1 Apa adanshi a na A̱sulazuva a yuwayin Irimiya adama a̱ nda̱na̱ta̱ ma ama a Yahuda suru, a̱tsuma̱ a'wan a̱ na̱shi o tsugono tsa̱ mogono Jehoyakim ulobo wa̱ Josiya va Yahuda. A̱yi a'wan o ndolo'o a̱ yi ɗa a'wan o ufaru u tsugono tsa̱ mogono Nebukanaza va Babila.✝ 2 Ɗaɗa Irimiya vumava̱sula̱ dammai a ama a Yahuda suru na̱ nda̱na̱ta̱ ma̱ Urishelima suru ana, 3 <<a'wan ushin na aza a ta'atsu, diga ya Josiya ulobo wa Amon mogono ma Yahuda hali acina urana u nda, adanshi a̱ A̱sulazuva a̱ ta̱wa̱ ta̱ uba̱ta̱ u va̱ waru n yuwaan ɗu ta̱ adanshi kuci, agba yu uwwa shi.>>

4 <<Ko na wo o'woi A̱sulazuva a̱ lyungu ta̱ agbashi a̱yi ama̱sula̱ suru mantsa kuci, agba yu uwwa shi, ko i polo le atsuvu shi. 5 A dansa ɗu ta̱, vadalai gogo, za suru lyawa ure wi iwuya ya̱ yi, na̱ linga vi iwuya ya̱ yi, adama i da̱nu a̱tsuma̱ e iɗa i na A̱sulazuva a ca nɗu na̱ nkaya nɗu hali hali. 6 She i toni musula̱ n ro adama i yuwaan le ulinga ko a̱ga̱nda̱ wan. She i zuwa mu n yuwan upan o una̱ u na i yuwayin linga vee ekere a̱ ɗu a̱ga̱nda̱ wan. Ne ɗa ma̱a̱ ta̱wa̱a̱ ɗu na addama shi.>> 7 <<Amma na̱ ne suru, yi uwwa mu shi. I zuwa mu ta̱ n yuwan upan adama e ili i na ekere a̱ ɗu a yuwain, agba a̱ yi ɗa nda i ronoyi aciya̱ɗu addama.>> Ne ɗa A̱sulazuva a dammai.

8 Adama o ndolo A̱sulazuva o oɓolo a̱ a̱soja a zuva a damma ta̱, <<Ana wo o'woi i 'yuwain a yuwan tsutoni na adanshi a̱ va̱, 9 n ta̱ ɗe ama o upasu wu ugana suru oɓolo na aagbashi a̱ va̱ Nebukanaza mogono ma Babila,>> ne ɗa A̱sulazuva a dammai, <<n ta̱ gba a̱ ta̱wa̱to le adama a yuwan uvon ni iɗa i nda, oɓolo na̱ nda̱na̱ta̱ ma̱ yi, oɓolo na̱ nɗa nna n ri uka̱nda̱ruwu na̱ yi suru. N to kototo le suru, reve n ka̱mba̱to le ili i wovon, ni ili yi izo'oshi, a̱ ta̱ gba o'wo okongo hali hali. Ne ɗa A̱sulazuva a dammai. 10 N ta̱ kimusa̱ uɗyo u ma̱za̱nga̱ na̱ mere diga uba̱ta̱ u le, oɓolo nu uɗyo wu ka sa'avu na̱ za vali vu kasa'avu. N ta zuwa a̱ kuɗa̱ a uwwa ilama ya aatali a yira, waru ene ekan i fitila pe shi, zana a̱yi ɗa iroci yu ulambu wa asuvu nden.✝ 11 Iɗa i nda suru i to o'wo okongo, waru nɗa n da n ta yuwaan mogono ma Babila tsugbashi hali a'wan kupocindere.>>✝

12 <<Amma a mantsa ma na a'wan kupocindere'e a shiwain, n ta ca mogono ma Babila oforo oɓolo na̱ nɗa ma̱ yi suru, iɗa ya aza a Babila adama a̱ nusu le. N ta zuwa iɗa'a yo o'wo okongo hali hali. Ne ɗa A̱sulazuva a dammai. 13 N ta̱ fo a̱ ta̱wa̱a̱ iɗa i nda suru ni ili i na n yuwain adanshi a aci a̱ yi, ili i na a ɗanai a̱tsuma̱ a aatagada a nda suru, oɓolo ni ili i na Irimiya yuwain adanshi e ikaka a aci a nɗa nda suru. 14 N ta tsupaa aza a Babila o una̱ wi ili i na a yuwain oɓolo na̱ linga ve ekere le, waru nɗa na̱ ngono ma̱ a̱bunda̱ n ta zuwa le ulinga u tsugbashi.>>

15 Apa adanshi a na A̱sulazuva A̱sula̱ a Isra'ila a damma numu, <<Irimiya, vu ushi mokkoto ma masayan ma̱ ina̱bi ma nda mo upan u va̱ diga o ukere u va̱, vu zuwa nɗa nna suru ma̱a̱ lyungu wu ya̱'a̱ le o sowo yi. 16 A mantsa ma na o sowo niyi a ta takalyuwa, waru a yuwan ujaru adama a matsun me pe'eni ma na ma̱a̱ lyungu a̱tsuma̱ e le.>>

17 A̱vu n ushi mokkoto'o diga o ukere wa̱ a̱ A̱sulazuva. Reve n zuwa nɗa nna A̱sulazuva a̱ lyungu numu ya̱'a̱ le o sowo yi suru. 18 Urishelima na̱ mulyuci ma Yahuda na̱ ngono n le na azagbain e le, adama n ka̱mba̱to le okongo, ni ili i macuru ni ili i na a yuwayin una̱ ununa u ri ana'an*. 19 Waru n ca ta̱ fo mogono Firi'awuna ma Masar, oɓolo na aza a na a yuwusayin ulinga, na azagbain a̱ yi oɓolo na ama suru. 20 N ca ta̱ omoci a na a̱ ri ɗe fo, oɓolo na̱ ngono mi iɗa ya̱ Uz suru, oɓolo na̱ ngono mi iɗa ya Filistiya aza a Ashikelon na aza a Gaza na̱ Ekuron na akapi a ama a Ashido. 21 Waru n ca ta̱ fo a̱za̱ a̱ Edom na̱ Mowa na̱ Amon, 22 oɓolo na̱ ngono ma Taya suru, na̱ ngono ma̱ Sidon oɓolo na̱ ngono mu upasu u mala. 23 Ni iɗa ya Dedan na̱ Tema na̱ Buz, na aza a na a̱ ri alanga fo o osowo. 24 N ca ta̱ fo ngono ma Arabiya suru, na̱ ngono mo omocin nna ri nden a̱ a̱tsumona. 25 A̱vu fo n ca ngono ma Zimri na̱ ngono ma Elam suru, na̱ ngono ma Midiya. 26 Waru n ca ta̱ fo ngono mu upasu wu ugana suru, na aza a̱ ri alanga na̱ zuzu, ukuruwu ukuruwu, hali fo na̱ tsugono tsa na tsa̱ ri o urewesu wu uvaɗi suru. A mantsa ma na e le o sowoi suru, reve mogono ma Babila sowo fo.

27 <<Ɗaɗa gba n damma nle ana, <Apa ili i na A̱sulazuva o oɓolo a̱ a̱soja a zuva A̱sula̱ a Isra'ila a dammai, i sowo, yo o'wo usowu hali i shaama, i riya̱ hali na ya̱a̱ da̱shi 'yon shi, a̱yi ɗa uvon u na ma̱a̱ lyunguwa̱a̱ a̱ ɗu.> 28 Amma na a 'yuwan a̱ ushi mokkoto'o diga o ukere wa̱ wu no o sowo, reve vu damma le, <apa ili i na A̱sulazuva o oɓolo a̱ a̱soja a zuva a dammai, ko na̱ shi i 'yuwan i ciga i sowoi! 29 Ka̱lyuwa̱, n te e ifoɓi i na ma̱a̱ ta̱wa̱a̱ na addama a̱ lyuci na e ɗesu na Ala a̱ va̱. To, e yene i ɗu a ca ɗu oforo shi? Adama a na n ta̱ ta̱wa̱a̱ nda̱na̱ta̱ mu uvaɗi suru na̱ matsun me pe'eni.> >> Ne ɗa A̱sulazuva o oɓolo a̱ a̱soja a zuva a dammai. 30 Gogo she vu yuwan adanshi e ikaka yi idanshi i nda a aci e le, vu damma le,

<<A̱sulazuva a̱ ta̱ gugwa̱ diga zuva,✝

u ta yuwan tsata

diga uba̱ta̱ wu nden wa̱ yi wa akiza.

Reve u gugwa̱ nu ucira a aci e iɗa ya̱ yi.

U ta yuwan yisali she damma aza a na

a dadasa umatsun u ina̱bi,

u yuwan yisali a aci

a̱ nda̱na̱ta̱ mu uvaɗi suru.

31 Elemu a̱ ta̱ 'yon hali acina ukosu wu uvaɗi,

adama a na A̱sulazuva

a̱ ta̱wa̱a̱ ta̱ na adanshi a aci nɗa,

u ta̱ ta̱wa̱ nu ge'etosu a aci a vaɗilima̱ suru,

a̱vu waru wu una a̱za̱ e iwuya suru

na̱ matsun me pe'eni.>>

Ne ɗa A̱sulazuva a dammai.

32 Apa ili i na a̱ A̱sulazuva

oɓolo a̱ a̱soja a zuva a dammai,

<<Ka̱lyuwa̱, addama a ta a yuwusan a̱bunda̱,

diga a nɗa a̱ tyo a nɗa.

Waru wunla̱ wu upepu u ta̱ 'yosun

diga o ukosu wu uvaɗi.>>

33 <<A mantsa'a aza a na A̱sulazuva o una a̱ ta̱ da̱na̱ uba̱ta̱ biti, diga o ukosu wu uvaɗi u nda acina a̱ yi ndeɗe. Waru a yuwan mesun mo a̱tsumola̱ngu adama e le shi. Agba o ɓoloto a̱kwa̱kwa̱ a̱ lipu le, adama a na a̱ ciɗo le shi. Amma a ta lyawa le e iɗa tsa̱ a̱ya̱n.>>

34 <<I yuwan mesun na̱ a̱tsumola̱ngu,

a̱ɗu aza aguɓa,

waru i gandala o okomo,

a̱ɗu azagbain e ikyo i va̱.

Adama a na mantsa ma na

a paɗa ɗu yuwan ta̱.

Waru i ta̱ riya̱

a̱vu i ɓoso tsa aasa'atsu asa'ani.

35 Aza aguɓa a̱ tsura̱ ure u na

a suma a̱ ka̱ra̱ shi,

azagbain aza aguɓa a̱ tsura̱ uba̱ta̱ u na

a la'ato wuma u le shi.

36 Uwwa mesun ma aza aguɓa'a,

na̱ yisali yaa azagbain o oɓolo'o.

Adama a na A̱sulazuva o to kototosu

uba̱ta̱ wa alyuna u le.

37 Uɗolu u na wee yeneshe ben

u to o'wo okongo

adama o upan wu usuɗuwu wa̱ A̱sulazuva.

38 Tsa kamu na lyawai uba̱ta̱ wu upa'anta wa̱ yi,

iɗa i le i to o'wo okongo,

adama a matsun me pe'eni

ma aza a yipalishi

oɓolo nu upan wu usuɗuwu wa̱ a̱ A̱sulazuva.>>