1 Uwwai nda, mogono ma ta yuwan tsugono na̱ a̱ɓula̱, aza a tsugbain waru a ta yuwan tsugbain mejege. 2 Koyan a̱tsuma̱ e le u to o'wo tsu upa'atan wu upepu no oogodo adama a̱ wunla̱, tsu ɗolu mini a̱ a̱tsumona tsu ululu wa aatali a gbain e iɗa yu u'yewu. 3 Reve esu a aza a na ee inda, a̱a̱ ɓa̱ru shi, waru atsuvu a aza a na aa uwwusa o to polo atsuvu. 4 Okolo a za na tsu yuwusan ili iwau u ta̱ da̱na̱ nu urevu, waru eelentsu a za na tsu gura yuwan adanshi mejege shi u ta yuwan adanshi mejege. 5 A̱a̱ da̱shi ɗe ulo vuma va̱ a̱ɓula̱ shi, ko e ɗe za vu ule'e vuma gbain shi. 6 Adama a na ulo u ta yuwan adanshi o tsulo, okolo a̱ yi tapu ni ifoɓi i iwuya. U ta̱ da̱na̱ a yuwusan ili nu ulambu u wovon wa̱ A̱sula̱. A̱vu u baza epen a̱ tyo e ekere a̱ A̱sulazuva, u lyawa aza a ambulu a̱tsuma̱ a ambulu, reve waru u putsa za va akuli ni ili yo oso. 7 Za vu ule'e re va̱ yi iwuya i ɗa. U tsu foɓo ta̱ ifoɓi i wuya adama u kototo za vu ulambu ne epen, ko na̱ shi mesun ma za vu ulambu amayun a ɗa. 8 Amma vuma va̱ a̱ɓula̱ u tsu yuwan ta̱ ifoɓi ya̱ a̱ɓula̱, waru e ifoɓi ya̱ a̱ɓula̱ i ɗa wee isawan.

9 A̱ɗu a̱ma̱ci a na a̱ ri a̱ nden m mawwa mo uyo'o, 'yoyin yu uwwa mu, a̱ɗu esheli a na i ri nden fa̱a̱n poloi atsuvu e ili i na maa damma! 10 Upasu na aa'wan a̱ ta̱ wa'a a̱ɗu na i ri fa̱a̱n i te je'en lipu, adama a na a̱a̱ tsura̱ a ta'an muwun n ina̱bi shi, waru a ta'an muwun mu ɗanga shi. 11 Je'ein lipu a̱ɗu a̱ma̱ci a na i ri a̱ nden m mawwa mo uyo'o, je'ein lipu a̱ɗu esheli a na i ri a̱ nden n fa̱a̱n! Foɗoi itana i ɗu reve yi nla̱ akashamuna a̱ nkyun n ɗu. 12 I lapa nka̱ka̱n n ɗu adama a̱ a̱ɗuma̱ a sa'ani a̱ ɗu na adama a ataci a̱ ina̱bi a̱ ɗu, 13 na adama e iɗa ya ama a̱ va̱, iɗa i na i shiwain na awanda na̱ ma̱lyo, amayun i yuwan a̱tsumola̱ngu adama a 'wa mawwa mo uyo'o na ri a̱tsuma̱ a̱ lyuci na ri tapu na̱ ma̱za̱nga̱. 14 A ta lyawa u'wa u mogono, a ta vari lyuci gbain na ri na̱ a̱bunda̱ a ama babu za, aagaɗi na aburu o to o'wo ofoli suru suru, uba̱ta̱ wu uro u mololi mo una nu uba̱ta̱ wa alyuna e oɓolo e ikyon, 15 hali she na̱ a̱ tsuwa̱a̱n tsu Ruhu diga zuva, a̱vu iɗa yu u'yewu yo o'wo iɗa yu umili, a̱vu iɗa yu umili wo o'wo tsa̱ a̱rumbu. 16 Reve a̱ da̱na̱ a yuwusan mejege a̱tsumona, a̱ɓula̱ waru a̱ da̱na̱ a̱bunda̱ e iɗa yu umili. 17 Ili i na mayan ma̱ a̱ɓula̱ ma̱a̱ ta̱wa̱a̱ a̱yi ɗa nden ma asuvu, ili i na mayan ma̱ a̱ɓula̱ ma̱a̱ ta̱wa̱a̱ a̱yi ɗa nden kuci nu ulambu u makuɗa mo okolo babu utyo. 18 Ama a̱ va̱ a̱ ta̱ da̱nu uba̱ta̱ wu nden ma asuvu nden, uba̱ta̱ wu nden u na u ri na addama shi uba̱ta̱ u mawwa mo uyo'o. 19 Ko na wo o'woi atayan o polo ta̱ ɗanga va̱ a̱a̱rumbu waru lyuci'i u ta̱ rukutsa̱ suru suru, 20 aza a aba'un a ɗa yoo o'wo. I ta̱ cu'wa̱n a̱ nge'en mu ɗolu suru, a̱vu waru i lyawa inan na̱ nloli n ɗu a alyuna fa̱a̱n.