1 Apa adanshi a na A̱sulazuva a yuwayin Irimiya, u damma, a mantsa ma na mogono Jehoyakim ulobo wa̱ Josiya da̱na̱i o tsugono tsa̱ Yahuda, 2 <<Ka̱ra̱ a̱ 'ya̱wa̱ o u'wa wa̱ a̱za̱ a̱ Rekab vu banu le a̱ ta̱wa̱ a uwa a̱tsuma̱ aasula a̱ ta̱ a̱tsuma̱ asula a na ri a̱ nge'en a̱tsuma̱ o uwa wa̱ A̱sulazuva, reve vu ca le masayan ma̱ ina̱bi ma na ma̱a̱ tsu tsura̱to o sowo.>> 3 Ɗaɗa n ka̱ra̱i adama n ta̱wa̱a̱ na̱ Ja'azaniya ulobo wa̱ Irimiya ulobo wa Habaziniya, oɓolo na̱ a̱za̱ yi na̱ muwun mo olobo ma̱ yi, u'wa wa Rekab suru. 4 Reve n ta̱wa̱to le a̱tsuma̱ o u'wa wa̱ A̱sulazuva. Reve tsu uwa aasula o olobo a Hanan ulobo wa̱ Igidaliya vuma na a uwwusa wovon wa̱ A̱sula̱. Asula'a u da̱na̱ ta̱ zuzu na aasula azagbain, na ri zuva na aasula a Ma'aseya ulobo wa̱ Shalum, za na a yuwusan ipiri yu una̱ntsu wu uwata wu u'wa wa̱ A̱sulazuva. 5 Ɗaɗa n zuwai a̱ka̱bu a̱ va̱ tapu na̱ masayan ma̱ ina̱bi ma na ma̱a̱ tsu tsura̱to oɓolo na̱ mukkoto n ro elime a̱za̱ a̱ Rekab'm. Reve n damma le, <<Sowoi masaya'an.>>

6 Reve a̱za̱ a̱ Rekab'm a̱ usu a damma, <<A̱tsu, tsu tsu sowo masayan ma̱ ina̱bi ma na ma̱a̱ tsu tsura̱to shi, adama a na akaya a̱ tsu Jonadab ulobo wa̱ Rekab damma tsu ta̱, <Ko tsu, ko limatan tsu, she tsu sowo masayan ma̱ ina̱bi ma na ma̱a̱ tsu tsura̱to wan. 7 Ne ɗa waru tsa suwa 'wa, ko tsu cu'wa̱n cu'un ko tsu cimba uɗuma̱ u ina̱bi shi, she tsu da̱na̱ ni ili i ro diga a̱tsuma̱ e ili i nda wan. Amma ko na̱ shi tsu 'yuwan tsu ciga tsu da̱nu a̱tsuma̱ o ogodo. Ne ɗa tsa yuwan wuma wa̱ a̱bunda̱ a̱tsuma̱ e iɗa i na tsu ri o tsumoci.> 8 Agba tsu yuwan ta̱ tsutoni nu udammu wa akaya a̱ tsu Yehonada ulobo wa Rekab a̱tsuma̱ e ili i na u damma n tsu biti. A̱tsu ko a̱ma̱ci a̱ tsu ko muwun mo olobo n tsu ne esheli, koto tsu rito sowo masayan ma̱ ina̱bi ma na ma̱a̱ tsu tsura̱to shi, 9 ko tsu suwaa aciya̱tsu 'wa na tsa̱ da̱nu shi, ko tsu da̱na̱ nu uɗuma̱ u ina̱bi, ko atsusa ko icu'un yi ca̱'a̱n shi. 10 Gogo tsunda tsu ta yuwusan wuma u tsu a̱tsuma̱ o ogodo. Waru tsu ta yuwusan tsutoni lon ni ili i na suru akaya a̱ tsu Jonadab dammai tsu yuwan. 11 Amma a mantsa ma na mogono Nebukanaza va Babila ta̱wa̱i nu uvon a̱tsuma̱ e iɗa i nda, tsu damma ta̱, <Ta̱wa̱i, ko shi tsu 'yuwan tsu ciga tsu 'ya̱wa̱i Urishelima, adama tsu la'ai diga e ekere a̱soja a Babila na̱ a̱soja a Suriya.>Adama o ndolo a ɗa tsu ri pe a̱tsuma̱ a̱ Urishelima.>>

12 Reve A̱sulazuva a̱ da̱shi yuwan danshi na̱ Irimiya u damma, 13 <<Apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila a dammai, ka̱ra̱ vu damma a ama a Yahuda na̱ nda̱na̱ta̱ ma̱ Urishelima ana, <Gogo yoo rito ili i ro nda'a na yaa yuwan tsutoni na adanshi a̱ va̱ shi?> Ne ɗa A̱sulazuva a dammai 14 Ka̱lyuwa̱ ne'e, cine a yuwain tsutoni na adanshi a̱ Yehonada ulobo wa̱ Rekab, za na u dammai muwun ma̱ yi she o sowo masayan ma̱ ina̱bi ma na ma̱a̱ tsu tsura̱to wan. Agba e le ɗa nda o sowo masaya'an shi hali acina ana'an, adama a na a ta yuwusan tsutoni nu dammu wa akaya e le. Amma n yuwusan ta̱ adanshi na̱ ɗu kuci, na̱ ne suru i yuwan tsutoni na̱ a̱mu shi. 15 N da̱na̱ ta̱ lyungusa̱a̱ ɗu agbashi a̱ va̱ ama̱sula̱ kuci adansa, <Za suru vadala diga o ure wi iwuya ya̱ yi, reve u lapula linga va̱ yi, she u kuru musula̱ n ro ko u yuwaan le a̱ga̱nda̱ wan. Ɗaɗa ya̱a̱ da̱nu a̱tsuma̱ e iɗa i na n ca nɗu, a̱ɗu na̱ nkaya n ɗu.> >> Amma i poloo mu atsuvu ko yu uwwa mu shi. 16 <<Na amayun, olobo a̱ Yehonada ulobo wa̱ Rekab, a yuwan ta̱ ulinga nu udammu u na akaya le a lyawaa nle, amma a ama a nda a yuwaan mu tsutoni shi.>>

17 <<Adama o ndolo, apa ili i na a̱ A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, uwwai ne'e! N ta̱ ta̱wa̱a̱ ama a Yahuda na aza a na biti a̱ ri nden a̱tsuma̱ a̱ Urishelima suru, na̱ cu'un va addama biti na n dammai n ta̱ ta̱wa̱a̱ a aci le. N yuwaan le ta̱ adanshi, agba a uwwa mu shi, a̱vu n ɗe le, reve a̱ kuɗa̱ a̱ usu mu.>>

18 Ɗaɗa Irimiya dammai u'wa wa Rekab ana, <<Apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, ana wo o'woi i yuwain tsutoni na adanshi akaya a̱ ɗu Yehonada, reve i yuwan tsutoni ni i ili i na u damma nɗu suru, reve fo i yuwan ili biti ununa wuntsayi a yuwan, 19 adama o ndolo, apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, adama o ndolo, limatan va Yonadab ulobo wa̱ Rekab wa̱a̱ puwa̱a̱n shi.>>