1 Bel kingyo ta̱, Nebo waru ka̱ɗa̱to ta̱, a̱ma̱li e le a ta tanusu le e iliyamunga ni inan. Ili i na a tanusu nda o o'wo ta̱ itana yu ume e ekere e iliyamunga i na i kuna̱i. 2 A̱ kingyo ta̱ a̱vu a̱ ka̱ɗa̱to suru nle, aa gura tara itana'a shi, waru ele a aciyele a̱ ta̱ 'ya̱wa̱ tsugbashi. 3 <<Uwwa numu, a̱ɗu u'wa wa Yakubu, suru nɗu aza a na a pasai o u'wa wa Isra'ila. A̱mu ɗa ma̱a̱ guzusa̱ ɗu diga a mantsa ma na a yuwain a̱tsuma̱ a̱ ɗu. Waru maa tanusu ɗu diga a mantsa ma limatan ma̱ ɗu. 4 Hali a rawa tsukutsa tsa̱ ɗu, a̱mu ɗa a̱yi'i. Hali mantsa mo yono ma̱ ɗu a̱mu ɗa ma̱a̱ ka̱lyuwa̱ ɗu. A̱mu ɗa n yuwan nɗu waru n ta tanu ɗu, n ta̱ ka̱lyuwa̱ ɗu a̱vu n wawa ɗu.>> 5 <<Na̱ zane ɗa yoo o'woto mu una̱ta̱ na̱ a̱yi ko i kurato mu na̱ a̱yi? Na̱ zane ɗa yoo ɓolo mu za na tsu rotsuloi?>> 6 Ozo o ro a̱ tsu za̱la̱ ta̱ zinariya diga e itsa̱n i le reve a̱ kunzu azurufa e ili yu ukunzusu wu ume. Reve a tsupa maruma ma zinariya u rumaa le ma̱sula̱, a̱vu a̱ ka̱ɗa̱to a yuwaan yi a̱ga̱nda̱. 7 A tsu tanu yi ta̱ a̱ nlyungu n le a̱vu e sheɗe yi, a̱vu a zuwa yi, waru lo ɗa u tsi isawan. U tsu gura sheɓenu uba̱ta̱ shi. Ko na̱ vuma showen yi, u tsu usu shi, waa gura wawa yi a̱tsuma̱ a addama a na u ri shi. 8 <<Cuwain ni ili i nda, i guza̱ yi ugbamu. I zuwa yi o okolo, a̱ɗu a̱za̱ o unusu. 9 Cuwain ni ili yu ufaru ya̱ a̱ca̱pa̱, a̱mu ɗa A̱sula̱ agba za ro lo shi. A̱mu ɗa A̱sula̱, waru za ro lo tsa̱ va̱ shi. 10 N tsu roco ta̱ ukosu wi ili diga o ufaru waru diga a mantsa mo ufaru, n tsu roco ta̱ ili i na koto a yuwain shi. N tsu damma ta̱, <Ifoɓi i va̱ i ta shiwan, waru n ta yuwan ili i na suru n cigai.> 11 N te ɗe asala a na a̱ tsu ka̱ɗa̱ inama diga e iɗa ya alanga, vuma na oo shiton ifoɓi i va̱. A̱mu ɗa n dammai, ne ɗa waru maa zuwa u shiwan. A̱mu ɗa n foɓoi, ne ɗa waru ma yuwan yi. 12 Uwwa numu, a̱ɗu aza a aciyogbamu, a̱ɗu aza a na i ri alanga na̱ a̱ɓula̱. 13 N ta rawatosu a̱ɓula̱ a̱ va̱ zuzu, u ri alanga shi, waru iwawi i va̱ waa tara mantsa shi. N ta zuwa iwawi i va̱ a̱tsuma̱ a̱ Sihiyona, tsugbain tsa̱ va̱ waru a̱tsuma̱ a Isra'ila.