1 <<Nna̱ va̱ ka̱mba̱, a̱vu Isra'ila,

vu ka̱mba̱ ya̱'a̱ va̱,>>

ne ɗa A̱sulazuva a dammai.

<<Nna̱ i tawa a̱ma̱li e idaba a̱ ɗu,

a̱ ma̱ka̱ka̱n ma̱ va̱,

a̱vu i lyawa agara nu ugbozu u ɗu,

2 waru a̱tsuma̱ amayun na̱ a̱ɓula̱ vu kucina ta̱,

<Nna̱ A̱sulazuva a̱ ri wuma,>

to, nɗa n ta̱ tsura̱ aba'un o una̱ wa̱ yi,

waru a̱ ta̱ tsura̱ tsugbain a̱tsuma̱ a̱ yi.>>

3 Apa nda ili i na A̱sulazuva a dammai

ama a̱ Urishelima na̱ Yahuda.

<<Cimbai iɗa i ɗu

waru she i cu'wa̱n a̱tsuma̱ awanda wan.✝

4 I paɗa aciya̱ɗu uryumbu

u matawa ma aciya̱ɗu uba̱ta̱ wa̱ A̱sulazuva,

a̱ɗu ama a Yahuda na ama a̱ Urishelima,

Ni i 'yuwan upan u va̱ u ta̱ cipa̱

u lyuwa ɗu tsa akina,

adama e iwuya i na i yuwain,

u ta lyuwa

agba babu za na a̱ kimusa̱ yi.>>

5 <<Salai a̱tsuma̱ a Yahuda

waru i damma a̱tsuma̱ a̱ Urishelima,

<Ivula̱i avana e iɗa'a suru!>

Oruwoi lon i damma,

<Ɓoloto yi!

Lyawa tsu sumai a̱ tyo e ilyuci

i na i ri na̱ kari vu ucira!> >>

6 <<'Ya̱sa̱in atuta adama a̱ ma̱ 'ya̱wa̱ ma̱ Sihiyona!

Suma yi adama a wuma u ɗu babu u ro!

Adama a na n ta̱ ta̱wusa̱

na addama diga upasu wu ugana

oɓolo na̱ a̱ba̱jini o ukototosu.>>

7 <<Kamu 'yon ta̱ diga a̱ nda̱na̱ta̱ ma̱ yi,

za vu ukototosu wu nɗa wu uta̱ ta̱.

U lyawa ta̱ nda̱na̱ta̱ ma̱ yi,

adama u lungusa̱ iɗa ya̱ wu,

ilyuci ya̱ wu i to o'wo okongo

babu za pe.

8 Adama o ndolo yo oto akashamuna

i yuwan a̱tsumola̱ngu, waru i shon.

Adama a na upan wa̱ a̱bunda̱ wa̱ A̱sulazuva

u vadaluwa tsu ucina̱ shi.>>

9 A̱sulazuva a damma ta̱ <<O urana u ndolo,>>

<<mogono na azagbain a ta kuɗa okolo,

nan ganu a ta lamba ili i na a damma,

ama̱sula̱ waru a ta yuwan asalama.>>

10 Reve n damma,

<<O'o A̱sulazuva Zagbain,

cine vu luluma̱i ama a nda

suru suru na̱ Urishelima

a na vu dammai,

<I ta̱ da̱na̱ na̱ asuvu nden,>

mantsa ma na matsun me pe'eni

ma̱ ri a̱la̱kutsu a̱ tsu?>>

11 A mantsa mo ndolo

a ta damma ama a nda na̱ Urishelima,

<<Upepu wu usuɗuwu diga agaɗi a̱tsumona

u ta lapa a̱ tyo uba̱ta̱ wa ama a̱ va̱,

amma adama u yeluwe ko u zangaɗu u ɗa shi,

12 upepu wu ucira u nda'a

diga uba̱ta̱ u va̱ u ɗa.

Gogo n ta cuɗuwa

uge'etosu u va̱ aci e le.>>

13 <<Ka̱lyuwa̱i, u tu lo a̱ ta̱wa̱ tse eleshe,

ikeke yi ido ya̱ yi a̱ ta̱wa̱ tsa̱ lipa̱,

ido ya̱ yi i la'a ta̱ a̱kuru ilaɗi.

A̱tsuma̱lima̱ a cina tsu ta̱!

Tsu uwa ta̱ uta'atsu!>>

14 <<A̱vu Urishelima,

vu zuza̱'wa̱ unusu wo okolo a̱ wu,

adama vu tsura̱ iwawi.

Hali mantsa ma̱ ne ma ɗa

va̱ ɓa̱na̱ majiyan ma vama okolo a̱ wu?

15 Uɗyo u ta adanshi diga a Dan,

a dansa iwuya

diga o upasu wa aagaɗi a Ifiramu.>>

16 <<Dammai nɗa ili ya nda!

I damma Urishelima ana,

<A̱soja a̱ tu lo a̱ ta̱wa̱ diga e iɗa ya alanga,

a̱ 'ya̱susa̱n uɗyo wu uvon

a aci e ilyuci gbain gbain ya Yahuda.

17 A̱ ka̱nda̱ruwa̱ yi ta̱

tsa̱ a̱za̱ e ipiri ya atsusa,

adama a na u yuwaan mu ta̱ aciyogbamu,> >>

Ne ɗa A̱sulazuva a dammai.

18 <<Ili na vu yuwain

na̱ linga va̱ wu ɗa

ta̱wa̱a̱ nuwu ni ili ya nda'a.

A̱yi nda a̱ yi ɗa oforo a̱ wu,

waru u to okono,

u uwa ta̱ she o okolo a̱ wu.>>

19 <<A̱tsuma̱lima̱ a̱ va̱! A̱tsuma̱lima̱ a̱ va̱!

N te e ikpatatsu a̱tsuma̱ a̱tsuma̱lima̱!

Okolo a̱ va̱ a̱ ta̱ ma̱riya̱,

maa gura rungwa̱ kpen shi.

Adama a na mu uwwa ta̱ mesun ma aavana,

mu uwwa ta̱ yisali yu uvon.

20 Addama aci addama,

o kototo ta̱ iɗa suru.

Babu usa̱n o kototo ta̱ ogodo a̱ va̱,

avu a kara umuna wu una̱ntsu u va̱.

21 Hali mantsa ma ne ma ɗa

me ene atuta o uvon

waru mu uwa mesun ma aavana?>>

22 <<Ama a̱ va̱ olo a ɗa,

e reve mu shi.

Muwun n babu ugbozu a ɗa,

a̱ ri nu urevu shi.

A̱ tu nu uguru u mayan me iwuya,

e reve cine a yuwan isa'ani shi.>>

23 <<N ka̱lyuwa̱ ta̱ uvaɗi

u ri ni ili shi waru ofoli a ɗa,

reve fo n ka̱lyuwa̱ zuva,

agba babu ɗe ekan.

24 N ka̱lyuwa̱ ta̱ nsasan,

reve me ene le e ijinga̱ɗu,

agaɗi suru e meje'en.>>

25 N ka̱lyuwa̱ ta̱, waru babu vuma,

nnunu ma zuva suru n suma ta̱.

26 <<N ka̱lyuwa̱ ta̱,

a̱vu me ene iɗa yu umili yo o'wo a̱tsumona,

ilyuci ya̱ yi suru yo o'wo ta̱ okongo

a̱ ma̱ka̱ka̱n ma̱ A̱sulazuva

nu upan wu usuɗuwu wa̱ yi.>>

27 Apa ili i na A̱sulazuva a Dammai,

<<Iɗa suru i to o'wo okongo,

ko a na wo o'woi

mo kototo yi suru suru shi.

28 Adama o ndolo ama o uvaɗi

a ta yuwan a̱tsumola̱ngu

waru zuva ta̱ ka̱mba̱ irumbu,

adama a na n damma ta̱

waru ma̱ bula̱ shi,

n yuwan ta̱ majiyan

waru ma̱ ka̱mba̱ a̱ca̱pa̱ shi.>>

29 <<Diga a mawwa me ilama

ya akumbi e ido na aza alapiya,

lyuci suru suma ta̱.

Ozo ro a uwa ta̱ a̱a̱rumbu

ozo ro a kumba atali.

Ilyuci suru yo o'wo ta̱ okongo,

babu za na a̱ da̱nu pe.

30 A̱vu za na o kototo yi,

nye va jiyasan

hali a na vo otoyi

aciya̱wu mutugu n shili

na̱ atali a zinariya?

Nyen i zuwai vu yuwain

yisukumishi o urewesu wa̱ wu?

Vu lobonoto ta̱ aciya̱wu pere.

A̱za̱ e icigi ya̱ wu a suma wu ta̱,

a̱ te izami i wuma ya̱ wu.>>

31 Mu uwwa ta̱ mesun

she damma ka na da̱nuyi teri,

a̱ ma̱nga̱ tsa za na

a matsan mawun mo ufaru,

Sihiyona a̱ mesun

a̱ wivuwun uta̱ ta̱,

a̱ba̱ruwusa̱ ekere a̱ yi a dansa,

<<A̱tsuma̱lima̱ a cina mu ta̱!

N ta̱ a̱ ma̱lima̱ a̱ ma̱ka̱ka̱n

ma̱ a̱za̱ mona ma ama.>>