1 A mantsa ma na Ahaz ulobo wa̱ Jotam ulobo wa Uziya u shi mogono ma Yahuda, reve Rezin mogono ma Aram na̱ Peka ulobo wa Remaliya mogono ma Isra'ila a gawan adama a yuwan uvon na̱ Urishelima, agba a gura lyuwa yi shi.

2 Ana a dammai u'wa wa̱ Da̱wuda, <<Aram ɓolo ta̱ aciya̱yi na̱ Ifiramu,>> ɗaɗa okolo a Ahaz na ama a̱ yi e je'ein cine ɗanga va̱ a̱a̱rumbu tsu jinga̱ɗa̱ nu upepu.

3 Reve A̱sulazuva a damma Ishaya, <<Uta̱ vu ga'an na̱ Ahaz, a̱vu nu ulobo wa̱ wu Shiya Jashub, o ukosu wu uyene u Mala mo Gon, o ure a̱ tyo Uba̱ta̱ wa̱ A̱za̱ a̱ Wuza̱'u. 4 Vu damma yi, <Yuwan ugbozu, vu voton ugbozu she vu uwwa wovon wan. She vu kuɗa okolo adama o usuɗuwu wa akina a̱ mugba̱ta̱ n re nda wan, adama a̱ ma̱puna̱ mo upan ma̱ Rezin na̱ Aram na̱ za vu ulobo wa Remaliya wan.> >> 5 Adama a na Aram na̱ Ifiramu nu ulobo wa Remaliya o foɓoo ɗu ta̱ iwuya, a dansa, 6 <<Lyawa tsu ka̱nda̱ruwa̱i Yahuda nu uvon, lyawa tsu lyuwa niyi tsu ne'eshen niyi, a̱vu tsu zuwai ulobo wa Tabeyel wo o'wo mogono ma̱ yi.>> 7 Suru na̱ ne apa nda ili i na A̱sulazuva Zagbain dammai, << <Ili i nda yee isawan shi waru waa yuwan shi, 8 adama a na Dimaska ɗa zagbain va Aram, zagbain va Dimaska waru Rezin ɗa. A̱tsuma̱ a a'wan kupota̱li no ozo o ton a ta kacara Ifiramu hali na a̱a̱ da̱shi buwa iɗa shi. 9 Aci a Ifiramu Samariya ɗa, waru aci a Samariya ulobo wa Remaliya u ɗa. Ni yi isawaton okolo a̱ ɗu shi, yaa gura isawan shi.> >>

10 Reve A̱sulazuva a yuwisan adanshi na̱ Ahaz, 11 <<Ve ece A̱sulazuva A̱sula̱ a̱ wu iroci, ko diga uba̱ta̱ u na u la'ai a̱ru'un ko ɗe zuva na la'ai alanga.>>

12 Amma Ahaz damma ta̱, <<Mee ece shi, waru ma̱a̱ lyungwa̱ A̱sulazuva shi.>>

13 A̱vu Ishaya damma, <<Uwwai u'wa wa̱ Da̱wuda! Ankuri a ama a na ya̱a̱ lyungusa̱ u rawa ne shi? I ciga ta̱ i lyungwa̱ ankuri a̱ A̱sula̱ a̱ va̱ fo? 14 Adama o ndolo Zagbain na aciya̱yi u ta ca ɗu iroci, usheli u na koto u revei vali shi u ta yuwan a̱a̱tsuma̱, a̱vu u matsan ulobo, a̱vu u ca yi aala Imanuwe.* 15 U to sowo maani ma̱ a̱ga̱ɓa̱ ni ishiki, a mantsa ma na wee reve 'yuwan iwuya a̱vu u ɗangwa isa'ani. 16 Agba kafu mantsa ma na ulobo'o wee reve 'yuwan iwuya a̱vu u ɗangwa isa'ani, ngono n re nda n na maa casu wu wovon a̱bunda̱ lo'on nɗa n le n to o'wo ofoli. 17 A̱sulazuva a̱ ta̱ ta̱wa̱a̱ wu na ama a̱ wu nu u'wa wa dada va̱ wu cu'un vu rana na koto a yuwain shi diga a mantsa ma na Ifiramu kakasai na̱ Yahuda, u ta̱ ta̱wa̱a̱ na̱ mogono ma Asiriya!>>

18 O urana u ndolo A̱sulazuva a̱ ula̱a̱ ayun a na a̱ ri o utyo wu ɗolu va Masar ni ishiki yi iɗa ya Asiriya. 19 Reve a̱ ta̱wa̱ suru a̱ va̱la̱ a̱ ka̱ri na̱ pa'atan va atali no ogozo a awanda nu usowoto u mini suru. 20 O urana u ndolo Zagbain o to kopo utanu diga mavada mo Uɗolu'u, Mogono ma Asiriya, u linga na̱ a̱yi u puna aaci a̱ wu ne eleme a ana a̱ wu, a̱vu waru u tawa ntsuka̱ ma̱ wu fo. 21 O urana u ndolo vuma ta zuwa ma̱dindim ma̱ ta̱ ni ikyon i re. 22 Agba adama a maani ma̱ a̱bunda̱ ma na aa casu, u to sowo maani ma̱ a̱ga̱ɓa̱. Na amayun aza a na a pasai pe e iɗa'a suru o to sowo maani ma̱ a̱ga̱ɓa̱ ni ishiki. 23 O urana u ndolo, uba̱ta̱ biti uba̱ta̱ u na u shi na ataci ukpakukupa (1,000), a na a rawai shekel azurufa ukpakukupa (1,000), u to o'wo uba̱ta̱ u ma̱lyo na awanda. 24 Ama a̱ ta̱ 'ya̱wa̱ ɗe na̱ tan na aya adama a na iɗa'a i ta shiwan na̱ ma̱lyo na awanda. 25 Agba agaɗi a na a̱ shi a cimbusa nu ugalatsu, i buwa a̱ 'ya̱wa̱ ɗe shi o wovon u ma̱lyo na awanda, amma o to o'wo uba̱ta̱ u na a lyawai inan ni ikyon waru a̱a̱ da̱na̱ a agara.