1 A̱tsuma̱lima̱ a ta cina aza a na a̱ cipa̱sa̱ a̱ tyo Masar izami yi ikambi, aza a na aa zuwusaa ido ucira, aza a na a zuwayi oɓolo e ikeke yi do i le ucira adama a na a̱ ri a̱bunda̱ na̱ wa akumbi e ido adama a na a̱ ri nu ucira lon. Agba a̱ bunga̱ Za va Akiza a Isra'ila shi, ko a zami ikambi uba̱ta̱ wa̱ A̱sulazuva shi. 2 Agba suru na̱ ne, A̱sulazuva a̱ ta̱ nu ugbozu, waru u tsu ta̱wa̱a̱ ta̱ na̱ a̱tsuma̱lima̱, u tsu vadala adanshi a̱ yi shi. U ta̱ 'ya̱sa̱n nla̱ngi nu u'wa wu za vi iwuya, na aza a na aa kambusa le. 3 Adama a na aza a Masar ama a ɗa, A̱sula̱ a ɗa shi, ido i le lipu ɗa ruhu ɗa shi. A mantsa ma na A̱sulazuva a̱ ba̱ruwa̱i ukere wa̱ yi, za vi ikambi ta̱ ta̱ɗa̱tsa̱, za na a kambai waru u ta̱ riya̱, suru nle a̱ ta̱ kuwa̱ oɓolo. 4 Apa nda ili i na A̱sulazuva a damma numu, <<Cine kamu ko mawun ma kamu ma̱ tsu gugwa̱ e ekere e ili i na u tsu reme, agba ko na̱ a̱ shi e ɗe oɓolo a aza a aguɓa adama a̱ yi, yorori i le i tsu ca yi wovon shi, ko u dama ne elemu e le shi. Ne ɗa A̱sulazuva o oɓolo a̱ a̱soja a zuva a̱a̱ cipa̱ u yuwan uvon a Masasan ma̱ Sihiyona a aagaɗi a̱ yi. 5 Cine nnunu n tsu piri a tsu'yan, ne ɗa A̱sulazuva o oɓolo a̱ a̱soja a zuva ee geshe Urishelima. U te geshe yi a̱vu u wawa yi, u ta pasa yi a̱vu u papa yi.>>

6 Ka̱mba̱i uba̱ta̱ wu za na i 'yasa̱yin aci, a̱ɗu aza a Isra'ila. 7 Adama a na o urana u ndolo koyan a̱tsuma̱ a̱ ɗu u ta 'yuwan a̱ma̱li a azurufa na̱ zinariya na ekere o unusu a̱ ɗu a yuwaan nɗu.

8 <<Aza a Asuriya a̱ ta̱ riya̱ na̱ matsun me pe'eni ma na za vuma ɗa shi, matsun me pe'eni ma vuma shi, u ta lyuwa le. A ta suma matsun me pe'eni'i, a̱vu gba a zuwa olobo e le ulinga nu ucira. 9 Za vu ucira va̱ yi ta̱ puwa̱n a̱tsuma̱ o wovon, reve nan yali a̱ yi a vari tsugbain a̱tsuma̱ o wovon,>> ne ɗa A̱sulazuva a dammai, za na akina a̱ yi a̱ ri a̱tsuma̱ a̱ Sihiyona, za na akina a̱ ma̱kula̱ a̱ yi a̱ ri a̱tsuma̱ a̱ Urishelima.