1 Rungwa̱i i poloo mu atsuvu, a̱ɗu nɗa m memere ma̱ mini! Lyawa i ka̱mbuwisa̱ ucira u ɗu, lyawa i rawa zuzu i yuwan adanshi, lyawa suru ntsu tsu ga'asain uba̱ta̱ wu uge'etosu. 2 <<Zane ɗa za na 'ya̱sa̱in za diga asana, e ɗesu yi a̱tsuma̱ a̱ a̱ɓula̱ o ulinga wa̱ yi? U ca yi ta̱ ulyuwu wa aci wu nɗa suru, reve wu dasa ngono za̱la̱ va ana va̱ yi. Reve o o'wo tsa̱ ma̱buta̱ na̱ matsun me pe'eni ma̱ yi, utan wa̱ yi u bete'we le ta̱ tso owopo o upepu. 3 U saɓa le ta̱ nu u ka̱ra̱sa̱i gbaga, nu usa̱n a̱civa̱ a̱ yi a̱ ju'wa̱in iɗa. 4 Zane ɗa zuwai ili ya nda yo o'wo ne? Za na yuwain mantsa diga ɗe o ufaru? A̱mu A̱sulazuva ɗa n yuwain. A̱mu ɗa za vu ufaru a̱mu ɗa ukosu, a̱mu ɗaɗa a̱yi.>> 5 Nɗa m memere ma̱ mini me ene ta̱ ili i na n yuwain, reve a uwwa wovon, nɗa mu ukosu wu uvaɗi n je'en ta̱ lipu. Reve a rawa zuzu, a̱ ta̱wa̱ elime. 6 Za suru kamba ta̱ za va̱ yi reve u damma za va̱ yi, <<Vi isawan ugbamu.>> 7 Za vu ushe'en tsu ca ta̱ maruma ma zinariya adanshi. Waru za na tsu gboro na̱ ma̱ka̱ta̱ u tsu ca ta̱ za na tsu ga̱la̱ aci o uruma, a dansa adama o mosono me irumu, <<U lobono ta̱.>> Reve a vara yi ni ikusa adama u jinga̱ɗa wan. 8 <<Amma a̱vu, Isra'ila, aagbashi a̱ va̱, Yakubu, za na n ɗangulai, ugundo wa Ibrahim a̱sha̱wa̱yi a̱ va̱, 9 a̱vu za na n ta̱wa̱i na̱ a̱vu diga o ukosu wu uvaɗi, n ɗe wu ta̱ diga pasu va alanga. Reve n damma, <A̱vu ɗa aagbashi a̱ va̱>, n ɗangula wu ta̱ waru n 'yuwan wu shi. 10 She vu uwwa wovon wan, adama a na n to oɓolo na̱ a̱vu. She vu dama wan, adama a na a̱mu ɗa A̱sula̱ a̱ wu. N ta ca wu ucira waru n kamba wu. N ta ɓana wu nu ukere usa'ani u va̱ za va̱ a̱ɓula̱.>> 11 <<Suru aza a na a yuwusan upan na̱ a̱vu a ta uwwa wono reve o zo'oso le. Aza a na waru aa yuwusan mawasan na̱ a̱vu o to o'wo ili ye pere reve a̱ kuwa̱. 12 Vu ta zami n'yuwatan ma̱ wu, agba va̱a̱ tsura̱ le shi. Aza a na waru aa yuwusan uvon na̱ a̱vu o to o'wo tsi ili ye pere suru suru. 13 Adama a na a̱mu ɗa A̱sulazuva, A̱sula̱ a̱ wu. N tu uɓanu nu ukere usa'ani wa̱ wu, a̱mu ɗa za na damma nuwu, <She vu uwwa wovon wan, n ta kamba wu. 14 She vu uwwa wovon wan, a̱vu Yakubu acilya a babu ucira, a̱ɗu ama a Isra'ila, adama a na a̱mu na aciya̱va̱ n ta kamba ɗu,> >> A̱sulazuva a ɗa a dammai, za na Tsupaa nɗu, Za va Akiza a Isra'ila. 15 Uwwai nda, n ta zuwa ɗu yo o'wo tsa aaɗanga a faba, za sa'avu, za wali, za na ri na anga. I ta faba nsasan i rukutsa̱ le, waru i ta̱ ka̱mba̱to agaɗi o o'wo tso owopo. 16 I ta̱ yeluwe le, reve upepu u pura̱ le a̱ ka̱ra̱, lipa̱ baza le. Amma i ta yuwan ma̱za̱nga̱ uba̱ta̱ wa̱ A̱sulazuva, reve i yuwan uvaɗu e ekere a Za va Akiza a Isra'ila. 17 Mantsa ma na a̱za̱ o ulambu na aza a na a cigai ikambishi a̱ bunga̱i mini reve a lamba, a̱la̱kutsu e le e ɗewe ta̱ adama a akuli a̱ mini. Reve a̱mu A̱sulazuva n usu le, a̱mu A̱sula̱ a Isra'ila maa vari le shi. 18 N ta̱ kpa̱tu'wa̱ ɗolu zuva va agaɗi, waru iɓula i mini i yene e memere mo uka̱ri. N ta̱ ka̱mbuwa̱ a̱tsumona mala ma̱ mini, iɗa yu u'yewu waru yo o'wo iɓula i mini. 19 N ta zuwa ɗanga sida na aza a akashiya na aza a murtil na̱ a̱za̱ a̱ zetun a kungwa a̱ a̱tsumona. Waru n ta zuwa ɗanga sapure na̱ a̱za̱ a̱ fir, nu uɗanga u fini o o'wo a̱a̱rumbu a̱ a̱tsumona. 20 Adama ama ee ene reve waru e reve, adama a yuwan majiyan e reve a na ukere wa̱ A̱sulazuva a ɗa a yuwan ili i nda, Za va Akiza a Isra'ila a ɗa a yuwan niyi. 21 Reve A̱sulazuva a damma, <<Ta̱wa̱yi na adanshi a̱ a̱ma̱li a̱ ɗu.>> Reve mogono ma Yakubu ma damma, <<Lyawa o roco ili i na aa gura yuwan.>> 22 <<Lyawa le a̱ ta̱wa̱ na̱ a̱ma̱li e le, a damma tsu ili i na yaa fara. A damma tsu nye i ɗa ili yu ufaru, nye i ɗa ele, adama tsu petelyuwe le. Ko gba a damma ili i na i ri elime adama tsu reve ili i na yaa fara. 23 Damma ntsu ili i na ya̱a̱ ta̱wa̱ nda elime, tsa̱ra̱ tsu reve a na a̱ɗu ɗa musula̱. I yuwan ili i sa'ani ko yu uwuyanu, tsa̱ra̱ tsu yuwan asalama ko tsu uwwa wovon. 24 Uwwai nda, a̱ɗu waru ili i ro i ɗa shi waru a̱ga̱nda̱ a̱ ɗu ili ye pere i ɗa, waru ili yi idaba i ɗa za na ɗangula ɗu.>> 25 <<N 'ya̱sa̱n ta̱ za ro diga ugana, waru u ta̱ lo a̱ ta̱wa̱ diga asana, waru u ta̱ ɗe ala a̱ va̱. Waru u ta dadasa azagbain tsa̱ ci'in, cine za vu uma'an tsu kukutsa olo'o. 26 Zane ɗa dammai ili i nda i ta fara ɗe nu ufaru, tsa̱ra̱ tsu reve. Diga gogo tsa̱ra̱ tsu damma, <U ta yuwan mejege>? Babu za na dammai ne, babu waru za na cuɗuwai ne, babu waru vuma ro na uwwai adanshi diga uba̱ta̱ u ɗu.>> 27 A̱mu ɗa n fara dammai Sihiyona, <<Uwwai ele ɗa nda!>> N lyunguwa̱ ta̱ Urishelima na̱ malingata ma alabari a sa'ani. 28 Mantsa ma na n ka̱lyuwa̱i a̱tsuma̱ a̱ a̱ma̱li babu za. Me ene waru za a̱tsuma̱ e le na aa ca a̱sa̱la̱ shi, za na na̱ me ece wa̱a̱ usu shi. 29 Uwwai nda, suru nle ili i ɗa shi. Waru ulinga u le pere ɗa, waru she'en le upepu u ɗa goon.