1 Adanshi a nda a̱ ta̱wa̱ ta̱ ya̱ Irimiya adama a ama a Yahuda a na a̱ ri nden a̱tsuma̱ e iɗa ya Masar va̱ Za̱la̱ na̱ Megido na̱ Takifanke na̱ Memfis oɓolo na̱ Masar vo Gon. 2 <<Apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, yee ene ta̱ cu'un va̱a̱ a̱ba̱jini addama a na n ta̱wa̱yi Urishelima oɓolo ni ilyuci ya Yahuda suru, waru a̱yi ɗa nda ana'an o o'woi okongo waru babu za, 3 adama e iwuya i le. A zuwa mu ta̱ n yuwan upan a̱tsuma̱ o ure wu ukula̱tosu wa̱ a̱tsuka̱ a̱ ma̱guru wa̱ a̱ga̱nda̱ uba̱ta̱ u musula̱ n ro, musula̱ nna ele, ko nkaya nle e revei shi. 4 N da̱na̱ ta̱ a̱a̱ lyungusa̱a̱ le na agbashi a̱ va̱ ama̱sula̱ kuci adansa, <She i yuwan ili yi idaba i ndolo i na A̱sulazuva a 'yuwain wan!> >> 5 Agba a uwwa shi, ko o polo atsuvu e le, a vadala diga a̱tsuma̱ e iwuya i le shi. Ko a lyawa ukula̱tosu wa̱ a̱tsuka̱ a̱ ma̱guru uba̱ta̱ u musula̱ n ro shi. 6 Adama o ndolo a ɗa upan u va̱ wu usuɗuwu, u cipa̱i a aci e ilyuci ya Yahuda, oɓolo na̱ re va̱ Urishelima. A̱vu n ka̱mba̱to le okongo ununa a̱ ri ana'an. 7 To, agba gogo, apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila a dammai, adama a̱ nye i ronoyi aciya̱ɗu cu'un va̱ a̱ba̱jini va̱ a̱tsuma̱lima̱ a nda? Nye i zuwai yu uta̱a̱ yi ali na̱ a̱ma̱ci na̱ muwun na̱ nreɓu diga a̱tsuma̱ a Yahuda a̱ tyo Masar, hali na wo o'wo babu za na a la'a? 8 Nye i zuwai yaa zuwusa mu upan adama a linga ve ekere a̱ ɗu, na ya̱a̱ kula̱tosu a̱tsuka̱ a̱ ma̱guru a̱ tyo uba̱ta̱ u musula̱ n ro a̱tsuma̱ a Masar, uba̱ta̱ u na i ta̱wa̱i adama a na ya̱a̱ da̱nu? I to o una aciya̱ɗu, reve waru i ka̱mba̱to aciya̱ɗu ili i na a yuwayin una̱, ni ili i wisulusa e ekere a nɗa mu uvaɗi ma̱ɓula̱. 9 Ko yi icina ta̱ na̱ linga vi iwuya vu nkaya nɗu oɓolo na̱ a̱za̱ o ngono na̱ nan egbere a Yahuda, oɓolo ni iwuya ya̱ a̱ma̱ci e le, ni iwuya i ɗu ni iwuya ya̱ a̱ma̱ci ɗu, aza a na i yuwain e iɗa ya Yahuda oɓolo na̱ re va̱ Urishelima? 10 Hali acina ana'an i ka̱ɗa̱to aci ya̱ ɗu, ko i ca mu tsugbain shi, ko i yuwan tsutoni na̱ wila̱ u va̱ nu udammu u va̱ na n ca ɗu, a̱ɗu na̱ nkaya n ɗu shi.

11 <<Adama o ndolo, apa ili i na A̱sulazuva o oɓolo a̱soja a zuva A̱sula̱ a Isra'ila dammai, n ta̱ e ifoɓi i na ma̱a̱ ta̱wa̱a̱ a̱ɗu, a̱ɗu aza a Yahuda suru na̱ a̱tsuma̱lima̱ nu ukototosu. 12 N to kototo akapi a ama a Yahuda, ele a na a zuwai aci adama a̱ nden a̱tsuma̱ e iɗa ya Masar. Suru n le a̱ ta̱ kuwa̱ ɗe, a̱ ta̱ kuwa̱ a̱tsuma̱ o ure u matsun me pe'eni ko a̱ kuwa̱ na ambulu. Diga a za ke'en a̱ tyo a zagbain a̱ ta̱ kuwa̱ a̱tsuma̱ o ure u matsun me pe'eni na ambulu. O to o'wo ili ye pere ni ili i wovon, ni ili i na a yuwayin una̱ ni ili i wisulusa. 13 N ta ca aza a na a̱ ri nden a̱tsuma̱ e iɗa ya Masar oforo, ununa n cayi Urishelima oforo na̱ matsun me pe'eni na ambulu na̱ mɓa̱la̱. 14 Babu za ro diga a̱tsuma̱ akapi a ama a Yahuda na 'ya̱wa̱i Masar na̱ a̱ da̱na̱ wuma ko u la'a na wa̱ ka̱mba̱ e iɗa ya Yahuda, za na a̱a̱ da̱na̱ a maluwa ma na a̱ ka̱mba̱ a̱ da̱nu, babu za na a̱ ka̱mba̱ she de ke'en na la'ai.>>

15 Ɗaɗa ali a na suru e revei a na a̱ma̱ci e le a̱ kula̱tosa̱a̱ musula̱ n ro a̱tsuka̱ a̱ ma̱guru, oɓolo na̱ a̱ma̱ci a na a̱ ri pe a̱tsuma̱ a̱ba̱jini e iɓolo'o, oɓolo na ama a na suru a̱ ri nden a̱tsuma̱ a Masar vo Gon na̱ Za̱la̱, a dammai Irimiya, 16 <<Tsoo polo atsuvu tsu uwwa ikaka ya adanshi a̱tsuma̱ ala A̱sulazuva a na vu damma n tsu shi! 17 Na amayun tsu ta yuwan ili i na tsu cigai. Tsu ta ca kucci vi ili i ma̱guru a̱ tyo e iroci yi ka ndolo ma̱sula̱ ma na a̱ tsu ɗe Egbere va Zuva, tsu ta ca yi kucci vi ili yo oso, ununa a̱tsu na̱ nkaya n tsu na̱ ngono n tsu na azagbain a̱ tsu, tsa yuwusan a̱tsuma̱ e ilyuci ya Yahuda na̱ a̱tsuma̱ a̱ re va̱ Urishelima. A mantsa mo ndolo tsu da̱na̱ ta̱ ni ilyalya lon, reve tsu tsura̱ utsuru waru babu ili i na i damaton n tsu. 18 Amma diga a mantsa ma na tsu lyawai a̱ kula̱tosa̱a̱ ma̱sula̱ ma na a̱ tsu ɗe Egbere va Zuva a̱tsuka̱ a̱ ma̱guru na̱ kucci vi ili yo oso, ɗaɗa tsu lambai ili biti, a̱vu tsu reme tsu kuwa̱ a̱tsuma̱ o ure u matsun me pe'eni na ambulu.>>

19 A̱vu a̱ma̱ci a̱ da̱shi damma, <<A mantsa ma na tsu cayi kucci va̱ a̱tsuka̱ a̱ ma̱guru na̱ kucci vi ili yo oso a̱ tyo uba̱ta̱ u ma̱sula̱ ma na a̱ tsu ɗe Egbere va Zuva, ashe ali a̱ tsu e reve a na tsa yuwusan emeshen a̱tsuma̱ e iroci yi ka'a hali na tsa casu yi kucci vi ili yo oso shi?>>

20 A̱vu Irimiya damma ama'a suru, ali na̱ a̱ma̱ci aza a na a ca niyi u'usuwu u nda u damma, 21 <<A majiyan ma̱ ɗu, A̱sulazuva e reve ko u cuwan na̱ kucci va̱ a̱tsuka̱ a̱ ma̱guru nna i cayi a̱tsuma̱ e ilyuci ya Yahuda na̱ a̱tsuma̱ a̱ re va̱ Urishelima, na̱ a̱ɗu na̱ nkaya nɗu na̱ ngono nɗu na azagbain a̱ɗu, na ama e iɗa'a shi? 22 Amma na wo o'woi A̱sulazuva a gura kaɓa asuvu adama a linga vi iwuya na̱ linga vi idaba na i yuwain shi, ɗaɗa iɗa i ɗu yo o'woi ili i na a yuwayin una̱ no okongo, waru babu pe za, ununa u ri ana'an. 23 Adama a na i kula̱toi a̱tsuka̱ a̱ ma̱guru, waru a̱vu i yuwaan A̱sulazuva unusu agba i yuwan yi tsutoni shi, ko i kuru wila̱ wa̱ yi ko udammu wa̱ yi ko ili i na u zuwai shi, ɗaɗa gba addama a nda a cina nɗu, ununa yee enei nda'a.>>

24 Ɗaɗa Irimiya dammai ama'a suru, oɓolo na̱ a̱ma̱ci'i, <<Uwwai adanshi a̱ A̱sulazuva suru nɗu ama a Yahuda a̱ɗu na i ri a̱tsuma̱ e iɗa ya Masar. 25 Apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, a̱ɗu na̱ a̱ma̱ci a̱ɗu i roco ta̱ a̱tsuma̱ o ure u ɗu na i kucinai na i dammai, <Na amayun tsu to shiton akucunu a na tsu yuwain na tsa ca kucci va̱ a̱tsuka̱ a̱ ma̱guru oɓolo na̱ kucci vi ili yo oso a̱ tyo uba̱ta̱ u ma̱sula̱ ma na a̱ tsu ɗe Egbere va Zuva.> >> To, she i lyuwa elime, i shiton akucunu'u! I shiton akucunu a̱ ɗu!

26 <<Amma gogo yu uwwa adanshi a na A̱sulazuva a dansa, ama a Yahuda a na a̱ ri nden a̱tsuma̱ e iɗa ya Masar suru, n kucuna ta̱ na ala a̱ va̱ adansa, ko vuma ta̱ a̱tsuma̱ a aza a Yahuda a na a̱ ri a̱tsuma̱ e iɗa ya Masar a̱a̱ da̱shi ɗe ala a̱ va̱ ko u kucuna adansa, <Nna̱ a̱ A̱sulazuva Mogono me Ili suru ri wuma> >> shi. 27 Adama a na n zuwaa le ta̱ esu adama e ifoɓi yi iwuya, agba yi isa'ani shi, ama a Yahuda a na a̱ ri nden a̱tsuma̱ e iɗa ya Masar suru a̱ ta̱ kuwa̱ a̱tsuma̱ o ure u matsun me pe'eni na ambulu hali she no o kototo le suru suru. 28 Aza a na waru a la'ai diga o ukwa̱ u matsun me pe'eni, reve a̱ ka̱mba̱ a̱tsuma̱ e iɗa ya Masar o to o'wo wa'a goon. Ɗaɗa akapi ama a Yahuda aza a na a̱ ta̱wa̱i adama a̱ da̱nu a̱tsuma̱ a Masar ee reve a na adanshi a̱ zane ɗa a shiwan, za va̱ ko za le. 29 Ili ya nda i to o'wo ɗu iroci i na ma ca ɗu oforo uba̱ta̱ u nda, ne ɗa A̱sulazuva a dammai, to, gogo she i reve adanshi a na n yuwain na ma̱a̱ ta̱wa̱a̱ ɗu na addama u ta shiwan na amayun. 30 Apa ili i na A̱sulazuva a dammai, <<Na amayun n ta ca Firi'awuna va Hofira mogono ma Masar e ekere a n'yuwatan ma̱ yi aza a na aa zama wuma wa̱ yi, ununa n cayi mogono Zedekiya va Yahuda e ekere o mogono Nebukanaza va Babila ma'yuwatan ma̱ yi, za na da̱na̱i a zama wuma wa̱ yi.>>