1 A̱vu A̱sulazuva a damma mu,<<Ko na̱ shi Musa na̱ Sama'ila e isawan a̱ ma̱ka̱ka̱n ma̱ va̱ e ipati, na̱ ne suru okolo a̱ va̱ a̱ ka̱mba̱ uba̱ta̱ wa ama a nda shi. Vu gba̱ra̱ le diga elime a̱ va̱! Lyawa le a̱ ka̱ra̱! 2 Nna̱ e ece wu waru, <A̱ te ɗa tsa̱ ka̱ra̱ a̱ tyo?> Vu damma le, <Apa nda ili i na A̱sulazuva a dammai.> >>

<< <Aza a na a zuwai na̱ a̱a̱ kuwa̱ suru,

a̱ ta̱ gba kuwa̱!

Aza a na a zuwai o una̱ u matsun me pe'eni,

a̱ ta̱ gba kuwa̱ na̱ matsun me pe'eni!

Aza a na a zuwai o una̱ wa ambulu,

a̱ ta̱ gba kuwa̱ na ambulu!

Aza a na a zuwai a na a̱ 'ya̱wa̱ tsugbashi,

a̱ ta̱ gba a̱ 'ya̱wa̱ tsugbashi!> >>✝

3 <<N ta̱ lyunguwa̱a̱ le na̱ re na̱shi vu ukototosu,>> ne ɗa A̱sulazuva a dammai, <<matsun me pe'eni adama mo o una, na̱ musa̱n adama a kakara a̱kwa̱kwa̱, na̱ nnunu ni inama yu una adama a tama le waru o kototo. 4 N ta zuwa le o o'wo ili yi idaba e ekere o tsugono tsa a nɗa suru, adama e ili i na Manase mogono ma Yahuda ulobo wa̱ Hezekiya yuwain ɗe Urishelima.>>

5 <<Zane ɗa e ene iliyali ya̱ wu,

a̱vu Urishelima,

Zane ɗa a̱ shon,

adama a̱ wu?

Zane ɗa a̱ ta̱ra̱nu we ece wu,

nye i cina nuwu?>>

6 A̱sulazuva a damma ta̱,

<<Vu 'yuwan mu ta̱,

vu lyuwa ta̱ elime

na̱ morono ma̱ a̱ca̱pa̱.

Adama o ndolo n ta̱ 'ya̱sa̱n ukere u va̱

a aci a̱ wu n kototo wu,

ma̱a̱ da̱shi roco wu iliyali shi.

7 N ta̱ yeluwe ama a̱ wu,

na aakpatalutsu o uyeluwu

a̱ na̱ntsu vi ilyuci yi iɗa'a.

N ta̱ ta̱wa̱ na̱ a̱tsuma̱lima̱

nu ukototosu a aci ama a̱ va̱,

adama a na a vadala

diga a̱ re le shi.

8 N ta̱ da̱shi nruna̱ n le a̱bunda̱

hali a la'a wuyun

wu nkyun m mala a̱bunda̱.

N ta̱ ta̱wa̱ na̱ za vu ukototosu

nu urana aci,

a aci a nan mma vo olobo le,

nu uta̱ u ɗa ma̱a̱ ta̱wa̱a̱ le

na̱ a̱tsuma̱lima̱ na̱ wovon.

9 Ka na matsain muwun

n cindere ta̱ lima̱,

reve u rono wivuwun

wu ukosu wa̱ yi,✝

adama a na u lamba ta̱

uzuwu wo okolo a̱ yi suru

she damma urana u riya̱ yi ta̱

nu urana a aci.

A ta ca yi wono,

agba a tara yi ili i ro shi.

N ta zuwa o una akapi a na a la'ai

na̱ matsun me pe'eni

elime a n'yuwatan n le.>>

Ne ɗa A̱sulazuva a dammai.

10 <<A̱tsuma̱lima̱ acina mu ta̱,

a̱vu mma va̱ na vu matsa numu!

Vuma na suru iɗa i ri a̱ nla̱ngi na̱ a̱yi

waru a̱ ri a mawasan na̱ a̱yi!

A̱mu n ca okopu

ko n ushi okopu shi,

na̱ ne suru, koyan

ta yuwusaan mu una̱.>>

11 A̱vu A̱sulazuva a̱ usu u damma,

<<Na amayun, n ta wawa wu

adama e isa'ani,

na amayun, n ta zuwa

n'yuwatan ma̱ wu n yuwan

ipati e ekere a̱ wu,

a mantsa ma̱ a̱tsuma̱lima̱

na atakaci.

12 Vuma ta gura kuɗa rumu,

rumu diga ugana ko rumushili?>>

13 <<N ta zuwa utsuru u ɗu

nu uzuwa u ɗu,

wo o'wo itana i na a̱ pura̱i

uba̱ta̱ o uvon une'e.

Adama a̱ nusu ɗu

na i yuwain suru,

ba̱ta̱ biti a̱tsuma̱ e iɗa i ɗu.

14 N ta zuwa i yuwaan

n'yuwatan n ɗu tsugbashi

e iɗa i na i revei shi.

Adama a na upan u va̱

u ta dala tsa akina,

na̱ a̱ da̱na̱ a lyuwusa a aci a̱ ɗu.>>

15 <<A̱vu Irimiya dammisa,

A̱sulazuva, vu cuwan na̱ mu

waru vi idana mu.

Vu tsupaa mu a aci

aza a na o ɓongishi mu.

A̱tsuma̱ a makaɓa ma asuvu ma̱ wu,

she vu una mu wan.

Vu cuwan na̱ wisulusa u na,

n sowoi adama a̱ wu.

16 Mantsa ma na idanshi ya̱ wu i ta̱wa̱i,

n tama le ta̱,

e le ɗa a̱ da̱na̱i ma̱za̱nga̱ ma̱ va̱,

waru okolo a̱ va̱ a yuwan ta̱ mere,

adama a na a̱ ta̱ ɗesu mu

na ala a̱ wu,

a̱vu A̱sulazuva A̱sula̱

o oɓolo a̱ a̱soja a zuva.

17 Ko ta̱ n rito da̱nu a̱tsuma̱ e iɓolo

ya aza a na a̱ 'ya̱susa̱n aci shi,

agba ko ta̱ n rito yuwan ma̱za̱nga̱

oɓolo ne le shi.

N da̱nu ta̱ a̱mu nde'en,

adama a na ukere

wa̱ wu u ta aci a̱ va̱,

waru vu zuwa mu ta̱

n shiwan nu upan.

18 Adama a̱ nye ɗa wo o'woi

a̱tsuma̱lima̱ a̱ va̱ a̱ ri n koto shi?

Waru usa̱n u va̱

u ri na̱ a̱guma̱ shi?

Vu ta̱ luluma̱ mu tsu uka̱ri

u na we 'yewushe ɗa?

Va damma oko'o a na

a gura zuwaa ucira shi?>>

19 Adama o ndolo apa ili i na

A̱sulazuva a dammai Irimiya,

<<Na amayun, nna̱ vu vadala

n ta̱ ka̱mba̱to wu

adama vu yuwaan mu a̱ga̱nda̱,

nna̱ vu yuwan adanshi a sa'ani,

agba adanshi a vama shi,

vu to o'wo una̱ u va̱.

Lyawa ama a nda

a̱ ka̱mba̱ uba̱ta̱ wa̱ wu,

amma a̱vu she vu vadala

uba̱ta̱ u le wan.

20 N ta zuwa wu voo o'wo ama'a

uɓaɓu wu ucira wu rumushili.

A ta yuwan uvon na̱ a̱vu,

agba a lyuwa a aci wu shi.

Adama a na n to oɓolo na̱ a̱vu,

n wawa wu a̱vu waru n papa wu.>>

Ne ɗa A̱sulazuva a dammai.

21 <<N ta wawa wu

diga e ekere a n'yuwatan,

reve n wawa wu

diga e ekere a̱za̱ o ulambu

u mene me iliyali.>>