1 A̱tsuma̱ a'wan o ufaru u tsugono tsa̱ mogono Jehoyakim ulobo wa̱ Josiya va Yahuda,✝ A̱sulazuva a yuwan ta̱ adanshi na̱ a̱mu u damma, 2 apa ili i na A̱sulazuva a dammai, <<Vi isawan o ukowo wu u'wa u va̱, vu yuwan adanshi na a ama a na a̱ ta̱wa̱i diga e ilyuci ya Yahuda suru, ele na a̱ ta̱wa̱i o u'wa wa̱ A̱sulazuva adama a yuwan a̱ga̱nda̱. Vu damma le ili i na n damma nuwu suru, she vu jiba ko idanshi i ta̱ wan. 3 U ta gura o'wo a uwwa, za suru a̱tsuma̱ e le ta gura vadala diga a̱tsuma̱ o ure wi iwuya ya̱ yi. To, nna a yuwan ne, n ta vadala ifoɓi i va̱ n tawa addama a na n foɓoi adama a linga vi iwuya i na a yuwain.>> 4 Vu damma le, <<Apa ili i na A̱sulazuva a dammai, nni i zuwaa mu atsuvu shi, waru i yuwan mmalu a̱tsuma̱ o uritosu u va̱ na n zuwai elime a̱ ɗu shi, 5 nni i zuwaa idanshi yaa agbashi a̱ va̱ ama̱sula̱ atsuvu shi, aza a na n lyunguwa̱ nɗu kuci, ko na wo o'woi yu uwwa shi, 6 to, nni i vadala i yuwaan mu tsutoni shi, n ta̱ ɓoso u'wa u nda, ununa mu ɓosoi uba̱ta̱ wa̱ a̱ga̱nda̱ a̱ Shilo*. A̱vu n ka̱mbuwa̱ ala a̱ lyuci nda wo o'wo ili i na a yuwayin una̱ a̱tsuma̱ a nɗa mu uvaɗi suru.>>✝

7 <<Reve nan ganu na ama̱sula̱ oɓolo na ama suru, a uwwa Irimiya a dansa idanshi i nda o u'wa wa̱ A̱sulazuva.>> 8 A mantsa ma na Irimiya kotoi adansa suru ili i na A̱sulazuva a damma niyi u damma, reve nan ganu na ama̱sula̱ oɓolo na ama suru e reme yi, a damma, <<Ko vu 'yuwan vu ciga vu kuwa̱! 9 Adama nye vu yuwain adanshi e ikaka na ala A̱sulazuva, na vu dammai o to ɓoso u'wa u nda ununa a yuwain na̱ Shilo? Adama nye vu dammai lyuci nda to o'wo okongo, waru za a̱ da̱nu pe shi?>> Reve a ama suru oɓoloto a̱ ka̱nda̱ruwa̱ Irimiya a̱tsuma̱ o u'wa wa̱ A̱sulazuva.

10 A mantsa ma na nan a̱duga̱ri a Yahuda a uwwai a ɗa nda, reve o uta̱ diga o ukobu u mogono a̱ tyo o u'wa wa̱ A̱sulazuva, a̱vu a̱ da̱nu za suru o uba̱ta̱ wu nden ma̱ yi, reve a yuwan iɓolo o Una̱ntsu u Sa'avu wu u'wa wa̱ A̱sulazuva. 11 Ɗaɗa nan ganu'u na ama̱sula̱'a̱ a dammai a̱duga̱ri'i na ama'a suru ana, <<Irimiya, vuma nda ntsaa ta̱ a paɗaa yi ugana wu ukwa̱, adama a na u yuwan ta̱ adanshi e ikaka a aci a̱ lyuci nda, ununa yu uwwai na atsuvu ɗu!>>

12 Reve Irimiya yuwan adanshi na̱ a̱duga̱ri'i na ama'a u damma, <<A̱sulazuva a ɗa a̱ lyungu numu n damma adanshi e ikaka i nda a aci o u'wa u nda na̱ lyuci nda, ununa yu uwwai. 13 Adama o ndolo, she i lapula wuma u ɗu, na̱ linga ɗu, waru i yuwan tsutoni nu uɗyo wa̱ A̱sulazuva A̱sula̱ a̱ ɗu, ɗaɗa A̱sulazuva a vadala ifoɓi ya̱ yi adama a addama a na u dammai a aci a̱ ɗu. 14 Amma a̱mu gba, n ta̱ ekere ɗu, she i yuwaan mu ili i na yenei ulobono nɗu, waru wuntsaa nɗu. 15 Amma i reve, ili i ro yi lo shi nna̱ yu una mu, i ta̱ ronoo aciya̱ɗu okofi a mpasa m babu unusu, oɓolo na̱ lyuci nda na̱ nda̱na̱ta̱ ma̱ yi. Amayun za ta̱ ɗa, A̱sulazuva a ɗa a̱ lyungu numu uba̱ta̱ u ɗu, adama n damma adanshi a nda atsuvu a̱ ɗu.>>

16 Ɗaɗa nan a̱duga̱ri'i na ama'a suru a dammai nan ganu'u na ama̱sula̱'a̱, <<Vuma nda wuntsaa a paɗaa yi ugana wu ukwa̱ shi, adama a na u yuwaan tsu ta̱ adanshi na ala A̱sulazuva a̱ A̱sula̱ a̱ tsu.>> 17 Ɗaɗa ozo o ro a̱tsuma̱ a mbara n lyuci'i a̱ 'yoyin mishin, a yuwaayin oɓolo ama'a adanshi a damma, 18 <<Vumava̱sula̱ Mika diga Moreshete yuwan ta̱ adanshi e ikaka, a mantsa ma na mogono Hezekiya da̱na̱i o tsugono tsa Yahuda.>> Mika yuwaan ta̱ ama suru adanshi u damma,

Apa ili i na A̱sulazuva

oɓolo a̱ a̱soja a zuva dammai,

<<A ta luma Sihiyona

cine a tsu luma uɗuma̱,

Urishelima to o'wo edemu e everi,

aagaɗi a na a suwai

u'wa wa̱ A̱sulazuva zuva va̱ yi

u to o'wo olopu.>>

19 Reve a lyuwa elime na adanshi a damma, <<To, mogono Hezekiya va Yahuda na akapi ama a Yahuda o una ta̱ Mika vumava̱sula̱ ɗa? Ko ke'en! Ashe Hezekiya uwwa wovon wa̱ A̱sulazuva u pati ya̱ A̱sulazuva, u vadala ifoɓi ya̱ yi adama addama a na u foɓoi, na wa̱a̱ ta̱wa̱a̱ aciyele shi? Gogo tsu ta̱ zuzu na tsa̱a̱ ta̱wa̱a̱ aciya̱tsu na̱ a̱ba̱jini addama!>>

20 <<Waru a̱ da̱na̱ ta̱ na̱ vuma ro na yuwain adanshi e ikaka na ala A̱sulazuva. Ala a vuma ndolo ɗa Uriya ulobo wa Shemaya diga Kiriyat Jeyarim. U yuwan ta̱ adanshi e ikaka a aci a̱ lyuci nda ni iɗa i nda ununa Irimiya yuwain. 21 A mantsa ma na mogono Jehoyakim na̱ nan a̱duga̱ri a̱ yi oɓolo na̱ a̱soja a̱ yi suru a uwwai adanshi a vuma ndolo, reve mogono ma zami ure u na wo unai. Amma a mantsa ma na Uriya u uwwai ifoɓi i mogono, a̱vu wu uwwa wovon u suma a̱ tyo Masar adama u la'a. 22 Ɗaɗa mogono Jehoyakim lyunguyi Elinatan ulobo wa Akbo, oɓolo na ama o ro a̱ tyo Masar. 23 Reve e reme Uriya o uta̱ yi e iɗa ya Masar a̱ ta̱wa̱ na̱ yi uba̱ta̱ u mogono Jehoyakim. Reve mogono mo o una yi na̱ matsun me pe'eni, reve a vari a̱ a̱kwa̱kwa̱ a̱ lipu va̱ yi uba̱ta̱ u na a̱ ciɗosu alambi.>>

24 Ana mbara'a n kotoi adanshi'i suru, a̱vu Ahikam ulobo wa Shafa isawaan Irimiya, adama o ndolo a ca yi e ekere a ama adama o unai shi.