai na ama a na

a̱ ri e ilaɗi a ana,

a ta zuwa wu vu kuna̱,

cine tsa ɗa vaa gura

yuwan ala'anlai ni ido?

Nna̱ vu riya̱ e iɗa i na i ri hawun,

cine tsa ɗa vaa yuwan

na a damma a̱tsuma̱ a awanda

a na a̱ ri zuzu na̱ a̱a̱rumbu a̱ Urudu ɗa?

6 Agba a̱yi ɗa nda hali

na̱ mmaci ma̱ wu,

na ama o u'wa wa̱ wu,

a vadalaa nuwu ucina̱,

a yisali adama a̱ wu.

She vu soɗuwo le ma̱tsa̱n wan,

ko na aa yuwusan adanshi

a sa'ani a aci a̱ wu.>>

7 Reve A̱sulazuva a damma,

<<N lyawa ta̱ ama a̱ va̱ Isra'ila,

mu kasa ta̱ na ama a̱ va̱

agadu a̱ va̱.

N ta ca za na n cigai

e ekere a n'yuwatan ma̱ yi.

8 Ama agadu a̱ va̱ o o'wo mu ta̱

tsa kamu a̱tsuma̱ a̱tsumona,

a̱a̱ 'ya̱susa̱n mu uɗyo tsa kamu.

Adama o ndolo a ɗa

n 'yuwan niyi.

9 Ama agadu a̱ va̱

o o'wo mu ta̱ tsa̱ ajimba

lyawa nnunu n na n tsu ka̱ɗa̱ inama

a̱ ka̱nda̱ruwa̱ yi.

'Ya̱wa̱ vu ɓoloto

inama yu una suru,

vu ta̱wa̱to le

adama a tama le.

10 Aza aguɓa na̱ a̱bunda̱ a̱ lungusa̱ ta̱

uɗuma̱ u inabi u va̱,

a dadasa ta̱ uɗuma̱ u va̱,

a̱ ka̱mbuwa̱ ta̱ uɗuma̱ u sa'ani u va̱

okongo a na a̱ ri nu urana shi.

11 O to o'wo okongo,

o u'yewu no ofoli elime a̱ va̱,

iɗa'a suru u to o'wo okongo,

adama a na babu

za na ka̱mbuwa̱i ugbozu.

12 Zuva va agaɗi a̱tsumona a nda

a̱za̱ o ukototosu a̱ ta̱ ta̱wa̱,

adama a na matsun me pe'eni

ma̱ A̱sulazuva ma ta yuwan ukototosu

diga o ukosu wi iɗa

a̱ tyo o ukosu u ro.

Na amayun, babu za na

a̱ da̱nu lafiya.

13 A̱ ta̱ cu'wan oroci a yitabo,

reve a gasa awanda,

A̱ ta̱ kuna̱to aciyele

agba a̱ tsura̱ iliyinkapa shi.

Adama o ndolo sowoi wono

wi ili i na i gasai,

adama o upan

wu usuɗuwu wa̱ A̱sulazuva.>>

14 Apa ili i na A̱sulazuva a dammai, a aci o nron mu nden n vama ma ama a̱ yi, <<Ama a na a usai agadu a na u cayi ama a̱ yi Isra'ila wa agadu, n ta̱ mula̱ le diga a̱tsuma̱ e iɗa i le, waru n ta̱ mula̱ u'wa wa Yahuda diga a̱tsuma̱ e le. 15 Amma a mantsa ma na m mula̱ nle, n ta̱ da̱shi uwwisa iliyali i le, a̱vu n ka̱mbuwisa̱ koyan uba̱ta̱ waa agadu a̱ yi ni iɗa ya̱ yi. 16 Ɗe nu ufaru a̱ shi ta̱ rito ama a̱ va̱, cine a̱ shi a yuwan akucunu na ala a Ba'al. Amma nna̱ a̱ ka̱mbuwa̱ ugbozu, o rito re wuma wa ama a̱ va̱, a̱vu a yuwan akucunu na ala a̱ va̱ a damma,<N kucina ta̱ na ala A̱sulazuva a na a̱ ri wuma,> To, a̱ ta̱ gba a̱ shuwa̱ le a̱tsuma̱ ama a̱ va̱. 17 Amma nɗa nna suru n 'yuwain a uwwa adanshi a̱ va̱, n ta̱ mula̱ le suru suru avu n kototo le. Ne ɗa A̱sulazuva a dammai.>>