1 Apa ili i na A̱sulazuva a dammai,

<<Ka̱lyuwa̱ n ta̱ ta̱wa̱a̱ na̱ ruhu

vu ukototosu a aci a Babila

na̱ nda̱na̱ta̱ ma Babila.

2 N ta̱ lyungu no omoci a̱ 'ya̱wa̱ Babila

adama a̱ yeluwe yi,

waru a yuwan ili i na a cigai ni iɗa'a biti,

a̱ ta̱ ta̱wa̱ a̱ riya̱ yi mɓa̱nga̱ biti

a̱tsuma̱ o urana wa addama a̱ yi.

3 She i lyawa za vu utan

wu nla̱ amunga o utan wa̱ yi wan,

waru she i lyawa yi

u oto itana yu uvon ya̱ yi wan.

She i lyawa olobo a̱ yi wan,

waru i kototo a̱soja a̱ yi suru suru.

4 A̱ ta̱ riya̱ ukwa̱ e iɗa ya Babila,

nu usa̱n wa̱ a̱bunda̱ a̱ lipu le a̱ re va̱ yi.

5 Agba A̱sulazuva oɓolo a̱ a̱soja a zuva

a lyawa aza a Isra'ila ko Yahuda shi,

waru a̱mu ɗa A̱sula̱ e le.

Ko na wo o'woi iɗa i le

i shiwan ta̱ nu unusu,

unusu u na a yuwaan numu,

a̱mu za va Akiza a Isra'ila.>>

6 <<I suma diga a̱tsuma̱ a Babila

za suru suma adama a wuma wa̱ yi!

Adama she o kototo ɗu

adama o unusu wa Babila wan!

Adama a na mantsa ma yuwan ta̱

a na A̱sulazuva e ge'eto yi,

u ta yuwan atsupu a aci yi

o una̱ wu linga va̱ yi.

7 Ɗe nu ufaru Babila da̱na̱ ta̱

cine revei mokkoto ma Zinariya

o ukere wa̱ A̱sulazuva.

U zuwa ta̱ uvaɗi suru wo o'wo usowu,

nɗa mu uvaɗi n sowo ta̱

masayan ma̱ ina̱bi va̱ yi

reve o o'wo ujaru.

8 Babu ufaru Babila riya̱ ta̱ reve wu kuɗa

i shon adama a̱ yi!

I zamiya yi a̱guma̱ adama antsu a̱ yi,

u ta gura o o'wo u tsura̱ opocino.

9 Tsu shi ta̱ a yuwaan Babila opocino,

amma wa̱ tsura̱ lafiya shi,

tsu rungwa̱ niyi kpen,

za suru ka̱mba̱ a̱ wa̱ta̱ wa̱ yi,

adama a na uge'etosu wa̱ yi

u rawa ta̱ zuva va zuva

u 'yon zuva

hali acina eleshe.

10 A̱sulazuva a wawa tsu ta̱

ta̱wa̱ yi tsu yuwain adanshi a̱ yi

a̱tsuma̱ a̱ Sihiyona,

tsu dammai ili i na A̱sulazuva

a̱ A̱sula̱ a̱ tsu a yuwain.>>

11 <<Nan yali a̱ a̱soja a damma ta̱,

tewen yi ibata i ɗu!

Reve i tara a̱ra̱ga̱ a̱ ɗu!

Adama a na A̱sulazuva a̱ 'ya̱sa̱n ta̱

ruhu va̱ a̱za̱ o tsugono tsa Midiya

adama a na ifoɓi ya̱ yi

a̱ yi ɗa u kototo Babila.

A̱sulazuva a ta yuwan atsupu,

atsupu adama a̱ A̱a̱'isa̱mapaɗa a̱ yi.

12 'Ya̱sa̱in atuta

i teme o ɓuɓosuso kari va Babila!

Waru i da̱shi ucira wa̱ a̱za̱ e ipiri,

a̱vu fo yi shuwa̱ a̱za̱ e ipiri a̱ ba̱ta̱ le,

reve i vawan yi!

Adama a na A̱sulazuva o to shiton

ili i na u dammai,

udamma wa̱ yi a aci a ama a Babila.

13 A̱vu na vu ri nden zuzu

nu uba̱ta̱ u na u ri na̱ mini ma̱ a̱bunda̱,

a̱vu na vu ri nu utsuru wa̱ a̱bunda̱,

ukosu wa̱ wu u ta̱wa̱ ta̱.

Mantsa ma na o kototo wu yuwan ta̱.

14 A̱sulazuva oɓolo a̱ a̱soja a zuva

a kucina ta̱ na aciya̱yi u damma,

na amayun n ta̱ shiton wu na ama

she damma oɓolo akyun,

agba a̱ ta̱ 'ya̱sa̱n uɗyo wu ulyuwu wa a aci,

a na a̱ tsura̱i a aci a̱ wu.>>

15 <<U yuwan ta̱ uvaɗi a̱tsuma̱ o ucira wa̱ yi,

reve u shuwa̱ uvaɗi a̱tsuma̱ o ugbozu wa̱ yi,

a̱vu fo u polo zuva va zuva a̱tsuma̱ o urevu wa̱ yi.

16 A mantsa ma na u yuwain tsata,

mini ma zuva va zuva ma̱ tsu gugwa̱ ta̱.

U tsu zuwa ta̱ eleshe a̱ 'yon

diga o ukosu wu uvaɗi.

U tsu lyungu ta̱ ni imaɗatsu

oɓolo ni iro'i

waru u tsu lapa ta̱ upepu,

diga o u'wa wi izuwa ya̱ yi.✝

17 Za suru ri nu ugbozu shi,

waru u ri nu urevu shi,

za vu uruma u zinariya suru,

u tsu sowo ta̱ wono diga a̱ a̱ma̱li a̱ yi.

Iroci ya̱ yi epen a ɗa,

a̱ ri na̱ wivuwun a̱tsuma̱ e le shi.

18 A̱ ri nu urana shi,

ili ya avandaru i ɗa goon,

mantsa ma na uge'etosu u le u rawai,

a̱ ta̱ kuwa̱.

19 A̱sula̱ a na a̱yi ɗa akunda agadu a Yakubu,

u ri tsa̱ musula̱ nda shi,

adama a na a̱ yi ɗa u yuwain ili biti

oɓolo nu ugundo wa agadu a̱ yi.

A̱sulazuva oɓolo a̱ a̱soja a zuva a ɗa ala a̱ yi.>>

20 <<A̱sulazuva a damma ta̱,

a̱vu ɗa itana yu uvon i va̱,

aaɗanga o uvon u va̱,

na̱ a̱vu ɗa m bete'wei nɗa mu uvaɗi suru,

waru na̱ a̱vu ɗa n kototoi tsugono tsu uvaɗi.

21 Na̱ a̱vu ɗa m bete'wei ido

na aza a na a kumbusa le,

na̱ a̱vu ɗa fo m bete'wei ikeke yi ido,

na aza a na a kumbusa le.

22 Na̱ a̱vu ɗa m bete'wei vali na̱ ka,

waru na̱ a̱vu ɗa m bete'wei abara nu ulobo,

na̱ a̱vu ɗa fo m bete'wei ulobo nu usheli.

23 Na̱ a̱vu ɗa m bete'wei za va aguɓa

no oɓolo e ikyon ya̱ yi,

na̱ a̱vu ɗa m bete'wei cimbi

ni inan yi iluma ya̱ yi,

waru na̱ a̱vu ɗa m bete'wei nan gwamna

na azagbain a̱ yi.>>

24 <<E esu ɗu a ɗa maa tsupa a aci a Babila na a aci a̱ nda̱na̱ta̱ ma aza a Babila suru, adama e iwuya i na a yuwain suru, a̱tsuma̱ a̱ Sihiyona,>>

ne ɗa A̱sulazuva a dammai.

25 <<Ka̱lyuwa̱, n ta̱ tsushu'un na̱ a̱vu,

a̱ba̱jini a masasan mo ukototosu,

a̱vu na vu kototoi uvaɗi ma̱ɓula̱,

n ta canana ukere u va̱ a̱ nla̱ngi na̱ vu,

n ta̱ keɓe wu vu bunda̱la̱

diga zuva a̱ tyo e iɗa,

waru n kula̱to wu vu la̱nga̱.

ne ɗa A̱sulazuva a dammai.

26 A̱ da̱shi tsura̱ aatali a sa'ani

a na a vara ikyun yu ucira yu usaa shi,

ko a̱a̱ tsura̱ aatali a na

a vara ikyun yu usaa shi,

adama a na aatali'i a̱ da̱na̱ nu urana shi hali hali.

Ne ɗa A̱sulazuva a dammai.

27 <<Ya̱sa̱in atuta e iɗa'a,

yi ivula̱a̱ nɗa mu uvaɗi avana!

I foɓo nɗa adama a yuwan uvon na̱ yi,

i ɗe tsugono tsu uvaɗi

adama a̱ riya̱a̱ yi nu uvon,

i ɗe Arara na̱ Minni na̱ Ashekenaza,

i zuwa yali yu uvon

i rono a̱soja aaɗanga adama a̱ yi,

i zuwa ido i ɓa̱tsa̱

tso oɓolo akyun.

28 I foɓo nɗa adama a yuwan uvon na̱ yi,

i foɓo ngono ma aza a Midiya

na̱ nan gwamna e le oɓolo na azagbain e le,

ni iɗa i na i ri za̱la̱ tsugono tsa̱ le suru.

29 Iɗa'a i jinga̱ɗa̱ ta̱,

u ta̱ o uje'en adama a̱ a̱tsuma̱lima̱,

adama a na A̱sulazuva o to shiton

ifoɓi ya̱ yi a aci a Babila,

ifoɓi i na wa̱a̱ ka̱mbuwa̱i okongo

uba̱ta̱ u na babu pe za.

30 Nan yali o uvon a Babila a lyawa ta̱ uvon,

reve a̱ da̱nu a̱tsuma̱ a̱ ba̱ta̱ vu ucira le,

ucira u le u koto ta̱,

reve o o'wo tsa̱ a̱ma̱ci,

na a zuwai ba̱ta̱ vu nden n le akina,

waru a kuɗa ta̱ irumu yi na̱ntsu i ilyuci'i.

31 Aza a na a tsu yuwan uro shi

a̱ ta̱ ntoniloi,

malingata ma̱ ta̱ e itoni

i malingata babu uro,

adama a̱a̱ 'ya̱wa̱a̱

mogono ma Babila ni ikaka ana,

a̱ ka̱nda̱ruwa̱ ta̱ lyuci'i suru nu uvon.

32 A usa ta̱ ba̱ta̱ vu pasata n mini suru,

a̱vu fo a daɓa a̱rumbu na akina

waru a̱ a̱soja a uwwa ta̱ wovon.

33 Adama a na apa ili i na A̱sulazuva oɓolo a̱ a̱soja a zuva

A̱sula̱ a Isra'ila dammai,

Usheli u va̱ Babila

u ta̱ tso osoroto,

uba̱ta̱ u na o foɓoi ishina adama a faba,

aa jima shi mantsa ma na a faba yi ta̱ ta̱wa̱.>>

34 <<Nebukanaza mogono ma Babila

ma lyuwa tsu ta̱ nu uvon,

waru u zuwa tsu ta̱ a̱tsuma̱ o urupulu,

a̱vu wo o'woto tsu

tsa̱ a̱ka̱bu a na a̱ ri ni ili shi.

U soɗu tsu ta̱ cine a agangu a tsu yuwan,

reve u shiton a̱a̱tsuma̱ a̱ yi

ni ilyalya i na tsu tsu lyuwusa,

a̱vu u shaama tsu.

35 Lyawa nda̱na̱ta̱ ma̱ Sihiyona n damma,

lyawa A̱sula̱ a zuwa ulungusu

u na Babila yuwaan numu

ka̱mba̱ aci a̱ yi!>>

Lyawa fo nda̱na̱ta̱ ma̱ Urishelima n damma,

<<Lyawa alaki a mpasa ntsu

n da̱na̱ a aci a̱ nda̱na̱ta̱ ma Babila.>>

36 <<Adama o ndolo, apa ili i na A̱sulazuva a dammai,

ka̱lyuwa̱, n ta̱ ee isawaan ɗu,

reve n tsupaa ɗu,

n ta zuwa mala ma Babila me 'yewe,

a̱vu fo n zuwa esu a̱ mini a̱ yi a kwan.

37 Babila to o'wo edemu everi,

uba̱ta̱ wu nden n musa̱n mu una,

oɓolo ni ili i wovon ni ili i macuru,

waru uba̱ta̱ u na babu pe za.

38 Ama a Babila a ta yuwan ilama

cine vu revei kamu,

waru a yuwan yisali

cine vu revei muwun mi ikamu.

39 Amma a mantsa ma na a jisan n le,

n ta̱ foɓoo le ilyalya ya̱ a̱buki,

reve n zuwa le osowo

o o'wo usowu,

adama a yuwan yisali ni izo'oshi,

reve a uwa a lantsa,

nlavu n na a juwan shi.

Ne ɗa A̱sulazuva a dammai.

40 N ta̱ cipa̱ na̱ le a̱ tyo uba̱ta̱ u mapaɗa,

tsa̱ a̱giri'i ni ikyon na̱ nga̱ji.

41 <<Ununa a lyuwa Babila nu uvon

uvaɗi ma̱ɓula̱ u ta lyawa uvaɗu!

Babila to o'wo ili yi idaba a̱tsuma̱ a nɗa!

42 Mala ma̱ 'yon ta̱,

reve u ɓa̱ru Babila,

ikeɗu i mini mo ujaru,

ma̱ ta̱ ɓa̱ru yi.

43 Ilyuci ya̱ yi yo o'wo ta̱ okongo,

iɗa yu u'yewu na̱ a̱tsumona,

iɗa i na babu pe za,

waru babu vaɗilima̱ na a ɓatsaa na̱ pe.

44 N ta̱ ca Bel ma̱sula̱ ma Babila oforo,

a̱vu n zuwa yi u shaama ili i na u soɗu yi.

Nɗa m buwa a suma a̱ tyo ya̱'a̱ yi shi,

na amayun, ukari wa Babila u to oco!>>

45 <<A̱ɗu ama a̱ va̱,

uta̱i diga a̱tsuma̱ a Babila!

Za suru suma adama a wuma wa̱ yi,

i suma diga o upan wu usuɗu wa̱ A̱sulazuva!

46 Gogo, she yu uta̱a̱ okolo

ko yu uwwa wovon wan,

adama adanshi e keke'en a na a uwwusa

a̱tsuma̱ e iɗa'a wan.

Adanshi e keke'en aa'wan a nda

ko'o ɗa na adanshi e keke'en aa'wan o ro,

na adanshi e keke'en

o 'ya̱susa̱n wu ugbozu wi iɗa'a,

Adanshi e keke'en o mogono ma̱ ndeɗe

ma̱ 'yon ta̱ tsushu'un

na̱ mogono ma̱ ndeɗe.

47 Adama o ndolo, rana ta̱ lo a̱ ta̱wa̱,

a na ma ca musula̱ ma Babila oforo,

iɗa'a suru u to sowo wono,

waru a̱ a̱kwa̱kwa̱ a ama a̱ yi a na o unai

a̱ ta̱ da̱na̱ uba̱ta̱ suru a̱tsuma̱ e iɗa'a.

48 Zuva ni iɗa,

ni ili i na i ri pe a̱tsuma̱ e le suru,

a ta yuwan yisali i ma̱za̱nga̱ a aci a Babila,

adama a na ozo o ukototosu a̱ ta̱ riya̱a̱ yi

diga upasu wu ugana.

Ne ɗa A̱sulazuva a dammai.

49 Na amayun Babila ta̱ riya̱

adama ama a Isra'ila a na o unai.

Ununa aza a na o unai a̱tsuma̱ o uvaɗi suru,

a̱ riya̱i e ekere a Babila.>>✝

50 <<A̱ɗu na i ri e ilaɗi adama i la'a

ekere a matsun me pe'eni,

Suma yi! She yi isawan wan!

I cuwan na̱ A̱sulazuva,

ko na wo o'woi i ta̱ ɗe e iɗa ya alanga,

i da̱na̱ a cuwusan na̱ Urishelima.

51 <Tsu sowo ta̱ wono lon,

adama o ulamu u na a yuwaan ntsu,

adama a na omoci a uwa ta̱ ba̱ta̱ va akiza

a̱tsuma̱ o u'wa wa̱ A̱sulazuva!> >>

52 <<Amma adama o ndolo,

rana ta̱ lo a̱ ta̱wa̱,

a na ma ca musula̱ ma Babila oforo,

aza a na a uwwai usa̱n

a̱tsuma̱ e iɗa ya̱ yi suru

a̱ ta̱ da̱na̱ a̱ ma̱nga̱.>>

Ne ɗa A̱sulazuva a dammai.

53 <<Ko na̱ shi aza a Babila a kumba a̱ tyo zuva,

a suwa atsura o ucira ɗe,

na̱ ne suru, n ta̱ lyungu wa̱ yi,

na̱ a̱za̱ o ukototosu.>>

Ne ɗa A̱sulazuva a dammai.

54 <<Uwwai uɗyo u mesun

a̱tsuma̱ a Babila,

ni ilama ya̱ a̱ba̱jini o ukototosu

diga a̱tsuma̱ a Babila!

55 Adama a na a̱ A̱sulazuva a̱ ta̱ kototo Babila,

u ta zuwa yi u ɓa̱na̱ una̱ wu uvaɗu wa̱ yi.

A̱soja a̱ ta̱ da̱na̱ a̱ zura̱sa̱ tsi ikeɗu i mala

a̱ 'ya̱susa̱n ɗyo le.

56 Adama a na za vu ukototosu

riya̱a̱ ta̱ Babila,

a̱ ta̱ reme a̱ a̱soja a̱ yi,

reve a kuɗa tan le suru.

Adama a na A̱sulazuva, A̱sula̱ atsupu a ɗa,

waru u ta yuwan atsupu e mejege.

57 N ta zuwa azagbain a̱ yi

na̱ a̱za̱ o urevu a̱ yi,

na̱ nan gwamna a̱ yi

na̱ a̱soja a̱ yi

na̱ nan yali ya̱ a̱soja a̱ yi o sowo,

o o'wo usowu hali a lantsa,

nlavu n na a juwan shi.

Ne ɗa mogono za na ala a̱ yi ɗa

A̱sulazuva mogono mo oɓolo a̱ a̱soja a zuva dammai.

58 <<Apa ili i na A̱sulazuva

oɓolo a̱ a̱soja a zuva dammai,

ukari wu uga'an u nda wa Babila,

o to ɓosoi hali a̱ tyo e iɗa,

na̱ntsu va̱ yi vu ga'an nda,

a̱ ta̱ kula̱to le na akina.

Ukadu wa ama e le

u to o'wo pere

atakaci a nɗa mu uvaɗi

u to o'wo ili i na akina a lyuwa.>>

59 A̱yi nda a̱ yi ɗa ikaka i na Irimiya vumava̱sula̱ cayi Seraya ulobo wa̱ Neriya ulobo wa Ma'aseya, a mantsa ma na u ka̱ra̱i oɓolo na̱ Zedekiya mogono ma Yahuda, a̱ tyo Babila a̱tsuma̱ aa'wan a̱ na̱shi o tsugono tsa̱ a̱ yi. Waru Seraya ɗa da̱na̱i zagbain na e idanasa u ucu'watan wo omoci. 60 Irimiya ɗana ta̱ a̱tsuma̱ a aatagada o ukutsuluwu suru addama a na aa cina Babila, a̱ yi adanshi a na a ɗanai suru a aci a Babila. 61 Reve Irimiya damma Seraya, <<Mantsa ma na vu rawai Babila, vu reve vu ɗe ta̱ nu una̱ wi idanshi i nda suru za suru a uwwusa. 62 A̱vu vu damma, <A̱sulazuva a̱vu ɗa vu yuwain adanshi adama o uba̱ta̱ nda, adansa, vu ta̱ kototo yi, hali na babu ili i na ya̱a̱ da̱nu pe, ko vuma ko iliyamunga. Uba̱ta̱'a̱ u to o'wo okongo hali hali.> 63 A mantsa ma na vu kotoi ɗesununa̱ diga a̱tsuma̱ aatagada o ukutsuluwu'u, reve vu nla̱a̱ yi aatali, vu variyi a̱tsuma̱ a̱ mini ma Yufiriti. 64 Reve vu damma, <Ne ɗa Babila a liɓa, waru wa̱a̱ da̱shi 'yon shi, adama a̱tsuma̱lima̱ a na ma̱a̱ ta̱wa̱a̱ yi. Waru a ama a̱ yi a̱ ta̱ kuwa̱.> >>

A̱yi nda a̱ yi ɗa ukosu wi idanshi ya Irimiya vumava̱sula̱.