1 <<A̱tsuma̱lima̱ a ta cina aza a aguɓa a na a̱ lungususa̱ waru e bete'wishe ikyon ya aguɓa a̱ va̱!>> Ne ɗa A̱sulazuva a dammai. 2 <<Adama o ndolo, apa ili i na A̱sulazuva a̱ A̱sula̱ a Isra'ila a dammai, aza a na a tarai ume wa aguɓa a ama a̱ va̱. Ana wo o'woi i bete'wei ikyon i va̱ reve i gba̱ra̱ le, agba yi idana le shi. Agba gogo, n ta ca ɗu oforo o una̱ wu unusu u na i yuwain.>> Ne ɗa A̱sulazuva a dammai.

3 <<A̱mu na aciya̱va̱ m ta̱ ɓoloto akapi e ikyon i va̱ na buwai diga e iɗa suru, aza a na m gba̱ra̱i. N ta̱ ka̱mba̱to le uba̱ta̱ wa alyuna u le, uba̱ta̱ u na a yuwan limatan reve a yuwan a̱bunda̱ lon. 4 N ta zuwaa le aza a aguɓa a na e indana le, a buwa a̱ da̱shi uwwa wovon ko a dada'wan shi, waru a buwa da̱shi lamba za ro a̱tsuma̱ e le shi. Ne ɗa A̱sulazuva a dammai.>>

5 <<Ka̱lyuwa̱, rana ta̱ lo a̱ ta̱wa̱,>>

Ne ɗa A̱sulazuva a dammai,

<<Na ma̱a̱ 'ya̱sa̱n eten a̱ a̱ɓula̱

o mogono diga o ugundo wa̱ Da̱wuda,

mogono ma na maa yuwan

tsugono a̱tsuma̱ o ugbozu,

mogono ma na maa yuwan amayun

na̱ a̱ɓula̱ a̱tsuma̱ e iɗa'a.✝

6 A̱tsuma̱ a rana va̱ yi

a ta wawa Yahuda,

waru Isra'ila ta̱ da̱nu gbaga.

Agba apa ala a na e ɗeyi na̱ yi,

A̱sulazuva a̱ A̱ɓula̱ A̱tsu.>>

7 <<Adama o ndolo, a̱mu A̱sulazuva n damma ta̱, agba a̱ yi ɗa nda rana ta̱ lo a̱ ta̱wa̱ na̱ da̱shi damma, <N kucuna ta̱ na̱ A̱sulazuva a na a̱ ri wuma, za na o uta̱yi aza a Isra'ila diga e iɗa ya Masar shi.> 8 Amma o una̱ u ndolo a ta damma, <N kucuna ta̱ na̱ A̱sulazuva a na a̱ ri wuma, za na o uta̱i ugundo wa̱ Isra'ila diga e iɗa yu ugana, diga e iɗa i na u bete'we nle.> Ɗaɗa a̱ da̱shi da̱nu a̱tsuma̱ e iɗa i le.>>

9 <<Okolo a̱ va̱ a̱ la̱nga̱ ta̱,

adama a ama̱sula̱ epen,

etele a̱ lipu a̱ va̱ suru

a̱ ta̱ meje'en,

mo o'wo ta̱ tsa za na ri usowu,

tsa za na masayan ma̱ ina̱bi ma̱ tsura̱toi

adama a̱ A̱sulazuva,

oɓolo ni idanshi ya akiza a̱ yi.

10 Adama a na iɗa'a i shiwan ta̱

na aza a na a yuwusan tsipere,

adama o una̱ iɗa'a u ta̱ a̱tsumola̱ngu,

hali ogozo a alyuna a̱tsumona e 'yewe.

Majiyan ma ama̱sula̱'a̱ iwuya i ɗa

waru a yuwan ulinga nu ucira u le

a̱tsuma̱ o ure wa amayun shi.>>

11 <<Ama̱sula̱ na̱ nan ganu suru

a̱ ri no okolo A̱sula̱ shi,

hali fo n cina ta̱ iwuya i le

a̱tsuma̱ a̱ a̱a̱'isa̱ a̱ va̱.

Ne ɗa A̱sulazuva a dammai.

12 Adama o ndolo, re le to o'wo

re ve ederi tapu ni irumbu,

ɗe ɗa a̱ riya̱.

N ta̱ ta̱wa̱a̱ le na addama,

a̱tsuma̱ a'wan a na a ca le oforo.

Ne ɗa A̱sulazuva a dammai.>>

13 <<A̱tsuma̱ ama̱sula̱ a Samariya,

me ene ta̱ ili yi idaba i nda.

A yuwan ta̱ adanshi

e ikaka na ala a Ba'al

reve a zuwa a ama a̱ va̱ Isra'ila

a vadalaa mu ucina̱.

14 A̱tsuma̱ a ama̱sula̱ a̱ Urishelima,

me ene ta̱ ili i ro i na i la'ai idaba.

A ta yuwusan tsushakala

waru a ta mmalu a̱tsuma̱ epen,

waru a̱ ta̱ o ucina̱

wa aza a na a yuwusan iwuya,

hali na babu za na vadalai

diga a̱tsuma̱ o ure wi iwuya ya̱ yi.

Suru nle a̱ ta̱ tsa̱ Sodom ya̱'a̱ va̱,

waru a ama a̱ Urishelima

a̱ ta̱ tsa̱ Gomora.>>✝

15 Adama o ndolo, apa ili i na

A̱sulazuva o oɓolo a̱ a̱soja a zuva a dammai

adama a ama̱sula̱ a nda,

<<Ka̱lyuwa̱, n ta zuwa le a lyuwa

ilyalya yo okono ya̱ a̱tsuma̱lima̱,

waru o sowo mini ma̱ tsukono.

Adama a na diga uba̱ta̱

wa ama̱sula̱ a̱ Urishelima ɗa,

ulambu u wovon wa̱ A̱sula̱

u bete'wei a̱tsuma̱ e iɗa'a suru. >>

16 Apa ili i na A̱sulazuva

oɓolo a̱ a̱soja a zuva dammai,

<<She i polo atsuvu e idanshi

ya ama̱sula̱ a nda wan,

a̱ ta̱ lulumusa̱ ɗu.

A ta dansa alavu alavu a majiyan me le goon,

agba adanshi A̱sulazuva a ɗa shi.

17 Ama̱sula̱ a nda a ta dansaa

ama a na a vadalaa yi

adanshi a̱ A̱sulazuva ucina̱,

<Na amayun i ta̱ da̱nu gbaga!>

Waru a ta dansaa aza a na a̱ ri

a mmalu a̱tsuma̱ okolo aciyogbamu e le,

<Babu addama a na a̱ ta̱wa̱ ɗu.> >>

18 <<Amma zane ɗa a̱tsuma̱ e le isawain ɗe,

a̱tsuma̱ e iɓolo i tsugbain

ya̱ A̱sulazuva ɗe zuva,

adama we ene,

ko wu uwwa adanshi a̱ yi?

Zane ɗa a̱tsuma̱ e le a uwwai

waru wu uwwai adanshi a̱ yi?

19 Ka̱lyuwa̱, agba a̱yi ɗa nda,

upan wu ucira wa̱ A̱sulazuva u ɓa̱tsa̱i,

tsu upepu wu lipa̱ vu ukototosu,

waru u ta̱ riya̱a̱ a̱za̱ e iwuya.

20 Upan wa̱ A̱sulazuva o von shi,

she nu yuwan, waru u shiton

ili i na i ri okolo a̱yi.

A rana na va̱a̱ ta̱wa̱,

i ta̱ reve ifoɓi i nda ulobonu.

21 N lyungu ama̱sula̱ a nda shi,

na̱ ne suru, a̱ ka̱ra̱ ta̱ ni ikaka i le.

N yuwan adanshi ne le shi,

na̱ ne suru, a lyuwa ta̱

elime na adanshi e ikaka.

22 Amma na̱ shi a damma

e isawan ta̱ a̱tsuma̱ e iɓolo

i tsugbain tsa̱ a̱ va̱,

a̱ shi ta a yuwaan ama a̱ va̱

adanshi a̱ va̱,

a̱ shi ta a zuwa a ama a̱ va̱ a vadala,

a lyawa re vi iwuya i le,

oɓolo na̱ linga vi iwuya i le.>>

23 Amma a̱vu A̱sulazuva a damma,

<<A̱mu'u A̱sula̱ a na a̱ ri zuzu goon ɗa,

agba A̱sula̱ a na a̱ ri alanga shi?>>

24 <<A̱ ta̱ tsura̱ za ro na a gura soko aciya̱yi,

hali na ma̱a̱ kuɗa̱ ene yi?

Ne ɗa A̱sulazuva a dammai.

Ashe a̱mu ɗa n shitoyin zuva ni iɗa shi?>>

Ne ɗa A̱sulazuva a dammai.

25 Mu uwwa ta̱ ili i na ama̱sula̱ a dammai, aza a na aa yuwusan adanshi e ikaka ye epen na ala a̱ va̱, a dansa, <<N yuwan ta̱ alavu, n yuwan ta̱ alavu!>> 26 <<Hali acina mantsa ma̱ ne ɗa ili i ndolo yaa lyuwa elime a̱tsuma̱ okolo a ama̱sula̱ a nda na a yuwusan epen, aza a na aa yuwusan adanshi e ikaka ye epen i wulumu i majiyan i le? 27 A ta majiyan ma alavu a na adansa va̱ni le, a ta gura zuwa ama a̱ va̱ e icina na ala a̱ va̱, cine nkaya nle mi icinai na ala a̱ va̱, a̱tsuma̱ o ure u mayan ma̱ a̱ga̱nda̱ a̱ tyo ya Ba'al.>>

28 <<Lyawa vumava̱sula̱ na a yuwusan alavu,

damma alanga eteshe

na alavu yi ɗa.

Amma lyawa za na

a yuwusan adanshi a̱ va̱,

damma adanshi a̱ va̱ a̱tsuma̱ a amayun.

Ana wo o'woi babu ili i na i ɓoloi

ogozo ni ishina.>>

Ne ɗa A̱sulazuva a dammai.

29 <<Ashe, adanshi a̱ va̱ akina ɗa shi?

Ashe, u ri tsa̱ ma̱ka̱ta̱

ma na a̱ tsu ɓoso atali shi?>>

Ne ɗa A̱sulazuva a dammai.

30 Adama o ndolo, A̱sulazuva a damma ta̱, <<N ta tsurala na ama̱sula̱ a na e iva̱i idanshi i le va̱ni le, a yuwusan adanshi a̱ yi, she damma wu uta̱ ta̱ uba̱ta̱ u va̱. 31 Na amayun, n ta tsurala na ama̱sula̱ a na a̱ kpa̱tu'usa̱ una̱ u le, adansa majiyan me le. <Ne ɗa A̱sulazuva a dammai.> 32 Na amayun, n ta tsurala na aza a na a yuwusan adanshi e ikaka ya alavu epen. A dansa alavu'u, a zuwusa a ama a̱ va̱ a vadalaa ure wa amayun a̱ va̱ ucina̱ a̱tsuma̱ o ure we epen le, nu uvaɗu we pere u le. A̱mu n lyungu le shi, waru n ca le udammu shi, waru a̱ da̱na̱ nu urana e ekere a ama nda ko ke'en shi.>> Ne ɗa A̱sulazuva a dammai.

33 <<Amma a̱vu Irimiya, nna a ama a nda ko vumava̱sula̱ ko nan ganu ece wu, <Nye ɗa ikaka ya̱ A̱sulazuva?> Vu damma le, <Cu'un vi ikaka i ne? N ta vari ɗu.> Ne ɗa A̱sulazuva a dammai. 34 Amma nna̱ vumava̱sula̱ ko ganu ko vuma ro ɗe ko'o damma,<Apa ikaka i na A̱sulazuva a dammai,> N ta ca yi oforo nu u'wa wa̱ yi suru. 35 Amma apa ili i na za suru a damma za va̱ yi na̱ moron ma̱ nden ma̱ yi, <Nye ɗa u'usuwu wa̱ A̱sulazuva?> Ko a damma, <Nye ɗa A̱sulazuva a dammai?> 36 Amma she i da̱shi damma, <Apa ikaka i na A̱sulazuva a dammai wan,> Adama a na ume wi ikaka yi za suru, u ta̱ da̱na̱ aciya̱yi. Agba a̱ yi ɗa nda ya̱a̱ lyungususa̱ ikaka ya̱ A̱sula̱ a Wuma, A̱sulazuva oɓolo a̱ a̱soja a zuva, A̱sula̱ a̱ tsu. 37 Apa cine yaa yuwan adanshi na̱ vumava̱sula̱, i damma yi, <Cu'un vu u'usuwu u ne ɗa A̱sulazuva a ca yi?> Ko gba shi, <Nye ɗa A̱sulazuva a dammai?> 38 Ko na wo o'woi i ta dansa, <A̱yi nda ɗa ikaka ya̱ A̱sulazuva,> apa ili i na A̱sulazuva a dammai. I yuwan ta̱ ulinga ni idanshi i nda, <Apa adanshi e ikaka ya̱ A̱sulazuva,> ko na wo o'woi n damma ɗu ta̱, she i yuwan ulinga na̱ yi wan, <Apa ikaka ya̱ A̱sulazuva.> 39 Adama o ndolo, na amayun n ta̱ e icina na̱ ɗu, a̱vu n vari ɗu diga elime a̱ va̱ oɓolo na̱ lyuci gbain na n ca nɗu na̱ nkaya nɗu. 40 N ta zuwa ɗu yo o'wo ili i na ogoro ni ili i wono hali hali. Waru e icina ni ili yaa nda shi.>>