1 Apa idanshi ya Irimiya ulobo wa Hilikiya, za ta̱ a̱tsuma̱ a nan ganu ɗe Anatot a̱tsuma̱ e iɗa ya Banyami. 2 Adanshi A̱sulazuva a̱ ta̱wa̱ ta̱ ya̱'a̱ yi, a̱tsuma̱ a aa'wan a kupa na aza a ta'atsu o tsugono tsa̱ Josiya ulobo wa Amon mogono ma Yahuda,✝ 3 hali acina mantsa mo tsugono tsa̱ Jehoyakim ulobo wa̱ Josiya mogono ma Yahuda, acina woto wa tawun wa aa'wan kupa na̱ za ta̱ o tsugono tsa̱ Zedekiya ulobo wa̱ Josiya mogono ma Yahuda, a mantsa ma na a̱ pura̱i ama a̱ Urishelima a̱ tyo tsugbashi.✝

4 Adanshi A̱sulazuva a̱ ta̱wa̱ ta̱ ya̱'a̱ va̱, adansa,

5 <<Babu na a yuwain a̱'ya̱n a na a yuwan a̱a̱tsuma̱ a̱ wu,

n reve wu ta̱,

waru kafu a matsan wu,

n tawa wu ta̱,

n zuwa wu vumava̱sula̱,

e ekere a nɗa.>>

6 Reve n damma, <<Ee, A̱sulazuva Zagbain! N reve ili i na maa damma shi, a̱mu mawun ma ɗa.>>

7 Amma a̱vu A̱sulazuva a damma mu, <<She vu damma, <A̱mu mawun ma ɗa wan.> Na̱ vu 'yuwan vu ciga vu 'ya̱wa̱ uba̱ta̱ wu za na n lyungu nuwu, waru vu damma ili i na n damma nuwu. 8 She vu uwwa wovon ule wan, adama a na n to oɓolo na̱ a̱vu waru n wawa wu,>> ne ɗa A̱sulazuva a dammai.

9 Reve A̱sulazuva a̱ ba̱ruwa̱ ukere wa̱ yi u ju'wa̱n una̱ u va̱, u damma, <<Ka̱lyuwa̱, gogo n zuwa ta̱ adanshi a̱ va̱ o una̱ wa̱ wu. 10 Ka̱lyuwa̱, ana'an nda n ca wu ta̱ ucira, e ekere a nɗa na̱ tsugono, na va̱a̱ mula̱, waru vu kototo, vu varu, a̱vu voo oco, na va suwa waru vu shuwa̱.>>

11 Reve adanshi A̱sulazuva a̱ ta̱wa̱ ya̱'a̱ va̱, adansa, <<Nye ɗa ve enei, Irimiya?>>

Reve n usu, <<Mee ene ta̱ eten o uɗanga u alumon.>>

12 Reve A̱sulazuva a damma mu, <<Vee ene ta̱ ulobonu, adama a na n ta̱ ka̱lyuwusa̱ adama mee ene adanshi a̱ va̱ a shiwan ta̱.>>

13 Reve adanshi a̱ A̱sulazuva a̱ ta̱wisa̱ mu adansa, <<Nye vee enei?>>

Reve n usu, <<Mee ene ta̱ upondo a̱ ma̱puna̱ uza̱nluwu a̱ ka̱lyuwusa̱ ugana.>>

14 Reve A̱sulazuva a damma mu,

<<Diga upasu wu ugana a̱ ta̱ tsun a̱tsuma̱lima̱,

uba̱ta̱ wa aza a na a̱ ri pe nden e iɗa'a!

15 Ka̱lyuwa̱, n ta̱ mpolo n na moo ɓoloto a ama o tsugono

tsu upasu wu ugana suru,

ne ɗa A̱sulazuva a dammai.

Ngono n le n ta̱ ta̱wa̱ a zuwa ootogu o tsugono tse le

o una̱ntsu wa̱ Urishelima,

a̱ ta̱ ta̱wa̱ a̱ ka̱nda̱ruwa̱ kari va̱ yi suru,

a̱ ka̱nda̱ruwa̱ ilyuci ya Yahuda suru.

16 Waru n ta damma uge'etosu u va̱ a aci a ama a̱ va̱,

adama e iwuya i le suru

na a 'yuwan numu,

o ukula̱tosu wa̱ a̱tsuka̱ a̱ ma̱guru a̱ tyo a̱ musula̱ n ro,

na̱ mayan ma̱ a̱ga̱nda̱ e ekere e ili i na ekere e le a yuwain.>>

17 Amma a̱vu, Irimiya vu nla̱ gbakala va̱ wu! Vu 'yon vu damma le suru ili i na n damma nuwu. She vu da'wan adama ele wan, adama she mu da'waton wu a̱ ma̱ka̱ka̱n me le wan. 18 Ana'an nda n ka̱mbuwa̱ wu ta̱ lyuci vu ukari wu ucira, tsa atsura a̱ rumu, nu ukari wu rumushili, adama vi isawan nla̱ngi a aci e iɗa'a suru, na̱ waru u yuwan nla̱ngi na̱ ngono ma Yahuda na̱ azagbain a̱ yi, na̱ nan ganu na ama a̱ yi. 19 A ta yuwan nla̱ngi na̱ a̱vu, amma a lyuwa a aci a̱ wu shi, adama a na n to oɓolo na̱ a̱vu, waru n wawa wu, ne ɗa A̱sulazuva a dammai.