1 Apa adanshi a na A̱sulazuva a yuwayin Irimiya, ana, 2 <<'Yon vu zura̱ a̱ tyo uba̱ta̱ wu za vu uma'an vu mpondo. Ɗe ɗa maa ca wu ikaka i va̱.>> 3 Reve n ka̱ra̱ a̱ cipa̱, n cina za vu uma'an vu mpondo'o a yuwusan uma'an wu mpondo. 4 Ili i na u ma'asain no olo'o u la̱nga̱ ta̱ e ekere a̱ yi, a̱vu u ma'isan upondo u ro ko'o no olo'o'o ununa u cigai.

5 Reve adanshi a̱ A̱sula̱ a̱ ta̱wa̱ uba̱ta̱ u va̱ ana, 6 <<U'wa wa Isra'ila, ashe ma gura yuwan na̱ ɗu cine za vu uma'an vu mpondo nda yuwain shi? Agba a̱ yi ɗa nda cine olo'o a̱ ri e ekere aza vu uma'an, ne ɗa a̱ɗu fo i ri e ekere a̱ va̱, a̱ɗu ama a Isra'ila. 7 A mantsa ma na n yuwain aɗa e iɗa suru, ko tsugono tso ro na ma̱ mula̱ ko n lungusa̱ ko n kototo, 8 nna̱ iɗa i na n yuwain adama aɗa e le o ndolo'o n vadala diga e iwuya i le, to, n ta vadala majiyan ma̱ va̱, a̱vu n tawa addama a na n shi n foɓoi a aci e le. 9 Agba mantsa ma na suru n yuwain adanshi adama e iɗa suru ko tsugono tsa na ma̱ 'ya̱sa̱n ko n shuwa̱, 10 nna̱ u yuwan iwuya elime a̱ va̱, reve u 'yuwan na waa uwwa adanshi a̱ va̱, to, n ta vadala ifoɓi isa'ani i va̱ na shi n foɓoi na ma̱a̱ ta̱wa̱a̱ yi.>>

11 <<Gogo vu yuwan adanshi na ama a Yahuda na aza a na a̱ ri nden a̱tsuma̱ a̱ Urishelima vu damma le, <Apa ili i na A̱sulazuva a dammai, ka̱lyuwa̱, n ta̱ e ifoɓi i na ma̱a̱ ta̱wa̱ ɗu na addama waru n foɓo ta̱ iwuya adama a̱ ɗu. Gogo she za suru vadala diga o ure wi iwuya ya̱ yi, waru u lapula re va̱ yi na̱ linga va̱ yi.> 12 Amma a̱ ta̱ usu a damma, <U ri nu urana shi! Tsu ta lyuwa elime ni ili i na okolo a̱ tsu a cigai, za suru a̱tsuma̱ a̱ tsu ta̱ toni aciyogbamu o okolo a̱ yi vi iwuya.> >>

13 <<Adama o ndolo,

apa ili i na A̱sulazuva a dammai,

vu yuwan yeci a̱tsuma̱ a nɗa,

zane ɗa uwwai ɗe cu'un nda?

Isra'ila yuwan ta̱ iwuya lon!

14 Mini ma atayan ma masasan

ma̱ Lebanon ma kasa ta̱

na atali a masasa'an?

Ko mini mo uta̱nu ma̱ yi na ri

e meyene diga alanga

kuɗa̱ ta̱ na e yene?

15 Amma na̱ ne suru,

ama a̱ va̱ e icina ta̱ na̱ a̱mu,

a̱ kula̱towa̱a̱ ta̱

musula̱ n vama a̱tsuka̱.

Aza a na a zuwa nle a̱ ta̱ɗa̱tsa̱i a̱ re le,

a̱tsuma̱ a̱ re vu ufaru le.

A zuwa le ta̱ a yuwan mmalu

a̱tsuma̱ o ure u na u ri ulobonu shi,

a̱tsuma̱ o ure u na wuntsayi shi,

a̱tsuma̱ a̱ re na o foɓoi shi.

16 Adama o ndolo iɗa ya aza a Yahuda

i to o'wo okongo,

ni ili i macuru hali hali.

Aza a na a̱ ka̱ra̱sa̱ lo suru,

a ta yuwan asalama

reve a gbaɗatsa aaci.

17 Cine upepu wa asana

u tsu lapa ma̱buta̱,

ne ɗa me bete'we e le

elime a n'yuwatan n le.

N ta vadalaa le ucina̱

mo roco le urewesu u va̱ shi,

a̱tsuma̱ o urana wa addama e le.>>

18 Reve ama a Yahuda a dammulai va̱ni le ana, <<Ta̱wa̱i, tsu yuwain ifoɓi a aci a Irimiya, adama uritosu u wila̱ wa Musa u na nan ganu a yuwain nu ucasu wa̱ a̱sa̱la̱ wa̱ a̱za̱ o urevu, oɓolo na adanshi diga uba̱ta̱ wa ama̱sula̱ puwa̱n wan. Adama o ndolo ta̱wa̱i, tsu la'a niyi nu una̱, she tsu poloi atsuvu e ili i na waa dansa wan.>>

19 <<Reve Irimiya yuwan avasa u damma,

A̱sulazuva vu poloo mu atsuvu,

vu uwwa ili i na n'yuwatan n va̱ maa dansa!

20 U lobono ta̱ a tsupa isa'ani ni iwuya?

Na̱ ne suru a̱ ka̱pa̱a̱ ta̱

wuma u va̱ a̱ka̱ri e iwuya.

Vu cuwan cine mi isawain elime a̱ wu

na n yuwain adanshi o una̱ u le,

adama vu tawa upan wa̱ wu a aci e le.

21 Amma gogo gba,

vu ta̱wa̱a̱ muwun n le na ambulu,

vu zuwa o una le na̱ matsun me pe'eni.

Lyawa a̱ma̱ci e le a lamba muwun nle,

o o'wo nruna̱.

Lyawa o una ali e le,

a̱vu fo o una olobo e le

na̱ matsun me pe'eni uba̱ta̱ o uvon.

22 Lyawa a uwwa mesun a 'wa le

mantsa ma na vu ta̱wa̱yi

na aza a na a̱ riya̱a̱ le nu uta̱.

Adama a na a̱ ka̱pa̱ ta̱ a̱ka̱ri e iwuya

adama e reme mu,

reve fo azu maza

adama e reme ana a̱ va̱.

23 Amma a̱vu A̱sulazuva, vu reve ta̱

ni ifoɓi i iwuya i le suru

na a cigai o una mu.

She vu yuwaan le gafura

vi iwuya i na a yuwain wan,

ko vu ta'asa nusu le

diga a̱ ma̱ka̱ka̱n ma̱ wu wan.

Lyawa a tawa le elime a̱ wu,

vu ge'eto le a mantsa

ma na vu ri o upan!>>