1 Apa ili i na A̱sulazuva a dammai, <<Zuva nda̱na̱ta̱ n tsugono n va̱ n ɗa, uvaɗi waru udasata u va̱ u ɗa. Cu'un vu u'wa u ne u ɗa yaa gura suwaa mu? Te ɗa uba̱ta̱ u wivuwun u va̱ wa̱a̱ da̱na̱? 2 Ili i nda suru ukere u va̱ u ɗa u yuwan nle, ɗaɗa ili i nda suru yo o'woi.>> Ne ɗa A̱sulazuva a dammai. <<Apa vuma na okolo a̱ va̱ a cigai, za na tarai aciya̱yi ili i ro shi na̱ za na tsu la̱pa̱ vadala shi reve u je'en na adanshi a̱ va̱. 3 Za na cayi kucci vu nan suru u ta̱ tsa vuma na unai vuma, za na waru cayi kucci mokyokyon, tsu za na kuɗai yinlu i musa̱n. Za na cayi ishina tsa̱ kucci, tsa vuma na cayi kucci vu mpasa m ma̱gurusumu. Za na cayi kucci vu ucuwusan vi ili i ma̱guru i na a̱ tsu ɗe furenkise, tsa vuma na zuwayi ma̱sula̱ aba'un. Ele nda a ɗangwa ta̱ re le, reve asuvu e le a ciga idaba i le, 4 adama o ndolo n ta ɗangwa oforo o usa̱n adama e le reve n ta̱wa̱a̱ na̱ ili i wovon a aci e le. Adama a na mantsa ma na n ɗeyi, babu vuma na usuyi, ana n yuwain adanshi babu vuma na zuwai atsuvu. Amma reve a yuwan ili i wuya e esu a̱ va̱ reve a ɗangwa ili i na n cigai shi.>> 5 Uwwai adanshi a̱ A̱sulazuva, aza a na e je'eshen a adanshi a̱ yi, <<A̱za̱ a̱ ɗu a na a 'yuwan nɗu reve o lo ɗu adama a ala a̱ va̱ a damma ta̱, <Lyawa A̱sulazuva a̱ tsura̱ tsugbain, adama tse ene ma̱za̱nga̱ ma̱ ɗu.> >> Agba ele ɗa aza a na e ene wono u le. 6 Yu uwwa elemu a̱tsuma̱ a̱ lyuci, yu uwwa elemu diga a̱ A̱a̱'isa̱! Elemu a̱ A̱sulazuva, a tsupusa n'yuwatan ma̱ yi ili na yi ntsaa nle. 7 <<Kafu u uwa mɓa̱la̱ n limatan u matsan ta̱, kafu mɓa̱la̱ n ta̱wa̱ yi u matsan ta̱ ulobo. 8 Zane ɗa uwwai ɗe cu'un vi ili i nda? Zane ɗa e enei ɗe cu'un vi ili i nda? Ko a ta gura matsan iɗa o urana u ta̱? Agba na̱ mɓa̱la̱ n limatan n remeshi Sihiyona, a̱vu u matsashin muwun ma̱ yi. 9 N ta̱ ta̱wa̱a̱ na̱ limatan zuzu a̱vu n zuwa a̱ kuɗa̱ matsan?>> Ne ɗa A̱sulazuva a dammai. A̱mu na n tsu ta̱wa̱a̱ na̱ limatan ma̱a̱ ɓa̱ru umatsutsun shi, ne ɗa A̱sula̱ a̱ ɗu a dammai. 10 <<I yuwan ma̱za̱nga̱ na̱ Urishelima a̱vu i yuwan mere adama a̱ yi, suru nɗu aza a na a ciga niyi. Yuwain ma̱za̱nga̱ na̱ a̱yi na̱ mere, suru aza a na a̱ showen niyi. 11 Adama a na i ta apa reve waru i cuwa̱n na̱ maani ma̱ yi, i to sowo a̱bunda̱ lon na asuvu a̱ ta̱ a̱tsuma̱ a tsugbain tsa̱ a̱bunda̱ tsa̱ yi.>>

12 Adama a na ne ɗa A̱sulazuva a dammai: <<Uwwai nda, n ta zuwa asuvu nden a̱ tyo ya̱'a̱ yi tsu uɗolu, reve utsuru wu nɗa wo o'wo tsu uɗolu u meyene. I ta tsura̱ nden ma asuvu na̱ nden nu uyo'o cine wa̱a̱ ɓa̱na̱sa̱ ɗu, yu uwwa uyo'o cine wee sheɗeshe ɗu e ekere a̱ yi, cine vu revei mereɓu ma tsu uwwa uyo'o a agutsu a mma va̱ yi. 13 Cine mma tsu ɓa̱na̱ mawun ma̱ yi ne ɗa ma̱a̱ ɓa̱na̱ ɗu. I ta̱ tsura̱ ucasu wa adanshi a̱tsuma̱ a̱ Urishelima.>> 14 I te ene, a̱vu okolo a̱ ɗu a̱ za̱nga̱na̱, etele a̱ ɗu o to lobono tsa anlya. Reve waru agbashi a̱ yi e reve nu ukere wa̱ A̱sulazuva, reve u roco upan wa̱ yi e ekere a n'yuwatan ma̱ yi. 15 Uwwai nda, A̱sulazuva a̱ ta̱ ta̱wa̱ na akina, ni ikeke yi ido ya̱ yi tsu lipa̱. A̱vu u roco upan wa̱ yi nu usuɗuwu, na̱ tsuɓari tsa̱ yi ne elentsu a akina. 16 Adama a na na akina oɓolo na̱ matsun me pe'eni ma ɗa A̱sulazuva aa yuwan uge'etosu wa̱ yi a ci a ama suru. Aza a na A̱sulazuva aa paɗa a̱ ta̱ da̱na̱ a̱bunda̱.

17 <<Aza a na a̱ ka̱mba̱toi aciyele na akiza reve waru a̱ ka̱mba̱to aciyele cece adama a uwa a̱ a̱rumbu, o tono za na ri e memere ma aza a na aa tamusa inama yu ngurusumu na̱ a̱ga̱ɗa̱ na akapi e ili yi idaba i na i buwai, a̱ ta̱ kuwa̱ suru nle,>> ne ɗa A̱sulazuva a dammai.

18 <<Adama a na n reve ta̱ linga le oɓolo na̱ majiyan me le, waru mantsa ma̱ to lo a̱ ta̱wa̱ a na moo ɓoloto nɗa suru ne elentsu. A̱ ta̱ ta̱wa̱ reve e ene tsugbain tsa̱ va̱.

19 <<N ta zuwa iroci a̱tsuma̱ e le, reve n lyungu aza a na a la'ai a nɗa, a̱ tyo Tarshishi na aza Libiya na̱ a̱za̱ a̱ Lud, aza a na o ronoi utan, a̱ tyo Tubala na̱ Heleni, a̱ tyo a nɗa m memere ma̱ mini ma alanga, n na koto a uwwai ala a̱ va̱ shi waru koto e enei tsugbain tsa̱ va̱ shi. Reve ele a damma tsugbain tsa̱ va̱ a̱tsuma̱ a nɗa. 20 Reve a̱ ta̱wa̱ na̱ a̱za̱ a̱ ɗu suru, diga a nɗa suru, a̱ tyo a masasan ma akiza ma̱ va̱ a̱tsuma̱ a̱ Urishelima cine vu revei kucci e ekere a̱ A̱sulazuva. A̱ ta̱ ta̱wa̱ zuva vi ido, zuva vi ikeke yi ido ni ikeke yi inan, oɓolo na̱ mololi mo do oɓolo na arakumi,>> ne ɗa A̱sulazuva a dammai. <<A̱ ta̱ ta̱wa̱ ne ele, cine aza a Isra'ila a̱ tsu ta̱wa̱ na̱ kucci vi ishina, a̱ tyo a̱ a̱a̱'isa̱ a̱ A̱sulazuva a ntaɗa n cece. 21 Reve n zagwa ozo o ro e le o o'wo nan ganu oɓolo nan Levi,>> ne ɗa A̱sulazuva a dammai.

22 <<Cine zuva sa'avu nu uvaɗi u sa'avu u na n yuwain aa jima a̱ ma̱ka̱ka̱n ma̱ va̱,>> ne ɗa A̱sulazuva a dammai. <<Ne ɗa umatsun wa̱ wu na ala a̱ wu aa jima. 23 Diga o Woto u Sa'avu a̱ tyo Woto u Sa'avu, waru diga Ashibi a̱ tyo Ashibi, ama suru a̱ ta̱ ta̱wa̱ a yuwan a̱ga̱nda̱ a̱ ma̱ka̱ka̱n ma̱ va̱,>> ne ɗa A̱sulazuva a dammai. 24 <<Reve o uta̱ a alanga a̱vu a̱ ka̱lyuwa̱ a̱kwa̱kwa̱ a ama a na a yuwaan numu aciyogbamu. Adama a na azun a na aa tamasa le a̱a̱ kuwa̱ shi, akina a na a̱a̱ kula̱tosu le a̱a̱ kima̱ shi, o to o'wo ili yi idaba e ekere a vaɗilima̱ suru.>>