1 Apa alavu alavu a na Ishaya ulobo wa Amoz we enei adama a Yahuda na̱ Urishelima a yashi i tsugono tsa Uziya na̱ Jotam na̱ Ahaz na̱ Hezekiya ngono ma Yahuda.

2 Uwwa, a̱vu zuva! Vu polo atsuvu, a̱vu uvaɗi! Adama a na A̱sulazuva a yuwan ta̱ adanshi: <<N kungwato ta̱ muwun a̱vu n 'ya̱sa̱n le, agba reve a̱ 'ya̱sa̱a̱n mu aci. 3 Nan vi iluma reve ta̱ za na ri na̱ a̱yi, mololi waru me reve ta̱ ukungulu wu za na ri na̱ a̱yi, amma Isra'ila reve shi, ama a̱ va̱ a̱ ri nu urevu shi.>> 4 Ayya, iɗa yu unusu! Ama a na a̱ ri utanuwu ni iwuya, muwun ma̱ a̱za̱ e iwuya, muwun n na n la̱nga̱i, aza a na a lyawai A̱sulazuva, aza a na a tarai Za va Akiza a Isra'ila ili i ro shi, a̱vu a vadalaa yi ucina̱. 5 O una̱ wu nyen yoo ronusoo aciya̱ɗu ma̱ga̱la̱? O una̱ wu nyen yaa lyuwa elime na aciyogbamu? Aci a̱ ɗu suru a̱ ta̱ wamatowun, okolo a̱ ɗu suru waru a̱ ta̱ a̱ mɓa̱la̱. 6 Diga a apata a ana a̱ ɗu hali a̱ tyo a aci a̱ ɗu ko uba̱ta̱ u ri gbaga shi, she antsu na̱ wufuru na ajakata, a̱ za̱'wa̱ le shi ko gba a̱ nla̱ le shi ko a̱ tsun le mani'in shi. 7 Iɗa i ɗu yo o'wo ta̱ ofoli, a̱ kula̱to ta̱ ilyuci i gbagbain i ɗu, e esu a̱ ɗu a ɗa omocin aa gasasa a̱ɗuma̱ a̱ ɗu, ofoli e iɗa cine omocin o tsu kototo iɗa. 8 Reve a lyawa Usheli Sihiyona a̱ nde'en tsa̱ ma̱va̱li o uɗuma̱ wa̱ inabi, tso oogodo o uɗuma̱ wo oɗyoryo, tsa̱ lyuci na a̱ ka̱nda̱ruwa̱i nu uvon. 9 Na̱ A̱sulazuva o oɓolo a̱ a̱soja a zuva a̱ shi a lyawaa tsu akapi wuma shi, tsu shi to o'wo tso Sodom na̱ Gomora. 10 Uwwai adanshi a̱ A̱sulazuva, a̱ɗu aza a tsugbain tso Sodom; poloyi uritosu wa̱ A̱sula̱ a̱ tsu atsuvu a̱ɗu ama a̱ Gomora! 11 <<Nye i ɗa a̱bunda̱ e ikucci i ɗu yaa munaa mu?>> Ne ɗa A̱sulazuva a dansa. Kucci vu ukula̱tosu ɗu va̱ a̱giri'i na̱ za mani'in vi inama i na i ri na̱ lipu a rawa mu ta̱. Maa uwwusa majin ma mpasa mo ogono e inan i ɗu ko vi ikyon ko vu mgbele n ɗu shi. 12 A mantsa ma na i ta̱wa̱i a̱ ma̱ka̱ka̱n ma̱ va̱ zane ɗa zuwa nɗu wudasu wu kowo va̱? 13 Lyawai a̱ ta̱wusa̱a̱ mu na̱ kucci ve pere! Ili i ma̱guru i ɗu ili i tsugya tsa ɗa e ekere a̱ va̱. A̱buki o woto sa'avu na Ashibi na̱ wivuwun, maa gura kaɓa asuvu ni iɓolo i la̱nga̱ yi iwuya i ɗu shi. 14 Okolo a̱ va̱ a 'yuwan ta̱ a̱buki o woto sa'avu ɗu oɓolo na̱ a̱buki a na a zuwai. O o'wo mu ta̱ itana, n kuna̱ ta̱ ni itana i le. 15 Nni i 'ya̱sa̱n ekere a̱ ɗu zuva, n to sokoo ɗu urewesu u va̱. Ko ni i yuwan avasa lon, moo polo atsuvu shi, adama a na ekere a̱ ɗu a̱ ta̱ tapu na̱ mpasa. 16 Sa'ai i ka̱mbuwa̱ aciya̱ɗu cece. Tawai linga vi iwuya i ɗu a̱ ma̱ka̱ka̱n ma̱ va̱! Lyawai mayan me iwuya. 17 Ritoi mayan me mejege! Zamiyi amayun i kamba aza a na oo ɓongishi. Piriya̱yi mkpa'an, reve yi isawaan nruna̱. 18 <<Ta̱wa̱i gogo tsu yuwain a̱sa̱la̱,>> ne ɗa A̱sulazuva a dammai. <<Ko na̱ shi unusu u ɗu u ri ushili san, o to o'wo u'uri puwu tsa̱ tsikilu, ko na̱ a̱ shi ushili tsa mpasa, o to o'wo tsa̱ a̱punda̱ a̱ uri. 19 Ni i ri ufoɓu waru i yuwan tsutoni, i ta lyuwa ili i na i la'ai ulobonu yi iɗa'a, 20 agba ni i 'yuwan a̱vu i yuwaan mu aciyogbamu, a ta lyuwa ɗu na̱ matsun me pe'eni.>> Adama a na una̱ wa̱ A̱sulazuva u ɗa u yuwain adanshi. 21 Ka̱lyuwa̱i cine lyuci va̱ a̱ɓula̱ ka̱mba̱i aashakala! U shi ta̱ tapu na amayun waru a̱ɓula̱ a̱ shi ta̱ pe tapu a̱tsuma̱ a̱ yi, agba gogo a̱za̱ a̱ mona a ɗa a̱ ri pe. 22 Azurufa va̱ wu na shi can wo o'wo ta̱ accaka a azurufa, masayan ma na ma la'ai uyo'o ma̱ wu a̱ sula̱ yi ta̱ na̱ mini. 23 Azagbain a̱ wu aza a aciyogbamu a ɗa, n'utsa̱ me evu. Suru nle a ciga ta̱ u'ushishi wu utowusu wu una̱, ne e izami yu uneꞌe u yipalishi. A̱a̱ pirishiya̱ mkpa'an shi, a tsu zuwaa addama a amayun a̱ nruna̱ atsuvu shi. 24 Adama o ndolo Zagbain, A̱sulazuva o oɓolo a̱ a̱soja a zuva, Za vu Ucira va Isra'ila, a damma ta̱, <<Ili i ro yi lo shi, n ta̱ cu'waan n'yuwatan n va̱ upan u va̱ n tsupa e ekere a aza a na a̱ ri a̱ nla̱ngi na̱ a̱mu. 25 N ta vadala ukere u va̱ a̱ nla̱ngi na̱ a̱vu, n ta pisha wu mu uta̱a̱ accaka a̱ wu tsa aringasa a̱vu mu uta̱a̱ idaba ya̱ wu suru. 26 N ta̱ ka̱mbuwa̱ a̱za̱ o uge'etosu wa̱ wu tsa̱ a̱za̱ o ufaru, na̱ a̱za̱ a̱ a̱sa̱la a̱ wu tsa̱ a̱za̱ o ufaru. Na a yuwan ne ɗaɗa ee ɗe wu Lyuci Gbain va̱ A̱ɓula̱, Lyuci Gbain va Amayun.>> 27 A ta tsupaa Sihiyona o ure u mejege, aza a na a vadalai waru na̱ a̱ɓula̱. 28 Agba aza a aciyogbamu na̱ a̱za̱ o unusu a̱ ta̱ rukutsa̱ le oɓolo, aza a na waru a lyawai A̱sulazuva o to koto. 29 <<I ta uwwa wono adama a ɗanga oku na yaa uwwusa uyo'o u vama u le; a ta ca ɗu wono adama a̱ a̱rumbu a na i ɗangwai. 30 Adama a na i to o'wo tso uɗanga u oku u na a̱vu'un a̱ yi a kpanlai, i to o'wo tsa̱ a̱a̱rumbu a na a̱ ri na̱ mini shi. 31 Waru za vu ucira to o'wo tsa̱ a̱'yuwa̱, ulinga wa̱ yi waru tsu ugasu wa akina ele ra a̱ ta̱ kula̱ oɓolo, babu za na a̱a̱ kimusa̱ akina'a.>>