1 Ele lo a̱vu Shefatiya ulobo wa Mattan na̱ Gedaliya ulobo wa Fashu na̱ Yehukal ulobo wa Shelemiya na̱ Fashu ulobo wa Malkiya, suru nle a uwwa ta̱ adanshi a na Irimiya yuwain elime a ama ana, 2 <<Apa ili i na A̱sulazuva a dammai, za na da̱nuyi a̱tsuma̱ a̱ lyuci nda suru u ta̱ kuwa̱ a̱tsuma̱ o ure u matsun me pe'eni na ambulu na̱ mɓa̱la̱. Amma za na o uta̱i suru u cayi aciya̱yi e ekere a̱ a̱soja a Babila u ta̱ da̱na̱ wuma. Na amayun u ta la'ato wuma wa̱ yi reve u da̱na̱ wuma. 3 Waru nda ili i na A̱sulazuva a dammai, na amayun a ta ca lyuci nda e ekere a̱ a̱soja o mogono ma Babila, za na aa lyuwai nu uvon.>>

4 Reve azagbai'in a damma mogono, <<Wuntsaa ta̱ o una vuma nda'a. Adama a na u kuɗa ta okolo akapi a̱soja a na a buwai a̱tsuma̱ a̱ lyuci'i, oɓolo na akapi okolo a ama, o ure wi ili i na waa dansaa le. Adama a na vuma nda'a u ri a ɗa gbaga lipu va ama nda shi, she a̱tsuma̱lima̱ goon.>> 5 A̱vu mogono Zedekiya damma, <<To, o lo yi gba ekere a̱ ɗu, a̱mu mogono maa gura putsaa ɗu shi.>>

6 Adama o ndolo a̱vu a tara Irimiya a zuwai oko'o a̱tsuma̱ o u'wa wa Malkiya ulobo u mogono, za na ri upasu wu ukowo wa̱ a̱za̱ e ipiri. Reve a̱ cipa̱to Irimiya a̱tsuma̱ oko'o na amunga. Waru oko'o u da̱na̱ pe na̱ mini shi, she yilyo'o goon, a̱vu Irimiya liɓa pe a̱tsuma̱ a̱ yilyo'o'o.

7 Amma a̱vu Ebedimele vuma va Kush zagbain a̱tsuma̱ o u'wa u mogono uwwa ana, a zuwa ta̱ Irimiya a̱tsuma̱ oko'o a na a̱ ri pe na̱ mini shi. A mantsa ma na mogono ma̱ da̱na̱i nden o una̱ntsu u na a̱ tsu ɗe una̱ntsu wa Banyami, 8 a̱vu Ebedimele uta̱ diga a̱tsuma̱ o ukobu u damma yi, 9 <<Wuma wa̱ wu u jima zagbain va̱ mogono, ama a nda a yuwan ta̱ iwuya suru a̱tsuma̱ e ili i na a yuwayin vumava̱sula̱ Irimiya. A vari yi ta̱ a̱tsuma̱ oko'o a na a̱ ri na̱ mini shi, uba̱ta̱ u na wa̱a̱ kuwa̱ na ambulu, adama a na babu akapi opopofu a na a buwai a̱tsuma̱ e iɗa'a.>>

10 A̱vu mogono ma damma Ebedimele vuma va̱ Kush,<<Tara ama mata'atsu diga pa, i ka̱ra̱ yu uta̱a̱ Irimiya diga oko'o'o kafu u kuwa̱.>>

11 Adama o ndolo reve Ebedimele tara ama'a u ka̱ra̱ ne ele a̱ tyo a̱tsuma̱ o u'wa wi izuwa a̱tsuma̱ o ukobu. Reve u pura̱ akuci a amuna na akashi a̱ a̱tugu na amunga a̱vu wu telyuwetyowa̱ Irimiya pe a̱tsuma̱ oko'o'o. 12 A̱vu Ebedimele vuma va Kush damma Irimiya, <<Zuwa akuci amuna'a na akashi a̱tugu'u a yipayan ya̱ wu ukatalu na amunga'a.>> Reve Irimiya yuwan ne. 13 Reve o rono yi agawan na amunga a̱vu o uta̱a̱ yi diga a̱tsuma̱ o oko'o. A̱vu Irimiya da̱nu o ukowo o upasu wa aza a na a yuwusan ipiri.

14 A̱vu mogono Zedekiya da̱shi lyunguwisa̱ a̱ ta̱wa̱ na̱ Irimiya vumava̱sula̱ uba̱ta̱ wa̱ yi o una̱ntsu wa ta'atsu wu u'wa wa̱ A̱sulazuva. Reve mogono ma damma Irimiya, <<N ciga ta̱ me ece wu ili i ro ne'e, agba she vu soko mu ili wan.>>

15 A̱vu Irimiya damma Zedekiya, <<Nna̱ n ca wu usu, voo o una mu shi? Ko na̱ shi n ca wu a̱sa̱la̱ voo o polo mu atsuvu shi!>>

16 Amma a̱vu mogono Zedekiya kucinaa Irimiya usokowu u damma, <<N kucina ta̱ na̱ A̱sulazuva a na a̱ ri wuma, za na zuwai tse e ivuwusan, moo o una wu shi, ko n ca wu e ekere aza a na a zama wuma wa̱ wu shi.>>

17 A̱vu Irimiya damma mogono Zedekiya, <<Apa ili i na A̱sulazuva o oɓolo a̱ a̱soja a zuva a̱ A̱sula̱ a Isra'ila dammai, nna̱ vu ca aciya̱wu e ekere a̱soja o mogono ma Babila, a ta lyawa wu wuma waru a̱ kula̱to lyuci nda shi, a̱vu nu u'wa wa̱ wu i ta̱ da̱na̱ wuma. 18 Amma nna̱ vu ca aciya̱wu e ekere a̱ a̱soja o mogono ma Babila shi, to, a ta ca lyuci nda e ekere e le, waru a̱ ta̱ kula̱to yi na akina, waru a̱vu na aciya̱wu vaa la'a e ekere e le shi.>>

19 A̱vu mogono Zedekiya damma Irimiya, <<N ta uwwusa wovon wa aza a Yahuda na a sumai a cayi aci ye le e ekere a̱ a̱soja a Babila. U ta gura o o'wo a̱soja a Babila a ca mu e ekere aza a Yahuda o ndolo adama a yuwaan mu ulamu.>>

20 A̱vu Irimiya usu u damma, <<A ca wu e ekere e le shi. A̱vu de vu yuwan tsutoni na adanshi a̱ A̱sulazuva a na ma adansa wu. U ta̱ gba yuwaan wu urana, waru vu ta la'a na̱ wuma wa̱ wu.>> 21 <<Amma nna̱ vu 'yuwan a ca aciya̱wu, to, apa ili i na A̱sulazuva o roco numu, 22 a̱ma̱ci a na a lyawai suru a̱tsuma̱ o ukobu u mogono ma̱ Yahuda, a̱ ta̱ o uta̱ ne le adama a ca azagbain o mogono ma Babila, waru a̱ma̱ci'i a ta damma wu,

<<A̱ luluma̱ wu ta̱ reve a lyuwa aci a̱ wu,

ele n'utsa̱ nna vu soɗuwoyi ma̱tsa̱n.

N'utsa̱ ma̱ wu n vari wu ta̱,

mantsa ma na ana a̱ wu

o sovuroi a̱tsuma̱ a̱ yilyo'o.>>

23 <<A̱ ta̱ o uta̱ wa̱a̱ a̱soja a Babila na̱ a̱ma̱ci a̱ wu na̱ muwun ma̱ a̱ wu alanga. Waru a̱vu na aciya̱wu vaa la'a diga e ekere e le shi, amma a ta zuwa mogono ma Babila me reme wu, waru a̱ ta̱ kula̱to lyuci nda na akina.>>

24 A̱vu Zedekiya damma Irimiya,<<She vu lyawa za ro reve na adanshi a nda wan, nna̱ za ro reve gba, a̱vu ɗa va̱ kuwa̱. 25 Nna azagbain a̱ va̱ a uwwa n yuwan ta̱ adanshi na̱ vu, a̱vu a̱ ta̱wa̱ uba̱ta̱ wa̱ wu a̱vu a damma, <Vu damma tsu ili i na vu dammai mogono, oɓolo ni ili i na mogono ma damma nuwu, she vu soko tsu ili i ro wan, na̱ ne ɗa shi tsu to o una wu.> 26 A̱vu vu damma le ana, <M pati ta̱ mogono she u da̱shi lyawa mu n ka̱mba̱ o u'wa wa Jonata adama n kuwa̱ ɗe wan.> >>

27 <<Reve gba azagbain o mogono suru a̱ ka̱ra̱ a̱ tyo ya̱ Irimiya a̱vu ece yi, a̱vu u damma le suru ili i na mogono ma damma niyi u damma. Adama o ndolo a ɗa a̱ da̱shi damma niyi adama shi, adama a na babu za na uwwai n dammulai nna a yuwain na̱ mogono.>>

28 A̱vu Irimiya da̱nu o ukowo wu upasu wa aza a na a yuwusan ipiri, hali acina urana u na a lyuwai Urishelima nu uvon.

Apa cine a lyuwai Urishelima nu uvon,