1 Adama a̱ Mowa.

Apa ili i na a̱ A̱sulazuva oɓolo a̱ a̱soja a zuva

a̱ A̱sula̱ a Isra'ila a dammai,

<<A̱tsuma̱lima̱ a ta cina wu Nebo,

adama a na u ta̱ la̱nga̱.

Kiriyatayim ta̱ sowo wono,

waru a usa yi.

Uba̱ta̱ wu upa'atan wu ucira u ta̱ sowo wono,

waru a̱ ta̱ bete'we yi.

2 A̱ da̱shi cuwa na̱ Mowa shi,

a̱tsuma̱ a̱ Heshibon ama a̱ ta̱ foɓo a̱risa̱ a̱ yi,

<Ta̱wa̱i, tsu ta̱wa̱i nu ukosu wu nɗa nda!>

A̱ɗu fo ama a Madmen i ta̱ rungwa̱ kpen,

waru matsun me pe'eni ma ta saɓa ɗu.

3 Uwwai uɗyo u mesun diga Horonayim,

uɗyo wa̱ a̱ba̱jini o lyungusu nu ukototosu.

4 A ta kuɗa Mowa

muwun keke'en ma̱ yi n ta̱ shon.

5 O toni ta̱ agawan a̱ tyo Luhi,

a̱ mesun lon a mantsa ma na a̱ ri a mmalu,

nu ure u na u ka̱ra̱i a̱cipa̱ a̱ tyo Horonayim

a̱ mesun a aci o ukototosu u na a uwwai.

6 Sumai! Sumai adama a wuma u ɗu!

Tsura̱ yo o'wo cine ido yu una i tsu sumusa.

7 Ana wo o'woi i zuwai ucira u ɗu,

a linga ɗu nu utsuru u ɗu,

a̱ɗu fo a̱ ta̱ pura̱ ɗu a̱ tyo tsugbashi,

Kemosh fo ta̱ 'ya̱wa̱ tsugbashi,

oɓolo na̱ nan ganu a̱ yi

na azagbain a̱ yi.

8 Za vu ukototosu ta̱ riya̱a̱ lyuci suru,

waru babu lyuci na a la'a.

Ka̱ri ta̱ la̱nga̱

reve o kototo musasan,

adama a na ne ɗa A̱sulazuva a dammai.

9 Tsuyin akpaɗi pe a̱ Mowa,

adama iɗa'a i la̱nga̱ she ili i topo pe wan

adama wo o'wo okongo,

waru ilyuci ya̱ yi yo o'wo okongo,

babu za na a̱ da̱nu pe.>>

10 <<Una̱ u ta̱ reme za na tarai

ulinga wa̱ A̱sulazuva ili i ro shi!

Una̱ u ta̱ reme

za na ronoi matsun me pe'eni ma̱ yi,

diga o wocosu wu mpasa!>>

11 <<Mowa da̱na̱ ta̱ na asuvu nden

diga o tsulolobo tsa̱ a̱ yi,

u to lo uba̱ta̱ u na a zuwa niyi,

koto a tarai diga nda a̱ tyo ndeɗe shi

ko u rito u tyo uba̱ta̱ u tsugbashi shi

u ta̱ lo nu uyo'o wa̱ yi babu ukotu.>>

12 Amma rana ta̱ lo a̱ ta̱wa̱,

na ma̱ lyungu ama a na o kototo Mowa,

o to o'woto ilyuci ya ama a̱ yi ofoli,

reve fo o o'woto ilyuci'i okongo,

ne ɗa A̱sulazuva a dammai.

13 A̱za̱ a̱ Mowa a ta uwwa wono

u ma̱sula̱ ma̱ le Kemosh,

a ta uwwa wono

ununa aza a Isra'ila a uwwai wono

a mantsa ma na a zuwai

ucira u le a̱tsuma̱ a̱ Betel.

14 <<Gogo cine ya damma,

<a̱tsu nan yali o uvon a ɗa,

ama a na a gurai uvon lon?> >>

15 <<O to kototo Mowa

a̱ ta̱ ka̱nda̱ruwa̱ ilyuci ya̱ yi nu uvon,

waru a ta paɗa

olobo a sa'ani a̱ yi.

Ne ɗa mogono ma dammai,

za na ala a̱ yi a ɗa

A̱sulazuva oɓolo a̱ a̱soja a zuva.>>

16 <<A̱risa̱ a̱ Mowa a yuwan ta̱ zuzu,

waru addama a̱ yi a̱ la̱pa̱ ta̱wa̱ shi.

17 Yuwain mesun

ma̱a̱ a̱tsumola̱ngu adama a̱ yi,

a̱ɗu na i ri uka̱nda̱ruwu na̱ yi suru,

a̱ɗu nɗa suru na i revei

na aɗa o ucira wa̱ yi.

I yuwan mesun ma̱a̱ a̱tsumola̱ngu i damma,

<Ka̱lyuwa̱i ne'e,

cine o kototoi tsugono

tsu ucira wa̱ yi suru!> >>

18 <<Cipa̱ yi diga uba̱ta̱ u tsugbain tsa̱ ɗu

i da̱nu e iɗa,

a̱ɗu na i ri nde a̱tsuma̱ a̱ Dibon

adama a na za na o kototo Mowa

ta̱ ta̱wa̱ u kototo wu,

waru u to kototo ilyuci

yi kari vu ucira ɗu.

19 A̱ɗu na i ri nde a̱tsuma̱ a Arowa,

yi isawan a̱ nge'en

mu ure reve i ka̱lyuwa̱,

yee ece vali na ri a zama

na waa la'a na̱ wuma wa̱ yi

oɓolo na̱ ka na cigai

u la'ato wuma wa̱ yi,

yee ece e le i damma,

<Nye ɗa gba yaa farasa?>

20 Mowa ili i wono i ɗa

adama a na o kototo yi ta̱!

I shon waru i 'ya̱sa̱n uɗyo!

I yuwan adanshi zuzu na̱ Anon adansa,

o kototo ta̱ Mowa.>>

21 <<Uge'etosu u ta̱ ta̱wa̱

a aci e ilyuci i na i ri a agaɗi,

a̱ tyo Holon na̱ Yaza na̱ Mefa'a,

22 na̱ Dibon na̱ Nebo na̱ Bet Dibilatayim,

23 na̱ Kiriyatayim na̱ Bet Gamu na̱ Bet Meyo,

24 na̱ Keriyot na̱ Bozura

na aci e ilyuci ya̱ Mowa

aza a na a̱ ri alanga na̱ zuzu.

25 A ta kuɗa avana a̱ Mowa,

waru a kuɗa ta̱ avangaci a̱ yi.>>

Ne ɗa A̱sulazuva a dammai.

26 <<Tsura̱to niyi,

adama a na u yuwaan ta̱

A̱sulazuva aciyogbamu.

Lyawa Mowa yuwan igandalu

a̱tsuma̱ a tsushamu tsa̱ yi,

lyawa wo o'wo ili yi izo'oshi.

27 Ashe a̱ɗu ama a̱ Mowa,

i ri e izo'oshi

ya ama a Isra'ila shi,

ashe i yuwan nda'a ne le

she damma evu a ɗa shi,

na vaa gbaɗatsasa aci o ulamu

a mantsa ma na vu ri

a adanshi a̱ yi shi?

28 A̱ɗu na ri nde a̱tsuma̱ a̱ Mowa,

i lyawa ilyuci i ɗu!

I 'ya̱wa̱ i da̱nu a̱tsuma̱ a atali!

Yoo o'wo tsa muɗa ma na

ma tsu yuwan yikinda

o una̱ntsu wa̱a̱ a̱ba̱nu.

29 Mu uwwa ta̱ aɗa aciyogbamu a̱ Mowa,

n reve ta̱ a na a̱ ri nu uvaɗu.

Mu uwwa ta̱ a na a̱ ri

ugbawu na̱ ma̱ka̱ga̱

nu u 'ya̱susa̱n wa avangaci u na ri na̱ yi,

a tara aci ye le zuzu shi.

30 A̱mu n reve ta̱ a na Mowa ri na aciyogbamu,

ma̱ka̱ga̱ me pere ma ɗa waa yuwusan.>>

Ne ɗa A̱sulazuva a dammai.

31 Adama o ndolo n ta̱ shon adama a̱ Mowa suru,

n ta yuwan a̱tsumola̱ngu adama a ama a Kir Here.

32 A̱vu uɗuma̱ u ina̱bi u Sibima

n ta̱ shon adama a̱ wu

ula'awu na̱ cine ma̱a̱ shon

adama a ama a Jaza!

ete'en a̱ wu a̱ ba̱ruwa̱ ta̱

hali a̱ tyo a mala ma Jaza,

za vu ukototosu ta̱ riya̱a̱

umatsun wu ɗanga va̱ vu na kutsai,

na ataci a̱ ina̱bi va̱ wu na kutsai.

33 Ma̱za̱nga̱ na̱ Mere ma̱a̱ ta̱ puwa̱a̱n

diga a̱tsuma̱ e iɗa yu umili ya̱ Mowa.

N ta̱ e isawaton moco ma masayan ma̱ ina̱bi

diga o uba̱ta̱ u mokpoko u masayan,

babu za na o kpoko le na̱ yisali i ma̱za̱nga̱.

Ko na wo o'woi a̱ ta̱ a yisali

yisali'i gba za ma̱za̱nga̱ ɗa shi.

34 <<Uɗyo u mesun me le ma̱ ta̱ 'yosun

diga a̱tsuma̱ a Heshibon na̱ Eleyale

mesu'un u tara ta̱ hali acina Jaza,

waru a ta uwwai a Zowa

hali acina Horonayim na̱ Egla Shelishiya.

hali na fo mini ma̱ Nimrim ma̱ 'yewe.

35 A̱tsuma̱ a̱ Mowa n ta̱ ta̱wa̱ nu ukosu

wa aza a na a casu kucci

vu ukula̱tosu a̱ ba̱ta̱ va̱ a̱ga̱nda̱,

waru a̱ kula̱tosu a̱tsuka̱ a̱ ma̱guru

uba̱ta̱ u musula̱ nle,>>

ne ɗa A̱sulazuva a dammai.

36 <<Adama o ndolo okolo a̱ va̱ a̱ ta̱ a̱tsumola̱ngu

adama a̱ Mowa tsa gbala,

u ta̱ a̱tsumola̱ngu tsa a gbala

adama a ama a Kir Here.

Waru utsuru u na a̱ tsura̱i u koto ta̱.

37 A puna ta̱ aaci biti

a̱vu a puna za biti ntsuka̱

za suru kyu'wan ta̱ ekere a̱ yi

reve a̱ nla̱a̱ za suru utugu

wa̱ a̱tsumola̱ngu e ikyun ya̱ yi.

38 Zuva vu ukwa̱'a̱ wa̱ Mowa biti

oɓolo nu uba̱ta̱ u na a ama o ɓolotosu

ili i ro yi lo shi, she mesun goon

adama a na mu ɓoso ta̱ Mowa

tsa̱ a̱ka̱bu a na a cigai shi,

ne ɗa A̱sulazuva a dammai.

39 Ka̱lyuwa̱, cine e bete'we niyi!

Ka̱lyuwa̱, cine u ri mesun!

Ka̱lyuwa̱, cine Mowa vadalai ucina̱ wa̱ yi

adama o wono!

Mowa o'woto ili i wovon

e ekere aza a na a̱ ri uka̱nda̱ruwu na̱ yi.>>

40 Gogo apa ili i na A̱sulazuva a dammai,

<<Ka̱lyuwa̱, a̱a̱kuru a̱ zura̱ ta̱ a̱ tyo e iɗa,

a̱ ba̱ruwusa̱ evelu a̱ yi a aci a Mowa.

41 A ta usa lyuci va̱ Keriyot

na̱ ba̱ta̱ vu ucira va̱ yi.

A̱tsuma̱ o urana u ndolo

okolo a̱ a̱soja a Mowa

o to o'wo tso okolo a ka na ri e teri.

42 A̱ ta̱ kototo Mowa a̱ nden ma̱ yi mi iɗa,

adama a na u yuwaan ta̱ A̱sulazuva unusu.

43 Wovon na̱ a̱ka̱ri na̱ maza a ta pura wu,

a̱ɗu a ama a̱ Mowa.

Ne ɗa A̱sulazuva a dammai.

44 Adama a na za na suru

sumai adama o wovon

u ta̱ riya̱ a̱tsuma̱ a̱ka̱ri,

waru za na sumai diga a̱ka̱ri

u ta̱ riya̱ a̱tsuma̱ a maza,

adama a na n ta̱ ta̱wa̱a̱ Mowa

na aa'wan oforo,

ne ɗa A̱sulazuva a dammai.

45 <<A̱za̱ e ilaɗi adama o uvon a̱ ta̱ mishin

za̱la̱ vu ululu wa̱ Heshibon

waru babu za na a kamba le,

adama a na akina e reme ta̱ a̱tsuma̱ a̱ Heshbon.

Na̱ elentsu akina diga e memere ma̱ Sihon,

a̱ kula̱tosu cin va̱ Mowa,

no okoluwo aza a aciyogbamu a nda.

46 A̱tsuma̱lima̱ a ta cina wu, a̱vu Mowa!

O kototo ta̱ aza a na a yuwusaan Kemosh a̱ga̱nda̱!

Waru a̱ pura̱ ta̱ olobo a̱ wu

ne esheli a̱ wu a̱ tyo tsugbashi.

47 Na̱ ne suru, a rana na a̱ ta̱wa̱,

n ta̱ ka̱mbuwa̱a̱ Mowa na aba'un a̱ yi,>>

ne ɗa A̱sulazuva a dammai.

Pa ɗa uge'etosu a aci a̱ Mowa o kotoi.