1 Ikaka adama o uka̱ri wa alavu alavu, Nye i ɗa ya̱a̱ ɓa̱la̱ ɗu, hali a na suru nɗu i kumbai zuva vu kwa̱'a̱, 2 lyuci na shiwain na̱ yorori, za na shiwain ne elemu na̱ a̱gidi'ya̱ ne elemu o uvaɗu? Ama a̱ ɗu a̱ kuwa̱ na̱ matsun me pe'eni ko uba̱ta̱ o uvon shi. 3 Suru azagbain a̱ ɗu a suma ta̱ oɓolo, e reme le ta̱ agba o rono utan shi. Aza a na i cinai suru e reme le ta̱, ko na a̱ shi a sumai alanga. 4 Adama o ndolo reve n damma, <<Tawai esu a̱ ɗu ya̱'a̱ va̱, lyawa numu n shon na aɓara a̱ a̱bunda̱. She za ca mu adanshi adama a ama a̱ va̱ a na o unai wan.>> 5 Adama a na urana u ɗa a na Zagbain A̱sulazuva o oɓolo a̱ a̱soja a zuva a ta̱wa̱yi, urana wu u'ya̱susa̱n wu ugbozu na̱ wudasu na̱ tsuda'wun a̱tsuma̱ o uka̱ri wa alavu alavu, urana u wuɓosu wu uɓaɓu ne e showesheyin nsasan. 6 Waru Elam tara ta̱ ujiyin ni ikeke yi ido na akumbi e ido, Kir gba shi u guza̱ ta̱ a̱a̱ra̱ga̱. 7 Ka̱ri va̱ wu na la'ai ulobonu ta̱ tapu ni ikeke yi ido, waru a zuwa ta̱ akumbi e ido a̱ na̱ntsu lyuci'i. 8 A tawa ta̱ ili i na i palai Yahuda. O urana u ndolo i bunga̱ ta̱ itana yu uvon i na a zuwai o U'wa wa̱ A̱a̱rumbu, 9 waru ye ene ta̱ lyuci gbain va̱ Da̱wuda wu ɓatsa ta̱ lon, reve i ɓoloto mini ma Mabata ma̱ Za̱la̱. 10 Reve i kece 'wa na ri Urishelima, a̱vu yi ɓoso 'wa adama i lapula uɓaɓu'u. 11 A̱vu i yuwan aabata e memere ma ɓaɓu re adama o ɓoloto mini ma Akuci a Mabata, amma i pati Za na yuwan niyi shi, ko ye ene Za na yuwan niyi ɗe nu ujumu tsugbain shi. 12 A̱tsuma̱ o urana u ndolo A̱sulazuva Zagbain vo oɓolo a̱ a̱soja a zuva, e ɗe ɗu ta̱ i yuwan mesun na̱ nden ma̱ a̱tsumola̱ngu, i yuwan ogbondo, reve yoo oto akashamuna. 13 Agba a̱yi ɗa nda, she ma̱za̱nga̱ na̱ mere na̱ mapaɗa me inan ni ikyon nu utamu wi inama no oso a masayan. I ta dansa, <<Lyawa tsu lyuwai tsu sowoi, adama a na nfa'an tsu ta gura kuwa̱i!>>

14 A̱sulazuva o oɓolo a̱ a̱soja a zuva o roco ta̱ ili i nda a atsuvu a̱ va̱, <<Amayun aa tawa ɗu ume wu unusu u nda shi hali urana u na ya̱a̱ kuwa̱,>> ne ɗa Zagbain, A̱sulazuva o oɓolo a̱ a̱soja a zuva a dammai.

15 Mpa nda ili i na Zagbain A̱sulazuva o oɓolo a̱ a̱soja a zuva a dammai, ta̱wa̱ vu 'ya̱wa̱ uba̱ta̱ wa Shebena zagbain vu u'wa u mogono, vu damma yi, 16 <<Nye i ɗa vaa yuwusan pa waru zane ɗa ca nuwu ucira u na vee she'een aciya̱wu aason zuva va aatali, a na vo foɓusoo aciya̱wu uba̱ta̱ u wivuwun wu ukosu a aatali? 17 Uwwai nda, A̱sulazuva e te reme wu a̱vu u vari wu nu ucira, a̱vu vuma vu ucira. 18 U ta̱ kutsulu wu reve u vuvu wu tsa̱ kolo e iɗa i na i ri washin. Ɗe ɗa va̱a̱ kuwa̱ waru ɗe ɗa ikeke yi ido yu ucira ya̱ wu ya̱a̱ da̱na̱. A̱vu ili i wono i ɗa o u'wa wu zagbain va̱ wu.>> 19 Waru n to loso wu diga a tsugbain tsa̱ wu, waru n ta tawa wu o ootogu a tsugbain tsa̱ wu.

20 <<A̱tsuma̱ o urana u ndolo n te ɗe aagbashi a̱ va̱ Eliyakim ulobo wa Hilikiya. 21 N to oto yi a̱tugu a gbagbain a̱ wu waru mu nla̱ yi gbakala va̱ wu, waru n ta̱ ka̱mbuwa̱ ucira u tsugbain tsa̱ wu e ekere a̱ yi. U to o'wo dada va aza a na a̱ ri na̱ nden Urishelima nu u'wa wa Yahuda. 22 N ta sa̱ga̱dowa̱ yi kpa̱tu'utsu vu u'wa wa̱ Da̱wuda o uvangaci wa̱ yi. Ili i na u kpa̱tu'wa̱i babu za na a̱a̱ ɓa̱ru yi, waru ili i na u ɓa̱ruyi babu za na a̱ kpa̱tu'wa̱ yi. 23 N ta vara yi tsa̱ rumu ma̱shuwa̱ uba̱ta̱ o ugbamu, waru u ta̱ ta̱wa̱ no ootogu a tsugbain o u'wa wa dada va̱ yi. 24 Waru a̱ ta̱ sa̱ga̱dowa̱ yi tsugbain tsu u'wa wa dada va̱ yi suru nu ugundo wa̱ yi na̱ muwun n tsukaya tsa̱ yi, ntaɗa n kekeꞌen suru, na̱ munda na̱ nden suru.>>

25 <<O urana u ndolo,>> A̱sulazuva o oɓolo a̱ a̱soja a zuva a damma ta̱, <<rumu na a varai uba̱ta̱ o ugbamu, u ta̱ mula̱ u ta kuɗa reve u riya̱. Waru itana i na suru a̱ sa̱ga̱doi ɗe o to kototo le,>> adama a na A̱sulazuva a ɗa a dammai.