1 <<Kuruyi re va̱ Urishelima

i gawan ni i cipi,

i ka̱lyuwa̱ ba̱ta̱ suru yi idana,

i ka̱lyuwa̱ uba̱ta̱ wa agalaci a̱ lyuci.

Ko i ta̱ tsura̱ vuma ta̱

na yuwusan a̱ɓula̱,

za na cigai amayun,

tsura̱ n yuwaan lyuci gbain nda gafura.

2 Ko na wo o'woi a damma ta̱,

<Tsu kucina ta̱ na̱ A̱sulazuva a na a̱ ri wuma,> >>

na̱ ne suru akucunu epen ɗa a yuwusan.

3 A̱sulazuva, amayun a ɗa esu a̱ wu a zama shi?

Vu faba le ta̱,

amma a uwwa mɓa̱la̱ shi,

vu minjira le ta̱

amma a 'yuwan ta̱ a yuwan ulapulu.

A shuvulai ta̱ urewesu u le,

hali u la'a aatali ugbamu,

reve a̱ kuɗa̱ a vadala.

4 Reve n jiyan adansa,

<<Ele nda a̱za̱ o ulambu ɗa gon,

a̱ ri nu ugbozu shi,

adama a na e reve ure wa̱ A̱sulazuva shi,

ko ili i na A̱sula̱ e le a cigai shi.

5 Adama o ndolo n ta̱ 'ya̱wa̱

uba̱ta̱ wa azagbain

n yuwan adanshi ne le,

na amayun e reve ta̱ ure wa̱ A̱sulazuva,

ni ili i na A̱sula̱ e le a cigai.

Amma no okolo a̱ ta̱ a ɗa

a kuɗai a̱gba̱la̱ e iluma,

reve a taɓa akani.

6 Adama o ndolo kamu diga

a̱a̱rumbu to kototo le,

nkerenkesu diga a̱tsumona

mo to una le,

uta̱su u ta vawan ilyuci i le,

wu kara za na suru

uta̱i mukari mukari,

adama a na nusu le

yuwan ta̱ a̱bunda̱ lon,

ulambu wa̱ a̱ɓula̱ e le

a yuwan ta̱ kpara.>>

7 Amma a̱vu A̱sulazuva a damma,

<<Nye i zuwai maa yuwaan wu gafura?

Muwun ma̱ wu mu kasa ta̱ na̱ mu,

reve a yuwan akucunu

na̱ musula̱ nna ri musula̱ shi.

N yuwaan le ta̱ ili i na a cigai suru,

na̱ ne suru a yuwan ta̱ tsipere

reve a̱ shiton 'wa va za a tsushakala.

8 A̱ ta̱ tse ido i na i ri ni icigi i tsukoɓi,

za suru a zama ka moron ma̱ nden ma̱ yi.

9 Ulobono n ca le a̱tsuma̱lima̱ shi?>>

Waru ulobono n tsupaa aciya̱va̱

a̱ cu'un vu nɗa nda shi?

Ne ɗa A̱sulazuva a dammai.

10 <<I ɓatsa pe a̱tsuma̱

a̱ɗuma̱ ina̱bi va̱ yi i tama le,

amma she i kototo le suru suru wan.

I za̱ka̱tsa̱ eten e le,

adama a na ama a nda

a̱za̱ a̱ A̱sulazuva a ɗa shi.

11 U'wa wa Isra'ila na̱ Yahuda o o'wo ta̱

a̱za̱ o ulambu wa̱ a̱ɓula̱

suru suru e ekere a̱ va̱,

ne ɗa A̱sulazuva a dammai.

12 A yuwan ta̱ epen a aci a̱ A̱sulazuva,

adansa, wa yuwan ili shi!

Babu iwuya i na ya̱ ta̱wa̱ tsu,

tse ene matsun me pe'eni

ko ambulu shi.>>

13 <<Ama̱sula̱ e epen ɗa,

adanshi A̱sula̱ a̱ ri oɓolo ne le shi,

adama o ndolo lyawa ili i na a dammai

i ka̱mba̱ aci ye le.>>

14 Adama o ndolo, apa ili i na A̱sulazuva A̱sula̱

o oɓolo a̱ a̱soja a zuva a dammai,

<<Adama a na ama

a yuwan ta̱ adanshi a nda,

n ta zuwa adanshi a̱ va̱

o una̱ wa̱ wu wo o'wo akina

waru ama'a o o'wo

ɗanga na akina a̱ tsu kuloto.>>

15 <<Ka̱lyuwa̱i, a̱ɗu u'wa wa Isra'ila,

n ta̱ ta̱wa̱a̱ ɗu na̱ nɗa

ma alanga a yuwan nla̱ngi na̱ ɗu,>>

nɗa mu ufaru na kaɓai asuvu,

ama a na i revei elentsu e le shi,

aza a na i revei ili i na a dansa shi.

Ne ɗa A̱sulazuva a dammai.

16 <<Ujin u le u ta̱ tsa ason a na a̱ ri ukpa̱tu'u,

a̱soja le suru ali o uvon a ɗa.

17 A ta tama itana ya̱ a̱ɗuma̱ a̱ ɗu

ni ilyalya i ɗu,

waru o to kototo muwun

mo olobo ne esheli a̱ ɗu,

o to soɗu geru vi ikyon i ɗu,

reve a tama ataci

na̱ ɗanga vu biri ɗu.

Na̱ matsun me pe'eni ma ɗa o kototo

ilyuci yu ucira i na i zuwayi ucira.>>

18 <<Amma ko a̱tsuma̱ a rana ndolo,

A̱sulazuva a damma ta̱,

mo kototo ɗu suru suru shi.>>

19 <<Waru mantsa ma na ama a yuwain yeci,

<Nye i zuwai A̱sulazuva A̱sula̱ a̱ tsu

a yuwain ili ya nda suru?>

I ta damma le, <Cine i vari numu,

a̱vu i yuwaan musula̱

mo omocin e iɗa i ɗu a̱ga̱nda̱,

ne ɗa yaa yuwaan omocin a̱ga̱nda̱

e iɗa i na ri za ɗu shi.> >>

20 <<Vu damma u'wa wa Yakubu ili ya nda

vu damma yi a̱tsuma̱ a Yahuda, ana,

21 uwwai nda, a̱ɗu olo

na ama o ulambu wu ugbozu,

aza a na a̱ ri ne esu

agba e tse ene shi,

aza a na a̱ ri na atsuvu

agba a tsu uwwa shi.✝

22 Wuntsa yu uwwa wovon u va̱ shi?

Wuntsa vu je'en lipu

a̱ ma̱ka̱ka̱n ma̱ va̱ shi?

A̱mu ɗa n zuwai wuyun

wo o'wo utyo u mala,

utyo u na u ri nu ukosu shi,

Ikeɗu i mini i ta̱ vuta̱la̱,

agba a gura pasai shi,

a̱ ta̱ gugwa̱

agba a gura pasulaniyi shi.

Ne ɗa A̱sulazuva a dammai.

23 Amma ama a nda a̱ ta̱ na

aciyogbamu nu ugbawu wo okolo,

a vadaluwa ta̱ reve e cina na̱ mu.

24 A damma aciyele,

<Lyawa tsu uwwa wovon

wa̱ A̱sulazuva A̱sula̱ a̱ tsu shi,

za na tsu ca mini na̱ lyushi,

mini mo ufaru u lyushi

nu ukosu u lyushi,

za na damma ntsu a lamba ajuma o ugasa

a̱tsuma̱ aa'wan suru shi.

25 Nusu ɗu kakasa ɗu ta̱ ni ili ya nda,

waru iwuya i ɗu i putsa ɗu ta̱

a̱ tsura̱ isa'ani.

26 A̱tsuma̱ ama a̱ va̱

a̱ tsura̱ ta̱ ama a vama,

aza a na a vawusan she damma

aza a na azusu nnunu,

tsa aza a na azusu igolo,

adama e reme ama.

27 Cine aruta a tsu shiwan na̱ nnunu,

'wa le shiwan ta̱ ne epen,

o o'wo ta̱ a̱za̱ o utsuru,

na̱ a̱za̱ o ucira,

28 a yuwan ta̱ mgbain a madala.

Iwuya i le i ri nu utyo shi,

a tsu yuwaan mkpa'an

uge'etosu wa̱ a̱ɓula̱ shi,

waru a̱ tsi isawaan

a̱za̱ o ulambu shi.

29 Wuntsa n ca le a̱tsuma̱lima̱

adama e ili i nda shi?

Ko wuntsaa n tsupaa aciya̱va̱

uba̱ta̱ wu nɗa tsunda shi?

Ne ɗa A̱sulazuva a dammai.

30 << <Ili i wovon ni ili yi idaba

i fara ta̱ e iɗa'a.

31 Ama̱sula̱ a ta yuwusan

adanshi e ikaka ye epen,

nan ganu a ta yuwusan

uge'etosu nu ucira u le,

waru ama a̱ va̱ a ciga ta̱ ne,

agba nye ɗa ya yuwan

nu ukosu u ta̱wa̱?> >>