1 Reve A̱sulazuva a damma mu, <<Wala vu tsulaa aciya̱wu ukwan, vu yuwan gbakala na̱ yi, agba she vu lyawa u ju'wa̱n mini wan. 2 Reve n tsula yi cine adanshi A̱sulazuva a dammai, a̱vu n yuwan gbakala na̱ yi.>>

3 A̱vu A̱sulazuva a̱ da̱shi yuwan adanshi na̱ mu, wa̱ ire u damma, 4 <<Vu tara gbakala vu ukwan u na vu tsulai'i, zana waru vu yuwayin gbakala na̱ yi gogo, vu ka̱ra̱ a̱ tyo o uɗolu wa̱ Yufiriti, vu soko yi ɗe uba̱ta̱'a̱ a̱tsuma̱ a̱a̱ba̱nu a aatali.>> 5 Ɗaɗa n ka̱ra̱i n soko niyi a̱ a̱a̱ba̱nu zuzu nu uɗolu wa̱ Yufiriti cine A̱sulazuva a damma numu.

6 Ana a yuwain ayin e re, a̱vu A̱sulazuva a damma mu, <<'Yon, vu ka̱ra̱ a̱ 'ya̱wa̱ Yufiriti, vu tara gbakala na n damma nuwu vu soko ɗe.>> 7 Reve n ka̱ra̱ a̱ 'ya̱wa̱ Yufiriti mu uta̱a̱ gbakala'a, diga a̱a̱bunu uba̱ta̱ u na n soko niyi. Agba gogo gbakala'a u la̱nga̱ ta̱, u buwa nu ulinga u ro waru shi.

8 Reve A̱sulazuva a yuwan adanshi na̱ mu ana, 9 <<Apa ili i na a̱ A̱sulazuva a dammai, <Ne ɗa fo ma̱a̱ lungusa̱ uvaɗu wa Yahuda na̱ a̱bunda̱ o uvaɗu wa̱ Urishelima. 10 Ama awuya a nda a 'yuwan ta̱ a uwwa adanshi a̱ va̱. A̱ ta̱ kurusu ugbawu wo okolo e le, hali o tonishi musula̱ n ro aa yuwusaan le a̱ga̱nda̱ nu ulinga. O to o'wo tsa̱ gbakala ndolo, za na ri nu ulinga shi. 11 Cine gbakala tsu shiva ikyun i vuma, ne ɗa n zuwai u'wa wa Isra'ila na̱ Yahuda suru a sura numu, adama o o'wo ama a̱ va̱, a ca aala a̱ va̱ tsugbain, a̱ ta̱wa̱a̱ mu ni ica na̱ tsugbain, agba a̱ kuɗa̱ ta̱ a uwwa. Ne ɗa A̱sulazuva a dammai.> >>

12 <<Vu damma le, <Apa ili i na A̱sulazuva, A̱sula̱ a Isra'ila, a dammai, o shiton tsa̱n vu kwan masayan ma̱ ina̱bi biti na̱ mini.> Amma na damma wu, <A̱tsu, tsu reve a na o shiton tsa̱n vu kwan masayan ma̱ ina̱bi biti na̱ mini shi?> >>

13 <<A̱vu vu damma le, <Apa ili i na A̱sulazuva a dammai, n to shiton a ama e iɗa i nda suru na̱ masayan ma̱ ina̱bi hali o o'wo usowu, hali fo na̱ ngono nna n ri na agadu ootogu o tsugono tsa̱ Da̱wuda, na̱ nan ganu na ama̱sula̱ na ama a̱ nda̱na̱ta̱ ma Urishelima suru. 14 N ta zuwa le o ɓosoloi aci e le na aci e le, nan dada na̱ muwun. Maa lyawa iliyali ko ankuri ko isa'ani a putsaa mu o kototo le shi. Ne ɗa A̱sulazuva a dammai.> >>

15 <<Uwwai, reve i polo atsuvu,

she i yuwan ugbawu wan,

adama a na A̱sulazuva a yuwan ta̱ adanshi.

16 I ca A̱sulazuva A̱sula̱ a̱ ɗu tsugbain,

kafu u ta̱wa̱a̱ ni irumbu,

kafu waru ana a̱ ɗu a̱ ta̱ɗa̱tsa̱

zuva va agaɗi e irumbu,

a̱ ɗu pe e ibingi ye ekan,

a̱vu u ka̱mbuwai irumbu,

u ka̱mbuwai irumbu i lima̱ pici.

17 Amma ni i kuɗa̱ a uwwa,

n ta̱ shon usokowu

adama o uvaɗu u ɗu.

N ta yuwan mesun mo usuɗu,

esu a̱ va̱ o to oco a aɓara lon,

adama a na a̱ ta̱ pura̱ oɓolo e ikyon

ya̱ A̱sulazuva a̱ tyo tsugbashi.>>

18 Vu damma mogono

ne egbere mma mogono,

<<Cipa̱i diga o ootogu

o tsugono tsa̱ ɗu,

adama a na okokolo o tsugono

tsa tsugbain tsa̱ ɗu

a̱ ta̱ riya̱ diga aci a̱ ɗu.

19 A̱ ta̱ ɓa̱ru ilyuci ye Nege,

agba babu za na

a katsu'wa le.

A̱ ta̱ pura̱ aza a Yahuda suru

a̱ tyo tsugbashi,

a̱ ta̱ pura̱ le kpa̱ra̱a̱.>>

20 <<'Ya̱sa̱yin esu ɗu,

i ka̱lyuwa̱ yee ene,

aza a na a̱ ri a̱ ta̱wa̱

diga o upasu wu ugana.

A te ɗa oɓolo a na

a zuwai ekere a̱ ɗu,

oɓolo e ikyon i na

yaa yuwusan uvaɗu ne ele?

21 Nye yaa damma mantsa ma na

A̱sulazuva a zuwaa nɗu

aza a na i tarai n'utsa̱ n ɗu

a yuwan tsugbain e ekere a̱ ɗu?

Ashe ya uwwa a̱tsuma̱lima̱

tsa ka na ri e teri shi?>>

22 Nna̱ waru yee ece aciya̱ɗu,

<<Nye i zuwai ili i nda

i cina ntsu?>>

Ili ya nda gba

adama a̱bunda̱ o unusu u ɗu u ɗa

i zuwai a̱ ba̱ɗa̱ nuwu

umuna alanga eteshe,

reve a suɗato lipu va̱ wu.

23 <<Vuma va̱ Kush ta gura

vadala iroci yu ukwan

i lipu va̱ yi ɗa?

Ko uta̱su u ta gura vadala

abasabasa a̱ lipu va̱ yi ɗa?

Yaa gura yuwan isa'ani a̱ɗu na

i tsu yuwusan iwuya kuci shi?

24 N ta̱ bete'we ɗu tsa̱ tsu'yuwa̱,

tsa̱ tsu'yuwa̱ tsa na upepu

wa̱ a̱tsumona u tsu pura̱.

25 A̱yi ndolo a̱yi ɗa akunda a̱ ɗu,

akunda a na n ritowo nɗu,

adama a na yi icinai na̱ mu,

a̱vu i zuwaa musula̱ me epen ucira.>>

Ne ɗa A̱sulazuva a dammai.

26 <<A̱mu na aciya̱va̱,

n ta̱ pa̱lu'wa̱ ɗu

n lyawa ɗu ataɓu

hali wono u guza̱ ɗu.

27 Adama e icigi i tsipere tsa̱ a̱ ɗu,

ni icigi yi ili yi idaba i ɗu,

na̱ tsushakala tsa̱ wono tsa̱ ɗu,

mee ene ta̱ linga vi idaba ɗu

zuva va agaɗi na̱ a̱tsuma̱ a agalaci.

A̱tsuma̱lima̱ a ta cina wu Urishelima!

Hali mantsa ma̱ ne

vaa lyuwa elime na̱ nden

mu ulambu wa akiza?>>