1 Nden ma asuvu, i ca ama a̱ va̱ nden ma asuvu, ne ɗa A̱sula̱ a̱ ɗu a dammai. 2 I yuwaan Urishelima adanshi ben, reve i saala yi a na a̱tsuma̱lima̱ a̱ yi o koto ta̱, a na a yuwaan yi ta̱ gafura vu nusu va̱ yi, waru a na u ushi ta̱ oforo e ekere a̱ A̱sulazuva udoɓonuwu adama o unusu wa̱ yi. 3 Uɗyo wu nanza e ɗewu, <<O ogozo i foɓoo A̱sulazuva ure, i yuwan ure u gbain mejege a̱ a̱tsumona adama a̱ A̱sula̱ a̱ tsu. 4 O to shiton uka̱ri suru, waru masasan suru na aagaɗi a ta vala le, a ta lapula a̱ka̱ci e re. O to shiton muka̱ri mu re. 5 Reve o roco tsugbain tsa̱ A̱sulazuva, reve vaɗilima̱ suru ene yi, adama a na una̱ wa̱ A̱sulazuva a ɗa a dammai.>> 6 Uɗyo u damma ta̱, <<Saala!>> Reve n damma, <<Nye i ɗa maa saala? Vuma suru tsa anlya tsa ɗa, waru ulobonu wa̱ yi suru tsa̱ yipa̱lu ya aatsusa i ɗa. 7 Anlya a tsu 'yewe ta̱, reve yipa̱lu i kpanla ana wivuwun wa̱ A̱sulazuva wi ivula̱ niyi. Amayun, ama anlya a ɗa. 8 Anlya a tsu 'yewe ta̱, yipa̱lu i kpanla, amma adanshi a̱ A̱sula̱ a̱ tsu, e te isawan babu ukotu.>> 9 A̱vu na va̱a̱ ta̱wusa̱a̱ na alabari a sa'ani a̱ tyo Sihiyona, gawan zuva masasan. A̱vu Urishelima na va̱a̱ ta̱wusa̱ na alabari a sa'ani, 'ya̱sa̱n uɗyo wa̱ wu na̱ yisaali. 'Ya̱sa̱n yi, she vu uwwa wovon wan, damma ilyuci ya Yahuda, <<Apa A̱sula̱ a̱ wu!>> 10 Uwwai nda, A̱sulazuva A̱sula̱ u ta̱wa̱ ta̱ nu ucira, a̱vu ekere a̱ yi a yuwan tsugbain o una̱ wa̱ yi. Uwwai nda, iliyinkapa ya̱ yi i ta̱ e ekere a̱ yi, atsupa a̱ yi waru a̱ ta̱ e ekere a̱ yi. 11 U to goloɓo oɓolo e ikyon ya̱ yi tsu za va aguɓa. U to ɓoloto mukyokyon ma̱ yi e ekere a̱ yi. U te sheɗe le a̱ mɓa̱nga̱ ma̱ yi. Reve u rono aza a na a̱ ri na̱ muwun ben. 12 Zane ɗa ritoi mini suru a apata e ekere a̱ yi ko u rito washin wa zuva nu ukere wa̱ yi? Zane ɗa guza̱i ma̱buta̱ a aasaka, ko u rito ume wu nsasan wa agaɗi ni ili yu uritosu wu ume? 13 Zane ɗa revei majiyan ma̱ A̱sulazuva, ko zane aa gura ca yi a̱sa̱la̱? 14 Zane ɗa u tsu zami u ca yi a̱sa̱la̱? Waru zane ɗa tsu kamba yi u da̱na̱ nu urevu? Zane ɗa tsu roco yi ure wa amayun, a̱vu u roco yi urevu, nu ure u mereve? 15 Uwwai nda, nɗa'a a̱ ta̱ tsa madaɓi diga a aasa'atsu, waru e te keceshe le tsa̱ a̱buta̱ e ili yu uritosu wu ume. A̱yi ɗa nda, A̱sulazuva a tsu rito ta̱ memere ma̱ mini tsa̱ ma̱buta̱ ma̱ va̱ga̱lya̱. 16 Ɗanga Lebanon suru a rawa na aa zuwa akina adama a masa'a shi, waru inama ya̱ yi i rawa na aa ca kucci vu ukula̱tosu shi. 17 Nɗa suru a̱ ri ili e ekere a̱ yi shi. U tara ili e ekere a̱ yi shi ngashi ili i ɗa shi waru lya̱nga̱. 18 Na̱ zane ɗa yaa kurato A̱sula̱? No oroci e ili i ne i ɗa yaa kurato yi? 19 Ma̱sula̱! Ili i na maruma ma̱ zuɗa̱i, za vu ulinga u zinariya na pupala niyi na̱ zinariya a̱vu u zuɗa̱a̱ yi akani a azurufa. 20 Vuma na ri nu ulambu a̱bunda̱ na waa gura ca kucci ne tsunda shi, u tsu ɗangwa ta̱ ɗanga na vaa shama shi. U tsu zami ta̱ vuma na gurai uruma u shuwa̱a̱ yi ma̱sula̱ ma na ma̱ tsu jinga̱ɗa̱ shi. 21 Koto i reve shi? Koto yu uwwa shi? Koto a damma ɗu diga o ufaru shi? Koto i reve ikyun i na a yuwain uvaɗi shi? 22 A̱yi ɗa za na ri nden zuva ma̱ka̱nda̱ri mo uvaɗi. Ama a̱ yi waru cine vu revei akyun, za na buba̱ruwa̱i zuva cine vu revei umuna. Reve u buba̱ruwa̱ le cine vu revei oogodo a na a̱a̱ da̱nu pe. 23 Za na ka̱mba̱toi ngono ili shi, reve waru u ka̱mba̱to azagbain o uvaɗi ili shi. 24 Ele a̱a̱ cuwa̱n le, ele oo toposhi, kafu a yuwan aralu ugbamu e iɗa, na̱ wi ivula̱ le, a̱vu a kpanla, a̱vu lipa̱ pura̱ le cine vu revei owopo. 25 <<Na̱ zane ɗa yaa kurato mu? Zane ɗa ri una̱ta̱ na̱ a̱mu?>> Ne ɗa Za va Akiza dammai. 26 I 'ya̱sa̱n esu a̱ ɗu zuva a̱vu i ka̱lyuwa̱, Zane ɗa yuwain ili i nda suru? Za na uta̱yi oɓolo e le a̱za̱ a̱ ta̱ ta̱ e ɗesu le na ala e le suru, nu ucira wa̱ yi, adama a na u ta̱ nu ukadu o ucira babu za ta̱ na puwa̱in. 27 Nye i zuwai vu dammai, a̱vu Yakubu, a̱vu vu damma, a̱vu Isra'ila, <<Ure u va̱ u tu usokowu diga a̱ A̱sulazuva'a, waru ili i na i ri za va̱ A̱sula̱ a̱ va̱ a tara yi ili shi>>? 28 Koto vu reve shi? Koto vu uwwa shi? A̱sulazuva a̱yi ɗa A̱sula̱ a babu ukotu, za na yuwain kosu vu uvaɗi. U tsu kuna̱ shi waru u tsu lamba ucira shi, babu waru za na ee reve a̱ru'un o urevu wa̱ yi. 29 U tsu ca ta̱ za na kuna̱i ucira, za na waru ri ucira uka̱la̱mu a̱vu u da̱shi yi ucira. 30 Ko olobo a̱ ta̱ kuna̱ a̱vu waru a lamba ucira, reve a̱ ta̱ɗa̱tsa̱ a̱ riya̱, 31 agba ele aza a na a zuwayi A̱sulazuva ucira u ta ca le ucira u sa'avu, a ta 'yawan tsa̱ a̱kuru. A ta suma agba a̱a̱ kuna̱ shi, a ta wala agba a̱a̱ ta̱ka̱lyuwa̱ shi.