1 A̱tsuma̱ a aa'wan a̱ kucci o tsugono tsa̱ mogono Zedekiya va Yahuda, o woto wa kupa a̱vu mogono Nebukanaza va Babila ta̱wa̱ na̱ a̱soja yi suru, a̱vu a̱ ka̱nda̱ruwa̱ Urishelima nu uvon. 2 A̱tsuma̱ o urana wa̱ kucci o woto wa̱ na̱shi, a̱tsuma̱ aa'wan a kupa na̱ za ta̱ o tsugono tso mogono Zedekiya, ɗaɗa a̱ ba̱ma̱i ukari u lyuci.

3 Ɗaɗa azagbain o mogono ma Babila suru a uwwai a̱ da̱nuyi o Una̱ntsu u Memere u lyuci adama a yuwan tsugbain tsa lyuci'i. Aza a na ele ɗa Nerigal Sareze na̱ Samga Nebo na̱ Sarisekim za va Rabisari yali ya̱ a̱soja na̱ Neriga Sareze va Rabima oɓolo na azagbain o mogono a Babila suru.

4 A mantsa ma na mogono Zedekiya va Yahuda no oɓolo a̱ a̱soja a̱ yi ene nle a̱vu a suma, a lyawa lyuci'i na ayin a̱ kuru na̱ a̱a̱rumbu o mogono, nu una̱ntsu u na u ri e memere vu ɓaɓu re, a̱vu a saɓa nu ure wu Uka̱ri wa Araba.

5 Amma a̱vu a̱soja a Babila a saɓa le, a̱vu e reme mogono Zedekiya a agalaci a̱ Jeriko. Reve e reme yi a̱ tyowetyo yi uba̱ta̱ wa̱ Nebukanaza a̱tsuma̱ a Ribla e iɗa ya Hamat, uba̱ta̱ u na Nebukanaza paɗa niyi ugana. 6 Ɗe a̱tsuma̱ a Ribla ɗa mogono ma Babila mo o unai olobo a̱ Zedekiya, esu a̱ yi a ɗa waru o unai azagbain a ama a Yahuda suru. 7 A̱vu wu foɗo esu a Zedekiya, a̱vu wu wunla̱ yi na amunga e irumu u tara yi a̱ tyo Babila.

8 A̱vu a̱ a̱soja a Babila a̱ kula̱to u'wa u mogono na̱ 'wa va ama na akina, a̱vu fo o ɓoso ukari u lyuci wa̱ Urishelima. 9 A̱vu Nebuzarada, zagbain va̱ a̱za̱ e ipiri i mogono pura̱ akapi ama a na a buwai a̱tsuma̱ a̱ lyuci'i, oɓolo na aza a na a sumai a̱ tyo ya̱'a̱ yi o o'woi a̱za̱ a̱ yi, u pura̱ le ta̱ suru a̱ tyo tsugbashi e iɗa ya Babila. 10 Amma a̱vu Nebuzarada zagbain va̱ a̱za̱ e ipiri'i, u lyawaa a̱za̱ o ulambu o ro a̱tsuma̱ e iɗa ya Yahuda a̱ɗuma̱ a̱ ina̱bi na atsusa.

11 To, agba a̱ yi ɗa nda, mogono Nebukanaza va Babila cayi ɗe Nebuzarada zagbain va̱ a̱za̱ e ipiri i mogono u dammu adama a̱ Irimiya ana, 12 <<Vu tara Irimiya vi idana yi ulobonu lon, agba she vu yuwayin iwuya i ro wan, amma vu yuwayin ili i na u cigai biti.>>

13 <<Adama o ndolo a̱vu Nebuzarada zagbain va̱ a̱za̱ e ipiri i mogono na̱ Nebushaban za na tsu ɗe Rabisari yali ya̱ a̱soja na̱ Neriga Sareze za na tsu ɗe Rabima oɓolo na akapi a̱soja o mogono ma Babila, 14 a̱ lyungu adama a̱ ta̱wa̱ na̱ Irimiya diga o upasu wu ukowo wa̱ a̱za̱ e piri. A̱vu a ca yi e ekere a̱ Gedaliya ulobo wa̱ Ahikam, ulobo wa Shafa, adama u tara Irimiya a̱ tyo o u'wa, adama u da̱nu ɗe a̱tsuma̱ ama a̱ yi.>> 15 A̱sulazuva a̱ shi ta̱ a yuwan adanshi na̱ Irimiya a mantsa ma na u da̱na̱i uɓa̱ruwu a̱ nge'en mu upasu wa̱ a̱za̱ e ipiri u damma, 16 Ka̱ra̱ vu yuwan adanshi na̱ Ebedimele vuma va̱ Kush vu damma yi, <<apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, ka̱lyuwa̱, agba a̱ yi ɗa nda n yuwan ta̱ zuzu na moo o shiton adanshi a na n yuwain adama a̱ lyuci nda, adanshi a addama agba za vi isa'ani shi. A mantsa'a a ta shiwan e esu a̱ wu. 17 Amma o urana u ndolo n ta wawa wu Ebedimele, waru aa ca wu e ekere aza a na vaa uwwusa wovon shi. Ne ɗa A̱sulazuva a dammai. 18 Na amayun n ta wawa wu, waru va̱a̱ kuwa̱ a̱tsuma̱ o ure u matsun me pe'eni shi, vu ta la'a na̱ wuma wa̱ wu, adama a na vu zuwai ucira wa̱ wu ya̱'a̱ va̱. Ne ɗa A̱sulazuva a dammai.>>