1 Ikaka adama a Masar, uwwai nda, A̱sulazuva a̱ ta̱ ta̱wa̱ a̱tsuma̱ e eleshe e ilaɗi, u ta̱ lo a̱ ta̱wa̱ e iɗa ya Masar. A̱ma̱li a Masar o o'wo ta̱ wuda'un a̱ ma̱ka̱ka̱n ma̱ yi, okolo a aza a Masar waru a̱ ka̱ra̱ ta̱ e jeruwushe. 2 <<N ta sato aza a Masar na aza a Masar, mawun ma̱ a̱na̱wun na̱ mawun ma̱ a̱na̱wu, moron ma̱ nden na̱ moron ma̱ nden, lyuci na̱ lyuci, tsugono na̱ tsugono. 3 Aza a Masar a̱ ta̱ uta̱a̱ okolo, reve n ra̱pula̱ ifoɓi i le. A ta zami ikambi ya̱ a̱ma̱li na̱ ruhu va̱ a̱kwa̱kwa̱ no oboci na aza a na a yuwusan ulinga oɓolo na̱ ruhu va̱ a̱kwa̱kwa̱. 4 N ta ca aza a Masar e ekere a zagbain na ri usuɗuwu, na̱ mogono ma na ma̱ ri ujaaru u yuwan tsugono a aci e le,>> ne ɗa A̱sulazuva o oɓolo a̱ a̱soja a zuva a dammai. 5 Mini ma mala ma̱ Nilu ma̱ te 'yewe, reve uɗolu'u wu ukwan reve e 'yewe. 6 Muɗolu n to uta̱ ushamu, ɗolu waru to koto reve waru o ukwan. Anlya na apumpu a ta kpanla, 7 ma̱vu'un suru ma na ma̱ ri zuzu nu Uɗolu wa̱ Nilu fo, a̱ nge'en mu uɗolu'u. Uɗuma̱ u na a̱ cu'wa̱in suru zuzu nu uɗolu wa̱ Nilu u te 'yewe, a̱ te ivula̱ le reve a̱ puwa̱n. 8 A̱za̱ e mereme ma mugula a ta yuwan a̱tsumola̱ngu a̱vu waru a gaga akatsu, oɓolo na aza a na suru aa varishi igon pe a̱tsuma̱ a̱ Nilu'u, aza a na fo a varishi igolo okolo e le a ta kuɗa. 9 Aza a na a yuwusan ulinga na̱ a̱nka̱ u ta̱ ɓa̱li le, aza a na fo a ɗavusa itana i uri a̱ to uta̱a̱ okolo e le. 10 Aza a na aa ɗavusa amuna e iɗa'a a ta lamba ili i na aa yuwan, aza a zamalinga suru waru a ta yuwan a̱tsumola̱ngu. 11 Azagbain a̱ Zowan olo a ɗa ili i ro i ɗa shi, a̱za̱ a̱ a̱sa̱la̱ a Firi'awuna a tsu ca a̱sa̱la̱ a̱ a̱ɓula̱ shi. Cine tsa ɗa vaa damma Firi'awuna, <<A̱mu mawun ma̱ a̱za̱ o urevu ma ɗa, mawun mo ngono mu ufaru>>? 12 To, Firi'awuna te ɗa a̱za̱ o urevu a̱ wu? Lyawa o roco wu a̱vu a damma wu ili i na A̱sulazuva o oɓolo a̱ a̱soja a zuva o foɓoi a̱ tyo a aci a aza a Masar. 13 Azagbain a̱ Zowan o o'wo ta̱ olo, a̱ luluma̱ ta̱ azagbain a̱ Memfis. Atali a̱ nkyun mu usaa vu gundo va Masar o rono ta̱ Masar o ure u vama. 14 A̱sulazuva a̱ tsuwa̱n le ta̱ na̱ ruhu tsulo, adama o ndolo a̱sa̱la̱ e le suru wo o'wo ta̱ tsulo. A zuwa ta̱ Masar o o'wo o utakalyuwusa cine ososowi a tsu takalyuwusa a̱tsuma̱ a tsushaamu tsa̱ yi. 15 Babu ili i na Masar aa gura yuwan, aaci ko wizan, ashuwashuwa ko apumpu.

16 O urana u ndolo aza a Masar o to o'wo cine vu revei a̱ma̱ci. A̱ ta̱ je'en lipu na̱ wovon za̱la̱ vu ukere u na A̱sulazuva o oɓolo a̱ a̱soja a zuva a cananai nla̱ngi ne ele. 17 Iɗa ya Yahuda i to o'wo ili i wovon e ekere a Masar. Za na e ɗeweyi Yahuda suru ta uwwa wovon, adama e ili i na A̱sulazuva o oɓolo a̱ a̱soja a zuva o foɓoi a aci e le.

18 O urana u ndolo ilyuci i ton ya Masar i ta yuwan elentsu a aza a Ka'ana reve a yuwan akucunu a nzuwulai na ala a̱ A̱sulazuva o oɓolo a̱ a̱soja a zuva. A̱tsuma̱ e le a̱ ta̱ ɗe za ta̱ Lyuci vu Ukototosu.

19 O urana u ndolo a ta yuwaan A̱sulazuva masa'a e memere me iɗa ma Masar, oɓolo na atsura a̱ tyo a̱ A̱sulazuva o utyo wi iɗa'a. 20 U to o'wo iroci oɓolo macuwayin uba̱ta̱ wa̱ A̱sulazuva o oɓolo a̱ a̱soja a zuva e iɗa ya Masar. Na̱ a̱ showen A̱sulazuva adama a aza a na o ɓongishi le, u ta̱ lyunguwa̱ le na̱ za vi iwawi za na ee geshe le, reve u papa le. 21 A̱sulazuva a ta zuwa aza a Masar e reve na̱ a̱yi, a̱vu a̱tsuma̱ o urana u ndolo a̱ ta̱ reve A̱sulazuva. A ta yuwan a̱ga̱nda̱ oɓolo na̱ kucci nu ucasu, a̱vu a taraa A̱sulazuva akucunu a̱vu o shiton le. 22 A̱sulazuva a ta faba Masar, u ta faba le a̱vu u ka̱mba̱to le gbaga. A̱ ta̱ ka̱mba̱ uba̱ta̱ wa̱ A̱sulazuva, a̱vu u zuwaa le atsuvu e ili i na a patishi a̱vu u ka̱mba̱to le gbaga.

23 O urana u ndolo a̱ ta̱ tsura̱ a̱ba̱jini o ure diga Masar a̱ tyo Asiriya. Aza a Asuriya a̱ ta̱ 'ya̱wa̱ uba̱ta̱ wa a za a Masar, a̱vu waru aza a Masar a̱ 'ya̱wa̱ uba̱ta̱ wa aza a Asiriya. Aza a Masar na aza a Asuriya a ta yuwan a̱ga̱nda̱ uba̱ta̱ u ta̱. 24 O urana u ndolo Isra'ila to o'wo za va ta'atsu, oɓolo na̱ Masar na̱ Asiriya, o to o'wo aba'un e memere mo uvaɗi. 25 A̱sulazuva o oɓolo a̱ a̱soja a zuva a ta zuwaa le aba'un, a dansa, <<Aba'un za va Masar ɗa ama a̱ va̱, Asuriya waru ulinga wu ukere u va̱, Isra'ila gba ili ya agadu i va̱.>>