1 Apa idanshi yi ikaka i na Irimiya vumava̱sula̱ lyunguyi diga Urishelima a̱ tyo uba̱ta̱ wa akapi a mbara ma ama a Yahuda, na̱ nan ganu na ama̱sula̱ oɓolo na ama a na Nebukanaza pura̱i diga Urishelima a̱ tyo tsugbashi Babila. 2 U ɗana ta̱ idanshi yi ikaka'a cina a tara mogono Yekoniya a̱ tyo Babila oɓolo ne egbere mma mogono, na azagbain o ukobu u mogono na azagbain a Yahuda na̱ Urishelima, na̱ a̱za̱ o ulinga wu ukere, oɓolo na aruma diga Urishelima. 3 A̱vu Irimiya lyungu ikaka'a e ekere Elasa ulobo wa Shafa na̱ Gemariya ulobo wa Hilikiya aza a na mogono Zedekiya va Yahuda lyunguyi Babila, uba̱ta̱ u mogono Nebukanaza va Babila. Apa ili i na idanshi yi ikaka'a ya dansa,

4 <<Apa ili i na A̱sulazuva o oɓolo a̱ a̱soja a zuva A̱sula̱ a Isra'ila a dammai, a̱ tyo uba̱ta̱ wa aza a na a̱ pura̱i diga Urishelima a̱ tyo tsugbashi a Babila. 5 <I suwaa aciya̱ɗu 'wa i da̱nu pe. I shuwa̱ ɗanga waru i lyuwa umatsun u le. 6 Yuwain lolo i matsan olobo ne esheli. Waru i zamiya muwun mo olobo n ɗu a̱ma̱ci, adama a matsan muwun mo olobo ne esheli. I da̱na̱ a mamatsan ɗe i yuwan a̱bunda̱, waru she i jiba a̱bunda̱ wan. 7 Amma i zami nden n lafiya ɗe a̱ lyuci na n tyowetyo nɗu tsugbashi. Waru i yuwan avasa uba̱ta̱ wa̱ A̱sulazuva adama o uba̱ta̱'a̱, adama a na nden n lafiya mu uba̱ta̱'a̱ a̱ yi ɗa nden n lafiya n ɗu. 8 Adama a na apa ili i na A̱sulazuva o oɓolo a̱ a̱soja a zuva A̱sula̱ a Isra'ila a dammai, <<She i lyawa ama̱sula̱ a̱ ɗu na̱ a̱za̱ a̱ yindi a na a̱ ri a̱tsuma̱ a̱ ɗu a̱ luluma̱ ɗu wan. She i polo atsuvu a alavu a na i cigai a yuwaan ɗu wan. 9 A ta yuwusaan ɗu adanshi e ikaka ye epen na ala a̱ va̱. Agba n lyungu le shi,>> >

ne ɗa A̱sulazuva a dammai.

10 <<Apa ili i na A̱sulazuva a dammai, a mantsa ma na i shiwain a'wan kupocindere za̱la̱ tsugono tsa Babila, n ta bura ɗu, waru n ta̱ shiton nzuwulai n sa'ani n na n yuwaan nɗu, nzuwulai n na ma̱a̱ ka̱mba̱to ɗu uba̱ta̱ u nda.✝ 11 N reve ta̱ cu'un vi ifoɓi i na n ri na̱ yi aci ya̱ ɗu. Ifoɓi yi isa'ani, agba yi iwuya shi, adama n ca ɗu uzuwu wo okolo na̱ wuma u sa'ani u na i cigai nda a̱ tyo elime. Ne ɗa A̱sulazuva a dammai. 12 Ne ɗa yaa yuwan ɗesu uba̱ta̱ u va̱, a̱vu i vadala i yuwan avasa uba̱ta̱ u va̱, reve mu uwwa ɗu. 13 I ta zami mu reve i tsura̱ mu, n ni i zami mu no okolo a̱ ɗu suru.✝ 14 Waru n ta zuwa i tsura̱ mu. A̱vu n ka̱mbuwa̱a̱ ɗu aba'un a̱ ɗu, a̱vu m ɓoloto ɗu diga a̱tsuma̱ a nɗa suru na̱ ba̱ta̱ na suru m gba̱ra̱ nɗu, ne ɗa A̱sulazuva a dammai. N ta̱ ka̱mba̱to ɗu uba̱ta̱ u nda, diga uba̱ta̱ u na n zuwai a̱ pura̱ ɗu a̱ tyo tsugbashi. Ne ɗa A̱sulazuva a dammai.>>

15 <<I ta gura damma, <A̱sulazuva a̱ 'ya̱sa̱n ta̱ ama̱sula̱ adama a̱ tsu a̱tsuma̱ a Babila,> 16 agba apa ili i na A̱sulazuva a dammai adama o mogono, za na ri nden o ootogu o tsugono tsa̱ Da̱wuda, oɓolo na ama a na a buwai suru a̱tsuma̱ a̱ lyuci nda, ele nro mu nden n ɗu aza a na o toni nɗu a̱ tyo tsugbashi shi, 17 na amayun,>> apa ili i na A̱sulazuva o oɓolo a̱ a̱soja a zuva dammai, <<N ta̱ lyungu na̱ matsun me pe'eni na ambulu na̱ mɓa̱la̱ a aci le, waru n ta zuwa le o o'wo tsu biri na shamai hali na a gura lyuwa le shi adama o ulambu wu ulobonu u le. 18 N ta saɓa le na̱ matsun me pe'eni na ambulu na̱ mɓa̱la̱, waru n zuwa le o o'wo ili i wovon uba̱ta̱ wa̱ a̱za̱ o tsugono tsu uvaɗi suru, ni ili i na a yuwayin una̱ ni ili i wovon ni ili i macuru ni ili yi izo'oshi e ekere a nɗa suru, a̱ tyo uba̱ta̱ u na n gba̱ra̱ nle a̱ tyo biti. 19 Adama a na a uwwa adanshi a̱ va̱ shi,>> ne ɗa A̱sulazuva a dammai, <<Idanshi i na n lyungusa̱ n le kuci diga o una̱ wa agbashi a̱ va̱ ama̱sula̱. Agba a̱ɗu na i ri nden e iɗa i tsugbashi yu uwwa shi,>> ne ɗa A̱sulazuva a dammai.

20 <<Adama o ndolo, yu uwwa adanshi A̱sulazuva, a̱ɗu na m gba̱ra̱i suru diga Urishelima a̱ tyo Babila tsugbashi.>> 21 Apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, adama Ahabu ulobo wa̱ Kolaya na̱ Zedekiya ulobo wa Ma'aseya, aza a na a yuwusan adanshi e ikaka ye epen na ala a̱ va̱. <<N ta ca le ekere o mogono Nebukanaza va Babila, waru u ta̱ o una le esu a̱ ɗu. 22 Adama e ili i na yaa cina le, ama a Yahuda suru aza a na a̱ tyowetyoi tsugbashi a Babila, a̱ ta̱ bunga̱ danshi vu una̱ n na a dansa, <Lyawa A̱sulazuva a̱ ka̱mba̱to wu tsa vumava̱sula̱ Zedekiya na̱ vumava̱sula̱ Ahabu aza a na mogono ma Babila ma̱ kula̱toi na akina!> 23 Adama a na a yuwan ta̱ linga vi iwuya a̱tsuma̱ a Isra'ila, a yuwan ta̱ tsipere na̱ a̱ma̱ci o nro mu nden n le, reve fo a yuwan adanshi epen na ala a̱ va̱, adanshi a na n damma le shi. A̱mu n reve ta̱, waru a̱mu ɗa esu aciya̱va̱. Ne ɗa A̱sulazuva a dammai.>>

24 <<Vu damma Shemaya vuma va̱ Nehelam, 25 apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, vu lyungu ta̱ na̱ mpepelime na ala a̱ wu a̱ tyo uba̱ta̱ wa ama a̱ Urishelima suru, a̱ tyo ya Zafaniya ulobo wa Maseya ganu, oɓolo na akapi a nan ganu. Vu damma Zafaniya, 26 A̱sulazuva a ɗangula wu ta̱ vo o'wo ganu o una̱ wa̱ Yehoyida, adama vu da̱na̱ za na a̱ da̱na̱ e idanasa u'wa wa̱ A̱sulazuva. Waru vu ta̱ nu ucira u na vee reme suru ajarata a vuma na e ɗesu aciya̱yi vumava̱sula̱, adama vu gbagara le a gba, reve fo vu zuwaa le ili i yinlu yi rumu a̱ yinlu i le. 27 To, agba nye i zuwai vu ɓarai Irimiya vuma va Anato, za na ka̱mbuwa̱i aciya̱yi vumava̱sula̱ a̱tsuma̱ a̱ ɗu shi? 28 Adama a na u lyungu ta̱ ni ikaka a̱ tyo ya̱'a̱ a̱ tsu a Babila adansa, <Nden n tsugbashi nda n ta jima. Adama o ndolo she i suwa 'wa i da̱nu pe. Reve i shuwa̱ a̱ɗuma̱ waru i lyuwa umatsun u le.> >>

29 Ɗaɗa Zafaniya ganu ɗeyi mepepelime'e nu una̱ atsuvu a Irimiya vumava̱sula̱. 30 Ɗaɗa A̱sulazuva a yuwain adanshi na̱ Irimiya u dammai, 31 vu lyungu ni ikaka i nda a̱ tyo uba̱ta̱ wa aza a na a̱ ri nden n tsugbashi, <<Apa ili i na A̱sulazuva a dammai adama a Shemaya vuma va̱ Nehelam. Ana wo o'woi Shemaya yuwaan ɗu adanshi e ikaka, ko na wo o'woi n lyunguyi shi, reve u zuwa ɗu i zuwa okolo adanshi epen, 32 adama o ndolo, apa ili i na A̱sulazuva a dammai, na amayun n ta ca Shemaya vuma va̱ Nehelam oforo na̱ limatan va̱ yi suru. Waru wa̱a̱ da̱na̱ lo na̱ za na buwai wuma a̱tsuma̱ a ama a nda shi, agba wee ene isa'ani i na maa yuwaan a ama a̱ va̱ shi, adama a na u yuwan ta̱ alajiya aciyogbamu a aci a̱ va̱.>> Ne ɗa A̱sulazuva a dammai.