1 Uwwai nda, gba, A̱sulazuva a̱ ta̱ lungusa̱ uvaɗi, u ta ka̱mbuwa̱ yi okongo, waru u ta̱ punda̱ra̱ iɗa yu uvaɗi reve u baza aza a na a̱ ri na̱ nden pe. 2 Waru ili i ta̱ i ɗa yaa cina ganu na ama, za vu u'wa na aagbashi, mma va aasula nu usheli wa aasula, za va awina na̱ za va atsulu, za vo okopu na̱ za vu ucasu wo okopu, za vu utan na̱ za na cayi utan. 3 Uvaɗi u to o'wo ofoli waru a̱ ta̱ pura̱ ili suru suru. A̱sulazuva a ɗa a yuwain adanshi a nda. 4 Uvaɗi u te 'yewe nu u kpanli. Waru uvaɗi u ta la̱nga̱ nu u kpanli, ama a gbagbain o uvaɗi a ta maramba. 5 Uvaɗi wo o'wo ta̱ idaba adama a aza a na a̱ ri nden pe, adama a na a̱ kuɗa̱ ta̱ a yuwan tsutoni na̱ wila̱. Reve waru a̱ kuɗa̱ a̱ kuru ili i na n zuwai, a̱vu a kuɗa akucunu a babu ukotu. 6 Adama o ndolo ɗa una̱ waa lyuwusa uvaɗi, waru ama a ta tara ume wu unusu u le. Waru adama o ndolo a ɗa a̱ kula̱toi ama o uvaɗi, waru ama wa'a ɗa a buwai. 7 Masayan ma sa'avu mo ukwan ta̱, waru aataci a ina̱bi kpanla ta̱. Aza a na suru a̱ da̱na̱i a̱ ma̱za̱nga̱ a̱ ka̱mba̱ ta̱ a̱za̱ a̱ a̱tsumola̱ngu a̱ ma̱nga̱. 8 Uyo'o wa aganga u koto ta̱, elemu e mere ma̱ a̱ a̱za̱ a̱ a̱buki mo koto ta̱, ma̱za̱nga̱ ma̱ kumburu ma̱ rungwa̱ ta̱. 9 A̱a̱ da̱shi sowo masayan na a cani ishipa shi. Ma̱ra̱ mo wo'o ta̱ okono e ekere a aza a na oo sowuso yi. 10 Ilyuci i gbagbain yo wo'o ta̱ ofoli no okongo, waru a katsu ta̱ na̱ntsu vu u'wa suru. 11 A̱ da̱na̱ ta̱ o yorori e re adama o ulambu u masayan. Ma̱za̱nga̱ me le suru ma̱ ka̱mba̱ ta̱ irumbu, mere mo koto ta̱ o uvaɗi. 12 A lyawa ta̱ lyuci gbain okongo, waru a ɓuɓatsa na̱ntsu va̱ yi muɓaci muɓaci. 13 A̱yi nda a̱yi ɗa ili i na ya̱a̱ ta̱wa̱ e memere mo uvaɗi na ama, tsa mantsa ma na a tsu za̱ka̱tsa̱ uɗanga u zetun, tso u'yanlu a mantsa ma na o kotoi uta'an u ina̱bi. 14 A̱ 'ya̱sa̱n ta̱ ɗyo le, a yuwan ta̱ yorori i ma̱za̱nga̱, aza a na a̱ ri a̱livu waru o to orowo adama a tsugbain tsa̱ A̱sulazuva. 15 Adama o ndolo aza a na a̱ ri upasu wa asana a ta ca A̱sulazuva tsugbain. Aza a na waru a̱ ri a̱ nge'en m mala, a ta ca ala a̱ A̱sulazuva tsugbain, A̱sula̱ a Isra'ila. 16 Diga o ukosu wu uvaɗi tsu ta uwwusa uɗyo wi ishipa yi ica, ishipa i tsugbain a̱ tyo uba̱ta̱ wu Za va̱ A̱ɓula̱. Amma n damma ta̱, <<N la̱nga̱ ta̱, n la̱nga̱ ta̱! A̱tsuma̱lima̱ a cina mu ta̱! A̱za̱ e ikpa'a e reme ta̱ ulinga wi kpa'a, a̱za̱ e ipkpa'a a lyuwa ta̱ elime na̱ mayan me ikpa'a!>> 17 Ili i wovon na̱ a̱ka̱ri na̱ maza a ta pura ɗu, a̱ɗu ama o uvaɗi. 18 Za na suru sumai adama o uɗyo wi ili i wovon u ta̱ riya̱ a̱ a̱ka̱ri, za na waru uta̱i a̱ka̱ri u ta riya̱ a maza. Adama a na na̱ntsu va zuva ta̱ kpa̱tu'wa̱, waru ikyun yu uvaɗi i ta̱ jinga̱ɗa̱. 19 Uvaɗi u to ɓoso ma̱ɓula̱, u te ne'eshenlei, waru u ta̱ jinga̱ɗa̱ lon. 20 Uvaɗi u ta̱ da̱na̱ o utakalyuwusa tso ososowi, u da̱na̱ a̱ jinga̱ɗa̱sa̱ tso oogodo, ume wu unusu wa̱ yi u ta a aci a̱ yi. U ta riya̱ agba waa gura da̱shi 'yon shi. 21 O urana u ndolo A̱sulazuva a ta ca cira va zuva a̱tsuma̱lima̱ zuva, na̱ ngono mu uvaɗi e iɗa. 22 O to ɓoloto le uba̱ta̱ u ta̱ tsa aza a na a̱ ri o u'wa wa ali a̱tsuma̱ a̱ a̱ka̱ri. A̱ ta̱ ɓa̱ru le o u'wa wa ali, waru na a yuwan rana va̱ a̱bunda̱ a ta ca le a̱tsuma̱lima̱. 23 Woto u ta yuwan irumbu, urana waru u ta uwwa wono, adama a na A̱sulazuva o oɓolo a̱ a̱soja a zuva a ɗa a yuwusan tsugono tsa masasan ma̱ Sihiyona na̱ a̱tsuma̱ a̱ Urishelima. Tsugbain tsa̱ yi waru tsa̱ ta̱ da̱na̱ a̱ ma̱ka̱ka̱n ma azagbain a̱ yi.