1 Apa adanshi a na A̱sulazuva a dammai Irimiya, a mantsa ma na Zedekiya mogono ma̱ lyunguwa̱yi Pashu ulobo wa Malkiya oɓolo na̱ Zafaniya ganu ulobo wa Ma'aseya ni ikaka a damma Irimiya, 2 <<Patiya tsu A̱sulazuva, a na wo o'woi Nebukanaza mogono ma Babila ma̱ ta̱ ta̱wusa̱a̱ tsu nu uvon. U ta gura wo o'wo A̱sulazuva a ta yuwaan tsu ulinga wa asalama o ro, ununa u tsu yuwusan, za na a zuwa Nebukanaza'a u tawa ekere a̱ yi.>>

3 Amma Irimiya usu le ta̱ u damma, <<Dammai Zedekiya, 4 apa ili i na A̱sulazuva A̱sula̱ a aza a Isra'ila a dammai, ka̱lyuwa̱, n ta vadaluwa itana yu uvon i na i ri ekere a̱ ɗu, aza a na yaa yuwusan ulinga ne le i yuwan uvon na̱ mogono ma Babila na aza a Babila, ama a na a̱ ka̱nda̱ruwa̱i ukari u lyuci ɗu. Reve m ɓoloto ama'a e memere ma̱ lyuci gbain nda. 5 A̱mu na aciya̱va̱ n ta yuwan nla̱ngi na̱ ɗu, nu ukere wu ucira u va̱, oɓolo na̱ linga va asalama, nu upan, na asuvu usuɗuwu, nu upan wu usuɗuwu lon. 6 Waru n ta faba aza a na a̱ ri na̱ nden a̱ lyuci gbain nda, ama ni inama yu una suru a̱ ta̱ kuwa̱, o ure wu mɓa̱la̱ n vama nda. 7 Reve A̱sulazuva a damma, na̱ a̱yi ndolo koto, n ta tara Zedekiya mogono ma Yahuda oɓolo na azagbain a̱yi, na ama a na a̱ ri pe a̱ lyuci gbai'in aza a na a la'ai uba̱ta̱ a̱ mɓa̱la̱ n vama nda'a, na̱ matsun me pe'eni na ambulu reve n ca le e ekere a Nebukanaza mogono ma Babila, oɓolo ne e ekere a n'yuwatan nle aza a na a zama wuma u le. Mogono'o u to kototo le na̱ matsun me pe'eni. Wa lyawa le shi, waru we ene iliyali i le shi, ko u jibaa le shi.>>

8 <<Na̱ ne suru, reve A̱sulazuva a damma n damma ama a nda'a, <Apa ili i na A̱sulazuva a dammai, ka̱lyuwa̱i, n foɓo ta̱ re re elime a̱ ɗu na yaa ɗangula, ure u na ya la'a nu ure u na ya̱ kuwa̱. 9 Za na suru da̱nuyi a̱ lyuci gbain nda'a u ta̱ kuwa̱ na̱ matsun me pe'eni, na ambulu na̱ mɓa̱la̱ n vama. Amma za na suru uta̱i u cayi aciya̱yi e ekere aza a Babila aza a na a̱ ka̱nda̱ruwa̱ nɗu nu uvon, u ta la'ato wuma wa̱ yi. 10 Adama a na a̱mu A̱sulazuva n zuwa ta̱ urewesu u va̱ a̱ lyuci gbain nda'a adama o ukototosu, waru adama e isa'ani shi, n ta ca yi e ekere o mogono ma Babila, waru a̱yi ɗa wa̱a̱ kula̱to yi na akina.> >> Ne ɗa A̱sulazuva a dammai.

11 <<Reve A̱sulazuva a damma mu, n damma u'wa u tsugono tsa Yahuda, uwwai adanshi a̱ A̱sulazuva, 12 a̱vu u'wa wa Da̱wuda, apa ili i na A̱sulazuva a dammai!

<<I yuwan isa'ani usana suru,

waru i wawa za na o ɓongishi,

za na a yuwain wivu,

adama she upan u va̱ u ɓa̱tsa̱ tsa akina

u lyuwa elime na alya

waru babu za na a gura kimusa̱ yi,

adama a linga vi iwuya i ɗu wan.

13 Ka̱lyuwa̱i, agba a̱ yi ɗa nda

n ta̱ nla̱ngi na̱ ɗu,

a̱ɗu aza na i ri nden zuva vu uka̱ri,

a̱ɗu na i ri nden agalaci atali,

a̱ɗu na yaa dansa,

zane ɗa a gura zura̱ a̱ tyo ya̱'a̱ tsu,

zane ɗa a gura uwa

ba̱ta̱ vu ucira tsu?

Ne ɗa A̱sulazuva a dammai.

14 N ta̱ ge'eto ɗu

o una̱ wu linga ɗu,

n ta daɓa a̱a̱rumbu a̱ ɗu na akina,

adama u kula̱to ili i na i ri

uka̱nda̱ruwu na̱ yi suru.>>

Ne ɗa A̱sulazuva a dammai.