1 A̱sulazuva a̱vu ɗa A̱sula̱ a̱ va̱, n ta ca wu tsugbain, n ta cuwa ala a̱ wu, adama a na vu yuwan ta̱ ili ya asalama, ili i na vu foɓoi ɗe nu ujumu wa̱ a̱ɓula̱ na amayun. 2 Vu ka̱mbuwa̱ ta̱ lyuci gbain edemu, lyuci vu ucira'a wo o'wo ta̱ okongo, a̱a̱ da̱shi ene ukobu u tsugono wo omocin shi, a̱a̱ da̱shi suwisa yi shi. 3 Adama o ndolo ama o ucira a ta ca wu tsugbain, ilyuci yi nɗa ya aza a wuya a ta uwwa wovon wa̱ wu. 4 Adama a na a̱vu ukafata wa̱ a̱za̱ o ulambu u ɗa, ukafata wa aza a na a̱ ri e izami yi ikambishi pe a̱tsuma̱lima̱ e le. Vo o'wo le ta̱ upa'atan e ekere a̱ wunla̱, waru vo o'wo le ta̱ ululu diga o usuɗuwu wu urana. Adama a na wivuwun wa aza a wuya u ta̱ tsu upepu u wunla̱ u na u tsu fabasa uɓaɓu, 5 waru tsu usuɗuwu wa̱ a̱tsumona. Ne ɗa vi isawatoin elemu o omocin cine ululu we eleshe u tsu jiba usuɗuwu wu urana, ne ɗa vi isawatoin ishipa ya aza a wuya. 6 A masasan ma nda A̱sulazuva o oɓolo a̱ a̱soja a zuva o to foɓoo ama suru a̱buki e ilyalya i na i la'ai ulobonu, a̱buki a masayan mo ufaru, e inama i na i la'ai ulobonu na̱ masayan ma na ma la'ai uyo'o. 7 A masasan ma nda ma ɗa woo kototo aapalutsu a na a palai ama suru, nu umuna u na wu palai nɗa suru. 8 A̱sulazuva Zagbain to kototo ukwa̱ suru suru, waru u ta tasa aɓara o urewesu suru, u ta tawa wono wa ama a̱ yi o uvaɗi suru. A̱sulazuva ɗa a dammai. 9 O urana u ndolo a ta damma, <<Amayun a̱yi nda ɗa A̱sula̱ a̱ tsu, tsu ca ta̱ amayun ya̱'a̱ yi, waru u wawa tsu ta̱. A̱yi nda ɗa A̱sulazuva, tsu zuwaa yi ta̱ ucira, lyawa tsu yuwain ma̱za̱nga̱ na̱ mere a̱tsuma̱ e iwawi ya̱ yi.>> 10 Adama a na ukere wa̱ A̱sulazuva u ta̱ cipa̱ zuva masasan ma nda, amma a ta dadasa a̱za̱ a̱ Mowa e iɗa cine a tsu dadasa tsu'iwa̱ a̱tsuma̱ e edemu. 11 A ta canana ekere e le a̱tsuma̱ a̱ yi, cine za vu uda̱su tsu fabi ekere adama o uda̱su. A̱sula̱ a̱ ta̱ ka̱ɗa̱to uvaɗu u le, suru nu ugbozu we ekere e le. 12 U to ɓuɓoso ɓaɓu vu ucira ɗu, u ka̱mba̱to le e iɗa suru suru a̱ tyo a̱ ma̱buta̱.