1 Ele lo reve A̱sulazuva a yuwan adanshi na̱ irimiya wa̱ ire, mantsa ma na u da̱na̱i uɓa̱ru o u'wa wa ali a̱ mɓa̱nga̱ ma aza a na a yuwusan ipiri u damma, 2 <<Apa ili i na A̱sulazuva a dammai, za na yuwain uvaɗi, reve n foɓo yi a̱vu n shuwa̱ yi, A̱sulazuva a ɗa ala a̱ yi. 3 Ɗe numu reve a̱mu gba n usu ɗu, a̱vu fo n damma ɗu a̱ba̱jini e ili yu usa̱n i mereve, aza a na koto i revei shi.>>

4 <<Adama a na apa ili i na A̱sulazuva A̱sula̱ a Isra'ila a dammai, adama a 'wa lyuci nda na̱ 'wa vu ngono ma Yahuda aza a na o ɓosoi adama o ɓolo ma̱bula̱ ma na a putsaa a kumba nu ukari na̱ matsun me pe'eni, 5 a yuwan uvon na̱ a̱soja a Babila. A ta shiwan na̱ a̱kwa̱kwa̱ a ama a na n zuwai o una a̱tsuma̱ o upan u va̱, nu upan wu usuɗuwu u va̱. N ta̱ soko urewesu u va̱ adama a ama a̱ lyuci nda, adama e iwuya i le i na a yuwain suru.>>

6 <<Na̱ ne suru na amayun, n ta̱ ta̱wa̱a̱ lyuci nda na̱ nden n lafiya no opocino. N ta̱ gba yuwaan ama a̱ va̱ opocino reve n lyawa le a uwwa uyo'o wa asuvu nden na̱ mapari, 7 a mantsa ma na n ka̱mba̱toi Isra'ila na̱ Yahuda diga uba̱ta̱ u tsugbashi, waru n ta̱ da̱shi shuwa̱ le ununa a̱ da̱na̱i ɗe nu ufaru. 8 N ta̱ fo o'woto le cece diga o unusu u na a yuwaan numu suru, a̱vu n yuwaan le gafura vu nusu le suru na aciyogbamu a na a yuwaan numu. 9 Ɗaɗa lyuci nda'a a zuwa e reve mu, ili i ma̱za̱nga̱ ni ili yi ica ni ili i tsugbain uba̱ta̱ wu nɗa mu uvaɗi suru. A mantsa ma na a uwwai isa'ani i na n yuwaan niyi suru, a ta uwwa reve a uwwa wovon, a̱vu a da'wan adama a̱bunda̱ e isa'ani na̱ nden n lafiya n na n cayi lyuci'i.>>

10 Apa ili i na A̱sulazuva a dammai, <<Ko na yaa dansa adama o uba̱ta̱ u nda ana, <Okongo a ɗa, babu pe vuma ko inama a̱tsuma̱ a̱ yi.> >> Na̱ ne suru a̱tsuma̱ e ilyuci ya Yahuda na̱ re va̱ Urishelima na lyawai wo o'woi okongo, amma a̱ ta̱ da̱shi uwwa, 11 uɗyo u ma̱za̱nga̱ na̱ mere, nu uɗyo u vali vu ka sa'avu na̱ za vu ka sa'avu, nu ɗyo va aza a na a̱ ta̱wa̱yi na̱ kucci vu ugodyusho a̱tsuma̱ o u'wa wa̱ A̱sulazuva adansa,

<<<I godyowo A̱sulazuva oɓolo a̱ a̱soja a zuva,

adama a na A̱sulazuva za vi isa'ani ɗa,

waru icigi ya̱ yi i na i tsu vadala shi i ta̱ lo hali hali!> >>✝

12 Apa ili i na A̱sulazuva o oɓolo a̱ a̱soja a zuva dammai, <<Lo uba̱ta̱ u nda'a, uba̱ta̱ u na u ri okongo babu pe vuma ko nama'a, a̱tsuma̱ e ilyuci ya̱ yi a̱ ta̱ da̱shi tsurisa̱ ba̱ta̱ va alyuna, adama aza aguɓa a̱ da̱nu oɓolo ni iliyamunga i le.>> 13 Reve A̱sulazuva a damma, <<Aza aguɓa a̱ ta̱ da̱shi e isawan a canana ukere u le e keceshe iliyamunga i le mantsa ma na a̱ ri a̱ ma̱ka̱ra̱, a̱tsuma̱ e ilyuci ya agaɗi, na aza a mugaɗi ma̱ a̱livu n keke'en wa̱ Nege, na ri a̱tsuma̱ o upasu wi iɗa ya Banyami, na̱ mulyuci na ri uka̱nda̱ruwu na̱ Urishelima, oɓolo na akapi e ilyuci ya Yahuda.>>

14 <<Reve A̱sulazuva a damma, agba a̱yi ɗa nda mantsa ma̱ ta̱ lo a̱ ta̱wa̱ a na moo shiton nzuwulai n na n yuwain nu u'wa wa Isra'ila na Yahuda.>>✝

15 <<A rana ndolo, na a mantsa mo ndolo,

n ta zuwa eten a̱ a̱ɓula̱ o uta̱

diga o ugundo wa̱ Da̱wuda,

waru u ta yuwan uge'etosu wa̱ a̱ɓula̱ e iɗa'a.

16 A rana ndolo a ta wawa Yahuda,

Urishelima waru ta yuwan nden n lafiya.

Apa ala a na e ɗe ete'en,

A̱sulazuva A̱ɓula̱ A̱tsu.>>

17 <<Adama a na apa ili i na A̱sulazuva a dammai, ugundo wa̱ Da̱wuda wa̱a̱ kuɗa̱ aa lamba za na a̱ da̱nu ootogu o tsugono tsu u'wa wa Isra'ila shi. 18 Ko nan ganu o ugundo wa̱ Levi a̱a̱ kuɗa̱ aa lamba za na e isawan elime a̱ va̱ shi, na waa ca kucci vu ukula̱tosu, na̱ kucci vi ishina na akapi a̱ kuci shi.>>

19 Apa adanshi a na A̱sulazuva a yuwayin Irimiya adansa, 20 <<Apa ili i na A̱sulazuva a dammai, nna̱ vu ta gura putsaa urana na ayin na o roco aciyele a mantsa ma na wuntsayi, 21 to, a ta gura kuɗa nzuwulai n va̱ na aagbashi a̱ va̱ Da̱wuda, oɓolo na̱ n nzuwulai n va̱ nu ugundo wa̱ Levi nan ganu, aza a na aa yuwusan a̱ga̱nda̱ elime a̱ va̱, waru Da̱wuda buwa a̱a̱ da̱shi tsura̱ ugundo u na wa̱a̱ da̱nu ootogu o tsugono shi. 22 N ta zuwa ugundo wa̱ Da̱wuda aagbashi a̱ va̱, na̱ a̱za̱ a̱ Levi ugundo u nan ganu a yuwan a̱bunda̱ tsa̱ italyo'o ya zuva na̱ tsa̱ wuyun wu nge'en m mala, hali na a gura kece le shi. >>

23 Reve A̱sulazuva a̱ da̱shi yuwan adanshi na̱ Irimiya u damma, 24 <<Ko vu uwwa ta̱ ili i na a ama a nda a dansa gba? A ta dansa, <A̱sulazuva a 'yuwan ta̱ 'wa re na u ɗangulai ɗa?> >> Adama o ndolo a ɗa o goroi a ama a̱ va̱, waru a̱ da̱shi a tara le tsa nɗa waru shi. 25 Gogo gba, apa ili i na A̱sulazuva a dammai, <<Nna̱ a̱mu ɗa n yuwain urana na ayin shi, waru a̱vu n lapula wila̱ wa zuva na̱ za vu uvaɗi shi, 26 to, n ta̱ gba a 'yuwan ugundo wa Yakubu na aagbashi a̱ va̱ Da̱wuda, waru ma̱a̱ da̱shi ɗangula za ro diga a̱tsuma̱ a̱ muwun mo olobo ma̱ yi, na waa yuwan tsugono e ekere o ugundo wa Ibrahim na̱ Ishiyaku na̱ Yakubu shi. Adama a na n ta̱ ka̱mbuwa̱a̱ le na aba'un e le, reve n roco le iliyali.>>