1 A̱tsuma̱ o woto wa̱ cindere a̱vu Isma'ila ulobo wa Netaniya ulobo wa Elishama, diga o ugundo u tsugono, za ta̱ a̱ a̱tsuma̱ a̱za̱ e ipiri i mogono, ta̱wa̱ uba̱ta̱ wa Gedaliya ulobo wa Ahikam a̱tsuma̱ a Mizfa oɓolo na ama kupa. A mantsa ma na a̱ ri a alya e ilyalya oɓolo, 2 a̱vu Isma'ila ulobo wa Netaniya, oɓolo na ama a kupa a na a̱ ri oɓolo na̱ a̱ yi, a̱ 'yon o una Gedaliya ulobo wa Ahikam ulobo wa Shafa na̱ matsun me pe'eni, za na Mogono ma Babila ma ɗangulai a na wo o'wo gwamna vi iɗa'a. 3 Isma'ila fo una ta̱ aza a Yahuda suru a na a̱ da̱na̱i oɓolo na̱ Gedaliya a̱tsuma̱ a Mizfa, oɓolo na̱ a̱soja a Babila a na a̱ ri lo uba̱ta̱'a̱.

4 Ana usana u tawai cina o una Gedaliya, babu na za ro revei ili i na i farai, 5 she n lo ama kupakunla̱ a̱ ta̱wa̱ diga Shekem na̱ Shilo na̱ Samariya na̱ ntsuka̱ n le upunu na̱ a̱tugu e le wukaru na̱ lipu le ɓuɓatsa adama a̱ a̱tsumola̱ngu. Reve a̱ ta̱wa̱ na̱ yira adama a̱ kucci na aturare a̱ ma̱guru adama a na a ca kucci a̱tsuma̱ o u'wa wa̱ A̱sulazuva. 6 Reve Isma'ila ulobo wa Netaniya uta̱ diga a̱ a̱tsuma̱ a Mizfa adama u ga'an ne le, a̱ mesun, adansa, <<Ta̱wa̱i uba̱ta̱ wa Gedaliya ulobo wa Ahikam.>> 7 A mantsa ma na a uwai a̱tsuma̱ a̱ lyuci'i, reve Isma'ila ulobo wa Netaniya na ama a na a̱ ri oɓolo na̱ a̱ yi o una le suru, reve o oco le a̱tsuma̱ a̱ka̱ri.

8 Amma a̱vu ama a kupa diga a̱tsuma̱ ama'a a damma Isma'ila, <<She vu una tsu wan, adama a na tsu ta̱ na̱ asula e izuwa yo oroci a yitabo na̱ yitabo na̱ mani'in ma̱ zetun ni ishiki, a̱ ta̱ ɗe usokowu a̱ a̱ɗuma̱.>> Reve u lyawa le, agba wu una le oɓolo na akapi'i shi. 9 To, agba a̱ka̱ri a na Isma'ila variyi a̱kwa̱kwa̱ a ama a na wu unai'i oɓolo na̱ Gedaliya, a̱ yi ɗa u da̱na̱i a̱ka̱ri a na Mogono Asa ka̱pa̱i adama a mapari e ekere Basha Mogono ma Isra'ila. Reve Isma'ila ulobo wa Netaniya shiton yi na̱ a̱kwa̱kwa̱.

10 Reve Isma'ila pura̱ akapi ama a na a̱ ri a̱tsuma̱ a Mizpa, esheli o mogono oɓolo na aza a na a lyawai a̱tsuma̱ a Mizfa, aza a na Nebuzarada zagbain va̱ a̱za̱ e ipiri zuwai e ekere a Gedaliya ulobo wa Ahikam. Isma'ila ulobo wa Netaniya pura̱ e le ta̱ a̱ tyo tsugbashi, reve u 'yon tsura̱ u pasa a gawan a̱ tyo o upasu wa aza a Amon.

11 Amma a mantsa ma na Yohanan ulobo wa Kareya, oɓolo na a azagbain a̱soja a na a̱ ri oɓolo na̱ a̱ yi a uwwai cu'un vi iwuya i na Isma'ila ulobo wa Netaniya yuwain, 12 reve a̱ pura̱ ama e le suru, adama a̱ 'ya̱wa̱ a yuwan uvon na̱ Isma'ila ulobo wa Netaniya. A̱vu a cina yi o oko'o a gbain a̱tsuma̱ a Gibiyon. 13 A mantsa ma na ama a na a̱ da̱na̱i oɓolo na̱ Isma'ila enei Yohanan ulobo wa̱ Kareya a̱ ta̱wa̱ oɓolo na̱ nan yali ya̱ a̱soja, reve a yuwan ma̱za̱nga̱. 14 A̱vu ama a na Isma'ila pura̱i suru diga a Mizfa a vadala a̱ ka̱mba̱ uba̱ta̱ wa̱ Yohanan ulobo wa̱ Kareya. 15 Amma a̱vu Isma'ila ulobo wa̱ Netaniya oɓolo na ama kunla̱ a̱tsuma̱ a ama a̱ yi a la'a diga ekere a Yohanan, reve a̱ tyo uba̱ta̱ wa aza a Amon.

16 A̱vu Yohanan ulobo wa̱ Kareya oɓolo na̱ nan yali ya̱ a̱soja suru a na a̱ ri oɓolo na̱ yi, a wawa ama a na Isma'ila ulobo wa̱ Netaniya pura̱i diga a Mizfa, cina wu una Gedaliya ulobo wa̱ Ahikam. A̱tsuma̱ le a̱ da̱na̱ ta̱ na̱ a̱soja na̱ a̱ma̱ci na̱ muwun na azagbain o ukobu, a na u ta̱wa̱i ne le diga a̱ lyuci va̱ Gibiyon. 17 Reve a̱ 'yon na̱ a̱ ka̱ra̱ a̱ tyo Masar, a̱vu e isawan a Geru Kimham zuzu na̱ Batalami, 18 adama a na a la'a diga e ekere a̱soja a Babila. A uwwusa ta̱ wovon u le adama a na Isma'ila ulobo wa̱ Netaniya unai Gedaliya ulobo wa̱ Ahikam, za na mogono ma Babila ma̱ shi ma zuwai gwamna vi iɗa'a.