1 <<Uwwai nda, u'wa wa Yakubu, a̱ɗu na e ɗesu na ala a Isra'ila a̱ɗu na yu uta̱i o ugundo wa Yahuza. A̱ɗu na i tarai akucunu na ala a̱ A̱sulazuva yee ɗesu A̱sula̱ a Isra'ila, agba a̱tsuma̱ a amayun ko na̱ a̱ɓula̱ shi. 2 A̱ɗu na yee ɗesu aciya̱ɗu ama a̱ lyuci va akiza a̱ɗu na yaa zuwusaa ala a̱ A̱sula̱ a Isra'ila ucira. A̱sulazuva o oɓolo a̱ a̱soja a zuva a ɗa ala a̱ yi. 3 N yuwan ta̱ adanshi e ili i na i ka̱ra̱i ɗe, ɗe nu ujumu. Una̱ u va̱ u ɗa u damma nle reve n revetyo le, reve n yuwushin nle go'o, a̱vu gba a shiwan. 4 Adama a na n reve ta̱ cine i ri na aciyogbamu, yinlu i ɗu tsa aruva a̱ rumu ɗa, icin i ɗu tsa̱ rumushili. 5 A̱yi ɗa i zuwai n damma nuwu ili i nda ɗe nu ujumu. Kafu a fara n damma nɗu ele adama she vu ta̱wa̱ vu damma, <A̱ma̱li a̱ va̱ a ɗa a yuwan nle wan, ushe'en wa akpata a̱ va̱ na̱ ruma na n zuɗa̱i ele ɗa a yuwan nle wan.> 6 Yu uwwa ta̱ ili i nda, ka̱lyuwa̱ nle suru. Ya̱a̱ usu a fara ta̱ shi? Diga gogo a̱ 'ya̱wa̱ n ta damma ɗu ili i sa'avu e ili yu usokowu i na i reve ne ele shi. 7 Gogo ɗa a yuwan nle, ɗe nu ujumu u ɗa shi. Kafu ana'an koto shi yu uwwa aɗa e le shi, adama o ndolo yaa damma, <Amayun n reve ta̱ ne ele shi.> 8 Koto vu uwwa ko vu reve, diga o ufaru atsuvu a̱ wu a̱ shi ukpa̱tu'u ne'en shi. Adama a na n reve ta̱ cine vu ri za vi ikpa'a. A̱ ta̱ ɗesu wu za va aciyogbamu diga o umatsun wa̱ wu. 9 Adama a ala a̱ va̱ n ta̱ rutsusa̱ upan u va̱, adama e ica i va̱ i ɗa m putsa niyi a rawa wu, adama n tawa wu wan. 10 Uwwai nda, n lapula wu ta̱, agba tsa azurufa tsa ɗa shi, n lyungwa̱ wu ta̱ na akina a̱ a̱tsuma̱lima̱. 11 Adama a̱ va̱, adama a̱ va̱, n yuwain ili i nda. Cine maa lyawa tsugbain tsa̱ va̱ vama? Maa ca nanza tsugbain tsa̱ va̱ shi.>>

12 <<Uwwa mu a̱ɗu u'wa wa Yakubu, Isra'ila za na n ɗeyi! A̱mu ɗa a̱yi. A̱mu ɗa za vu ufaru a̱mu ɗa za vu ukosu. 13 Ukere u va̱ u ɗa u varai ikyun yu uvaɗi, ukere u sa'ani u va̱ u ɗa wu ba̱ruwa̱i zuva, a mantsa ma na n ɗe nle suru o tsu ɓoloto ta̱.>> 14 <<Ɓolotoi, suru nɗu, a̱vu yu uwwa. Zane ɗa a̱tsuma̱ a̱ a̱ma̱li dammai ɗe ili i nda? Za na A̱sulazuva a ɗangwai a̱yi ɗa waa yuwan ifoɓi ya̱ yi e ekere a Babila. Ukere wa̱ yi u ta̱ da̱na̱ a̱ nla̱ngi na aza a Kaldiya.* 15 A̱mu, a̱mu na aciya̱va̱ ɗa n yuwain adanshi. A̱vu n ɗe yi a̱vu n ta̱wa̱ na̱ a̱yi, waru u ta lyuwa aci e ili i na u cigai u yuwan.>>

16 Rawai zuzu na̱ a̱mu yu uwwa nda, <<Diga o ufaru koto n yuwan adanshi usokowu shi. Diga a mantsa ma na u farai n ta̱ lo.>> Waru gogo A̱sulazuva Zagbain a̱ lyungu mu ta̱, na̱ Ruhu va̱ yi. 17 Apa nda ili i na A̱sulazuva Za va Atsupu va̱ wu, Za va Akiza a Isra'ila a dammai, <<A̱mu ɗa A̱sulazuva A̱sula̱ a̱ wu, za na oo rocosu wu ili i na i la'aa nuwu ulobonu, za na o rocosu wu ure u na va̱a̱ kuru. 18 Na̱ a̱ shi a damma vu polo ta̱ atsuvu e ili i na n zuwai, asuvu nden ma̱ wu n shi to o'wo tsu uɗolu, a̱ɓula̱ a̱ wu waru tsi ikeɗu i mala. 19 Ugundo wa̱ wu u shi ta̱ a̱ da̱na̱ she damma wuyun, muwun ma̱ wu she damma ma̱bula̱ ma na ma̱ ri n kece shi, ala e le a̱ ri n koɗo shi ko o kototo le e ekere a̱ va̱ shi.>> 20 Uta̱i a̱tsuma̱ a Babila, jika̱i i lyawa Kaldiya! Dammai ili i nda nu uɗyo u ma̱za̱nga̱ lon, i revetyo aɗa a̱ yi. I rawato yi hali ukosu wu uvaɗi. Dammai, <<A̱sulazuva a tsupaa ta̱ aagbashi a̱ yi Yakubu.>> 21 A mantsa ma na u kuruyi ne ele na̱ a̱tsumona a uwwa akuli shi. U zuwa ta̱ mini mo uta̱ a aatali adama e le. U ɓatsa ta̱ aatali a̱vu mini mo uta̱. 22 A̱sulazuva a damma, <<Za vi iwuya a̱a̱ da̱na̱ na asuvu nden shi.>>